Løgmaður hevur avgjørt at Dátueftirlitið, ið er stovnur undir Løgmansskrivstovuni, í næstum skal flyta inn á eystara arm á Skálafjørðinum. Avgerðin um at Dátueftirlitið skal flyta hevur verið til ummælis hjá Dáturáðnum, ið tekur undir við avgerðini.

Tóri Højgaard, stjóri á Dátueftirlitinum sigur, at: “Dátueftirlitið er í tí støðu, at núverandi høli í Havn er óhóskandi. Tí er neyðugt at finna nýggj hóskandi hølir. Ein staðseting á eystara armi á Skálafjørðinum kemur ikki at ávirka okkara virksemi.”

Løgmaður Bárður á Steig Nielsen sigur, at: “Vit eiga altíð at miðja í móti, at almenn arbeiðspláss eru staðsett kring alt landið. Men vit skulu ikki flyta stovnar fyri einhvønn prís. Tað má altíð geva meining og ikki ganga útyvir tænastuna. Í hesum førum skal Dátueftirlitið hava nýggj høli, og tí er upplagt at finna nýggj hølir uttanfyri Havnina. Eg fegnist um at stjórin og Dáturáðið taka undir við ætlanunum.”

Farið verður nú undir tilgongdina at fyrireika flytingina, herundir at skipa fyri útboði av møguligum hølum á eystara armi á Skálafjørðinum.

Á Dátueftirlitinum starvast 6 starvsfólk. Dátueftirlitið virkar sum skrivstova hjá Dáturáðnum, og hevur til uppgávur at hava eftirlit við og virka fyri, at dátuverndarlógin verður hildin. Harumframt veitir Dátueftirlitið ráðgeving og vegleiðing um dátuverndarlógina.

Løgmansskrivstovan

Landsstýrið heitti í fjør á nevndirnar í Føroya Tele og NET um at gera eina óhefta frágreiðing um, hvussu ein full ognarlig sundurskiljing kann tryggja fult gjøgnumskygni, fría og javna kapping. Frágreiðingin skuldi somuleiðis lýsa, um tað finnast aðrar leiðir at røkka sama setningi.

FT og NET hava biðið Copenhagen Economics um at gera greiningina.

Frágreiðingin lýsir tvey ymisk høvuðsmodell fyri sundurskiljing í Føroyum:

Eitt modell, har NET løgfrøðiliga verður skilt frá restini av FT-samtakinum og flutt til Føroya landsstýri sum eigara, og eitt modell, har tað bert verða framd onnur funktionell tiltøk at skilja sundur, men har NET framhaldandi verður partur av FT-samtakinum.

Niðurstøðan í frágreiðingini:
at ein bygnaðarlig sundurskiljing tryggjar fult gjøgnumskygni millum smásøluoperatørarnar viðvíkjandi treytunum fyri atkomu til undirstøðukervið (infrastruktur).
at ein bygnaðarlig sundurskiljing fer at geva eina fría og javna smásølukapping.
at ein bygnaðarlig sundurskiljing ikki hevur nógvar vansar við sær.
Viðvíkjandi møguleikanun at fremja onnur sonevnd funktionel tiltøk at skilja sundur, vísir frágreiðingin á, at henda loysnin ikki í líka stóran mun borgar fyri fullum gjøgnumskygni og tryggjar møguleikan fyri fríari og javnari smásølukapping.

Í samgonguskjalinum er avtalað, at farast skal undir eina fulla ognarliga sundurskiljing av almenna fjarskiftisnetinum. Landsstýrið er farið undir at viðgera frágreiðingina og tilmælini í henni.

Frágreiðingin (ráðgevandi toymi)

Eftirmeting (review) 

Viðmerkingar til Eftirmeting (ráðgevandi toymi)

​Sum liður í at tryggja eina óhefta og sakliga frágreiðing, varð arbeiðið skipað soleiðis, at eitt ráðgevingartoymi varð valt at gera frágreiðingina (útførandi toymi), og eitt annað toymi varð valt til at gera eina eftirmeting (review) av frágreiðingini í mun til arbeiðssetningin. Endaligi arbeiðsetningurin varð avtalaður millum eigaran og nevndina og lagdur fyri eftirlitsmyndugleikarnar og kappingarneytar til viðmerkingar. 

Fíggjarmálaráðið