Í morgun var ársins Kærleikskúlan hjá Dugna avdúkað. í ár er tað Astrid Luihn, listakvinna, ið hevur myndprýtt Kærleikskúluna. í sambandi við hátíðarhaldið helt Eyðgunn Samuelsen, landsstýriskvinna røðu, sum kann lesast niðanfyri:
Góðan morgun øll somul,
Fyrst fari eg at takka Dugna fyri, at eg eri boðin við til at siga nøkur orð til hesa hátíðarløtu í Listasavninum, nú Kærleikskúlan 2015 verður avdúkað.
Hetta er sjeynda árið á rað, at Dugna letur úr hondum Kærleikskúluna, og sjeyndu ferð eitt av okkara fremstu listafólkum sniðgevur hesa vøkru glaskúlu. Og sjálvsagt eru vit spent til hesa avdúking og at fáa at vita, hvat listafólk hevur fingið heiðurin at prýða hetta serstaka listaverk, og sleppa at síggja hetta vakra prýði fyri fyrstu ferð.
Kærleikskúlan er ein munnblást glaskúla, og ikki tvær kærleikskúlur eru eins, men hvør kúla er yndislig á sín egna hátt – júst sum eitt hvørt menniskja er ymiskt og serstakt.
Hon er viðbrekin, løtt og serstøk - eitt vakurt prýði og ein vælumtókt gáva, sum gevur góða meingin, tí allur søluágóðin fer til mennandi virksemi hjá Dugna.
Á henda hátt stuðlar Kærleikskúlan undir sjálvt grundáskoðanina hjá Dugna, ið viðurkennir ymiskleika og tekur støði í einstaka menniskjanum.
Dugni vil í sínum arbeiði styrkja um arbeiðsførleikar hjá fólki, sum hava skerdar førleikar og hava havt trupult við at fóta sær á arbeiðsmarknaðinum.
Hjá Dugna fært tú møguleika til at royna tíni arbeiðsevni, og at menna tínar persónligu og fakligu førleikar, soleiðis at til ber hjá tær at taka næsta stigi í mun til útbúgving ella arbeiði.
Dugni er sostatt ein týðandi leikari, ið er við til at gera arbeiðsmarknaðin meira fjøltáttaðan og rúmligan.
Greiða málið hjá Dugna er, at øll hava rætt til at vera virkin, um tað so er í útbúgving ella arbeiði: “tí tú ert nakað – og tú kanst nakað”. Og við at menna persónligar og fakligar førleikar, hjálpir Dugni fólki víðari í lívinum.
Árliga Kærleikskúlan er ein kærkomin áminning um, at tað er í lagi, at vit eru ymisk – vit eru øll serstøk – og at rúm skal vera fyri øllum í okkara samfelagi. Á henda hátt er árliga Kærleikskúlan eisini ein rúmlig ímynd av øllum tí virksemi, sum Dugni stendur fyri og átekur sær.
Samstundis sum ársins Kærleikskúla um eina løtu verður avdúkað, fer Ása Olsen, stýrisforkvinna fyri Dugna, eisini at hava eina aðra avdúking.
Tí Dugni hevur nú í fleiri ár, í sambandi við at Kærleikskúlan verður avdúkað, eisini givið fyrstu Kærleikskúluna til ein persón, ein stovn ella eitt átak, sum Dugni hevur valt sum eina virðilig fyrimynd.
Tað eru nógv, sum í tí stilla gera stóran mun. Hesi eiga at fáa viðurkenning og tøkk fyri at ganga undan. Hesi eru ein fyrimynd, sum vit onnur kunnu læra av. Hesa avdúking gleði eg meg eisini til.
Eg fari at enda at takka Dugna fyri tað arbeiðið, sum stovnurin ger fyri at skapa góðar liviumstøður hjá fólki við skerdum vinnuførleika, og fyri við hesum átaki at varpa ljós á hetta týðandi evni.
Takk fyri!
Eyðgunn Samuelsen
Landsstýriskvinna í almannamálum
RSS Feed
