​Nýggja hotellið, sum Atlantic Airways fer at reka við Staravegin í Havn, verður eitt Hilton Garden Inn hotell, og stjóri á Hilton í Føroyum verður Martin Restorff.

Hilton Garden Inn Faroe Islands verður navnið á nýggja fýra stjørnu hotellinum, sum Atlantic Airways fer at reka við Staravegin í Havn.

Hotellið verður sostatt partur av heimsumfatandi og navnframu Hilton-ketuni, ið hevur 100 milliónir fólk í sínum kundanetverki, og sum kann draga kundar til Føroyar úr m.a. Asia og USA, har Hilton-ketan er serliga sterk.

Stjóri á nýggja hotellinum verður Martin Restorff, sum hevur drúgvar royndir frá hotell-virksemi bæði í Føroyum og uttanlands.

- Hilton-navnið gevur okkum atgongd til ein umfatandi og spennandi kundaskara, sum vit kunnu selja til alt árið. Føroyar verða við hesum settar á Hilton-heimskortið og saman við tí marknaðarføring, sum longu er og verður gjørd á ferðavinnuøkinum, er hetta ein framúr góður grundvøllur undir nýggja hotellinum, sigur Martin Restorff, sum í næstum setur seg í stjórasessin á Hilton Garden Inn Faroe Islands.

​Hilton-hotellið

Hilton Garden Inn er tann parturin av Hilton-ketuni, ið hóskar seg sera væl til ferðafólk, sum í stóran mun vilja hava virknar frítíðarferðir við náttúruupplivingum. Harumframt hóskar hotellið avbera væl til vinnuferðavinnu økið.

130 stór kømur verða á Hilton Garden Inn Faroe Islands, og tænastur og umstøður liva upp til høga støði hjá altjóða Hilton hotellketuni.

- Vit skulu áhaldandi stremba eftir at geva kundanum tað besta av tí besta, tá talan er um tænastustigið, sigur Martin Restorff.

Hilton Garden Inn Faroe Islands verður byggilistarliga lagað eftir umhvørvinum, og tað verður bygt sambært øllum nútíðar byggireglum og orkukrøvum. Hotellið hevur við sær nýggj arbeiðspláss, og talan verður um eitt snøgt og tíðarhóskandi hotell.

Restorff-stjórin

Stjórin á Hilton Garden Inn Faroe Islands hevur fingist við hotell- og tænastuvirksemi, síðani hann dugdi at ganga. Sigast kann, at Martin Restorff hevur hotell-virksemi í blóðinum. Hann er triðja ættarlið av teimum, sum í síni tíð stovnaðu og róku Hotell Hafnia við Áarvegin í Havn.

- Tú kanst siga, at eg eri vaksin upp á Hafnia, har eg gekk í fótasporunum hjá pápa, pápabeiggja og abba mínum – Johan, MC og Christian-abba. Eg tori at siga, at vit settu altíð kundan í miðdepilin, og hetta ætli eg mær at grunda mítt nýggja starv á, sigur Martin Restorff.

Umframt royndirnar frá hotell-virksemi í Føroyum bæði innan mat, vín og tænastur, hevur Martin Restorff eisini royndir uttanlands frá Radisson SAS Royal í Keypmannahavn. Harumframt hevur hann eitt stórt netverk innan hotell-vinnuna uttanlands.

Seinastu 10 árini hevur Martin Restorff starvast í Eik Banka og Betri-samstakinum, har hann hevur havt leiðandi starv innan tænastuøkið.

JáH (y) 28.09.2018
Kelda: Atlantic Airways

Keyp av biogassverki
Felagið P/f Føroysk Náttúruorka, sum er eitt dótturfelag hjá Bakkafrost, og danska felagið Bigadan A/S undirskrivaðu fríggjadagin 21. septembur eina heildarveitingaravtalu um, at Bigadan skal byggja nýggja biogassverkið, ið Bakkafrost hevur tikið stig til at gera.

Hugskotið at gera eitt biogassverk í Føroyum er gamalt. Í fleiri ár hevur tað verið eyðsýnt, at burturkast frá alivinnuni og tøð frá landbúnaðinum eru virðismiklar ráðvørur, sum kunnu brúkast til biogassframleiðslu og góðskað tøð.

Biogassverkið, sum verður bygt á Skarðshjalla, skal í fyrstu atløgu taka ímóti og viðgera tøð frá mjólkarbóndum, lívfrøðiligt burturkast frá smoltstøðum og frá alingini á sjónum. Biogassverkið kann tó eisini taka ímóti øðrum lívrunnum burturkasti.
​
Avtalan millum Bakkafrost og Bigadan ásetur at biogassverkið skal verða liðugt í desembur 2019.

Nýggjur rakstrarleiðari
Fyrr í ár søkti Bakkafrost eftir rakstrarleiðara til nýggja biogassverkið. Umleið 30 umsóknir komu til starvið og Bakkafrost hevur valt at seta Fróða Mortensen í starvið. Fróði Mortensen er 37 ára gamal og útbúgvin maskinmeistari. Fróði Mortensen starvast í dag sum projektleiðari innan biogass á týsku fyritøkuni innan orkuframleiðslu E.ON. og hevur m.a. verið við til at byggja fleiri biogassverk í Danmark.

Fróði Mortensen byrjar í starvinum 1. oktober.

Kelda: Bakkafrost

SáH

Forkvinnan hjá Betri samtakinum, Aslaug Gisladóttir metir ikki, at Betri kundi hava álit á fyrrverandi stjóri Ben Arabo og tí bleiv hann sagdur úr starvi.

Gisladóttir vildi ikki koma nærri at í Dagur & Viku - hví Arabo so brádliga bleiv uppsagdur, men segði at hetta varð neyðugt at gera.

Fyrrverandi stjórin, Ben Arabo fær heili 2,4 milliónir krónir í løn, sum svarar til eina góða ársløn frá Betri.

JáH (y) 25.09.2018

USA langar hart eftir Kina og dømir Kina fyri at fara so illa við teim muslimsku uigurunum, skrivar NTB.

- Hundrað túsund, kanska milliónir av uigurum (eru ca. 1 - 1,6 uigurar, sum búgva í Kina og meginparturin av hesum tosað sítt egna mál - also ikki málið úr Kina) haldast ímóti sínum vilja á sokallaðum umskúla-leirum, sum tvingar politiska indoktrinering ella ein aðra ræðuliga mishandling, segði uttanríkismálaráðharrin Mike Pompeo fríggjadagin, tá ið hann tosaði um trúarfrælsi runt um í verðini.

JáH (y) London, North Greenwich 22.09.2018

​Umsetningurin í smásøluni verður gjørdur upp hvønn ársfjórðing í trimum høvuðsbólkum, sum eru matur og alkoholfríar drykkjuvørur, klædnavørur og fótbúnaður og búnýti og innbúgv. Samanborið við sama tíðarskeið í fjør vaks umsetningurin í høvuðsbólkinum búnýti og innbúgv knappliga tólv prosent annan ársfjórðing 2018.

Í høvuðsbólkinum klædnavørur og fótbúnaður var vøksturin munandi minni, við knappliga trmum prosentum. Sølan av mati og alkoholfríum drykkjuvørum vaks við gott trimum prosentum.

Les meira HER

Kelda: Hagstovan