Aftur hesaferð setti Klaksvíkingurin allar hinar bátarnar upp á pláss og aftur hesaferð var starturin avgerandi, teir løgdu seg á odda frá byrjan av og á veg inneftir økti teir bara um leiðsluna, størstu kappingina fingu teir frá Havnabátinum, men Norðingur var eisini beint í hølinum á teimum.

Tá ið málið var hálvt rógvin og teir nærkaðist Molanum legði Klaksvíkingurin seg hálva bátslongd framum hinar bátarnar og hesa leiðsluna hildu teir heilt til málið. Sera vakur róður og Klaksvíkingur kann við røttum kallað seg Føroyameistarar 2022.

Stórt tillukku við sigrinum og stórt tillukku við Føroyameistaraskapinum.

SáH

Ólavsøkuróðrurin hjá Páll Fanga var eisini vunnin sannførandi, men tað var sera javnt alla vegin inneftir og tað helt sær heilt til 100 metrar vóru eftir at rógva, tá gjørdi Páll Fangi ein øgiligan endaspurt og tað endaði við at Páll Fangi vann við einari bátslongd.

Stórt tillukku við sigrinum og Føroyameistaraskapinum.

SáH

Fípan Fagra fekk ein góðan start og legði seg á odda frá byrjan av, Teistin royndi at hanga í, men tá ið tær komu inn móti Molanum byrjaði Fípan at økja um leiðsluna.

Tær vóru hálva bátslongd frammanfyri og tá ið 300 metrar vóru eftir vóru tær eina bátslond frammanfyri og tær økti allan vegin inn og tá ið teir komu á málið vóru tær 2-3 bátslongdir fremst og komu klárt fyrstar á mál, sjá mynd herundir.

Spenningurin var um annað plássið og har gjørdist tveir bátar nummar tvey, tær vóru púra javnar, nevnliga Teistin og Firvaldur og blivu sostatt nummar tvey bæði á Ólavsøku og í FM stríðnum.

Stórt tillukku Fípan Fagra við sigrinum og Føroyameistaraskapinum.

SáH

KÍ leikti ein góðan dyst í kvøld og hevur spælt seg víðari í UEFA Conference League 2 umfar.

Teir vunnu 1-0 á FK Sutjeska á Djúpumýru og var tað málkongurin Páll Klettskarð sum avgjørdi dystin í 65. min., har hann stútaði bóltin í málið hjá FK Sutjeska eftir sera góðum innleggi frá Árna Frederiksberg, sum aftur var at síggjá á KÍ liðnum eftir at hann var vrakaður til báðar dystirnar ímóti Bodø Glimt.

Seinastu minuttirnar leikaði hart á málið hjá KÍ, men KÍ vardi væl og dómarin sum hevði lagt 5. min. í eykatíð floytaði dystin av í 95. min. og KÍ vann uppiborið og hevur spælt seg í 3. umfar.

Fantastiska flott klára og stórt tillukku.

SáH

Skjótisamband Føroya (SkF) hevur úttikið 6 íðkarar, at umboða Føroyar í heimsmeistarakappingini í leirdúgvuskjóting, sum verður í Kroatia, Osijek í døgunum 19. sep. til 12. okt. 2022.

Hetta er fyrstu ferð at SkF úttekur eitt landslið, at umboða Føroyar í eini altjóða skjótikapping. Áðrenn hava íðkarar, sum hava havt mál at luttaka í altjóða kapping, verði noyddir at umboða danskt felag, og verða úttikin umvegis danska skjótisambandið.

Men við góðari hjálp, hevur tað eydnaðist SkF, at fáa viðurkendan limaskap í altjóða skjótisambandinum ISSF, og kunnu íðkarar nú kappast undir Merkinum, á jøvnum føti við onnur lond í heiminum.

Íðkarar ið fara at umboða Føroyar er hesir.
Trap
Jón Jacobsen
Alex Johannesen
Johnhard Klettheyggj

Skeet
Marius F. Joensen
Tórur Fløtt
Jóannis Joensen

Aftrat hesum verða Esmar Joensen við sum ferðaleiðari í trap ferðaliðinum, og Hans Erik Jensen í skeet ferðaliðinum.

Um eina viku fer eitt annað landslið til norðurlandameistarakapping í Finnlandi. Hetta landslið er samansett av næstan somu íðkarum, sum fara til heimsmeistarakappinga, men Marius og Jón verða ikki við, í teirra stað eru úttikin Jóhann Fløtt og Jeppe S. Bruun.

Skjótisamband Føroya

Jákup Biskupstø Andreasen og KÍ hava longt samstarvið til og við 2024.

Hóast síni einans 24 ár, hevur klaksvíkingurin verið partur av Betri Deildini seinastu 8 árini. Jákup fekk debut tann 1. oktober 2014, tá KÍ vann 3-0 á Skála við Djúpumýru. Síðan tá hevur Jákup tørnað út fyri besta liðið heili 217 ferðir.

Í 2019 gjørdist tann tá einans 20 ára gamli miðvallarin liðskipari, og var fyrsti maður at lyfta FM steypið fyri KÍ síðan pápi hansara lyfti steypið í 1999.

Í seinastuni hevur lokali miðvallarin bitið seg fastan í A-landsliðshópin, og eru vónirnar stórar og bjartar um framtíðina.

Vit ynskja Jákup framhaldandi bestu eydnu í KÍ!

KÍ - Klaksvíkar Ítróttarfelag

Mads Boe Mikkelsen og KÍ hava longt samstarvið, og gleðast vit um at vit eiga landsliðsleikaran eisini til komandi kappingarár.

Mann kann ikki siga at Mads B. Mikkelsen hevur smæðst burtur á vøllinum í ár. Hann hevur við sínum framúr fótbóltslagið og hegni, víst seg at verið ein fong fyri felagið, og nú kunnu vit staðfesta, at Mads eisini er okkara komandi kappingarár.

Mads hevur røkt fleiri pláss hetta kappingarárið, har tekniski snildleikin hevur víst seg til at geva KÍ liðnum eitt gott hugflog í samanspælinum frameftir vøllinum. 
Hóast hann hevur spælt í Føroyum í góð tvey ár, so hava vit endiliga sæð Mads spælt regluliga, orsaka av skaðum - og síðani hann er komin til KÍ, hevur Mads veruliga víst seg fram - og hevur hann verið kallaður inn til landsliðið av tí sama.

Vit eru errin av at vit eisini hava Mads til komandi kappingarár.

Koyr á KÍ

KÍ - Klaksvíkar Ítróttarfelag

Á vestanstevnu í gjár, 16. juli 2022 hendi eitt álvarsligt óhapp, sum gjørdi, at Sjóherji við 6 mannaførum masters kvinnum koppaði.

Óhappið hendi úti á startinum, áðrenn róðurin hjá seksmannaførum kvinnum masters skuldi skjótast í gongd. Startlínan var slakkað, og ein bogi kom í línuna úteftir av fjarandi sjógnum. Tá startlínan varð strammað upp, lá Sjóherji omaná, soleiðis at startlínan kom upp undir árarnar á stýriborðssíðu. Báturin koppaði av hendingini, og manningin endaði á sjónum.

Fólk á staðnum bóru skjótt at, og manningin á Sjóherja varð beinanvegin fingin upp úr sjónum og inn á land, har neyðug hjálp var klár. Eftir stuttari løtu fekk manningin eisini bjóðað kreppuhjálp frá serkønum.

Hinar masters kvinnumanningarnar og formenn/-kvinnur í øllum róðrarfeløgum fingu somuleiðis SMS-boð við tilboði um kreppuhjálp á staðnum til tey, sum høvdu tørv á tí.

Róðrarsambandið harmast um, at almenn kunning ikki kom út so skjótt, sum óhappið hendi. Øll á staðnum vóru upptikin av at hjálpa manningini á Sjóherja á besta hátt, og hetta varð raðfest fram um alt annað. Róðrarsambandið harmast somuleiðis um, at bland kom í bátanøvnini í kunningini, har Sjódrekin hjá Skála Róðrarfelag av misgáum varð nevndur.

Eftir óhappið kann Róðrarsambandið staðfesta, at tilbúgvingin hjá Róðrarsambandinum, fyrireikarunum og øðrum virkar til fulnar, og at øll, sum hava hjálpt til í støðuni, hava rós uppiborðið.

Róðrarsambandið tekur støðuna í størsta álvara og tekur neyðug stig fyri at tryggja, at slíkt ikki endurtekur seg.

Hetta verður gjørt á fundi í kvøld, har umboð fyri Róðrarsambandið og fyrireikararnar av vestanstevnu luttaka og eftirmeta hendingina.

Róðrarsamband Føroya

Jóannes Bjartalíð og KÍ hava longt samstarvið inntil 2024!

Jóannes Bjartalíð fekk sínar fyrstu minuttir á besta liðnum í 2014, og hevur síðani leikt 237 dystir fyri okkum - harav 198 dystir eru leiktir í landskappingini.

Jóannes Bjartalíð hevur skorað 109 mál og lagt upp til eina rúgvu av málum.

Vit eru errin av, at vit hava ment leikarar sum Jóannes, sum hevur síðani hann var heilt ungur, meiri ella minni verið fastur maður á liðnum - serliga við hansara framúr bóltførleika, taktiska snildi og hørðum arbeiðið, hevur ment seg til ein av okkara leiðandi leikarum.

Til og við 2024, eiga vit eisini Jóannes Bjartalíð, og gleða vit okkum til fleiri góðar løtur við 10'arnum á vøllinum!

Koyr á KÍ

​KÍ - Klaksvíkar Ítróttarfelag

​Klaksvíkingur fekk ein super start og løgdu seg á odda beinanvegin og hesa leiðsluna hildu teir allan vegin inn og tá ið hálvt málið var rógving, vóru teir næstan eina bátslongd frammanfyri hinar bátarnar, men í endasspurtinum nærkaðist Norðingur, men Klaksvíkingur hevði støðuna undir kontrol og enn einaferð setti teir Norðing upp á pláss og vunnu hampuliga trygt.

Stórt tillukku til Klaksvíking og nú kunnu teir kallað seg føroyameistarar, tí teir kunnu ikki takast aftur í stigum. Einasta sum kann taka føroyameistaraskapi frá teimum í ár, er um teir vera kolldømdir á Ólavsøku.

Stórt tillukku við sigrinum og føroyameistaraskapinum.

SáH