Ein nýggjur føroyskur bittari frá Einar’s Distillery er nú á marknaðinum og fæst til keyps í Rúsdrekkasølu Landsins.

Einar’s Bitter er føroysk framleiðsla, og sera nógv orka er løgd í at velja og samanseta allarbestu urtir og krydd fyri at fáa tann besta smakkin.

Føroyski bittarin er eitt úrslit av hørðum arbeiði á Einar´s distillery seinastu árini og at Disa Christiansen úr Nólsoy fyri nøkrum árum síðan gav distarillarínum gott innlit í føroysk plantusløg, sum nú eru nýtt í hesum bittarinum.

Einar’s Distillery er fyrsta føroyska góðkenda distillarí, og framleiðir bæði Einar’s Akvavitt, Einar’s Vodka og Einar’s Gin, Einar´s Cask og nú eisini Einar’s Bitter. Føroyskt whisky frá Einar’s Distillery er eisini í tunnum og búnast.

Einar’s Bitter er 38% og kann njótast til veitslur og hugnaligar løtur.

​Havna- vinnunevndin í Klaksvíkar kommunu hevur samtykt, at lækka í gjaldið á bátaplássum í kommununi, umframt at tað nú verður kravt, at eigarar av bátaplássum skulu stovna eina sjálvvirkandi gjaldsavtalu.

Í 2017 samtykti Havna- og Vinnunnevndin, eftir at prísirnir tá vóru tillagaðir, at endurskoða prísirnar eftir einum ári, og tað er sum liður av hesum arbeiði, at ymiskar tillagingar nú eru framdar.

Útrokningargrundarlagið er broytt
Nakrar av broytingunum eru m.a. ein umlegging til eina sjálvvirkandi gjaldsavtalu, soleiðis at gjaldið nú verður flutt mánaðarliga – virkandi frá seinnu hálvu í 2019. Harafturat verða broytingar gjørdar í sjálvari prísásetingini, soleiðis at gjaldið frameftir verður roknað út frá breiddini av bátinum, heldur enn breiddini av sjálvum bátaplássinum. Broytingin merkir eina lækking hjá flest øllum bátaeigarum, júst hvussu stór lækkingin verður, avhongur av einstøku bátastøddini.

Ein orsøk til broyingarnar er m.a. at Klaksvíkar havn er einasta havn í landinum, sum hevur brúkt breiddina á bátaplássinum og ikki breiddina á bátinum sum útrokningargrundarlag. Harafturat er ein ávís umsiting av at krevja gjaldið inn, samstundis sum tað kann tað lætta um hjá bátaeigarum, at gjaldið nú verður mánaðarligt í mun til hálvárligt.

Økið verður nú hægri raðfest
Tummas Lervig er formaður í Havna- og vinnunevndini, og hann fegnast um øktu raðfestingina av bátaplássunum.

– Vit søkja nú eftir einum umsitara til alt tað maritima økið í kommununi, og harvið fær økið hægri raðfesting, samstundis sum arbeitt verður við at leggja eina bátabrúgv út afturat (sunnast við bátabrúgvarnar), sigur Tummas Lervig, formaður í Havna- og vinnunevndini.

Hann leggur afturat, at nú summarið er í hondum ger Klaksvíkar kommuna nógv við at fríðka økið, soleiðis at hugnaligt verður hjá bátagestum, at vitja í Klaksvik í summar. Klaksvíkar kommuna hevur áleið 100 bátapláss í løtuni.

Kelda: klaksvík.fo