Komið og hoyrið úrmælingin í góðari tænastu, Jan Restorff, í Kongshøll fríggjadagin 6. mars kl. 13.

Matstovan hjá Jan hevur fingið Michelin stjørnu fjúrtan ár á rað, og sjálvur hevur hann vunnið fleiri prísir fyri einastandandi upplivingina, sum hann gevur hvørjum einasta gesti. Jan fer millum annað at greiða frá, hvussu hann tryggjar eitt høgt tænastustig hvønn dag í árinum.

Jóhanna á Bergi, stjóri í Atlantsflogi, Rúni Poulsen, stjóri í Smyril Line og Karin Visth, vínovasti í Gist & Vist, fara eisini at hugleiða um ferðavinnuna í framtíðini.

Harumframt fer Annika Solveig Hedegård Isfeldt, mannfrøðingur, at siga frá, hvussu ferðavinnan ávirkar føroyingar.

Íverksetarar, sum hava tikið lut í verkætlanini hjá Hugskotinum “Nýskapan í ferðavinnuni”, fara eisini at leggja fram. Íverksetararnir fara at vísa, hvørjar ætlanir teir hava fyri ferðavinnuna í framtíðini.

Aftaná verður ábit.

Skunda tær og tekna teg til tiltakið á heimasíðuni hjá Hugskotinum: https://hugskotid.fo/skrseting-vinnuforum-2020

Tórshavnar Kommuna

SáH

Í desember undirskrivaði borgarstjórin, Jógvan Skorheim, avtalu um keyp av ognarpørtum á Fossum,  týsdagin, 11. februar 2020 kl. 14.00, var lisitatión av útstykkingini á Fossum, sum SNA arkitektar hava projekterað.

Í fyrsta byggistiginum verða 21 grundstykkir til sethús og 13 til raðhús.

Inn komu fýra tilboð:

Articon 33.667.673 kr
J&K Petersen 39.484.141 kr
Kanjon 36.650.840 kr
RTS 30.978.377 kr
Kostnaðarmeting: 37.448.853 kr

Teir projekterandi eru í ferð við at nærlesa tey innkomnu tilboðini, fyri síðani at koma aftur við einum tilmæli um, hvør fær arbeiðið.

Arbeiðið byrjar eftir ætlan í mai 2020.

Kelda: Klaksvík.fo

SáH

​Tað er ikki á hvørjum degi, at Høvdasmenn eru fotomodel, men tað hevur yngsta barni í Høvdasfamiljuni klára.

Yakub hevur verið fotomodel í kendu fyritøkuni name it og sæst hann nú á teirra heimasíðu.

Name it er  ein risa fyritøku, sum selur klæðir til børn og eru tey so væl nøgd við Yakub, at hann skal aftur vera fotomodel síðst í hesum mánanum.

Her nakrar myndir, sjá niðanfyri.

SáH

STARVSSETAN: Landsverk hevur framt bygnaðarligar broytingar, og í hesum sambandi skulu triggir nýggir deildarleiðarar setast; ein fíggjarleiðari, ein starvsfólkaleiðari og ein leiðari á Virkisdeildini. Fyri góðari viku síðani var fíggjarleiðarastarvið sett, og nú er Boði Haraldson settur sum leiðari á Virkisdeildini.
Boði Haraldson er 58 ára gamal, útbúgvin verkfrøðingur, og hevði drúgvar royndir sum býarverkfrøðingur í Tórshavnar kommunu, áðrenn hann kom í starv sum rakstrarleiðari á Deildini fyri Infrakervi á Landsverki á heysti 2016.

Afturat hesum báðum nýggju deildarleiðarunum skal í næstum setast ein starvsfólkaleiðari, og tá er leiðslan á Landsverki aftur fullmannað.

Landsverk hevur um hendi vega-, havna og byggiharrauppgávur, er ráðgevi hjá myndugleikum, og ger ætlanir og forkanningar í sambandi við landsvegir, tunlar, havnir, bygningar, tyrlupallar og innan flogvalløkið. Somuleiðis hevur stovnurin um hendi alt viðlíkahald av landsins ognum, umframt framleiðslu og sølu av gróti, skervi og asfalti.

Boði Haraldson tekur við starvinum beinanvegin sum leiðari á Virkisdeildini á Landsverki.

Landsverk

Í gjár skrivaðu vit undir leigusáttmála í Klaksvík til hølið hjá Soli Deo Gloria í veghæddini, har sum Kiosk700 var fyrr.

Dugni hevur síðsta árið verið í eini tilgongd við at innrætta okkara virksemið á Kambsdali á besta hátt. Við verkstøðum til timbur, seyming, sundurskiljing og polstring eru karmarnir framúr góðir. Vit hava tó havt eitt ynski um at hava endurnýtsluhandilin tættari øðrum handlum og virksemi, so fólk lættari kunnu koma á gátt, og vit enn betur kunnu røkka okkara málbólki. Hetta er blivið ein møguleiki nú Dugni hevur fingið størri játtan á løgtingsfíggjarlógini. Vit eru landsstýrinum og løgtinginum ógvuliga takksom, tí hetta gevur okkum møguleika fyri enn betur at røkka endamálinum hjá Dugna í Eysturoy og Norðoyggjum.

Somuleiðis eru vit hjartaliga takksom til Klaksvíkar kommunu og grannakommunurnar; Viðareiðis kommunu, Kunoyar kommunu, Hvannasunds kommunu og Fugloyar kommunu fyri játtaðan stuðul og góða móttøku nú handilin letur upp í Klaksvík í næstum.

Skrivað hevur Hedvig Johansdóttir

Kelda: Dugna

SáH

Í samrøðu við Jyllands-Posten greiðir Rune Nørregaard, kreditt- og fíggjarstjóri í BankNordik-samtakinum frá, hvussu tað er at vera danskari og búgva og starvast í Føroyum.

Rune er útbúgvin advokatur og hevur harumframt eina MBA-útbúgving frá IE Business School. Hann byrjaði sína starvsleið í BankNordik í 2009, tá ið hann fekk starv sum løgfrøðingur.

Í 2010 gjørdist hann leiðari á Stjórnarskrivstovuni í bankanum, og í 2012 tók hann við starvinum sum kredittstjóri. Síðani 2017 hevur hann røkt starvið sum kreditt- og fíggjarstjóri fyri alt samtakið, og samstundis er hann partur av samtaksleiðsluni saman við forstjóranum og rakstrarstjóranum.

Í greinini greiðir Rune m.a. frá, hvussu tað var at læra føroyska málið, og hvussu føroyska samfelagið - hóast sína avmarkaðu stødd - í stóran mun er merkt av altjóða hugsan.

Les greinina "Hvis jeg kan lide mit arbejde, kan jeg arbejde i hele verden" her (krevur hald): www.bit.ly/2RYGcPG
​

Leygardagin tann 15. februar verður Búnaðarstevnan fyriskipað á sætta sinni á Skúlatrøð í Klaksvík. Búnaðarstevnan er ein stevna, sum setur fokus á viðkomandi viðurskiftir innan landbúnað í Føroyum.

Búnaðarstevnan er virkin fyri tey sum hava framløgur og fyri luttakarar. Tú kanst seta spurningar og so hevur tú eisini ein góðan møguleika at samskifta beinleiðis við øll á gólvinum.

Búnaðarstevnan er væl vitjað og neyðugt er at skráseta seg sum luttakara, tí luttøkuplássið er avmarkað.

Skrá:
Fundarstjóri: Karl Johansen, sýslumaður

​10:00: Skráseting
10:30: Jógvan Skorðheim, borgarstjóri í Klaksvík, setur ráðstevnuna.
10:45: Umhvørvis- og Vinnumálaráðið, Helgi Abrahamsen, landsstýrismaður landbúnaður, ferðavinna og umhvørvið
11:30: Uttanríkiðs- og Mentamálaráðið, Hovíkssáttmálin – Jenis av Rana, landsstýrismaður
12:00 Miðmálið

Framløgur:
13:00 Framløga: Jóannes Johannesen: Miðstovugarðurin framleiður/selur: Mjólk, neytakjøt, seyðakjøt, eplir, røtur, umframt ymiskt grønmeti.
13:20 Framløga: Sunniva Gudmundsdóttir Mortensen: matkovin.fo
13:40 Framløga: Heini Mohr Hermansen, Føroya Tele: GPS skipanin Spora
14:00 Framløga: John Mortensen, Jarðir: ein felags pallur fyri jarðareigarar og fyrisitarar
14:30 Framløga: Høgmofjøs AS: Nútímans seyðahús, innrætting, útgerð vm.
15.00 Framløga: Tróndur G. Leivsson, Búnaðarstovan: Seyðahald vm.
​15:30 Framløgur liðnar / kaffi vm.
16:00: Konstruktivur kjakfundur við pallborðið.

Evni er: Ferðavinna og landbúnaður.

Nú hava so jarðareigarar og fyrisitarar tikið stig til at finna eina loysn. Landbúnaðurin er ein náttúrligur partur av ferðavinnumenningini og eigur at fáa góðar karmar og møguleikar til at menna seg innan ferðavinnuøki. Kjakst verður um samstarv, menning og fíggingarmøguleikar og annað viðkomandi. Pallborðsluttakarar verða úr vinnuni og fyri avvarandi mynduleikar.

Fundarstjóri og orðstýrari: Jón Brian Hvidtfeldt
​
18:00 Borðhald
​

Fríggjakvøldið 7. februar kl. 19 skipar Tórshavnar kommuna saman við Hugskotinum og Føroyingafelagnum í Aarhus fyri føroyska tiltakinum Tórskvøld. Tilmelding fer fram her: https://hugskotid.fo/skrseting-aarhus-trskvld Tiltakið er ókeypis og fyri allar føroyskar útisetar – yngri sum eldri.

Komið framvið til eitt hugnaligt kvøld, har Tórshavnar kommuna bjóðar ein heimligan bita úr Føroyum og Okkara bjóðar okkurt leskandi afturvið. Tónleikabólkurin JASMIN spælir til tiltakið og eisini verður møguligt at netverka við aðrar útisetar og umboð úr Tórshavnar Kommunu og Hugskotinum.

Høvi verður at hoyra um fjølbroyttu arbeiðsmøguleikarnar í Tórshavnar kommunu. Annika Olsen, borgarstjóri í Tórshavnar kommunu, fer harumframt at leggja fram um jaligu gongdina í høvuðsstaðnum. Eisini greiðir Hugskotið frá vaksandi huginum og dirvinum hjá føroyingum at skapa sítt egna starv.

Tilmelding til Tórskvøld fer fram á https://hugskotid.fo/skrseting-aarhus-trskvld Tiltakið er ókeypis og tað er avmarkað pláss.

Øll, sum luttaka á tiltakinum, eru við í lutakastinum um ein Sveiggj-ferðaseðil frá Atlantic Airways og ein flytipakka frá Smyril Line!

Hvar: Folkeoplysningens Hus, Vester Allé 8, 8000 Aarhus C, Lokale VA8-105, Foredragssalen

Nær: Fríggjadagin 7. februar 2020 kl. 19

Fyrrapartin í gjár var hátíðarløta í býráðshøllini, tá Guðlagur Johansen (Gulli) fekk sveinabræv. Gulli hevur staðið í læru í Smiðjuni hjá Klaksvíkar kommunu og kann tí kalla seg maskinsmið.

Til móttøkuna fyrrapartin í gjár segði Óla Jákup Bech, tekniskur stjóri, nøkur orð og ynskti Gulla tillukku. Síðani handaði Jan Askham, leiðari í Smiðjuni, honum sveinabrævið og eina gávu frá Klaksvíkar kommunu.

Vit ynskja Gulla hjartaliga tillukku við próvnum.

Kelda. Klaksvík.fo

SáH