Umleið kl. 20.00 sunnukvøldið fekk Føroya Politi fráboðan um, at ein kvinna í 20-árunum var álopin, meðan hon gekk túr eftir gøtuni ovarliga við Sandá í Havn.

Gerningsmaðurin leyp á kvinnuna aftanífrá og framdi ógvusligan harðskap móti henni. Kvinnan fekk ymiskar skaðar av álopinum og varð innløgd á Landssjúkrahúsið til kanningar.

Umleið 15 minuttir eftir álopið handtók politiið ein mann í kirkjugarðinum við Velbastaðvegin.

Ákæruvaldið framstillaði mannin í grundlógaravhoyring í gjár kl. 13.00. Maðurin varð varðhaldsfongslaður í fýra vikur. Maðurin, sum er í tríatiárunum og er útlendingur, noktaði seg sekan.

Politiið sóknast eftir vitnum
Stutt áðrenn álopið sá kvinnan ein mann, sum gekk eftir gøtuni frá AB-húsinum á Argjum oman móti Sandá, fyri síðani at snara til høgru eystureftir/omaneftir gøtuni. Hetta var ikki gerningsmaðurin, men hesin maðurin kann hava møtt gerningsmanninum, og politiið vil tí feðin hava samband við hann. Politiið heitir eisini á onnur møgulig vitni um at boða frá á telefon 114.

Politiið ger í løtuni umfatandi kanningar í málinum, eitt nú teknskar kanningar, DNA-kanningar og avhoyringar af fólki, sum kunnu hava hoyrt ella sæð tilburðin.

Føroya Politi

Pallborðsfundir, sofaprát og framløgur, ið snúgva seg um trivnað og menning í Klaksvíkar kommunu, hava seinastu árini verið fastur táttur í Virkið vár/Virkið heyst skránni, og sigast má, at tað hevur eydnast væl at skipa fyri minni og størri fundum, har borgarar, vinna og aðrir áhugapartar hava fingið møguleika at koma til orðanna.

Yvirskriftin hesaferð er “Okkara framtíðar Klaksvík”.

Í stuttari framløgu hava fimm borgarar í aldrinum 17 – 39 ár fingið til uppgávu at lýsa, hvat tað er, sum ger, at tey trívast í Klaksvík, og harumframt at koma við boðum uppá, hvat kann gerast enn betur.

Klaksvíkar býráð samtykti á seinasta býráðsfundi at fara undir arbeiðið at gera eina kommunuætlan, sum m.a. skal tryggja, at skiftandi býráð skipa og leiða kommununa inn í eina framtíð, sum byggir á haldgóðar og burðardyggar loysnir. Og hvat er ikki meira viðkomandi enn júst at geva teimum ungu, sum búleikast í býnum, møguleika at koma við nøkrum boðum uppá framtíðina.

Tiltakið verður í býarsalinum í Varpinum týskvøldið 30. apríl kl. 20.00.

Klaksvíkar Kommuna

Í morgin, týsdagin 30. apríl, tekur Klaksvíkar Sjúkrahús ímóti 3 Tesla Siemens MR-skannaranum.
 
Hetta er ein løta, sum vit øll hava sæð fram til, og hava arbeitt málrættað fram ímóti.

3 Tesla MR-skannarin vigar 7,3 tons, meðan sjálv MR-kabinan vigar 1,5 tons. 3 Tesla MR-skannarin er 2,45 metur breiður, 2,14 metur høgur og 1,72 metur djúpur. 

Skannarin verður avhendaður við Víkavegin týsmorgunin um kl. 8.  Skannarin verður lyftur oman í garðin hjá sjúkrahúsinum. Eftirfylgjandi verður hann rullaður inn í MR-kabinuna. 

Klaksvíkar Sjúkrahús vil senda eina inniliga bøn til bilførarar og onnur ferðandi, um at nýta onnur vegastrekkir í tíðarskeiðnum millum kl. 8-11, so Siemens, saman við fleiri, fær arbeiðsfrið í sambandi við avhendingina. 

Klaksvíkar Sjúkrahús ynskir at takka fyri ta vælvild, ið grannar og onnur hava víst seinastu tíðina, meðan arbeiðið við umbygging hevur staðið á. Somuleiðis takka vit øllum starvsfólkum á Klaksvíkar Sjúkrahúsi fyri tolsemi og fyri at hava rúmað forstýrinum inni í húsinum, í sambandi við umbyggingina.´

Klaksvíkar Sjúkrahús

​Nevndin í Hjartafelagnum varð afturvald á aðalfundinum 24. apríl 2024.
 
Í nevndini eru:
Eyðna Joensen, forkvinna
Amy Ljósheim, næstforkvinna
Jan Rasmussen, nevndarlimur
Ingibjørg Egholm, skrivari
Páll Hammer, nevndarlimur
Tiltakslimir
Sigga Durhuus
Fríðálvur A. Jensen

Hjartafelagið

Tað er staðbundna nevndin fyri Svínoy, saman við Karl Johansen, borgarstjóra, ið bjóðar bygdafólkunum á fund. Fundurin verður í Gamlagarði 3. mai kl. 13.00.

Fyrr um dagin hevur staðbundnanevndin ein regluligan fund. Eftir tann fundin verður høvið hjá svínoyingum at hitta staðbundnu nevndina í Gamlagarði.
​
Á skránni fyri almenna fundin er m.a. kunning um bygdaætlanina, vetrarfriðing av bygdini, asfaltering av kommunalum vegum og annað.

Øll eru hjartaliga vælkomin

Klaksvíkar Kommuna

Aksel. V. Johannesen, løgmaður, ætlar, at tær bøtur, sum verða skrivaðar á yvirtiknum málsøkjum, framyvir skulu fella í landskassan og ikki í ríkiskassan.

Hetta framgongur í svari frá løgmanni í dag uppá §52a fyrispurning frá Jørgeni Niclasen, løgtingsmanni.

“Tá talan er um bøtur á yvirtiknum málsøkjum, eiga hesar sjálvsagt at fella til landskassan. Tí tók eg longu málið upp við danska forsætisráðharran á fundi í Keypmannahavn hin 2. oktober í fjør. Eg kom við eini áheitan um, at samráðingar verða tiknar upp um eitt øðrvísi býti av sektum millum ríkiskassan og landskassan.” sigur Aksel V. Johannesen, løgmaður.

Á fundinum varð avtalað, at Løgmálaráðið og danska Justitsministeriet umrøða hesi viðurskifti nærri. Samráðingar verða væntandi tiknar upp í næstum.

Svarið hjá løgmanni kann lesast her.

Løgmansskrivstovan

Mikumorgunin 03.apríl  er morgunsangur kl. 10:00.

Hanus á Gørðum hevur stutta andakt.

Eftir morgunsangin er kaffi og hugnalig samvera í kirkjukjallaranum.

MORNING SONG WEDNESDAY MORNING 03TH' OF APRIL AT 10 A.M.
On Wednesday 3th'  of April  at 10 am we have morning song.

Hanus á Gørðum will have a short devotion.

After the morning song everyone is welcome for coffee/tea and a pleasant moment in the church basement.

Christianskirkjan