Mánadagin 4. juli skrivaðu Klaksvíkar, Fuglafjarðar og Eysturkommuna undir avtalu við Tannspenn sp/f, v/Halldis á Grønastøð sertannlækna í ortodonti.
Sambært § 2 í lógini um barna- og ungdómstannrøkt skulu øll kommunustýrið tryggja øllum børnum og ungum undir 18 ár, sum búgva í kommununi, møguleika fyri ókeypis fyribyrgjandi og viðgerðandi tannrøkt, og tað er júst hetta, sum henda avtalan tryggjar øllum børnum og ungum í Klaksvíkar, Fuglafjarðar og Eysturkommunu.
Eitt frambrot fyri sertannviðgerðina
Í drúgva tíð hevur tað verið breið semja um, at tørvur er á at samskipa sertannviðgerðina í Føroyum millum fleiri kommunur, tí talan er um eitt so avmarkað og fakliga krevjandi øki, at ein einsamøll kommuna ikki hevur grundarlag til tað einsamøll.
Hetta er orsøkin til, at borgarstjórarnir og kommunustjórarnir í Klaksvíkar, Fuglafjarðar og Eysturkommunu seinastu tíðina hava samráðst sínamillum og við Tannspenn sp/f, v/Halldis á Grønastøð, sum í løtuni er einasti sertannlækni í ortodonti í Føroyum.
Skipanin hevur higartil verið merkt av, at útlendskir sertannlæknar regluliga hava vitjað og viðgjørt føroysku børnini, men við hesum verður grundarlag skapt fyri einari føroyskari loysn, sum er á staðnum og tøk alt árið runt.
Tvey ára sáttmáli
Við ávísum fortreytum kemur undirskrivaða avtalan í gildi 1. aug. 2016 og fyrsta avtalutíðarskeiðið er til 1. aug. 2018, tvs. 2 ár, soleiðis at skipanin kann verða eftirmett áðrenn hon ætlandi verður longd.
Somuleiðis liggur í avtaluni, at sertannlækin og kommunala tannrøktin regluliga hittast til faklig statusprát.
Talan er um eitt samstarv millum kommunalu tannrøktirnar hjá luttakandi kommununum og sertannlæknan, har tær kommunalu tannrøktirnar, eftir ráðgeving frá sertannlæknanum, leggja til rættis og fremja ortodontiskar kanningar og visitatión av børnunum. Eftir ávísing frá sertannlæknanum gera kommunalu tannrøktirnar somuleiðis fyribyrgjandi, fyrireikandi og neyðugar tannviðgerðir.
Myndatekstur: Erik Lervig, kommunustjóri í Eysturkommunu, Tummas T. Eliasen, kommunustjóri í Klaksvíkar kommunu, Jógvan Skorheim, borgarstjóri í Klaksvíkar kommunu, Sonni á Horni, borgarstjóri í Fuglafjarðar kommunu, Halldis á Grønastøð, sertannlækni hjá Tannspenn, og Jonna Sjúrðarberg, tannlækni hjá Tannspenn, eru her avmyndað uttan fyri býráðshúsið í Klaksvík eftir undirskrivingina av avtaluni um sertannviðgerð av borgarum 0-18 ár í kommununum.
JáH (y) 12.07.2016
Kelda: Klaksvíkar Kommuna