​Roknskaparúrslitini hilnaðust sum heild væl fyrra hálvárið 2023. Úrslitið eftir skatt gjørdist 4,6 mió. kr. samanborið við 3,6 mió. kr. sama tíðarskeið í fjør.

Við eini sunnari javnvág millum inntøkur og útreiðslur, samstundis sum felagið hevur havt ein støðugan vøkstur av nýggjum kundum, hevur gongdin ársins fyrstu seks mánaðir verið góð. Skaðaútreiðslurnar hava tó verið á einum støði, sum er eitt sindur hægri, enn væntað varð við ársbyrjan.

Hækkaðar skaðaútreiðslur
Skaðaendurgjøldini hjá Trygd vóru 51,2 mió. kr. samanborið við 47,3 mió. kr. sama tíðarskeið í fjør. Lutfalsligu høgu skaðaútreiðslurnar hjá felagnum standast í høvuðsheitum av tí illveðrinum, sum var í februarmánað í ár. Illveðrið elvdi til fleiri skaðar kring alt landið. Umframt stormskaðarnar hevur høga inflatiónin eisini havt við sær, at tað, eins og alt annð, er vorðið dýrari at gera skaðar aftur, og hetta er eisini ein orsøk til hækkandi útreiðslur.

Avlop á íløguvirkseminum
Hóast yvirskipaða búskapargongdin í heiminum enn er merkt av høgari inflatión, hækkandi rentum og geopolitiskari óvissu, so hava virðisbrævamarknaðirnir sum heild klárað seg betri í 2023 samanborið við 2022. Hetta hevur eisini sett sín dám á roknskaparúrslitini fyri ársins fyrstu seks mánaðir. Higartil í ár hevur felagið havt eitt avlop av sínum íløguvirksemi á 0,4 mió. kr. samanborið við eitt hall á 4,3 mió. kr. sama tíðarskeið í fjør.

Stjóraskifti í Trygd
Í farnu viku byrjaði Anna Mohr Holm sum stjóri hjá Trygd. Hon avloysti Brian Smedemark, ið hevur verið stjóri síðani í 2018, og sum er byrjaður í nýggjum starvi sum rakstrarstjóri í BankNordik. Anna Mohr Holm er útbúgvin løgfrøðingur og hevur drúgvar royndir úr føroyska tryggingarheiminum.

”Hálvársroknskapartølini hjá Trygd bera boð um eina sterka og kappingarføra fyritøku. Ársins fyrstu seks mánaðir hava, eins og 2022, verið merktir av búskaparligari óvissu í heiminum, og harafturat hava vit havt ein vetur við illveðri, sum hevur ávirkað okkara skaðaútreiðslur. Men hóast hesar avbjóðingar, so eru úrslitini góð, og eg fegnist um, at eg sleppi at vera ein partur av Trygd, ið bæði er ein væl rikin fyritøka, og sum samstundis eisini kann bjóða øllum føroyingum trygd til kappingarførar prísir”, sigur Anna Mohr Holm, stjóri.

Roknskapurin í stuttum
- Hálvársúrslitið fyri skatt gjørdist 5,6 mió. kr. samanborið við 4,4 mió. kr. sama tíðarskeið í 2022.

- Úrslitið eftir skatt var eitt avlop á 4,6 mió. kr. samanborið við 3,6 mió. kr. sama tíðarskeið í fjør.

- Bruttoinntøkurnar frá tryggingargjøldum hækkaðu við 8,6 mió. kr. fyrra hálvár 2023 og vóru tilsamans 103,7 mió. kr.

- Skaðaútreiðslurnar vóru tilsamans 51,2 mió. kr. samanborið við 47,3 mió. kr. sama tíðarskeið í fjør.

- Endurgjaldsburturleggingarnar fyri egna rokning vóru 65,9 mió. kr.  samanborið við 57,1 mió. kr. fyrra hálvár í fjør.

- Skaðaprosentparturin hækkaði úr 63,5% upp í 65,3%.

Les meira í frágreiðingini her.

Trygd

​Mánadagin 28. august var móttøka á Sendistovu Føroya í Reykjavík í samband við at sendifólkaskifti fór fram. Frá 1. september verður Hanna í Horni sendikvinna, meðan Halla Nolsøe Poulsen takkar fyri seg fyri at taka við sum stjóri í NORA. Fitt av fólki høvdu leitað sær inn á gólvið, harímillum altingslimir, ráðharrar, sendifólk og vinir hjá sendistovuni.

Uttanríkis- og vinnumálaráðið

​Dennis Holm, landsstýrismaður, hevur gjørt av ikki at leingja undantakið, sum loyvir føroyskum skipum at landa allan makrel uttanlands.

Stutt fyri ólavsøku var ein broyting gjørd í kunngerð nr. 170 frá 30. desember 2019 um landing í Føroyum soleiðis, at til og við 31. august 2023 varð undantak givið frá lógarkravinum um, at øll veiða av makreli, undantikin 15%, skal landast í Føroyum.

Orsøkin var, at frystivirkini fyrr í summar fyribils góvust við at taka ímóti makreli, og tí kundu skipini bert landa til fiskamjølsvirki. Hetta elvdi til, at skipini komu at liggja og bíða eftir at sleppa framat at landa. Sostatt vóru møguleikarnir at fiska makrel darvaðir av vantandi móttøkuorku á landi.

Upplýst er Fiskivinnu- og samferðslumálaráðnum, at nú eru frystivirkini aftur farin at taka ímóti makreli. Grundað á hesa støðu er ikki grundarlag fyri framhaldandi at gera frávik frá galdandi áseting um, at allur fiskur skal landast í Føroyum.

Endamálið við at krevja, at øll veiða, undantikin 15%, skal landast og avreiðast um føroyskan bryggjukant er at tryggja, at sum mest av fiski kemur upp á land í Føroyum, og á tann hátt skapar virksemi og arbeiðspláss á landi í Føroyum, og at geva virkjum á landi í Føroyum betri atgongd til rávøru.

Fiskivinnu- og samferðslumálaráðið

​Áhugavert at hoyra stjóran í Visit Faroe Islands vera so uppgevandi og avgjørda og siga: 

“at uttan at málið um gongd í haga verður loyst, so skal man ikki halda fram við at marknaðarføra Føroyar sum ferðamál”. 

Vildi mett, at tað er høvuðsuppgávan hjá Visit Faroe Islands at hjálpa til við tí sum kann betrast innan galdandi lóggávu heldur enn allatíðina at fílast inná galdandi lóggávu. 

Galdandi lóggáva sigur, at tað er loyvi at ganga eftir gomlu gøtunum millum bygdir. Onnur gongd bert í samráð við tey sum vara av jørðini. 

Hetta mátti ikki verið so ómetaliga ringt at marknaðarført. Givið so, nevnd, stjórn og starvsfólk í ferðavinnuni kunnu halda at tað hevði verið betri um galdandi lóggáva var strikað. Inntil hon er broytt er núverandi lóggáva galdandi. 

Ferðafólkini koma til Føroyar fyri at uppliva okkara vøkru nátturðu og ríka fuglalív. Tí undrar tað almikið, at stjórin í Visit Faroe Islands og fleiri við henni, enntá løgtings- og landsstýrisfólk aftur og aftur føra fram, at einki gjald má takast uttan at veita eina tænastu. Td ein matpakka ella ein ferðaleiðara. 

Royndirnar kring landið, har gjald verður tikið, vísa at meginparturin, ja kanska omanfyri 90% av teimum ferðandi hvørki eftirspyrja matpakka ella ferðaleiðara. Tey vilja sleppa at ganga sum tey vilja, har tey vilja og tá tey vilja. 

Hóast hetta et teirra ynski, so skilja tey ómetaliga væl, at hetta ikki er serliga skilagott fyri okkara nátturðu, okkara djóra- og fuglalív og fyri bygdarfólki kring landi. Tey skilja burðardygga tilgongd, tey eru kanska hørm um at tey ikki sleppa fyri einki og kanska ósamd í avmarkingunum, men tey góðtaka treytirnar. Summi eru óiva ónøgd, men leggja tey nógv eftir seg? Ivasamt!!

Sjálvsagt skulu treytirnar verða kendar og broytingar lýsast í góðari tíð. Lukkutíð gongur tað rætta vegin, men pláss er fyri enn betri kunning vm. Her hevði verið gott við hjálp frá Visit Faroe Islands 🙏

Tómar hotelsengur og færri ferðafólk skyldast neyvan bara “óskilið” vegna gongd í haga. Høg inflatión, væntandi búskaparlig framgongd, prísvøkstur og hækkandi rentustøði og ongin Michelin matstova í Føroyum man óivað hava sína stóru ávirkan eisini.

Tí eitt sindur hugstoytt, at stjórin í Visit Faroe Islands mælir til at høvuðsvirksemi hjá Visit Faroe Islands - at marknaðarføra Føroyar sum ferðavinnuland - verður tikið av skránni vegna óskil skapt av festibóndum og óðalsfólki kring Føroya Land.

Hiking in the Faroe Islands