Tað var gleðiligt at hoyra at virkið í Skopun við nýggjum eigarum, er farið í gongd aftur. Tað er gott fyri okkum øll, ikki minst fyri sandoyingar, sum nú hava fingið arbeiðið aftur.

At Jónleif Johannesen eisini er glaður um at privatur kapitalur kann skapa arbeiði til nógvar hendur á Sandoynni, gleðist eg yvir.

At Jónleif eisini heldur at politiski myndugleikin (sum hann er sjálvur partur av), ikki skal leggja fótonglar fyri einum flakavirki sum tað í Skopun, ja, tað gleðir meg eisini.

Men sami Jónleif Johannesen var við til at samtykkja eina lóg, sum legði fótonglar fyri ætlaðu útbyggingina av Kósavirkinum í Klaksvík.

Ein stendur undrandi at síggja Jónleif Johannesen skriva um, ikki at leggja fótonglar fyri flakavirki í Skopun og sami maður himpraðist ikki við at leggja fótonglar fyri ætlaðu útbyggingunum á Kósavirkinum.

Vit eiga at skapa tryggar og góða karmar fyri alt okkara vinnulív.

Jákup Mikkelsen, tigmaður Fólkaflokksins

​So varð aftur ein hóttan um at skerja túratalið um firðir og sund, at forða okkum sum búgva úti á oyggjunum í Føroyum at flyta okkum millum oyggja.

Pengar mangla í, og hevur politiska skipanin vitað hetta í rúma tíð. Men vegna vantandi stev innanhýsis í samgonguni á Tingi, er ongin eykajáttan fingin til vega.

Fyri okkum sum liva skulu við hesum umstøðum er hetta bara vorðin gerandiskostur, hetta at hava hóttanir um skerda tænastu hangandi yvir høvdinum, og halda vit bara ondini fyri at vita hvønn okkara tað man fara at ganga útyvir hesuferð.

Heðin Mortensen, landsstýrismaður, hevur tikið ræði av øllum stovnum undir.

Samferðslumálaráðnum, ja, enntá varð hann virkandi stjóri á Landsverk eitt tíðarskeið. Umraðfestingar og nýtt virksemi ímóti viljanum hjá stjóranum á SSL hava gjørt sítt til, at pengar nú aftur mangla í til at reka tað tænastu sum játtanin frá Tinginum varð latin til.

Í meðan alt hetta rokilsi er veruleiki, hevur Landsverk í langa tíð vitað av, at grót enn einaferð er komið í innsiglingina í Skopun, við teirri avleiðing at Teistin má halda seg longri frá molanum enn vanligt, og at siglingarrennan nú er sera smøl at sigla inn ígjøgnum. So smøl at tað nøkulunda gongur at sigla inn meðan summarveðrið liggur, men vandi er fyri nógvum avlýsingum í heyst og í vetur. Hóast hetta varð staðfest fyri rúmari tíð síðani, er onki gjørt fyri at rudda grótið burtur.

Sandoyggin hevur als ikki møguleika at missa ein einasta túr við Teistanum, og við tí aktiviteti í oynni ið stendur fyri framman, er Teistin alt ov lítil frammanundan.

Tí heiti eg á stjóran á SSL ella Heðin Mortensen, landsstýrismann, hvør so enn hevur stýrisvølin, um at sleppa møguligum ætlanum at taka túrar burtur hjá Teistanum, og at brúka pengar beinanvegin til at rudda innsiglingina í Skopun fyri grót.

Uppgávan eftir valið verður at fáa fatur í meiri kapasiteti at sigla um fjørðin, og hetta ætli eg mær at brúka stóra orku uppá, um mær eydnast at vinna sessin á Tingi komandi setu.

Brandur Sandoy, Borgarstjóri og valevni Fólkafloksin

Meðan samgongan og landsstýrisfólkini “spæla” politikk (tey hava jú ikki meirilutan fyri nøkrum politikki), eru Sjúrður Skaale og KVF farin undir at skipa valstríðið til komandi løgtingsval.

Í staðin fyri at tosa um politiskta atgerðarloysið, sum hevur kostað føroyska skattgjaldaranum ørðandi milliónaupphæddir, orsaka av meirnýtsluni av byggiverkætlanum sum Glasir og H-bygninginum á Landssjúkrahúsinum, eru Sjúrður og KVF farin at tosa um, hvørjar treytir ymisku flokkarnir skulu lúka fyri at “sleppa” í samgongu við Javnaðarflokkin aftaná løgtingsvalið.

Fólkatingsmaðurin Sjúrður (tillukku við flotta valinum) tekur útgangsstøðið í, at Javnaðarflokkurin heldur áfram í landsins leiðslu. Hann veit væl, at Javnaðarflokkurin lítið og onki hevur avrikað í landsstýrinum. Tí ræður um at venda kjakið inn á onnur viðurskiftir, og er hann tí, saman við KVF, farin undir at seta Javnaðarflokkin í miðdepilin fram til løgtingsvalið.

Endamálið er at fáa veljaran at gloyma politisku gølurnar og fáa alt kjakið at snúgva seg um alt annað enn førda politikkin.

Tórskvøldið skuldi Høgni Hoydal standa til svars í D&V. Ikki fyri førda fiskivinnupolitikkin ella manglandi politikkin, men um eina yvirlýsing á flokstinginum hjá Tjóðveldi fyrr í ár. Førdi politikkurin, sum Javnaðarflokkurin er partur av, skal krógvast, og tí bleiv Høgni Hoydal ikki spurdur um, hvar menningarkvoturnar blivu av, hví ongin avtala er gjørd um fiskiskapin eftir sild og svartkjafti, hví ongar nýíløgur verða gjørdar í føroyska fiskiflotanum, hvat hann hevur gjørt fyri at fyribyrgja, at flakavirkið í Skopun letur aftur og 60 fólk verða søgd úr starvi, o.s.f. o.s.f.

Tá tað snýr seg um fiskivinnupolitikkin, so er Sjúrður og onnur í Javnaðarflokkinum farin at nýta vendingina, at Fólkaflokkurin lovar, at “fiskivinnunýskipanin skal rullast aftur”. Tey siga onki um hvat tað er, sum ætlanin er at rulla aftur. Alt tað sum Javnaðarflokkurin fanst at við gomlu skipanini, keyp og søla av rættindum, keyp og søla av kvotum og døgum, bert fá (fýra reiðarar) sita á øllum tilfonginum, og eg kundi hildi áfram, er framvegis galdandi.

Um vendingin meinast við, at Fólkaflokkurin vil avtaka uppboðssøluna, avtaka skipanina við menningarkvotum, minka um tilfongisgjaldið, so hevur hann rætt. Hetta er neyðugt fyri aftur at skapa stabilitet í høvuðsvinnuni, so menningin av fiskivinnuni og harvið øllum samfelagnum, kann byrja aftur, aftaná naggatódn í fýra ár.

Sjúrður og KVF vilja eisini krógva, at løgmaður og samgongan hava tikið alla politisku skipanina sum gísla fyri at sleppa at brúka stjórnarskrivstovurnar til eitt fýra mánaðar langt valstríð. Hóast samgongan ongan meiriluta hevur fyri sínum politikki (Løgtingið er jú, av somu orsøk, sent til hús), hoyrast og síggjast landsstýrisfólk dagliga í KVF, har tey framleggja politiskar ætlanir. Ætlanir sum í besta føri kunnu lýsast sum politiskar ballónir.

Tað einasta rætta í verandi støðu hevði verið, at løgmaður útskrivaði val til Løgtingið. Høvdu vit havt undirtøku fyri einum misáliti, hevði Tingið verið kallað saman beinanvegin, men ávísir einstaklingar/flokkar í anstøðuni, halda framvegis hondina yvir samgonguni og løgmanni, hóast atgerðarloysið og allar gølurnar. Hetta er ivaleyst fyri at varðveita góðu lønina nakrar mánaðir afturat.

Hevði val verið útskrivað høvdu flokkarnir fingið nøkulunda eins viðgerð av KVF í valstrýnum, og ein nýggj stjórn kundi verið skipað og farið til verka, tá nýggj tingseta byrjar á Ólavsøku.

Meðan vit bíða, mugu vit onnur standa model til, at Sjúrður, samgongan og KVF skipa valstríðið fram til Ólavsøku, tá løgmaður fær Løgtingsins Røðarapall, at halda valtalu fyri tjóðini og útskrivað val.

Jacob Vestergaard

Fólkaflokkurin

Langt úti í kviksilvurlýsandi meginhavinum liggur eitt einsamalt, lítið, blýlitað land. Hetta evarska lítla landið er samanborið við stórhavið sum eitt sandkorn á gólvinum í einum veitsluskála

Men sætt undir sjóneyku er hetta sandkornið kortini ein heilur heimur við fjøllum, dølum, sundum og fjarðum, húsum og smáum menniskjum. Soleiðis skrivar William Heinesen í søgu sínari Glataðu Spælimenninir.

Lítil er okkara heimur í mun til alheimin sum vit búleikast í. Men aftanfyri livir eitt fólk, sum hevur megnað at stríðst seg til eitt fólk, við egnum máli, egnum búskapi og ikki minst egnum framburði. Og vit skulu verða stolt av hesum. Tað er ikki ein flokkur sum skal hava patent uppá hesi viðurskifti, men vit øll somul.

Men framburður skal til, um vit skulu halda somu kós. Vøkstur er ein fyritreyt, og hann skulu vit verja og hjúkla um.

Visti tú, at okkara lítla sandkorn rúmar ein sannleika og eitt ríkidømi, sum vit sjálvdan gera okkum far um. Og sum hevur gjørt okkum øll ríkari og burðardygg?

Føroyar framleiða í dag á leið 4 milliónir fiskadøgurðar til heimin UM DAGIN. Hvønn dag í 365 dagar um árið. Hetta lítla sandkornið megnar í dag at lata 4 milliónir døgurðar um dagin til okkara viðskiftafólk runt um í heiminum. Til svangar munnar nær og fjar. Og tað er ikki ein sjálvfylgja. Tað krevur eitt vinnulív sum vil og hevur dirvi. Men ein fyritreyt er eitt fíggjarligt sterkt vinnulív, sum hevur tað rásarúm sum skal til at lyfta hesa uppgávu.

Tað er so lætt at fílast at. Men vit mugu duga at hava álit á teimum sum hava førleikarnar til at lyfta uppgávurnar; bæði fíggjarliga og við teimum menniskjaligu førleikunum sum skulu til. Tað er fyritreytin.

Eins sterk vit eru sum samd; eins veik eru vit sum sundurbýtt!

Pól Huus Sólstein
Valevni fólkafloksins til løgtingsvalið

​KvF royndi seg enn eina ferð hóskvøldið í D&V sum politiskan kannustoypara og borðreiddi aftur við samgongu- (t.e. tjóðveldis)tosi. Høgni Hoydal hevði sum vant frítt spæl í sjónvarpsstovuni. Aksel Johannesen, løgmaður, og Sjúrður Skaale sluppu eisini stutt framat.

Men tað tykist, sum KvF ikki er áhugað í øðrum enn tí, Tjóðveldi meinar og ætlar sær. Løgmaður hevur langt síðan boðað frá, at Javnaðurin ikki vil samstarva við Fólkaflokkin. Nú hevur Sjúrður Skaale útilokað Tjóðveldi – væl at merkja, um flokkurin ætlar at reka loysingarpolitikk.

Javnaðarflokkurin verður til hetta løgtingsvalið ímyndin av sundurlyndi og manglandi evnum ella vilja til semjur ella samstarv. Tað átti tí at verið áhugavert og relevant fyri tíðindamannin at spurt løgmann, hvønn flokk hann ætlar sær í samgongu við eftir valið.

Kanska ein óneyðugur spurningur, tí møguleikarnir fyri eini samgongu hjá løgmanni tykast at fækka fyri hvønn dag. Ikki minst tá valúrslitið av fólkatingsvalinum verður havt í huga.

Svarið er eftir hondini rættuliga einfalt.
Løgmaður ætlar sær í samgongu við Sambandsflokkin.

Spurningurin er bara, hvat Sambandið ger.
Javnaðurin er undir Akseli blivin so vinstravendur, at tað átti at verðið trupult við eini samgongu við Sambandið. Skal Aksel so tveita allan fiskivinnupolitikkin fyri borð fyri at bjarga sær eina samgongu við ein borgarligan flokk? Neyvan.

Ætlar Sambandið at reka fiskivinnu’politikkin’ hjá hesi samgongu víðari?

Stóri trupulleikin fyri føroyska samfelagið er, at um Sambandið ger samgongu við Javnaðarflokkin, skulu vit føroyingar ikki rokna við nakrari broyting yvirhøvur, hvørki á fiskivinnu-, vinnu-, fíggjar- e.ø. týðandi øki. Tað verður tí ein vanlagna fyri Føroyar, um vit eftir løgtingsvalið fáa eina “heimastýrissamgongu”.

Hvør verður 3. flokkur, um teir báðir ikki røkka 17 tingmonnum?

Veljarin má gera sær greitt, at einasti møguleiki fyri at fáa systemskifti í føroyskum politikki er at velja Fólkaflokkin.

Tað er tí mín vón, at Fólkaflokkurin eftir løgtingsvalið í august verður so sterkur, at tað bert verður møguligt við eini 2-flokka borgarligari samgongu millum Fólka- og Sambandsflokkin.

Sjálvstýris- og Miðflokkurin kunnu eisini vera við í eini slíkari samgongu, tí hetta er einasti máti at steðga tí ørskapi, sum byrjaði fyri 4 árum síðan, tá henda samgongan tók við.

Christian Andreasen
valevni hjá Fólkaflokkinum til løgtingsvalið

​SPJAÐING, SUNDURLYNDIÐ OG ORWELLIANSKA SAMFELAGIÐ👎⛔️😡

Javnaðarflokkurin, serliga løgmaður, hevur seinastu árini tosað um at savna tjóðina, men í veruleikanum hevur hann spjatt Føroyar í tvey: vit móti tykkum. Tað góða móti tí ónda.

Fyrsta var tað Fólkaflokkurin, sum løgmaður og javnaðarflokkurin ikki skoyttu um. Har við útihýsti løgmaður nær um 25% av fólkinum. Í dag er tað tjóðveldi, sum stendur fyri skotum. Eini 20-23% av fólkinum afturat. Sostatt hevur løgmaður og javnaðarflokkurin útihýst út við helvtina av Føroya fólki.

Hetta er ein stór andsøgn við nógv róstu nýggjársrøðu løgmans, har hann m.a. segði:

“Tá ið vit stremba eftir at byggja eitt samfelag, har øll hoyra saman, og vit taka okkum av hvør øðrum, byggja vit á nakað av tí besta í gamlari, føroyskari mentan.
Fatanina av, at vit øll ganga í einum og sama fylgi.”

Sitatið omanfyri minnir meg ikki sørt um kendu orðini hjá George Orwell:

"Øll eru líka, men summi eru meira líka enn onnur."

Hetta er ein beinleiðis ræðandi. Tað tykist, sum valdið og góðu valúrslitini hava stigið løgmanni og javnaðarflokkinum upp í høvdið. At teir eru blindaðir av valdinum og valrúsinum.

Vit kunnu hava ymiskar meiningar um alt millum himmal og jørð, men vit mugu vera nóg búgvin til at arbeiða saman. Tvørturum politisk "landamørk".

Um ikki, er tað veljarin og samfelagið, sum stendur eftir sum stóri taparin. Og tá er einki vunnið. Kanska er tað tað, løgmaður og javnaðarflokkurin ynskja. So kunnu teir sita við valdi, meðan samfelagið liggur í skeljasori.

Vónandi gjøgnumskoðar veljarin sundurlyndið, so at løgmaður og javnaðarflokkurin fáa ein ordans bakkaláara á valdegnum. Eitt reality check.

Tað hava teir so sanniliga brúk fyri.

Hanus Samró

Fólkaflokkurin

Skal valstríð verða sakligt og til gagn fyri land og fólk krevst, at KVF er sakligt. Hin møguleikin er at niðurleggja tíðindadeildina

Løgtingsval er í nærmastu framtíð. Tá er KVF ein partur. Tað keðiliga við KVF er teirra manglandi áhugi at lýsa mál.

Kann upplýsa bæði Georg og Ivan, at eg meti framgangsmátan, sum vit seinastu árini hava sæð í KVF, verða manipulatión av fólkinum í Føroyum. KVF misrøkir sína uppgávu. Teir gloyma ávís sjónarmið og nokta ávísum sjónarmiðum rúmd.

Við góðari hjálp frá KVF er framleitt eitt Fata Morgana uppá kr. 1.000.000.000 Ja, 1 milliard, sum ikki er til. Hesir pengar, sum ikki eru til, eru grundarlag undir risastórum útreiðsluvøkstri. Alt kemur fyri ein dag. Eisini hetta.

Tá KVF bara brúkar somu frøðingar ferð eftir ferð og útilukkar onnur, so er tað ikki sakligt men manipulatión av fólkinum. Hesir somu akademikarar hava ongantíð givið okkum eina sakliga akademiska grundgeving fyri sínum sjónarmiðum.

Havstovan segði fyri ári síðan, at fiskastovnarnir hava ongantíð í søguni verið so illa fyri. Nú siga teir at fiskurin hevur verið her alla tíðina. Og onki spurnatekin at hóma í KVF. Og Georg spyr framvegis, sum at tað er ein sjálvfylgja, at kvotur eru betri enn fiskidagar. Úr KVF hoyra vit einki uttan bara eina meining.

Eyðun Hansen, sum verður mettur at verða skilamaður, sleppur ikki í KVF.

Fyri mín part kann eg upplýsa, at eg ikki ein gongd slapp at greiða KVF (ikki føroya fólki) frá, hví og hvussu tilfeingisrentan er útrokna av Búskaparráðnum og Fiskimálaráðnum, við skeivum tølum.

Einaferð fekk Øssur Winterheig at vita, at hann oyðilegði fiskivinnudiskursin hjá KVF.

Framgangsmátin hjá KVF ger sítt til, at landskassin verður illa fyri og at fólk púra óneyðugt fara at missa sítt starv. Hetta gagnar ikki landi og fólki.

Eg stilli upp til komandi val. Útlitini fyri at røkka tingsessi eru rímulig. Eg kann í hvussu so er lova teimum sum velja meg, at eg áleggi hvørki palliba ella fyritøkum gjald fyri at fíggja slíkt virksemi. Føroyar og fólki sum her býr klárar seg útmerka væl uttan tíðindadeild í KVF á hesum støði.

Um eg greiði løgtingslimum frá, at tað at lækka játtanina til KVF 30 milliónir og hækka miðlastuðul 10 mió. gevur okkum fleiri og betri tíðindir í bæði Sjónvarpi og útvarpi enn vit fáa við at varveita tíðindadeildina, so verður tað uttan iva samtykt. Avlopið er 20 milliónir og kanska onkur akademikari roknar okkum tilfeingisrentuna á tíðindadeildini í KVF at verða 67%.

Larry Ellison bleiv einaferð spurdur, hví hann segði so nógvar leiðarar úr starvi. Hann svaraði, at tað var tí at tá leiðararnir gjørdu feilir, so vóru teir orsøkin til at nógv púra ósek fólk, sum gjørdu eitt gott arbeiði, mistu sítt starv.

Nú fáa vit at síggja um KVF broytir kós. Ein flokkur hevur í stevnuskránni at KVF skal privatiserast. Tað er kanska eisini eitt alternativ, sum hevur breiða undirtøku á Løgtingi í hesum uppboðssølutíðum.

Nú fáa vit at síggja um KVF broytir kós. Aftaná Ólavsøku er ov seint at biðja um gott veður.

Hetta er so mín persónliga meining.

Eivind Jacobsen

Valevni Fólkafloksins

Nú byrja so smátt avleiðingarnar at koma til sjóndar, eftir fýra ár við vinnufíggindaligum politikki.
Sjómenn hava longu, við undantaki av nøkrum fáum, følt sviðan av politikkinum ið førdur verður, har hýra teirra er munandi lækkað.

Virkir á landi føla nú eisini hvussu politikkarar anda tey í nakkan, og hvussu politiski grammleikin uttan mørk, smátt um smátt máar grundarlagi undan vinnuliga rakstrinum. 
Flest øll gjøld eru farin munandi upp, nýggj gjøld eru uppfunnin, alt fyri at metta trongdina at gjara út sentralt.
Tað varð ein sólskinssøga, tá vit í undanfarnu samgongu syrgdu fyri at Marine Harvest fekk royndarloyvi á Sandsvág, tí hetta hevði við sær, at teir saman við Delta settu gongd á virkið aftur í Skopun. Harvið fingu 60 fólk arbeiði í Sandoynni.

Og hvat er so hent síðani hendan samgongan kom til? 
Jú, avgjøldini á virksemið í Skopun er hækkað av sitandi samgongu, meðan sama samgonga hevur lagt fleiri avgjøld á virksemið sum hendan fyritøkan sum eigur í virkinum fíggjar seg við nevnliga alivinnuni. Tá tað illa fæst at bera til frammanundan, og man blívur við at leggja fleiri avgjøld á álíkavæl, kann man ikki undrast at fyritøkur velja at trekkja seg.

Hetta er nú hent í Skopun, hesi 60 fólkini í oynni standa nú uttan arbeiði, og skulu til at umhugsa hvar teirra framtíð er.
Menningarkvoturnar, sum skuldu verða loysnin á allari neyð kring landið, kundu fyri okkara økið tað sama verið kallaðar niðurlagingarkvotur, tí menning er ongin vorðin av hesum kvotum. Heldur beint øvugt, nú Sandoy Seafood er afturlatið. Snakkaði nakar um keisarans nýggju klæði?
Alt botnar í tí blóðskeiva ella blóðreyða politikkinum, ið førdur er seinastu árini, har man tekur pening úr vinnuni kring landið, fyri at pumpa peningin útaftur í almennum yvirforbrúki, hækkaðum lønum og glæstriprojektum fyri at byggja sær varðar.

At Sandoy Seafood gevst í Skopun, er ein varði á sosialistisku leiðini hjá hesi samgonguni. 
So er tað upptil sandoyingar um teir løna samgonguni tað aftur til valið. 
Men tað mátti smakka beiskt hjá onkrum.

Brandur Sandoy
Fólkaflokkurin

Hetta boðaði hon frá á Facebook fyri einum tíma síðani, les herundir.

“Tak og farvel til posten som Folketingets Formand.

Efter folketingsvalget er der flere, der har spurgt, om jeg fortsætter som Folketingets Formand. Det gør jeg ikke. Magten er skiftet.

Jeg har haft det ærefulde hverv i fire år, og jeg har glædet mig over hver dag.

Vi skal alle være stolte af vores velfungerende folkestyre.

Nu er jeg tilbage i Dansk Folkepartis folketingsgruppe, og jeg ser frem til at komme i gang med det politiske arbejde. Der er nok at gå i gang med.

🇩🇰Jeg ønsker alle en dejlig dag 🌞”

Pia Kjærsgaard

​TAKK FYRI STUÐULIN! 💚

Vit vilja hjartaliga takka tykkum, ið hava stuðlað Fólkaflokkinum, og okkara Beinir Johannesen til fólkatingsvalið.

Hetta gevur ábendingar um, at fólkið ynskir okkurt nýtt, og halda vit Beinir vera eitt upplagt boð til ein komandi løgtingslim.

So tað ræður um, at vit øll - ung sum gomul - aftur standa saman um okkara valevni, tá løgtingsval verður í august.

Takk fyri!

Huxa