Undir heitinum “Hvussu trívast ung í Klaksvík” skipaði Klaksvíkar kommuna hóskvøldið tann 24. oktober fyri kunningarfundi í Miðhøllini á Skúlatrøð, har Jógvan Kallsgarð Joensen, cand. soc. krim., legði fram og greinaði nøkur av úrslitunum av ungdóms­gransking, sum kommunan hevur luttikið í síðan 2012.

At evnið er aktuelt og viðkomandi varð staðfest av, at útivið hundrað fólk møttu til kunningarfundin hetta hóskvøldið á Skúlatrøð, og eftir framløguna hjá Jógvani Kallsgarð Joensen nýttu fólk eisini høvið til at seta spurningar og gera viðmerkingar.

Gransking gevur virðismikla vitan
Beinta Klakstein, trivnaðarforkvinna, sum var vertur fyri kunningarfundin, upplýsti, at Klaksvíkar kommuna vil vera við í slíkum viðkomandi granskingarverkætlanum, tí hetta gevur eina virðismikla vitan.

– Henda gransking er við til at lýsa og greina samanhangir og orsøkir til atburð og trivnað hjá ungdóminum og gevur harvið okkum sum kommunu innlit í møgulig fyribyrgjandi innsatsøki, segði forkvinnan.

Kommunan hevur nú luttikið í hesi altjóða ungdómsgranskingini í nøkur ár, og tað letur upp fyri at skráseta gongdina á ymsum økjum og hvussu hetta ávirkar trivnað og atferð.

– Tað er júst hetta, sum endamálið er við greiningararbeiðnum, sum Jógvan Kallsgarð Joensen, cand. soc. krim., hevur gjørt fyri kommununa í summar, og sum hann í hesum døgum leggur fram, bæði alment og fyri trivnaðarnevndini børn og ung og eisini fyri fakfólkum hjá kommununi, upplýsir Beinta Klakstein, forkvinna í trivnaðarnevndini børn og ung.

– At øll viðkomandi fakfólk kunnu hittast til eina slíka framløgu, er sera gott, tí úrslitini verða viðgjørd út frá nógvum ymiskum vinklum, og er tað eisini við til at gera grundarlagið fyri arbeiðinum frammeftir enn sterkari, sigur Beinta Klakstein at enda.

Kelda: klaksvík.fo

SáH

Jenis av Rana, landsstýrismaður í uttanríkismálum, og Jeppe Kofod, uttanríkisráðharri Danmarkar, undirrita í morgin mikudagin 30. oktober saman við ávikavist íslendska uttanríkisráðharranum, Guðlaugur Þór Þórðarson, og Jens Frølich Holte, norskur vara-uttanríkisráðharri, marknasemjur um landgrunnin millum Føroyar, Ísland og Noregi í økinum uttanfyri 200 fjórðinga sjómarkið.

Undirritanin fer fram í Stokkhólmi. Jenis av Rana undirritar vegna Føroyar, og Jeppe Kofod undirritar vegna Kongaríki Danmarkar.

Um avtaluna
Føroyar, Ísland og Noregi hava sett fram krøv um lut av landgrunninum norðanfyri Føroyar. Krøvini hjá teimum trimum londunum umskaraðust á einum øki, ið svarar til 111.500 km2.

Partarnir gjørdu longu í 2006 eina fyribils semju um, hvussu økið við umskarandi krøvunum hjá londunum skuldi býtast. Føroyar fingu tilluta umleið fjórðing av tí samlaða umskaraða økinum. Ísland fekk tillutað áleið eitt sama øki, meðan Noreg fekk tillutað umleið helmingin av økinum, hetta tí Noregi hevur rættindi til landgrunnin bæði frá norska meginlandinum og oynni Jan Mayen. Fyribils avtalan um býtið treytaði tó, at Landgrunnsnevndin hjá Sameindu Tjóðum (ST), ið hevur til uppgávu at vísindaliga eftirkanna krøvini hjá londunum, góðkendi krøvini hjá øllum trimum londunum.

Landgrunnsnevndin hjá ST hevur síðani góðkent krøvini hjá teimum trimum londunum og harvið grundarlagið fyri semjuni frá 2006. Síðani eru millumlanda samráðingar uppafturtiknar. Hesar hava snúð seg um at avtala og útgreina eina løgfrøðiliga skipan, um hvussu farast skal fram, um funnin verða marknaumskarandi ráevnisfund í økinum.

Við hesum marknasemjum við Noreg og Ísland fáa Føroyar tillutað 27.000 km2 av landgrunni.

“Tað er sera gleðiligt, at vit nú aftaná eina áralanga tilgongd kunnu taka seinastu og søguligu fetini við semju í hesum málinum, sum hevði kunnað blivið ein møguligur tvídráttur millum grannatjóðir” sigur Jenis av Rana, landsstýrismaður.
​

Í næstum letur BankNordik nýggja bankadeild upp á Biskupstorginum í Klaksvík.

Nýggja deildin er partur av stóru byggiverkætlanini, ið skal vera við til at menna miðbýin í Klaksvík.

Endamálið við nýggju deildini er at geva bæði starvsfólkum og kundum betri og nútímans karmar.

Almenn móttøka verður 14. november.

Her mynd av deildini hjá BankNordik, hon bleiv tikin tann 03. oktober í ár, tá ið Sjóhitaskipanin bleiv sett ígongd.

Kelda: BankNordik

SáH

Tá sitandi býráð tók við 1 jan 2017 vóru avbjóðingarnar stórar á kommunulæknaøkinum i Havn. Miðlarnir skrivaðu dagliga um trupulleikarnir við ma yvirskriftum sum “ Kommunulæknatrot i Havn” og “ Fleiri túsund vanta kommunulækna i Havn”.

Hósdag 24 oktober var móttøka fyri nýggju snotiligu kommunulæknaviðtalunum i Kirkjustræti i Hoyvík, har 5 kommunulæknar fara at starvast.

I dag hava vit sostatt loyst kommunulæknatrotið og allir havnaborgarar fáa nu fastan læknan.

Fari at ynskju nýggju læknunum blíðan byr.

Annika Olsen, Borgmeistari

SáH

Stórur spenningur er runt allan býin í dag, góðir 22 tímar inntil stóra brakið í Gundadali. News.fo og Norðoya Portalurin vóru runt býin við myndatólinum.

Byrjaði við teimum gomlu á Sambýlinum í Bøgøtu, tey vóru í holt við gera stórar KÍ bannarar og var tað ein sera trúføst KÍ kvinna, sum stóð fyri tí og var tað Stina Jacobsen.

Aftaná fór eg oman til børnini á Bøgøtu 3 og tey vóru eisini spent og so endaði eg við at vitja Betri og tey høvdu ordiliga spíla seg út og bjóðaðu viðskiftafólkinum alt gott.

Her nakrar myndir:

SáH

Mánadagin var almenn móttøka, tá nýggi bygningurin, sum er partur av Fjallafípuni, varð tikin í nýtslu. Børnini, sum høvdu sín fyrsta dag í útibarnagarðinum hendan dagin, vóru øgiliga spent, tá tey hoyrdu, at Bubu eisini kom at vitja.

Nógv var gjørt burturúr, tá 20 nýggj børn fluttu úr Gerðastovu og Barnhúsinum Margit og út í Fjallafípuna. Umframt at klovnurin Bubu kom at vitja, var nógv lekkurt til børnini, røður vórðu hildnar, og Teresa Ziska Dahl sang nakrar sangir.

Í mars mánaði varð grivið út, og sjey mánaðir seinni stendur bygningurin klárur at taka í nýtslu. Pláss verður nú fyri 20 børnum afturat, umframt at ein kjallarahædd er gjørd til goymslurúm o.a. Fjallafípan hevur í hesi tilgongdini lagt stóran dent á, at børnini skulu trívast á nýggja stovninum. Tí hava tey verið og vitjað stovnin fleiri ferðir, umframt at børnini sjálvi hava verið við til at velja nøvnini á stovunum. Valið fall á Bringureyða og Fjallamurruna, sum eisini eru fuglar, ið viðhvørt eru at síggja Úti í Grøv. Hinar stovunar í Fjallafípuni bera frammanundan nøvn á smáfugli, nevnliga Steinstólpan, Mýrisnípan, Reyðstapin og Músabróðir.

Útbyggingin av Fjallafípuni er liður í at víðka útibarnagarðin, soleiðis at øll børn í Klaksvíkar kommunu framyvir fáa møguleikan at ganga eitt ár í útibarnagarði og harvið fáa knýtt sambond við allar javnaldrar í býnum, áðrenn tey fara í 1. flokk.

Til mótøkuna seinnapartin segði borgarstjórin, Jógvan Skorheim, millum annað, at hann er sannførdur um, at hendan umskipan leggur lunnar undir, at øll seks ára gomul í býnum fáa møguleika at knýta vinabond tvørtur um býarmørk.

Beinta Klakstein, forkvinna í trivnaðarnevndini børn & ung, gleðist eisini um, at Fjallafípan nú er liðug útbygd, og at børnini í dag kundu byrja sín gerandisdag í frálíka umhvørvinum Úti í Grøv.

– Eg eri errin av arbeiðinum, sum avgjørt er í tráð við tað, sum kommunan ynskir, at skapa góðar karmar og umstøður fyri okkara børn, og at dagstovnaøkið verður raðfest høgt, sigur Beinta. Hon leggur afturat, at hon ikki er í iva um, at her koma børn og vaksin at trívast.

Nýggi bygningurin gevur Fjallafípuni pláss fyri 82 børnum í aldrinum 5 til 7 ár.

Kelda: klaksvík.fo

SáH

Teir flestu av útróðrarbátunum eru komnar aftur í dag. Norðsøki kom aftur klokkan 11:00 og hevði 6.800 pund á 45 stampum, kl. 11:30 kom Líðhamar aftur og teir høvdu 9.000 pund á 48 stampum. Stakkavík kom klokkan 12.20 og teir høvdu 7.300 pund á 37 stampum.

Allir hava roynt norðan fyri Føroyar og her ímillum oyggjarnar.

Veiðan hjá Líðhamar og Stakkavík bleiv boðin út til Fiskamarknaðin Føroyar og landa bleiv til NFCS.

Beint tá ið Stakkavík kom aftur fór Búgvin avstað og Fiskaklettur kom aftur og sandbáturin Havsand legði at bryggju.

SáH

Ægir sum fór við Atlantic Airways týsdagin á venjingarlegu í Spanien, eru endaði mitt í rokanum í Barcelona, har túsundtals mótmælisfólk eru í gøtunum og mótmælað, at katalanskir politikarar hava fingið langar fongsulrevsingar.

Mótmælisfólk í túsundavís tali eru í gøtunum og mótmæla og støðan er sera hættislig, har løgreglan er farin illa við mótmælisfólkunum og tey hava svara aftur við at seta forðingar upp við stórum ruskkonteynarum og dekkum, so løgreglufólkini ikki sleppa ígjøgnum við teirra bilum og hava tey eisini blaka bensinbombur eftir løgregluni.

Fleiri hundra eru blivin skødd og støðan gerst enn spentari fyri hvønn dag sum gongur og væntandi fara enn fleiri at mótmæla um vikuskiftinum.

Vit hava frætt frá Ægir, at tey eru í norðurendanum av Barcelona og merkja sjálvandi til mótmælini, men har tey eru er friðaligt, men tey ansa væl eftir.

Ferðalagið hjá Ægir kemur heim við Atlantic Airways týsdagin, so vónandi spælir alt væl av.

Her nakrar myndir og filmsklipp, sum June, Trygvi, Birita og Janus hava tikið í gjár. Soleiðis skrivar Elsebeth Vilhelm:

Í morgun međan svimjararnir vandu, fór mótmælisgongan forbí hotelliđ. Mótmælisfólkini eru til gongu til Barcelona, har tey øll møtast í morgin. Her eru nakrar myndir frá June, Trygva, Birita og Janus, sum vóru mitt í rokanum í morgun (tey valdu at verđa eftir í Calella)

SáH

​

DR K vísti eina áhugaverda sending um umvælingina av altartalvuni hjá Christianskirkjuni í gjárskvøldið, her kunnu til síggja sendingina aftur, klikk her, “Det store gæstebud – en usædvanlig restaureringshistorie”
SáH

Tað byrjaði at regna av grind klokkan 10 í morgun og út á dagin bleiv regni bara meira og mera.

Nógvar nýggjar áir hava stungið seg upp runt fjøllini  og summar áir eru blivnar til fossar.

Tað frættist runt býin, at fleiri staðni hava kloakskipaninir ringt við at svølgja øllum regninum í løtuni og onkrastaðni eru stórir hylar á vegnum.

Kommunufólkini eru úti og royna at leiða vatni burtur og tað hevur gingist væl eftir umstøðunum.

Her nakrar myndir frá øllum regninum í dag.

SáH