Høgni Hoydal, landsstýrismaður í fiskivinnumálum hevur gjørt av, at tey, ið hava eginkvotu av norðhavssild í 2017, kunnu flyta upp til 25 prosent av síni kvotu til 2018. Talan er um ávikavist eginkvotur, sum eru tillutaðar sambært løgtingslóg um vinnuligan fiskiskap og egnar árskvotur, ið eru keyptar á uppboði í 2017.

Landsstýrismaðurin hevur eisini gjørt av, at tey, ið hava egna árskvotu av svartkjafti, kunnu flyta upp til 10 prosent av egnu árskvotuni í 2017 til 2018. Avgerðin fevnir um ávikavist egnar árskvotur, sum eru tillutaðar sambært løgtingslóg um vinnuligan fiskiskap og egnar árskvotur, ið eru keyptar á uppboði í 2017.

Fyri at stuðla undir møguleikan at fiska av norðhavssildakvotuni í 2017, nú móttøkuorkan til matna á landi í Føroyum er skerd, hevur landsstýrismaðurin í fiskivinnumálum sent løgtinginum uppskot um at strika avreiðingargjaldið, ið er lagt á makrel og norðhavssild, um landað verður uttanlands ella til útlendskt móttøkuskip.

Talan er um broyting í løgtingslóg um serstakar treytir fyri fiskiskap eftir makreli, norðhavssild og svartkjafti og botnfiski í Barentshavinum í 2017, sum verður send til hoyringar í vikuni. Í uppskotinum verður ásett, at avreiðingargjaldið verður tikið av við virknað frá framløgudegnum í Løgtinginum.

Treyt fyri at avtaka avreiðingargjaldið og at loyva at partur av kvotu keypt á uppboði í 2017 kann flytast til at verða fiskað í 2018 er, at Løgtingið tekur undir við ætlaðu broytingunum.

Veiðigjaldið fyri kvotu, sum verður flutt frá 2017 til 2018, verður samsvarandi lóggávu um veiðigjald í 2018. Víst verður til uppskot til løgtingslóg um veiðigjald, sum verður sent til hoyringar í vikuni. Flutt kvota, sum er keypt á uppboði, verður ikki áløgd veiðigjald.

Avgerðin um at flyta kvotu frá 2017 til 2018 verður formliga staðfest í teimum kunngerðum, sum skipa fiskiskapin eftir ávikavist norðhavssild og svartkjafti í 2018. Fortreytin fyri flytingini er sostatt, at fiskivinnulóggávan í 2018 loyvir hesum. Lagt verður upp fyri hesum í uppskoti til løgtingslóg um fyrisiting av sjófeingi, eins og í løgtingslóg um vinnuligan fiskiskap.

Rættindahavari kann í 2018 bert fáa útskriva fiskiloyvi til flutta kvotu, um hann lýkur tær tá galdandi treytir um at kunna fáa fiskiloyvi.
​
JáH (y) 31.10.2017
Kelda: Fiskimálaráðið 31. oktober 2017

Orkupolitikkurin hjá landsstýrissamgonguni nevnir ítøkiliga, at í 2025 skulu í minsta lagi helvtin av øllum sethúsum og bygningum í Føroyum hitast við grønari orku. Eitt av bestu amboðunum at røkka hesum máli er hitapumpur.

Seinastu 10 árini hava fleiri enn 1000 hús skift oljufýrið út við luft/vatn hitaskipan ella jarðhitaskipan. Tað er tó bara ein lítil partur, tí enn eru umleið 20.000 oljufýr í nýtslu.

Soleiðis sigur Kári M. Mortensen, deildarleiðari á Orku á Umhvørvisstovuni millum annað í nýggjari grein. Les alla greinina her

JáH (y) 28.10.2017
Kelda: Heilsu- og Innlendismálaráðið

​Belgiski sendiharrin í Keypmannahavn, Leo Peeters, hitti í dag Poul Michelsen, uttanríkis- og vinnumálaráðharra, meðan hann er á vitjan í Føroyum. 

Á fundinum nýtti Poul Michelsen høvið at kunna sendiharran bæði um politisk og vinnulig viðurskifti. Serstakliga greiddi landsstýrismaðurin frá, hvussu Føroyar hava fjøltáttað útflutningsmarknaðirnar, soleiðis at føroyskar fyritøkur nú hava fleiri týdningarmiklar marknaðir, og arbeitt verður støðugt við at menna hesa gongd. Fríhandilssáttmáli er júst komin í gildi millum Føroyar og Turkaland, ein marknaður við 80 milliónum íbúgvum.

Samstundis varð víst á, at fríhandilssáttmálin við ES ikki javnvigar, men gevur ES størri møguleikar at selja til Føroya enn øvugt, og at vit tískil stremba eftir at fáa ein betri karm um okkara útflutning til ES.

“Føroyar eiga at fáa betri møguleikar eisini at selja viðgjørdar vørur til ES marknaðin. Hetta er eitt raðfest mál hjá føroyskum myndugleikum, og tað er ein týdningarmikil boðskapur at bera fram fyri vitjandi sendiharrum úr ES limalondum,” sigur Poul Michelsen, landsstýrismaður.

JáH (y) 26.10.2017
Kelda: Uttanríkis- og Vinnumálaráðið

Fyri løtu síðani fór Gadus at sigla móti kontrollpunktinum og so verður kóstin sett til Klaksvíkar.

Hettar skrivar Markus í Norðnástovu fyri 8 min. síðani:

"​So fór GADUS at sigla í mótið kontrollpunktinum og um eitt døgn ella so verður kósin sett heim à klettarnar, vit verða ætlandi á klax týsmorgunin 😍😍👍👍
Eg vil bara takka Harranum fyri fong og varveislu à hesum túri og biði Hann føra okkum trygt heim til Føroyar mítt land 😍😍👍👍
Og øllum tykkum har heima à landi sum à sjógvi, ongin nevndur og ongin gloymdur ynski eg ein góðan týsdag og Harrans signing til tykkum øll í ríkum màli ❤️

Norðoya Portalurin ynskir skipara og manning eina góða heimreisu.

​SáH