Lusia, sketjur, skótaspøl, sangur, skótaróp var á skránni og so var eitt herðaklapp- Lómurin- kosið. 

Í SNP hava vit úlvaungar, skótar, birkibeinar, rovarar, leiðarar og tey seinni árini hava vit havt “skótaommur”

Skótaommurnar stákast í køkinum, halda húsið reint og ruddiligt, keypa inn, hava skótafundir, hjálpa skótunum at seyma merkir á búnan, práta, fjasa og troysta úlvaungarnar og tá leiðarin er liðugur við skótafundin og hevur endavent øllum húsinum og ætlar sær at rudda, aðrenn hann fer heim, so hava skótaommurnar orna tað av sínum  eintingum. Og 1000 onnur ting. 

Lómurin 2025 varð givin til
skótaommurnar Ásu og Randi fyri eitt megnar skótaarbeiði í SNP. 

Nú er jólaferia og vit byrja skótaarbeiðið aftur í januar. Nýggir limir eru vælkomnir og limagjaldið er einans 200kr fyri skótaárið.

Fleiri myndir, klikk her "Skótalið Nólsoyar Pálls"

Skótalið Nólsoyar Pálls

Í samband við vegarbeiði á Norðoyri vera bilførarar bidnir um at vísa varsemi og at koyra varliga

Borgarar á Norðoyri hava í langa tíð víst á tørvin at fáa betri ferðslutrygd á Norðoyri. Pengar eru nú settir av til at breiðka vegastrekkið á Fornavegi og á Flatnavegi, og er hetta eitt týðandi stig at betra um ferðslutrygdina á Norðoyri.

Tá vegurin verður grivin upp, gevur hetta eisini møguleika fyri at leggja gøtuljóskaðal oman til lendingina, og tí eru nýggj gøtuljós oman til lendingina eisini partur av verkætlanini.

Gongubreyt og onnur ferðslutálmandi átøk eru eisini partur av verkætlanini.

Arbeiðið fer í gongd í morgin, 11. desember 2025. 

Klaksvíkar Kommuna

Í sambandi við byggiarbeiðið norðanfyri sjúkrahúsið, er brekkan stongd bæði fyri bilum og fólki til gongu.

​Tekningin her vísir, hvar inngongdin er, hvar parkerast kann og ikki, og eisini hvussu gangast kann frá Víkavegnum til inngongdina omaneftir

Klaksvíkar Sjúkrahús

KBH Byggivirki er nú farið í gongd við arbeiðið norðanfyri sjúkrahúsið. Har skal tekja gerast, soleiðis at sjúkrabilarnir kunnu standa undir taki.

Vegurin verður partvís grivin av og arbeitt verður beint frammanfyri inngongdina. Tískil ber hvørki til at koyra ella at ganga í brekkuni.

Arbeiðið tekur væntandi uml. 3 mánaðar. 

Í hesum tíðarskeiði verður víst til inngongdina omaneftir.

Klaksvíkar Sjúkrahús

Í gjár 3. desember varð skipað fyri árliga altjóða brekrættindadegnum í Smæruni við spennandi skrá. Eisini Marigt Stórá, landsstýriskvinna í almanna- og heilsumálum var við og setti dagin við røðu, sum til ber at lesa niðanfyri.

Góðu umboð úr MEGD og limafeløgum, fakfólk, myndugleikar, tit sum starvast á økinum, og ikki minst tit, sum hvønn dag liva við breki, á ymiskan hátt, góðu øll,

Hetta er mín fyrsta røða sum landsstýriskvinna í almannamálum.

Tí eri eg serliga fegin um, at hon verður hildin júst henda dag — á Altjóða brekdegnum - sum hvørt ár minnir okkum á ein grundleggjandi boðskap: - At øll menniskju hava somu virði og somu rættindi – og at samfelagið skal rúma øllum.

Elin hevur seinastu knapt 40 árini sett lit á mín gerandisdag, og tí fari eg at byrja við at lesa eina yrking, sum hon hevur skrivað.

Vakrasta stað
Tað er gott at hava eitt lív,
at búgva í Føroyum er ordiliga super,
mann sveimar runt sum ein sápubløðra,
millum djúpar dalar og høg fjøll,
lívið er herligt at liva,
kaga upp í himmalin,
stjørnurnar lýsa so fagurliga,
prýða kvøldarstund!

Eg ynski at øll fólk í Føroyum,
skulu hava tað gott,
ikki fáa sting í hjartað,
vit mugu øll liva lívið,
vit eru ikki í barndømi,
men bara ivingarsom,
”Nå, nú kom tað positiva í hana!”
dukka mín er blá,
teð er so hugnaligt at bukka beinini.

Vakrasta stað í hesi verð
eru hesar átjan oyggjar,
ikki sum í Afrika, har fleiri ikki eiga mat og klæðir
ella sum í Kina, har tey eta við pinnum,
ella sum í Grønlandi, har er kalt og kavi
og Aserbajdsjan er eitt sindur løgið land,
men her er gott at vera,
vit eru føroyingar,
vit eru trúføst.

Føroyar framá,
Merkið reytt, blátt og hvítt,
mín fitti pápi vann á Eysturríki í 1990,
tá hevði eg krabbamein,
vit mugu standa saman,
so verða vit sterk,
okkara besta land!

Føroyar hava tey seinastu árini tikið stór stig frameftir á brekøkinum.

Hugburðurin í samfelagnum er nógv broyttur gjøgnum árini, og vit tosa í dag um møguleikar, inklusjón og rættindi — heldur enn avmarkingar og forðingar.

Hendan hugburðsbroyting er ikki komin av sær sjálvari, men er eitt úrslit av áhaldandi arbeiði frá felagsskapum, einstaklingum og eldsálum – og her hevur MEGD og øll áhugafeløgini á brekøkinum havt ein heilt serligan leiklut.

Tit hava øll árini verið røddin, ið minnir okkum á, at javnrættur og virðing, eiga at vera sjálvt grundarlagið í okkara samfelagi.

Tit hava víst á, at rættindi skulu merkjast í gerandisdegnum – í skúlanum, á arbeiðsmarknaðinum, í heilsuverkinum, í atkomu til mentan og í øllum teimum smáu, men týdningarmiklu støðunum, sum skapa lívsgóðsku.

Og tit hava áhaldandi arbeitt fyri, at Føroyar í verki liva upp til ST-sáttmálan um rættindi hjá fólki, ið bera brek.

Hetta arbeiðið er ikki liðugt, og tað vita vit øll.

Men tað gevur vón, at vit saman hava bygt eina grund, har rættindini hjá fólki við breki ikki bara eru føgur orð á pappírinum, men ein partur av okkara felags virðisgrundarlagi.

Í ár er eisini eitt nýtt stig tikið, tá vit fingu Føroya fyrsta Brekumboð.

Hetta er eitt týðandi stig á leiðini – ein sjálvstøðug og óheft eind, sum skal tryggja, at røddin hjá fólki við breki verður hoyrd, og at rættindi verða vird í verki.

Men Brekumboðið kann ikki standa einsamalt. Tað er avgerandi, at vit framhaldandi byggja upp undir eitt tætt samstarv millum myndugleikar, feløg, stovnar og kommunur – og ikki minst, at vit lurta eftir teimum, sum vita, hvar skógvurin trýstir.

Eg havi stóran virðing fyri øllum tykkum, sum arbeiða á brekøkinum – bæði innan áhugafeløg, kommunur, almannaverk, og onnur tilboð og tænastur. Tit gera ein veruligan mun, tí arbeiðið tykkara tekur støði í menniskjum og teirra lívi. Og tað er júst í gerandisdegnum, at javnrættindi og inklusjón fáa veruligt innihald.

Kæru øll,

Altjóða brekdagurin er ein hátíðardagur, men hann er eisini ein áminning.
Ein áminning um, at felagsskapur og javnrættindi krevja áhaldandi arbeiði.
At hugburður og skipanir áhaldandi skulu endurskoðast, so vit øll kunnu fáa tað atkomu og virðing, sum vit hava rætt til.

Saman skulu vit halda fast í, at Føroyar skulu vera eitt land fyri øll.

Eitt land, har øll hava møguleika at liva, læra og virka – á jøvnum føti.

Takk fyri,
og hjartaliga til lukku við degnum.

Almanna- og heilsumálaráðið

Her ein grein um Klaksvíkar Sjúkrahús á heimasíðuni hjá DSS, Dansk Selskab for ledelse i Sundhedsvæsenet. 

Klaksvíkar Sjúkrahús bleiv fyri 130 árum síðani bygt á umsorgan, ábyrgd og felagsskapi. Leiðslan – Alexandra á Dul, Súsanna Olsen og Tummas í Garði – greiðir her frá, at drívmegin framvegis kennist, tá heilsuverkfólk úr Føroyum og Danmark lyfta í felag, antin tey standa á Rigshospitalinum, Vejle Sjúkrahúsi ella langt norðuri í Klaksvík. klikk link her: "Et lille sygehus med stor betydning"

​SáH

Føroyskir granskarar hava fingið tilsamans 3 mió. kr. í stuðli frá NordForsk til tríggjar ymiskar granskingar- og samstarvsverkætlanir.

Størsta játtanin er til Máltøknidepilin á Fróðskaparsetrinum. Barbara Scalvini og Iben Nyholm Debess, granskarar á Máltøknideplinum fáa umleið 2,2 mió. kr. til eina verkætlan um skynsama nýtslu av vitlíki. Hendan verkætlanin verður stýrd av Keypmannahavnar Universiteti. Les meira um verkætlanina her

Granskarar á tveimum føroyskum granskingarstovnum hava harumframt fingið tilsamans 796.000 kr. til at luttaka í eini verkætlan um norðurlendskt granskingarinfrakervi, sum er stýrd av tveimum universitetum úr Noregi. Jóhannus Kristmundsson, adjunktur á Náttúruvísindadeildini, og Regin Fjallsbak, KT-leiðari, á Fróðskaparsetrinum, hava fingið slakar 500.000 kr. Noomi Gregersen, ph.d., leiðari í Heilsustýrinum, hevur saman við fimm øðrum starvsfólkum fingið umleið 300.000 kr.

Verkætlanin, sum Fróðskaparsetrið er við í, kallast Nordic-Baltic Dataverse Hub.Her eru 17 luttakarar frá 6 stovnum úr 6 londum við.

Verkætlanin, sum Heilsustýrið er við í, kallast The Nordic Biobank Network. Her eru 35 luttakarar frá 13 stovnum úr 6 londum við.

Fleiri umsóknir verða játtaðar
NordForsk, ið er granskingarstovnurin hjá Norðurlendska Ráðharraráðnum, hevur játtað munandi fleiri umsóknir úr Føroyum, eftir at Føroyar gjørdust fullgildur limur í NordForsk fyri skjótt trimum árum síðani.

Arne Flåøyen, stjóri í NordForsk, hevur júst verið á vitjan í Føroyum fyri at kunna um arbeiðið í NordForsk. Hann heldur, at limaskapurin hevur gjørt Føroyar meira sjónligar.

- Tað hevur gjørt stóran mun, at Føroyar nú eru fullgildur limur. Granskarar aðrastaðni síggja Føroyar betur, og føroyingar verða bodnir við í partaløg nógv fyrr í tilgongdini enn áður, sigur hann.

Útboðini hjá NordForsk snúgva seg ofta um evni, sum eru viðkomandi á okkara leiðum, og sum føroyskir granskarar arbeiða við. Seinasta árið hava granskarar á Fróðskaparsetrinum og Havstovuni fingið stórar upphæddir til luttøku í granskingarverkætlanum.

Granskingarráðið

Landsstýriskvinnan í barna- og útbúgvingarmálum loyst úr starvi

Landsstýriskvinnan í barna- og útbúgvingarmálum, Súsanna Bertholdsen, hevur í dag biðið løgmann um at verða loyst úr starvi, sbr. stýrisskipanarlógini § 29, stk. 1.

Løgmaður hevur loyst landsstýriskvinnuna úr starvi.

Løgmaður hevur gjørt av at endurtilnevna Djóna Nolsøe Joensen, tingmann fyri Javnaðarflokkin, sum landsstýrismann í barna- og útbúgvingarmálum.

Løgmansskrivstovan

ALMENT MÓTMÆLI:
Vit í Veiðu- og Skjótifelag Føroya vilja hervið koma við einum álvarsomum mótmæli til framferðarhátti, sum Løgreglan hevur valt í sambandi við málið, ið nú er almannakunngjørt – har ein fyrrverandi sýslumaður og ein grindaformaður eru skuldsettir fyri brot á lógina um djóravælferð.

Málið er bæði týdningarmikið og viðbrekið, og vit vænta av føroysku myndugleikunum, at teir arbeiða á einum virðiligum grundarlagi, serliga í málum, har náttúru-, veiði- og djóraverndarlógir eru í spæl.

Teir upplýsingar, sum nú eru komnir fram, skapa tíverri greiðan iva um, hvørt framferðin hjá Løgregluni hevur verið í samsvari við hesar grundleggjandi meginreglur.

Vit mótmæla hesum, tí:
• Løgreglan eigur altíð at virka við varsemi, javnvág og virðing – ikki við óneyðugum ágangi ella ógreiðum mannagongdum.
• Mál, ið snúgva seg um grind, veiði og djóravælferð, krevja serligt gjøgnumskygni í hesum føri hevur løgreglan skúgva grindalógina fullkomiliga til viks.
• Framferð, sum kann tykjast skeiv ella ósaklig, undirger álitið á myndugleikar og setir rættartrygdina hjá borgarum í vanda.
• Hetta mál rakar ikki bara einstaklingar – tað rakar fjølbroyttu veiðimentanina og samfelagsliga álitið á, at lógin verður hildin eins av øllum.
Vit krevja tí:
• at framtíðar mál innan grind, veiði og djóravælferð verða viðgjørd á ein hátt, ið styrkir, heldur enn brýtur niður, álitið millum feløg, borgarar og myndugleikar

Vit vilja samstundis staðfesta, at at hetta skriv er prinsipielt og felagsslig:

Henda støða snýr seg ikki um at taka partí við einstaklingum, men um at verja tær meginreglur, sum alt tað føroyska samfelagið eigur at byggja á nevnliga

Virðing, rættvísi, javnrættindi, gjøgnumskygni og lógfest rættindi.

Vit halda áfram at virka fyri eini veiði- og skjótimentan, ið er ábyrgdarfull, virðilig og fakliga væl skipað – og sum byggir á, at myndugleikar og borgarar hava innanhýsis álit.

Vit heita á tykkum øll um at deila hetta uppslagið og standa saman um kravið um rættvísi og greiðar og lógarfestrar mannagongdir.

Vinarliga

Nevndin
Veiðu- og Skjótifelag Føroya

Í dag, 1. desember 2025, kemur nýggi landsstýrisbygnaðurin í gildi.

Dagføringar á heimasíðunum so sum starvsfólkayvirlit, arbeiðsøki og annað verða gjørdar í løtuni. Tí kann væntast, at upplýsingarnar á heimasíðunum eru ófullfíggjaðar í eina tíð.

Vinaliga set teg í samband við avvarðandi aðalráð, um tørvur er á upplýsingum.

Niðanfyri sært tú eitt yvirlit yvir broytingarnar:

Seks aðalráð
Aðalráðini eru nú hesi:
·       Løgmansskrivstovan, www.lms.fo      
·       Fíggjarmálaráðið, www.fmr.fo
·       Tilfeingis- og vinnumálaráðið, www.tvmr.fo
·       Barna- og útbúgvingarmálaráðið, www.bumr.fo
·       Almanna- og heilsumálaráðið, www.ahr.fo
·       Uttanríkis- og mentamálaráðið, www.ummr.fo

Løgmaður og landsstýrisfólk
·       Aksel V. Johannesen, løgmaður

·       Ruth Vang, landsstýriskvinna í fíggjarmálum

·       Eirikur í Jákupsstovu, landsstýrismaður í tilfeingis- og vinnumálum

·       Súsanna Bertholdsen, landsstýriskvinna í barna- og útbúgvingarmálum

·       Margit Stórá, landsstýriskvinna í almanna- og heilsumálum

·       Sirið Stenberg, landsstýriskvinna í uttanríkis- og mentamálum

Aðalstjórar
·       John Rajani, løgmansstjóri

·       Bjarni Askham Bjarnason, aðalstjóri í Fíggjarmálaráðnum

·       Pól E. Egholm, aðalstjóri í Tilfeingis- og vinnumálaráðnum

·       Poul Geert Hansen, aðalstjóri í Barna- og útbúgvingarmálaráðnum  

·       Bjørgfríð Ludvig, aðalstjóri í Almanna- og heilsumálaráðnum

·       Herálvur Joensen, aðalstjóri í Uttanríkis- og mentamálaráðnum

Um bygnaðarbroytingarnar í landsfyrisitingini
Tann 4. november boðaði løgmaður frá, at landsstýrið fer úr níggju aðalráðum niður í seks aðalráð umframt at málsøkini verða býtt øðrvísi. Eisini varð fráboðað, at nýggi bygnaðurin kemur í gildi 1. desembur 2025.

Løgmansskrivstovan