Jessica Cazabon er 16 ára gomul, partur av nevndini og er sera áhugað í politikki. Vit spurdu hana um hon tímdi at svara nøkrum spurningum.

1. Hví valdi tú Huxa?
Eg havi stóran áhuga í politikki. Í politiskum høpi eri eg borgarlig. Samstundis eri eg tjóðskaparsinnað. So tað rætta fyri meg er at vera limur í Huxa.
2. Hví ert tú borgarlig?
Tað eri eg, tí eg ynski fríar karmar fyri einstaka menniskjað og vinnuna. Eg meti ikki, at vit skulu gjalda meiri skatt, enn neyðugt er. Í tí sambandi vil eg fegin gjalda tað, sum krevst fyri, at øll skulu hava ókeypis atgongd til sjúkrahús, ellisheim og skúlar. Eg haldi ikki, at vit skulu hava so nógv óneyðug avgjøld, sum socialistiskar samgongur leggja á okkum. Socialistiskar samgongur taka alt ov nógvan pening frá okkum, og so skulu tær avgera, hvussu okkara peningur skal deilast út aftur. Eg haldi, at hvør persónur sjálvur skal kunna avgera, hvat hann nýtir sín pening til.
3. Hvat fekk teg at fáa áhuga í politikki?
Mamma mín er sera áhugað í politikki, so áhugin er av fyrstan tíð byrjaður har. Eisini helt eg tað vera sera áhugavert at hava politikk í samfelagsfrøði í skúlanum.
4. Heldur tú tað vera eina forðing at vera genta í politikki?
Nei, tvørturímóti. Eg haldi tað vera mennandi fyri politikkin at menniskju av báðum kynum eru virkin í politikki. Eg haldi tað vera ov fáar kvinnur í Fólkaflokkinum og Huxa, og tí vil eg fegin ganga á odda at vísa at Fólkaflokkurin og Huxa eisini eru fyri kvinnur.
5. Hvat hevur mest at siga fyri teg í politikki?
Har er so mangt, sum hevur nógv at siga fyri meg. Eitt nú lestrarmøguleikar, eldraøki, fiskivinnan, sum er okkara høvuðsvinna og útlendinga-politikkur.
6. Hevur tú nakra politiska fyrimynd?
Ja, Annika Olsen er mín politiska fyrimynd.
7. Kanst tú viðmæla ørðum at gerast limur í Huxa?
Ja, avgjørt. Vit hava eitt gott samanhald og samskifti í Huxa. Hóast eg eri yngst og í løtuni eri einasta genta í Huxa, havi eg følt meg væl- bæði saman við hinum limunum, men eisini í mun til kjak og annað prát, har eg merki, at eg eisini verði hoyrd. Eisini fái eg bjóðað nógvar spennandi uppgávur í Huxa. Tað er sera mennandi og gevandi at vera limur í Huxa, og eg eri errin av at vera sloppin at vera partur av Huxa.

Ger líka, sum Jessica og blív limur í HUXA

Her kanst tú blíva limur í HUXA
​
Huxa Fólkafloksungdómur

Í gjár vóru 39 nýggir tilburðir staðfestir, vísa nýggjastu tølini hjá landslæknanum.

Landslæknin hevur verið í sambandi við øll tey smittaðu.

1968 kanningar vóru gjørdar seinasta døgnið. Í løtuni eru 387 smittað, sjey eru innløgd, og 13 eru deyð við koronu í Føroyum.

Føroya Landsstýrið og Heilsumálaráðið

Í kvøld hevur Tórshavnar býráð endaliga samtykt fíggjarætlanina fyri 2022, við 12 atkvøðum fyri og einari ímóti.

Samlaðu inntøkurnar hjá Tórshavnar kommunu verða nú mettar til 1 milljard og 162 mió. kr. Hetta eru 70,2 mió.kr ella 6,4 prosent hægri, enn í fíggjarætlanini í fjør.

Rakstrarútreiðslurnar eru mettar til 917,1 mió.kr, ið er 36,7 mió. kr ella 4,2 prosent hægri enn í fjør. Íroknaður er tá lønarvøkstur á 1,75 prosent.

Ímillum 1. og 2. viðgerð er vøksturin í útreiðslum minkaður úr 4,8 niður í 4,2 prosent í eini tilgongd at fáa í lag skynsamari rakstur.

Vøksturin í rakstrarútreiðslunum er serliga á eldraøkinum, á sosiala og barnaverndarøkinum og á dagstovnaøkinum. Størsti parturin av vøkstrinum eru lønir, tí hesi økini eins og restin av kommununi eru rættiliga lønartung.

Vøksturin í barnatalinum krevur fleiri stovnspláss. Stór útbygging fer nú í gongd av dagstovninum á Hamrinum fyri 30 mió.kr.

Dagstovnaøkið verður uppnormerað við 10 mió kr. Arbeiðsbólkur hevur latið seks tilmæli um at styrkja námsfrøðiliga arbeiðið á stovnunum. Játtanin er størsta einstaka uppraðfesting av dagstovnaøkinum nakrantíð og fer beinleiðis til stovnarnar og harvið børnini.

Stórur dentur er lagdur á eitt vælskipað og uppraðfest eldraøki við nýggjum røktarheimi og røktaríbúðum. Eldraøkið verður framtíðartryggjað, og normeringin hækkar við 5 mió. kr.

Fyri at allar familjur og einstaklingar í kommununi skulu hava atgongd til ein hóskandi bústað, sum tey megna at gjalda fyri, eru settar í gongd kommunalar og privatar útstykkingar í stórum tali.

Gongd er sett á útstykkingar til sethús, raðhús, eigara- og leiguíbúðir á Argjahamri og við Stórutjørn. Í Kollafirði er lendi boðið út eins og á Velbastað. Í Nólsoy verður víðkað um verandi útstykkingar.

Privatar íbúðarbyggingar við bæði ognar- og leiguíbúðum eru eisini farnar í gongd. Millum Horna er til dømis lendið boðið út til privatar byggiharrar at byggja raðhús og leigubústaðir.

Samtykt er at bjóða lendi til lutaíbúðir. Talan er um tvey lendi, har tað skulu byggjast 60 lutaíbúðir.

Vit fara harumframt at gera fleiri vinnustykki, m.a. við Stjórutjørn, til ymiskan tørv og í ymiskum støddum.

Samlaðu íløgurnar fyri 2022 verða 272,5 mió. kr. Hetta eru alt íløgur, ið eru neyðugar fyri Havnina.

Størsta verkætlanin er langhylurin í Gundadali, sum 40 mió. kr eru settar av til í íløguætlanini fyri komandi ár.

Nýtt røktarheim er ein av stóru og nýggju íløgunum fyri framman. Heimið er staðsett á Stórubrekku við 64 nýggjum røktarheimsplássum og 16 atknýttum røktaríbúðum. Settar eru av 6 mió.kr til prosjektering. Aftan á verður farið í gongd við at byggja.

Skjøtil verður komandi ár settur á Stórhøllina við 10 mió.kr. Høllin kemur at hýsa innandura ítróttargreinunum umframt alskyns tiltøk av fólksligum og vinnuligum slag.

Bátahylurin í Álakeri verður liðugtgjørdur. Settar eru av 18 mió.kr fyri komandi ár.

Eisini Skjótibreytin verður gjørd liðug. Avsettar eru 5 mió.kr komandi ár.

Løgtingið hevur endaliga samtykt at veita fíggjarligan stuðul á 110 mió. kr til Innkomuvegin. Kommunan setir av 10 mió.kr komandi ár og góðar 40 mió.kr árliga næstu fýra árini.

Til fríðkan av kommununi eru í íløguætlanini komandi ár settar av íalt 27 mió. kr. Týðandi partar av miðbýarætlanini eru 8 mió.kr av hesi upphædd.

Til fríðkan av bygdum eru settar av 2 mió. kr og 5 mió.kr til fríðkan av býnum. Lendisgøtur 4 mió. kr. Spælipláss í býnum 5 mió.kr og vetrarfriðing í Kollafirði og Nólsoy 1 mió. kr.

Í Kaldbak verður sett hol á fyrireikandi arbeiðið at byggja fimleikahøll og borgarahús. Settar verða 5 mió.kr av á íløguætlanini komandi ár.

Dagføringar verða gjørdar á Hoyvíkar skúla og Skúlan við Løgmannabreyt fyri íalt 3,9 mió. kr.

Avsettar verða íalt 10 mió. kr til fótbóltsvallir, herundir á Argjum og í Hoyvík.

Tørvur er á nýggjum vatnreinsiverki í Havnardali, og byrjað verður tí at fyrireika hetta við at seta 1 mió. kr av á íløguætlanini.

Játtanin til dagføring av kloakkum verður hækkað, so samlaða upphæddin nú er 8 mió. kr. Avsetingin til vegaverkætlanir veksur til 8 mió. kr komandi ár.

Farið verður undir umfatandi grønt tiltak við nýggjari skiljihøll á Brennistøðini. Hetta er eitt nýtt umhvørvisliga týdningarmikið átak, sum ger bæði skiljing og endurnýtslu av burturkasti munandi lættari hjá bæði borgarum vinnu. Avsettar eru 7 mió. kr.

Hjá Tórshavnar havn eru samlaðu íløgurnar 24 mió. kr, herav størsti parturin er til at byggja nýggjan terminal á nýggja havnalagnum.

Tórshavnar kommuna stuðlar grønari umlegging og leggur tí stóran dent á grøna orku og umhvørvið annars, og vit stuðla tiltøkum fyri fólkaheilsu og grønari menning.

Sum ein liður í grønu átøkunum eru avsettar 8 mió.kr, umframt 15 mió. kr til Fjarhitafelagið, nú felagið er farið undir stórar útbyggingar av fjarhitanetinum, so fjarhitin kann gagnnýtast um allan býin. SEV setir eisini 15 mió. kr av til sama endamál.

Skattaprosentið verður óbroytt, 19%, og barnafrádrátturin verður 8.000 kr.

Vit vóna og ætla, at valskeiðið verður merkt av góðum samstarvshuga og vilja til saman at røkka úrslitum til gagns fyri borgarar í allari kommununi, og fremjandi fyri liviumstøður og møguleikar hjá verandi og komandi ættarliðum av borgarum.

Heðin Mortensen
borgarstjóri

Tórshavnar Kommuna

Núverandi samgonga hevur verið alt ov fitt móti undanfarnu samgongu í Klaksvíkar Kommunu og hvat hava tey fingið afturfyri, jú eina lortaspann so beint í høvdi og at andstøðan slett ikki stemmaði ikki fyri fíggjarætlanini fyri 2022 er lang úti, har tað mesta í fíggjarætlanini var liðugtgerð av verkætlanum sum undanfarna Býráð hevur sett i verk og har pengar slett ikki vóru tøkir til og nú er okkara stolti býir settur undir umsiting.

Veit ikki hvussu Tummas Lervig arbeiðir, men hansara felag ella okkara felag, sum vit øll eru sera stolt av, hevur fingið langt omanfyri 15 milliónir hesu árini hann hevur sitið í Klaksvíkar Kommuna. Rokna vit alt samanlagt, so táttar tað møguliga upp á 20 milliónir ella nógv meira og hann er als ikki nøgdir enn, men blívur við at forlanga og fær tað hann forlangar, sera løgi, nú Klaksvíkar Kommuna er noydd at taka risa lán fyri at halda sínar skyldur.

Bara í hesari fíggjarætlanini fekk hann 3.5 milliónir og so dugir hann at brúka kjaft aftaná og spæla hund, tí hann atkvøddi slett ikki fyri fíggjarætlanini 2022, so góðir er hann við sítt egna felag, men hann skal nokk til næsta val kunngerða, at hann atkvøddi fyri fíggjarætlanini 2022 og at Djúpumýra fekk 3.5 milliónir afturat, men at brúka seg nú og siga at fyrrverandi andstøða ikki heldur síni vallyftir, tí samgongan í Klaksvíkar Kommunu ikki hevur bremsa í, vegna fullkomiliga óskilandi fíggjarstýring av seinastu samgongu er at fara ov langt. Hvat hevði hann sagt, um núverandi samgonga strikaði 3.5 milliónir til Djúpumýru?

Seinasta samgonga í Klaksvíkar Kommunu sleppur alt ov lætt, Fólkaflokkurin skuldi spælt við opnum kortum og víst almenninginum hvussu rættað myndin og óskilið var, tá ið Jógvan Skorheim, Tummas Lervig og Signhild Johannesen sótu við maktini, har var møguliga handla í heimildarloysið og har vóru verkætlanir settar ígongd, sum slett ongir pengar vóru til, vinar og kenningarpolitikkur var í hásætið, men lítið og onki kemur fram, man tað vera tí, at andstøðan tá eisini dansaði um gullkálvin og ikki vil at alt kemur fram í ljósið?

Lurtaði eftir Býráðsfundinum hóskvøldið, at hoyra Jógvan Skorheim, Tummas Lervig og Signhild Johannesen, har tey vaskaði sínar hendur og søgdu øll við ein munn, at tey onga skyld høvdu í hesum óskilinum er so langt úti, at man ikki hevur orð fyri tí. Hví hundan settið ikki samgongan tey ordiliga uppá pláss, Atli S. Justinussen og Oddmar á Lakjuni gjørdi eina roynd, men hon var alt og veik.

Andstøðan í Klaksvíkar Kommunu segði at hon vil samarbeiða við meirilutan, men tað passar slett ikki, tey vilja hava klandur, so lat tey fáa klandur og leggið nú øll kortini á borið, so vit borgarar fáa at síggja, hvussu óskilið hjá undanfarnu samgongu var, tí tað kann ikki vera rætt, at Klaksvíkar Kommuna nú er undir umsiting vegna vána stýring av Jógvan Skorheim og nú skal Karl Johansen fáa skyldina.

Leggið kortini á borið, so vit fáa røttu myndina av hvussu vánaligt seinasta samgonga dugdi at stýra okkara stolta býi Klaksvík.

Vit kunnu sammeta Klaksvíkar Kommunu við Tórshavnar Kommunu, sambært Heðini Mortensen í Dag & Viku í gjárskvøldið, so skyldar Tórshavnar Kommuna NULL krónir og teir kunnu, um tey høvdu hug lænt 1 milliard og ikki komi upp á eina álíkning.

Í aller bestu tíðum hevur Jógvan Skorheim og hansara harkalið koyrt Klaksvíkar Kommunu undir umsiting og vit skylda nú 264 milliónir ella 264.000.000,oo kr. í nettoskuld.

Trúgvi væl at Sjálvstýrisflokkurin fór í knús undir hansara leiðslu og hann slapp sær av skútini, bæði landspolitiskt og kommunalt áðrenn skútan sakk.

Nevnast skal at Sjálvstýrisflokkurin var stovnaður í 1909 og hevur havt sera stóran týdning fyri menningina av Føroyum og Klaksvík, hvør minnist ikki Ásbjørn Joensen, ein klaksvíksvingur við stóra K, men nú hava næstan øll vent Sjálvstýrinum baki undir leiðsluni hjá Jógvan Skorheim og nú vera onnur noydd at taka suppuna upp eftir honum, bert spell at vit í Klaksvík ikki sóu hatta fyri mongum árum síðani.

Komu nú fram við øllum skjølunum frá seinastu samgongu, haldi vit borgarar hava krav uppá tað og man má spyrja, hvar hevur Kommunala Eftirlitið verið øll hesi árini? lesið um Kommunala Eftirlitið klikk her: “Eftirlit við kommunum”

SO VERÐUR TAÐ GJØRT.

Símun á Høvdanum

Á Býráðsfundinum tann 23. september bleiv samtykt at stroymingin skuldi bjóðast út av nýggjum.

Tveir spurningar til umsitingina hjá Klaksvíkar Kommunu?
Er sáttmálin uppsagdur við núverandi stroymarar?
Hava tit bjóða stroymingina út av nýggjum?

Her grein um stroymingina, sum er skrivað tann 24. september 2021, sjá herundir.

SáH

Stroymingin skal bjóðast út av nýggjum í Klaksvíkar Kommunu

Á Býráðsfundinum í gjárskvøldið bleiv samtykt at stroymingin skuldi bjóðast út av nýggjum.

So væntandi verður sáttmálin uppsagdur við núverandi stroymarar beinanvegin og so verður útbjóðingin bjóða út av nýggjum.

Sáttmálin millum kommununa og núverandi veitara kann sigast upp við eini freist á 3 mánaðir til ein 1. í
mánaðinum.

Hetta bleiv samtykt á Býráðsfundinum í gjárskvøldið. Nevndin mælir til, at nýtt útboð skal vera. Útbjóðingartilfarið skal eisini umfata møguleika fyri at goyma
fundir á netinum.

SáH

Løgmaður skal fríggjadagin hitta NATO-aðalskrivaran á NATO- høvuðsborgini í Brússel.

Á fundinum fara Bárður á Steig Nielsen og Jens Stoltenberg millum annað at umrøða trygdarpolitisku viðurskiftini um okkara leiðir. Eisini verður kunnað um áleikandi mál í NATO samstarvinum.

Bárður á Steig Nielsen er fjórði løgmaður í røðini, ið fær høvi at hitta ein NATO-aðalskrivara.

Í 2003 vitjaði Anfinn Kallsberg skotan George Robertson, í 2005 hitti Jóannes Eidesgaard hollendingin Jaap de Hoop Scheffer og í 2012 hevði Kaj Leo Holm Johannesen fund við Anders Fogh Rasmussen.

Løgmansskrivstovan

Eitt einmælt løgting hevur í dag samtykt tvey uppskot, sum Elsebeth Mercedis Gunnleygsdóttur, landstýriskvinna í almannamálum, legði fram vegna landsstýrið.

Annað málið var at javna almennar veitingar við 2.05 prosentum frá fyrsta januar 2022. Tað merkir, at almennar veitingar fylgja lønargongdini á almenna arbeiðsmarknaðinum. Hetta er fyrstu fer síðan 2014, at almennar veitingar verða javnaðar. Javningin merkir millum annað, at stakir pensjónistar, ið ikki fáa annað enn fólkapensjón og samhaldsfasta, síðan 2019 hava fingið ein hækking í pensjónini uppá kr. 1455, meðan giftir pensjónistar fáa kr. 1422 fleiri enn um mánaðin í 2022 enn í 2019.

Harafturat er eisini samtykt at broyta lógina um dagpening vegna sjúku, so foreldur at børnum, ið eru yngri enn 14 ár, ið mugu heim við barninum vegna Covid-19, eisini fáa dagpening. Talan eru um bæði sjúku og sóttarhald.

Vikið var frá øllum tíðarfreistum í hesum báðum málum. Tey vórðu til fyrstu viðgerð í gjár og til aðru og triðju viðger í dag.

Landsstýriskvinnan fegnast um, at trivnaðarnevndin hevur arbeitt skjótt og væl og at eitt samt løgting tók undir við málunum.

Fólkaflokkurin