Baranda úr Tórshavn/klaksvík við Mikkjal Paula Lamhauge og John Erik Frederiksbeg vunnu fiskikappingina, sum Stuðulsfelagið Dragin skipaðið fyri ídag. Nummar tvey gjørdist Neshamar og nummar trý gjørdist Alfa Pilot. Baranda hevði 300 pund uppá mannin, Neshamar hevði 200 pund og Alfa Pilot hevði smá 150 uppá mannin.

Størsta toskin fekk Petur Andreasen, sjá mynd niðanfyri.

Vinnandi báturin fekk handa steyp frá Hans Eli Hansen og eitt ferðasteyp, somuleiðis fingu teir eitt gávubræv uppá 3000,00 kr. frá Effo. Nummar tvey fekk steyp og eitt gávubræv uppá 2000,00 kr. frá Berglon. Nummar trý fingu eisini steyp.

Veðrið var av tí besta og beint sum bátarnir komu at bryggju, kom regni og vindurin, so sigast skal, at teir vóru sera hepnir í ár.

Nakað av fólki var komi saman á bryggjuni og sum siður er, bleiv uppisøla av fiski og hvør posi fór fyri góðar 100,00 kr. og vinningurin av søluni fór óskerdur til felagið.

Stórt tillukku til Mikkjal Paula og John Erik frá okkum á Norðoya Portalinum.

SáH  

Tíðindaskriv:
Umboð fyri seks fakfeløg fara at kjakast um sambandið millum fakfeløg og politikk og um at binda seg til politiskar flokkar. Kjakfundurin verður á Fólkafundinum í Klaksvík næsta vikuskifti.
 
Ber tað til at reka fakfelagsvirksemi uttan at vera politiskur. Ella eru politikkur og fakfeløg tvær síður av somu søk. Hvar ganga mørkini millum fakfelagsvirksemi og partapolitikk. Eru nøkur mørk?

Hetta fara umboð fyri seks fakfeløg at kjakast um í KÍ-høllini leygardagin 21. september á Fólkafundinum.

Politikkur og feløg
Herfyri vóru fleiri fakfeløg við í stórum mótmælistiltaki á Vaglinum í Havn. Tiltakið fekk dygga undirtøku, men samstundis vóru summir limir, sum settu spurnartekn við hvørt tað er rætt av feløgunum at vera við í slíkum tiltøkum, og onkur hevur funnist at feløgunum fyri at reka partapolitiskt virksemi.

Sum framhald av mótmælistiltakinum og fyrilestrum um fólkaræði hevur Starvsmannafelagið nú avgjørt at varpa ljós á spurningin: Fakfeløg og politikkur.

- Sjálvt um tey ikki eru partapolitisk, so eru fakfeløg politisk. Feløgini skulu verja áhugamálini hjá limunum og tí mugu tey sjálvandi hava sína hugsan um týðandi og grundleggjandi samfelagsmál og samfelagsviðurskifti, sum ávirka allar limirnar. Á tann hátt hanga politikkur og fakfelagsvirksemi óloysiliga saman.

- Spurningurin er so hvar mørkini ganga millum fakfelagsvirksemi og partapolitikk. Tað eru tað nógvar ymiskar meiningar um. Hesin spurningur er støðugt aktuellur, og hetta er rætta løtan at seta hann á dagsskránna til kjak.

Kjakið
Fakfelagsformennirnir fara at greiða frá hvussu sambandið er millum politikk og fakfelagsarbeiði í teirra dagliga virksemi í dag.

Haraftruat fara tey at kjakast um hvussu fast sambandið skal vera millum fakfeløg og politiskar flokkar. Taka tey undir við, at feløg binda formlig sambond við flokkar og stuðla teimum í einum valstríði, eins og siðvenja er fyri
í summum av grannalondum okkara?
 
Áhoyrararnir fáa eisini høvi at seta pallborðinum spurningar.

Tveir tímar
Tveir tímar eru settir av til kjakfundin í KÍ-høllini.

Byrjað verður kl. 13, tá Ingolf Olsen, journalistur og fakfelagsmaður hevur stuttan fyrilestur, har hann varpar ljós á sambandið millum politiskar flokkar og fakfeløg í Føroyum og í grannalondunum.

Síðani verður kjakið á skránni.

Tey, sum manna pallborið eru:
 
Georg F. Hansen, formaður í Føroya Arbeiðarafelag

Selma Ellingsgaard, forkvinna í Starvsmannafelagnum

Majbritt Mohr, forkvinna í Heilsurøktarafelagnum
 
Maud W. Hansen, forkvinna í Pedagogfelagnum

Leivur Persson, formaður í Búskapar- og Løgfrøðingafelagnum

Eyðstein Djurhuus, formaður í Skipara- og Navigatørfelagnum

SáH

Nú klokkan 8 byrjaði tann árliga fiskikappingin hjá Draganum, meldast kann til við Dragan, sum liggur niðanfyri Brandstøðina.

Veðrið er hampuligt í løtuni, so her talar alt fyri, at vit fáa eina góða fiskikapping ídag. Tað er Stuðulsfelagið fyri skúlaskipið M/S Dragin, sum skipar fyri kappingini. Besti bátur fær gávukort frá EFFO á 3.000,00 kr. og nummar tvey fær gávukort frá Berglon á 2.000,00 kr.
 
SáH

Aftur í ár bjóðar Klaksvíkar kommuna eina fjølbroytta og spennandi skrá í Kvøldskúlanum. Her eru tilboð fyri børn, vaksin og 60 +. Klikk á link niðanfyri, fyri at síggja skránna:


http://f28af7b29ae78e53404b-4494ca0af42ff50c5b17e1dab99a5aa6.r18.cf3.rackcdn.com/myfiles/1378908787_vetrarskra_kvoldskulin01.pdf