​Wuhan er blivin stongt niður eftir at 4 nýggir tilburðir av Korona eru staðfestir.

Tað almenna hevur bannað stórum mannafjøldum at møtast og matstovur, biografar og stuttleikahús skulu lata aftur.

Hetta er í økinum Jiangxia og biðja tey fólkini at halda seg innandura inntil tamarhald er á støðuni aftur.

Í Kina ganga tey sera høgt uppí Korona og hava tey eina null loysn, so Korona ikki spreiðir seg.

SáH

Í kunngerðini um veiðu eftir norðhavssild fyri 2022 verður er ásett, at 3.500 tons eru tøk til vinnuligar fiskiroyndir eftir norðhavssild.

Umsóknarfreistin er kl. 12.00 mánadagin 22. august 2022.

Nøgdin kann veiðast í føroyskum sjógvi, íslendskum sjógvi og í NEAFC-skipanarøkinum.

Tey, ið ætla at fremja royndir innan økið, skulu senda Fiskimálaráðnum umsókn.

Nærri kunning fæst her.

Fiskimálaráðið

Landsstýrismaðurin í fíggjarmálum hevur afturvalt:

Palla Ziskason, formann
Anfinn Kallsberg
Guðrið Højgaard
Oyvind Brimnes
Brynhild Høgnadóttir

í stýrið fyri Íleggingargrunnin frá 1. juli 2022 og 4 ár fram.

Íleggingargrunnurin fyri Føroyar er settur á stovn við Fólkatingslóg nr. 28 frá 29. januar 1964, sum seinast er broytt við lóg nr. 512 frá 27. mai 2013 om ændring af lov om en investeringsfond for Færøerne m.v. Virksemið hjá Íleggingargrunninum er ásett í kunngerð nr. 119 frá 23. oktober 1996. Grunnurin verður ofta nevndur 60-milliónagrunnurin, tí upprunastovnsfæið var 60 mió.kr.

Endamálið hjá grunninum er at veita figging til íløgur, serliga í sambandi við undirstøðukervið og líknandi, ið vera mettar neyðugar ella ynskiligar til menning av føroyskum vinnulívi, og har onnur figging ikki kann útvegast á nøktandi hátt. Grunnurin kann í ávísan mun eisini veita fígging til privatar vinnufyritøkur og felagsskapir við almannagagnligum endamáli. Harumframt kann grunnurin veita lán til stovnar ella aðrar grunnar, sum veita lán ella annan stuðul til privatar, almennar ella hálvalmennar vinnufyritøkur og fíggjarstovnar.

Grunnurin hevði eitt avlop á 17,3 mió.kr. í 2021.

Ognirnar eru tilsamans: 689 mió. Kr.

Harav:

Útlánini eru: 199 mió.kr.

Virðisbrøv og tøkur peningur er: 484 mió.kr.

Onnur áogn er: 6 mió.kr.

Grunnurin hevur givið tilsøgn um lán á samlað 50 mió.kr.

Fíggjarmálaráðið

Faroe Ship og MTV-Byggivirkið hava í dag skriva undir sáttmála um at byggja nýggjar bygningar á Skansabryggjuni. 

Nýggju bygningarnir verða tilsamans 5.100m2 til støddar afturat verandi 1.500m2 í Gráa Pakkhúsi. 
Bygningarnir verða eftir ætlan lidnir á heysti 2023.

Nýggju bygningarnir verða knýttur at verandi Gráa Pakkhúsi og koma í staðin fyri tað, sum í dag verður kallað Svarta Pakkhús. Svarta Pakkhús verður tikið niður í sambandi við umskipanina av økinum á Eystaru Bryggju. 

Umskipanin av økinum á Eystaru Bryggju hevur eisini við sær, at Faroe Ship hevur ætlanir um at byggja nýggja høvuðsskrivsstovu í sama øki sum nýggju bygningarnir. Samráðingar eru við MTV-Byggivirkið um hesa verkætlanina.  

Mortan Vang, stjóri á MTV-Byggivirkið, og Bogi P. Nielsen, stjóri á Faroe Ship, skrivaðu undir sáttmálan.

Faroe Ship