​TÝÐANDI SAMSTARV MILLUM KOMMUNUNA OG VINNUNA
Fundur var í morgun millum borgarstjóran, Karl Johansen, og Vinnulívsráðið.

Endamálið hjá Vinnulívsráðnum er at fjálga um vinnulívið í Norðoyggjum, og tískil er samstarvið millum Vinnulívsráðið og kommununa ein týðandi liður í menningini av kommununi, sum eisini ynskir at stuðla undir, at vinnulívið í býnum hevur góðar karmar at virka undir.

Vinnulívsráðið skipar javnan fyri netverksfundum, har sjóneyka verður sett á aktuell mál. Harumframt eru javnan framløgur frá fyritøkum í Norðoyggjum, sum kunna um sítt virksemi.

Klaksvíkar Kommuna

BankNordik hevur í dag skrivað undir avtalu við Spar Nord, ið ber við sær, at Spar Nord yvirtekur danska bankavirksemið hjá BankNordik fyri bókaða virðið umframt 255 mió. kr. í goodwill. Orsøkin til søluna eru høgu kapitalkrøvini, ið skerja framtíðar kappingarførið hjá bankanum í Danmark.
BankNordik rekur í dag virksemi í Føroyum, Danmark og Grønlandi, og sum SIFIpeningastovnur (Systemically Important Financial Institution) í Føroyum skal bankin lúka hægri kapitalkrøv, t.e. vera betur bjálvaður, enn kappingarneytarnir í Danmark. Hóast BankNordik hevur gjørt stór framstig á danska marknaðinum seinastu árini, eru hækkandi kapitalkrøvini ein vansi fyri møguleikarnar hjá bankanum at standa seg í framtíðar kappingini við danskar peningastovnar, ið eru sum BankNordik til støddar.
Henda avbjóðing er ikki galdandi fyri virksemið í Føroyum og Grønlandi, har bankin virkar undir á leið somu treytum sum kappingarneytarnir. BankNordik hevur samskift við avvarðandi myndugleikar í eini roynd at broyta kapitalkrøvini fyri danska virksemið, men tað hevur verið uttan úrslit. Nú ein nøktandi avtala er fingin í lag við Spar Nord, er avgerð tí tikin um at selja.
”Okkara virksemi í Danmark hevur ongantíð roynst so væl sum júst nú, og tí harmast vit um, at tað ikki hevur borið til at fáa lægri kapitalkrøv fyri danska partin av bankanum, so vit kunnu halda fram á góðu kósini. Samstundis eru vit eftir umstøðunum sera væl nøgd við søluprísin, ið er eitt greitt prógv um, at Spar Nord yvirtekur eitt lønandi virksemi frá okkum,” sigur Árni Ellefsen, forstjóri í BankNordik.
”Tað hevur alstóran týdning fyri okkum, at bæði viðskiftafólk og starvsfólk fara at trívast í Spar Nord, soleiðis at vit við okkara tænastum megna at byggja víðari á góða grundarlagið hjá BankNordik,” sigur Lasse Nyby, forstjóri í Spar Nord, ið telist millum størstu peningastovnarnar í Danmark.
BankNordik hevur miðsavnað ávísar uppgávur í Føroyum, og tí arbeiða nógv føroysk starvsfólk í dag við uppgávum, ið viðvíkja danska og grønlendska virkseminum hjá samtakinum. Tá ið danski parturin verður seldur, fara uppgávurnar á ávísum føroyskum deildum at minka samsvarandi, og tí verður tørvur á færri starvsfólkum í Føroyum, tá ið danska virksemið er endaliga avhendað miðskeiðis í 2021. Bankin kannar nú, hvussu arbeiðið frameftir skal skipast innanhýsis. Væntandi fara summi starvsfólk at verða flutt í onnur størv, men longu nú er greitt, at tað eisini fer at verða neyðugt at siga fólk úr starvi.
Umframt at vera eitt týðandi fíggjarsamtak í Føroyum hevur BankNordik góð 20% av marknaðinum í Grønlandi. Samtakið fer framhaldandi at leggja dent á at røkja góða sambandið við viðskiftafólkini og veita kappingarførar tænastur til privat húski og vinnulív á báðum marknaðum. Málið er at varðveita marknaðarstøðuna í Føroyum og skapa lønandi vøkstur í Grønlandi.
Sølan av danska virkseminum er treytað av góðkenning frá Fíggjareftirlitinum og kappingarmyndugleikunum og verður væntandi framd 1. mars 2021. Bankin væntar, at sølan fer at geva ein vinning millum 70 og 90 mió. kr. í ársroknskapinum fyri 2021.
BankNordik

​Sáttmálaskeiðið er 3 ár og 3 mánaðir, frá 1.10.2019 til 31.12.2022.

Lønarhækkingin fyrsta árið er sum hjá øðrum feløgum, meðan lønarhækkanirnar annað og triðja árið eru í krónum.

Mánaðarlønin hækkar 795 kr. 1. oktober 2019.

Mánaðarlønin hækkar 698 kr. 1. januar 2021.

Mánaðarlønin hækkar 499 kr. 1. oktober 2021.

Herumframt eru onkrar smávegis broytingar í sáttmálatekstinum.

Landsstýrismaðurin fegnast um, at lønarhækkanirnar eru í krónum øll trý árini, soleiðis at tey lægstløntu fáa lutfalsliga hægri lønarhækkan enn tey hægri løntu.

Semjan kann lesast her. 

Fíggjarmálaráðið 14. desember 2020.

​Týsdagin 1. desember hevur Nám sett hundrað fólkum úr fólkaskúla, miðnámi og fróðskaparsetri stevnu at møta á Hotel Føroyum. Tá fer Steffen Löfvall at standa fyri einum visiónsseminari um leiklutin hjá kt-didaktikki í undirvísingini nú og komandi. Tóri Slættalíð er orðstýrari á degnum. 
 
Við teimum tilmælum, sum heilsumyndugleikaranir ráða til í sambandi við koronasmittuna, er plássið so mikið avmarkað, at ikki fleiri enn hundrað fólk rúmast í hølunum. Leiðslur úti um landið hava funnið teir lærarar, sum verða við.
 
Hetta er fyrsta tiltak í eini tilgongd, har orð verða sett á nakrar visiónir um leiklutin hjá kt-didaktikki í undirvísingini í Føroyum. Endamálið er eisini at savna fakfólk, sum úr ymsum lærugreinum hava áhuga fyri kt-didaktikki og saman við teimum at kortleggja og skifta orð um staðbundnar kt-didaktiskar royndir.
 
Dentur verður lagdur á at samskipa visiónir. Tí fer dagurin at verða settur saman av stuttum fakligum framløgum, bólkapráti, samskrivingarverkstovum og felags samanumtøkum, siga fyrireikararnir í Námi.
 
Eftir seminarið verður tilfarið savnað og skrivað liðugt.
 
- Á visiónsseminarinum hyggja vit at kt-didaktikki sum eitt fakøkið, ið fevnir um tey trý vitanarøkini didaktikk, tøkni og fak, sigur Tóri Slættalíð, sum fyrireikar seminarið.
 
- Men visiónsarbeiðið endar ikki við hesum eina degi, men heldur fram at definera kt-didaktikk í føroyska undirvísingargeiranum. Í so máta er dagurin eitt byrjanarskot til nýggja fatan av, hvussu vit skulu brúka KT.

Nám

SáH

Lýst verður til almenna kapping, ið er at seta navn á nýggju KT-skipanina, sum Uttanríkis- og Mentamálaráðið, Undirvísingarstýrið og Nám hava tikið seg saman um at gera til tað føroyska undirvísingarverkið. 

Til tess at ímynda tað samstarv, sum nýggja KT-skipanini í øllum liðum byggir á, er tað eitt krav, at í minsta lagi fýra fólk eru við í uppgávuni at finna eitt navn, júst tí at hon krevur samstarv. 

Umframt, at navnið skal verða eyðsýnt og lættliga kennast aftur, skal tað eisini vera nýtiligt í teim ymsu undirvísingarumhvørvunum.

Heildarætlanini um nýggju KT skipanina, sum varð handað landstýrismanninum fríggjadagin 4. september 2020, sæst á heimasíðuni hjá Undirvísingarstýrinum og á Snar. 

Freistin at senda navnauppskot inn til dómsnevndina er úti fríggjadagin 4. desember 2020.

Í Dómsnevndini eru umboð fyri Undirvísingarstýrið, Nám og Talgildu Føroyar. Dómsnevndini tilskilar sær rætt at velja frítt millum innkomin uppskot, eisini at laga til ella vraka uppskot.

Vinningurin í kappingini um navnið á nýggju KT-skipanini fyri Undirvísingarverkið er 20.000 krónur.

Uppskot verða send til: uvs@uvs.fo
Vinnarin verður kunngjørdur á samkomu í Undirvísingarstýrinum í januar 2021. Hettar verður lýst nærri, og øll sum senda inn, fáa beinleiðis boð um úrslitið.

Ynskja tit at vita meira um hesa kapping, eru tit vælkomin at skriva til uvs@uvs.fo

Undirvísingarstýrið

Hetta verður hildið við rundstykkum og wienarbreyði í kantinuni í nýggja H - bygninginum.
​
Tann 29. oktober hátíðarhildu vit, at vit hava havt 400 skaðafríar dagar í arbeiðinum við nýggja H - bygningin á Landssjúkrahúsinum. At vit kunnu hava 400 skaðafríar dagar, kunnu vit takka okkara dugnaligu arbeiðstakarum og øllum teimum, sum eru við til at gera teirra arbeiðsdag tryggan og skaðafrían. 

Landsverk er byggiharri, og í 2015 byrjaði sp/f Grettir at grava út, og sjálv byggingin byrjaði í januar í 2017. MT Højgaard, Húsavarðartænastan, Demich og EL.FO eru høvuðsarbeiðstakarar. 

Landsverk fegnast um góðu gongdina og vóna vit, at vit kunnu halda áfram við enn fleiri skaðafríum døgum.

Myndirnar hevur Kristian Niclasen hjá SNA tikið.

Kelda: Landsverk 

Tá ið eg vitjaði á grótinum á Bumshamri í seinastu viku, tá tosaði eg við ein lastbilasjáfør og hann segði at tað ikki bara var ein sera stórur trupuleiki at sleppa av við avgresturin í Klaksvík, men tað var eisini ein stórur trupuleiki at fáa grót og skerv til húsabygging og hann var noyddur at fáa tað aðrastaðni frá í Føroyum og tað kostaði sera nógv fyri húsaeigarnir, sum byggja sær hús í hesum døgum, tí hann skuldi koyra langa veg til at fáa fatur á tilfarinum, tað kostaði bæði tíð, bensin, tunnilsgjald og flerir ferðir ígjøgnum árið hava útgrevsturin av húsum ligið púra stilt av hesum orsøkum, sum er lýst omanfyri.

Hetta má fáast í rættlag skjótast gjørlit eftir 10. november, tí tað fer at vera ein sera stórur trupuleiki, tá ið øll 91 grundstykkini á Fossum fara ígongd og at man ikki sleppur av við avgresturin og man ikki fær grót og skerv til húsini.

Onki er hent við útstykkingini á Fossum síðan juni í ár og her má ruddast upp í Klaskvíkar Býráð, so gongd kann fáast aftur á hesu verkætlan.

Til seinasta val lovaði Sjálvstýrisflokkurin sera nógv, eitt lyfti frá Borgmeistarnum og Kristian Eli var, at útstykkingin á Fossum skuldi vera liðugt í 2017 og hópin av pengum blivu avsett til hesa útstykking, men einasta sum er hent, tað var í summar nevnliga í 2020, tá ið borgmeistarin við hópum av myndamonnum koyrdi eina gravmaskinu á økið og setti skuffuna í, ikki gott nokk, lætt at lova og so er at halda givin lyftir, NOKK GRIVIÐ, GERIÐ LIÐUGT.

Er tað soleiðis ein skal stýra eina Kommunu, so veljið til Jógvan Skorheim, men vilja tit tað ørvísið, har borgarnir í Klaksvík fáa rein og greið boð, hvat hendur við útstykkingini á Fossum, so er at velja Símun á Høvdanum tann 10. november, tí SO VERÐUR TAÐ GJØRT.

​Símun á Høvdanum

Hetta var tað Klaksvíkar Kommuna lovaði til valið seinast og tað skuldi standa liðugt í 2017.   

Nú eg eri uppstillaður til Býráðsvalið tann 10. november, so havi eg verið og hugt eftir okkara kæra býi.

Týsdagin tann 13. oktober var eg og vitjaði trý støð, gamla Buckwald, nýggja Buckwald og neystini norðuri í Strond.

Var eitt sindur í sjokk, hvussu lítið skil tað var í gamla Buckwald ella rættari sagt á Grótbrotinum. Har hevði ein fortalt mær, at ein gravmaskina hevði staðið still í vikuvís og har bleiv als ikki tikið frá, tá ið teir vippaðu mold í Grótbrotið.

Eg gjørdi ikki mætari og fór á staðið og har var sjón fyri søgn, ongin var í gravmaskinuni og hon var næstan undirgrivin av mold, sjá mynd omanfyri.

Eisini sá vegurin ræðuligur út, har mold og eyrur rann oman brekkurnar, sjá filmsklipp og myndir herundir. Stakkals fólk sum búgva á Bumshamri og har á leið, har má vera ræðuligt at búgva, bæði viðvíkjandi larmi, mold og støv, har hundratals lastbilar ígjøgnum hesu seinastu árini hava koyrt framvið fulllessaðir av mold og nakað skitið hevur verið og har allur lorturin er komin á húsini og bilarnar. Rokni heldur ikki við at tit hava havt møguleikan at turka klæðir uttandura, tí har hevur verið nakað nógv støv og lortur frá lastbilinum og tað hevur sjálvandi komi á klæðini.  

Tað mest ræðandi var týsdagin var, tá ið ein lastbilur bjóðaði mær við til uppkoyringina norðanfyri. Hann ávaraði meg áðrenn, at vit kanska ikki sloppi uppá við lastibilinum og vildu illa til, so kundi vit fara á glið og so mátti man halda sær fast. Vit høvdu tóma last og so setti hann ferð á lastbilin og tá ið vit vóru komin næstan upp, so spolaði lastbilurin og vit fóru á glið omaneftir, men tíbetur hevði lastbilssjáførurin roynt hetta áður og vit fóru ikki útav, sjá myndina herundir av sporinum av lastbilinum. Lukkutíð komi vit oman aftur og mítt blóðtrýst var í topp, hatta er ikki fyri sartar sálir.

Handan trupuleikan við at sleppa av við moldina í Klaksvík fer at vera uppaftur størri í 2021, tí til jólar, so siga menn, at Grótbrotið er fult og so má finnast eitt annað stað at sleppa av við avgresturin og sleppur man ikki av við avgresturin, so steðgar allur útgrevstur upp í Klaksvík og tað kann fáa óbøtaligan skaða fyri Klaksvíkar Kommunu.

Hvat sigur samgongan í Klaksvíkar Býráð til hendan trupuleikan og hava tit eina loysn á málinum?

Símun á Høvdanum

Tað frættist frá álíkandi keldum at borgmeistarin Jógvan Skorheim hevur keypt Alfa Bókahandil. 

Jógvan Skorheim hevur keypt Alfa Bókahandil saman við Beintu Gregersen og Maritu Samson.

Sindur løgi, at Norðlýsið skrivaði um søluna í teirra Portali í gjár og ikki nevndu hvør hevði keypt Alfa, hetta skrivaðu teir ígjár: Alfa Bókahandil skiftir eigarar í næstum, Í løtuni sæst fólk rigga til at lata upp.....

​Sjálvandi veit Norðlýsið, at tað er Jógvan Skorheim, sum hevur keypt Alfa Bókahandil, men vit á News.fo og Norðoya Portalinum eru ikki 100 prosent sikkur, tí skulu tíðindi takast við eitt sindur av fyrivarni, men væntandi vera tíðindi váttaði ella avsannaði í dag ella í morgin. 

Prísurin fyri Alfa Bókahandil er ikki upplýstir, men væntandi bleiv hann seldur fyri ímillum 6-7 milliónir, men tað er bara ein meting frá mínari síðu av.

Vit ynskja nýggju eigarnum hjartaliga tillukku við keypinum og takka gomlu eigarnum Torbjørn Bringsberg og konuni fyri góða tænastu øll tey mongu árini tey høvdu Alfa Bókahandil.

SáH

Landsstýrið skjýtur upp at hækka játtanina til Heilsufrøðiligu starvsstovuna, til vistfrøðiliga merking av tara og taravørum

“Besta prísin fær bert tarin, sum hevur vistfrøðiliga merking, og tað hevur tí alstóran týdning fyri føroysku alifyritøkurnar at tær kunnu fáa hesa góðkenning í Føroyum”, sigur Helgi Abrahamsen, landsstýrismaður, nú fíggjarlógaruppskotið fyri 2021 er lagt fram.

Altjóða áhugin fyri at nýta tara til matna og taraúrdráttir til ymsar hágóðskuvørur er skjótt vaksandi, umstøðurnar at ala tara í Føroyum eru avbera góðar og áhugi er fyri at keypa føroyskan tara í stórum nøgdum fyri góðan prís. 

Alilógin bleiv í 2018 broytt so at taraloyvi kundu latast. “Fyritøkurnar, sum ala tara, hava higartil framleitt á royndarøkjum, men nú fyrstu taraloyvini eru latin, hava fyritøkurnar fingið tryggari karmar og møguleika fyri at vaksa um framleiðsluna. Tí hevur tað stóran skund eisini at fáa vistfrøðiligu góðkenningina upp á pláss, so at tarin og vørur við tara kunnu verða seldar fyri besta prísin,” sigur Helgi Abrahamsen. 

Landsstýrið raðfestir í fíggjarlógaruppskotinum at hækka játtanina til Heilsufrøðiligu starvsstovuna, sum í 2021 fer undir at fáa skipan í lag til vistfrøðiliga merking av tara og taravørum, sum verður góðkend í ES og USA.

Uttanríkis- og Vinnumálaráðið