Skráin fyri ráðstevnuna um virðisvøkstur í fiskivinnuni er nú tøk og møguleiki er fyri tilmelding.

Meira kunning um skrá og tilmelding sæst her.

Fiskivinnu- og samferðslumálaráðið

TONIK verður aftur 3. mai 2024

Fríggjadagin 12. mai var heimsins fyrsta TONIK-ráðstevna. Kveikjandi íverksetaratiltakið, sum sameinir list og kt.

Lagið á luttakarunum var avbera gott, og tað var beinanvegin greitt, at hetta er eitt tiltak, sum eigur at verða endurtikið. Frøin var tí stór, tá ið fyriskipararnir seinnapartin boðaðu frá, at TONIK verður aftur 3. mai 2024.

Høgni Hoydal, landsstýrismaður, setti dagin. Í røðu síni legði hann stóran dent á, hvussu TONIK sameinir list og tøkni við leikandi kørmum, sum eggja til at skapa nýggj sambond og at síggja nýggjar møguleikar.

Í Føroyum ber sera væl til at sameina list og tøkni, hugvísind, náttúruvísind og íverksetan, tí okkara land er so fjøltáttað og kortini tætt og samanbundið. Tað er eisini tí, at vit í Føroyum so lættliga kunnu menna allar hugsandi kt-loysnir til okkum sjálvs og til allan heimin.

Aðrir røðarar søgdu frá, hvussu heimurin er broyttur, og at tað er vorðið alt vanligari, serliga í kt-fyritøkum, at starvsfólkini arbeiða og búgva ymsa staðni kring um í heiminum, og at tey ikki longur eru bundin at, hvar fyritøkan hevur skrivstovur.

Tí ber nú betur til enn nakrantíð áður at stovna fyritøku og at arbeiða í altjóða kt-vinnuni og vera búsitandi í Føroyum.

Í Føroyum eru eisini fleiri fyritøkur, sum menna kt-loysnir til altjóða marknaðin. Almennu talgildu loysnirnar, sum Talgildu Føroyar hava staðið fyri, og sum føroyskir veitarar hava ment, eru somuleiðis frálík avrik, sum vísa, hvat føroyska kt-vinnan megnar.

TONIK styrkir føroyska kt- og listaumhvørvið og vísir útheiminum, hvat rørir seg og hvat ber til í Føroyum. Føroysku loysnirnar hava uppiborið at vaksa út í heim, og TONIK kann gerast ein týðandi liður í hesum. Eg vil takka TONIK toyminum fyri frálíka tiltakið og góðu fyriskipanina, og fegnist um at kunna boða frá, at Export Faroe Islands eisini verður við á TONIK 3. mai 2023, sigur Høgni Hoydal at enda.

Uttanríkis- og vinnumálaráðið

Fríggjadagin vitjaði NASA astronauturin Drew Feustel í Tinganesi, har hann hitti Høgna Hoydal, landsstýrismann í uttanríkis og vinnumálum.

Á fundinum greiddi Drew Feustel frá starvinum sum astronautur og virkseminum hjá NASA. Hann hevur starvast sum astronautur hjá NASA í út við 25 ár, og hevur m.a. tikið lut á trimum rúmdarferðum, og verið úti í rúmdini tilsamans 226 samdøgur.

Við á fundinum var David Arge Klevang Pedersen, serfrøðingurin í rúmdartøkni á DTU Space. David hevur m.a. við til at menna myndatólið Perserverance Rover hjá NASA sum gjørdi rannsóknir á Mars. Uni Árting granskari hjá Jarðfeingi er limur í Mars 2020 Science Team (Perserverance) hjá NASA.

Skift var orð um hvussu Føroyar, føroyskt vinnulív og føroyskir granskarar kunnu veita vitan og tænastur til rúmdargransking- og virksemi.

Í samgonguskjalinum er ásett, at stimbrast skulu vinnur, ið krevja góðan KT-førleika, eitt nú rúmdartengd vinna og gransking.

Drew Feustel er í Føroyum sum partur av einum kunningartiltaki hjá Fróðskaparsetur Føroya um rúmdargransking.

Uttanríkis- og vinnumálaráðið

Løgtingið samtykti í dag einmælt at seta UNESCO-sáttmálan um verju og fremjan av mentanarligum margfeldi, sum varð samtyktur á aðalfundi í UNESCO 20. oktober 2005, í gildi fyri Føroyar.

Mentanarpolitisk stevnumið um at verja og fremja mentanarliga margfeldið hava stóran týdning fyri livikor og virksemi hjá lista- og mentanarøkinum sum heild, tað er tí at frøast um, at Føroyar taka undir við sáttmálanum, eins og flest øll lond í heiminum longu hava gjørt", sigur Sirið Stenberg, landsstýriskvinna í almanna- og mentamálum.
 Yvirskipaða endamálið við sáttmálanum er at tryggja londunum rættin at reka mentanarpolitikk í egnum landi, at verja mentanarliga margfeldið og ásanna týdningin, ið mentanarligt margfeldi hevur fyri grundleggjandi mannarættindi. Harafturat er endamálið at fremja mentanarligt samstarv tvørtur um landamørk og fremja samstarv og samhaldsfesti við menningarlond til gagns fyri alt heimssamfelagið.

 Sáttmálin staðfestir rættindi, skyldur og møguleikar hjá pørtunum og vísir á, at mentanarligt virksemi, vørur og tænastur bera í sær samleika, virði og týdning, ið eru bæði mentanarlig og búskaparlig, og at atlit má takast at báðum. 

 Tiltøk, ið sáttmálapartarnir fremja, kunnu millum annað fevna um lóggávu á mentanarøkinum, vinnu- og tænastufremjandi tiltøk, stuðulskipanir, ið fremja margfeldi, til listafólk, miðlar og íverkseting. Sáttmálapartarnir verða eggjaðir til at skapa góðar umstøður og at stuðla skapandi virkseminum hjá listafólkum, og víst verður í hesum sambandi serliga á kvinnur, minnilutar og upprunafólk.

 Sambært UNESCO eru mentanarligu og kreativu vinnurnar millum skjótast vaksandi sektorar í heiminum. Mentanarligi sektorurin svarar fyri 6,1 % av heimsbúskapinum, og 30 mió. fólk, serliga ung fólk, starvast innan økið. Víst verður eisini til heimsmálini, har mentanarligu og kreativu vinnurnar eru avgerandi fyri at røkka málunum um ein javnari alheims búskap.

Í dag hava 195 lond umframt ES tikið undir við UNESCO-sáttmálanum. Undirtøka fyri UNESCO-sáttmálanum er harafturat ein fortreyt fyri limaskapi í ES-samstarvsætlanini Creative Europe 2021-2027, ið veitir stuðul til listaligar og mentanarligar verkætlanir umframt verkætlanir innan kreativar vinnur. Tað var føroyska UNESCO-nevndin, sum upprunaliga heitti á landsstýrið um at fáa UNESCO-sáttmálan settan í gildi fyri fyri Føroyar.

Innihaldið í sáttmálanum er mentamál, men av tí at talan er um at Føroyar taka undir við einum altjóða sáttmála, heitti Sirið Stenberg, landsstýriskvinna í mentamálum, á Høgna Hoydal, landsstýrismann í uttanríkis- og vinnumálum, um at leggja uppskotið til samtyktar fyri Løgtingið.

Almanna- og mentamálaráðið

Hanna í Horni er tilnevnd sum sendikvinna Føroya til Íslands. Hon tekur við 1. septembur, tá ið hon avloysir Hallu Nolsøe Poulsen, ið hevur verið sendikvinna í Reykjavík síðani 2020.

Hanna í Horni er 48 ára gomul og doktari í International Relations frá Swansea University. Hon hevur starvast í Uttanríkistænastuni síðani 2008 og frammanundan starvaðist hon í tvey ár á Sendistovu Føroya í Brússel sum málsviðgeri og skrivari. Í sínum starvi í Uttanríkistænastuni hevur Hanna eitt nú arbeitt við viðurskiftum millum Føroyar og Ísland og umboðað Føroyar í Arktiska Ráðnum. Seinnu árini hevur Hanna umsitið menningarsamstarv og neyðhjálp umframt mannarættindasáttmálarnar, ið Føroyar eru fevndar av.

Uttanríkis- og vinnumálaráðið