Orsøkin til, at tit á VFI uppliva at nøkur fá útlendsk ferðafólk gerast vónsvikin av, at tey ikki sleppa at ganga alla staðni har sum tey vilja, er ógvuliga einføld: Tit hava sjálvi fyrigyklað teimum, at tey kundu ganga og mala akkurát sum tey vilja. Og hetta hava tit gjørt, hóast tey ikki hava loyvi til tað.

Heldur enn at selja tykkara egna ímyndaða reklamuveruleika, so kundu tit bara selt veruleikan.

Tað hevði ikki bara verið rættari, tað vildi eisini verið lættari.

Og veruleikin sum tit áttu at “selt” er, at Føroyar eru eitt oyggjaland har sambandið við náttúruna, og burðardygga gagnnýtslan av náttúruni, altíð hevur verið ein samanrunnin partur av okkara mentan.

Og er hetta veruleikin, tá gevur tað væl seg sjálvt, at tit ikki kunnu strika landbúnaðin og náttúruverndina burturúr “brandingini” um endamálið er at selja Føroyar sum “the real deal”?

Vil Visit Faroe Islands tryggja atgongd til tann hagan, sum tit selja Føroyar uppá, so er eingin vegur uttanum eitt virðiligt samskifti og samstarv við okkum sum varða av høgunum.

So kann Visit Faroe Islands skelda og “spinna” og “branda” so galið tit vilja. Men hava tit fyrst brent brúnna til okkum sum varða av høgunum, so verður tað ikki serliga lætt hjá tykkum at selja Føroyar sum ferðamannaland framyvir.

Tí mátti tað eisini verið ólíka lættari, at arbeitt saman við okkum, heldur enn ímóti okkum.

Og hetta fer Løgtingið sjálvandi eisini at taka til eftirtektar, í samband við fíggjarlógarviðgerðina í morgin.

Føroya Óðalsfelag

Jacob Vestergaard, landsstýrismaður, hevur sett Maritu Rasmussen í starvið sum stjóri á Havstovuni.

Marita Rasmussen er 54 ára gomul. Hon er útbúgvin fiskivinnukandidatur á lærda háskulanum í Tromsø og master í leiðslu á Robert Gordon University í Aberdeen.

Seinastu 14 árini hevur Marita starvast sum stjóri í Vinnuhúsinum. Áðrenn tað hevur hon starvast innan føroysku fiski- og alivinnuna. Marita hevur javnan luttikið og virkað innan føroyska granskingar- og menningarøkið.

Marita Rasmussen byrjar í starvinum sum stjóri á Havstovuni eftir nærri avtalu við arbeiðsgevaran.

Fiskimálaráðið

Føroyar og Ísland hava gjørt semju um eina fiskiveiðiavtalu fyri 2022, sum er á sama støði sum tann fyri 2021.

Avtalan ber í sær, at føroysk skip eins og árini framman undan kunnu fiska botnfisk og uppsjóvarfisk í íslendskum sjógvi og íslendsk skip uppsjóvarfisk í føroyskum sjógvi.

Avtalan ásetir, at føroyska botnfiskakvotan, eins og áður, verður 5.600 tons, harav upp til 2.400 tons av toski og upp til 400 tons av brosmu. Føroyska lodnukvotan verður framhaldandi 5% av heildarkvotuni, sum Ísland, Grønland og Noreg áseta, men tó í mesta lagi 30.000 tons.

Avtalað er, at atgongdin at fiska svartkjaft og norðhavssild hjá hvørjum øðrum heldur fram sum undanfarin ár. Av beinleiðis kvotu fær Ísland 1.300 tons av makreli frá Føroyum; hetta er eisini óbroytt í mun til undanfarin ár.

“Fiskiveiðiavtalan millum Føroyar og Ísland hevur týdning fyri báðar partar, og eg fegnist um, at vit hava fingið eina loysn, ið skapar áhaldandi støðug viðurskifti millum londini og hjá vinnuni,” sigur Jacob Vestergaard, landsstýrismaður.

Føroyski fiskiskapurin í íslendskum sjógvi verður, umframt íslendskar kunngerðir, skipaður sambært føroyskum kunngerðum, ið verða lýstar um ársskiftið.

Fiskimálaráðið

Vakstrarforum almannakunngjørdi í dag frágreiðingina ”Havið og framtíðin” við 42 ítøkiligum átøkum til burðardyggan virðisvøkstur úr havinum.

Tilmælini eru innan fýra høvuðsøki: yvirskipaðar karmar, aling, fiskiveiðu og matvørur. Málið er at í 2030 skal útflutningsvirðið á føroyskum sjófeingi vera 11 milliardir krónur. Hetta var 7,7 milliardir í 2020.

Hetta skal millum annað gerast við eini munandi størri virðisøking av tilfeinginum enn í dag. Tað vil siga, at nógv meira skal fáast burtur úr hvørjum kilo ov rávøru.

”Skulu vit hava sama ella betri vælferðarstøði enn vit hava nú, so mugu vit hyggja at møguleikum fyri at økja um burðardyggan vøkstur, og vit eru noydd at seta okkum framsøkin mál. Tí hava vit sett okkum fyri, at virði á útflutninginum skal vaksa líka nógv frá 2020 til 2030, sum tað gjørdi frá 2010 til 2020,” sigur løgmaður.

Tilsamans hevur Vakstrarforum eyðmerkt seks vakstarøki. Fyri øll hesi skulu arbeiðsbólkar gera tilmæli:

Havið
Kunningar- og samskiftistøkni
Ferðavinna
Maritimar veitaravinnur
Útbúgving- og arbeiðsmarknaður
Grøna skiftið
Tað mesta av hesum arbeiði er farið í gongd og verður liðugt í komandi ári.

Les frágreiðingina "Havið og framtíðin."

Løgmansskrivstovan