Um mánaðarskifti oktober-november vitjar víðagitni kristni vísindamaðurin, fyrilestrarhaldarin og kjakarin, John Lennox, Føroyar, og skráin fyri hesa vitjan er júst almannakunngjørd.
29. okt. setir eftirspurdi professarin kósina móti Føroyum, har hann kemur at halda tríggjar almennar fyrilestrar, sum hava fingið heitini “Er átrúnaður skaðiligur?”, “Er Gud ein villleiðing?” og “Gud í almenna rúminum?” Føroyingar hava ymiskar meiningar um hesar truplu spurningar, og Lennox ynskir fegin at møta teimum, sum hava øðrvísi meiningar enn hann.
Fyrilestrarnir vera hildnir kvøldini 30. okt. – 1. nov. á ávikavist Hotel Føroyum, í Løkshøll og í Betesda, og møguleiki verður fyri tulking til føroyskt. Sunnudagin, 2. nov., fer Lennox av landinum aftur.
Fýra Master-útbúgvingar og tríggjar Phd-útbúgvingar
John Lennox er professari í støddfrøði á universitetinum í Oxford í Onglandi. Hann er ættaður úr Norðurírlandi, men hevur í mong ár búð í Onglandi. Lennox er væl útbúgvin, tí hann hevur ikki minni enn fýra Master-útbúgvingar og tríggjar Phd-útbúgvingar.
Hóast Lennox nærkast teimum 71 árunum, so ferðast hann kortini kring allan heimin fyri at halda fyrilestrar ella luttaka í kjaki. Í summar var hann á ferð í tveir mánaðir, fyrst í Norðuramerika og síðani í Avstralia, har avstralska sjónvarpið tók fleiri av fyrilestrunum upp. Fyrr í september hevur hann verið í Suðurafrika, og nú er hann aftur í Norðuramerika, har hann fríggjadagin skal halda fyrilestur á ongum minni enn Harvard University.
Áhugin fyri Lennox úti í heimi er tískil stórur. Lennox gjørdist kendur fyri at verja klassisku kristnu virðini og trúnna, eftir at hann fyri nøkrum árum síðani byrjaði at kjakast alment við nógvar framstandandi ateistar so sum Richard Dawkins, Christopher Hitchens og Peter Singer.
Men Lennox dugir ikki bara væl at tosa. Fryntligi og skemtingarsami norðurírin hevur eisini skrivað fleiri áhugaverdar bøkur, ið umrøða viðurskiftini millum vísindi, heimspeki og átrúnað. Í bókunum grundgevur Lennox m.a. fyri, at vísindi als ikki hava jarðað Gud, og at nýateistar mangan fara grundleggjandi skeivir, tá teir fordøma átrúnað.
KFS (Kristiligur Felagsskapur fyri Skúlaungdóm og lesandi) skipar fyri hesi forkunnugu vitjan, og atgongumerki til fyrilestrarnar 30. og 31. okt. kunnu nú keypast á www.tilmelding.fo/eventslist. Atgongumerkini kosta 100 kr., men lesandi og næmingar fáa tey fyri hálvan prís. Minnast skal á, at tað er avmarkað pláss. Fyrilesturin í Betesda er ókeypis.
Sí meira kunning á www.facebook.com/LennoxFO
Men Lennox dugir ikki bara væl at tosa. Fryntligi og skemtingarsami norðurírin hevur eisini skrivað fleiri áhugaverdar bøkur, ið umrøða viðurskiftini millum vísindi, heimspeki og átrúnað. Í bókunum grundgevur Lennox m.a. fyri, at vísindi als ikki hava jarðað Gud, og at nýateistar mangan fara grundleggjandi skeivir, tá teir fordøma átrúnað.
KFS (Kristiligur Felagsskapur fyri Skúlaungdóm og lesandi) skipar fyri hesi forkunnugu vitjan, og atgongumerki til fyrilestrarnar 30. og 31. okt. kunnu nú keypast á www.tilmelding.fo/eventslist. Atgongumerkini kosta 100 kr., men lesandi og næmingar fáa tey fyri hálvan prís. Minnast skal á, at tað er avmarkað pláss. Fyrilesturin í Betesda er ókeypis.
Sí meira kunning á www.facebook.com/LennoxFO
RSS Feed
