Fólkaflokkurin má duga at handfara Kringvarp Føroya til komandi valini, tí gera vit ikki tað, so tapa vit hvørt val. Tað kann ikki vera rætt, at tann størsti fjølmiðilin í Føroyum, sum fær omanfyri 80 milliónir ella meira í lumman um árið á fíggjarlógini og tá er Gekkaspæli ikki talt við, til at føra vinstrapolitikk og vit bara hyggja at.

KVF skal ikki sleppa at seta dagskránna til valini í framtíðini og tí er tað alneyðugt, at vit í flokkinum duga at handfara KVF, eitt nú, tá ið tey royna at fáa Fólkaflokkin í vánaligt orð, dømini er mong, eitt nú kvotubýti í flokkunum, undirsjóvartunlarnir, Barentshavið, fiskivinnusamráðingar við russar, klima o.a., her er alneyðugt at vit ikki lata okkum lokka í fellurnar hjá teimum og heldur siga hvat vit standa fyri og ikki lata KVF koyra valini og dagskránna fyri okkum, tí øll vita vit, at KVF er aktivt við í valstríðnum.

Vit eiga at venda spurninginum og spyrja KVF? hví teir vilja hava at Fólkaflokkurin skal rakkast niður fyri opnari mikrofon og aðrir vinstraflokkar, eitt nú Javnaðarflokkurin sleppa undan hørðu viðferðini frá KVF og sum oftast altíð fáa positiva umtala frá almennu fjølmiðlinum KVF.

Vit mangla Óla Breckmann
Vit mangla ein Óla Breckmann, sum ikki var bangin fyri at taka kampin upp móti KVF, so mín áheitan á Fólkaflokkin, vit mugi hyggja inneftir og so duga nógv betur at viðfara størsta fjølmiðilin í Føroyum, nevnliga vinstravenda KVF og seta okkum inn í teirra støðu og tora at venda dagsskránni og valstríði hjá teimum til okkara fyrimun.

Eitt nú hevur KVF brúkt Jóannes Eidesgaard fyrrverandi løgmann hjá Javnaðarflokkinum og sum er ultra vinstrasinnaður til hvørt høvi hesi seinastu 3½ árini til at gera viðmerkingar til alt millum himmal og jørð, hví man tað vera? eg veit og slíkt skulu vit ikki lata fara aftur við borðinum.

Vit hava gjørt nógv gott hesu 3½ árini vit hava verið í samgongu, men tað nevnir KVF onki um, teir vilja heldur seta Fólkaflokkin í vánaligt orð og tað hevur eydnast teimum sera gott higartil, men nú skal vend koma í.

Ein loysn hevði verið, at vit vóru betur fyrireikaði til næstu valini og míni ráð til flokkin er, at valevnini vera betur fyrireikaði, at vit skulu hava eina nógv betur heimasíðu, har upplýst verður um, hvat vit hava gjørt hesu 3½ árini og hvat vit hava megna framt í verkið, fyri at gera Føroyar til eitt enn betri land at liva í, vera meira sjónligur á sosialu miðlunum, meira á portalunum í Føroyum og so upplýsa hvat Fólkaflokkurin stendur fyri, at vit føra ein borgarligan politikk, eitt nú við at siga, at HEVUR VINNAN TAÐ GOTT, SO HAVA VIT ØLL TAÐ GOTT.

SO VERÐUR TAÐ GJØRT, vit koma sterk aftur.

Tillukku til Sjúrða Skaale og til Annu Falkenberg.

Símun á Høvdanum, Fólkafloksmaður

FFari inniliga at heita á øll fólkafloksáhugað um at fara á val mánadagin, tí so hava vit ein møguleika at vinna annan sessin. 

Hóast veljarakanningar ikki geva Fólkaflokkinum eitt umboð, so hevur søgan víst, at fara fólkafloksáhugað á val, so er stórur munur á kanningum og valúrslitinum. 

Tað hevur týdning, at eitt fólkafloksumboð verður valt. Eftir 15 ár uttan Fólkaflokkin á Fólkatingi hevur hópað seg upp ein røð av óloystum málum. Her má broyting koma í. 

Tí heiti eg inniliga á fólkafloksáhugað um fara á val. 

Jørgen Niclasen, valevni Fólkafloksins til fólkatingvalið

​FÓLKAFLOKKURIN

Havi royndirnar og eri klárur. Reyða danska stjórnin hevur noktað okkum okkara,  tí mugu vit nú fáa eitt fólkafloksumboð.
 
Sitandi danska stjórnin hevur noktað okkum at yvirtaka føroyska loftrúmið, sum sjálvandi er okkara. 

Íleggingargrunnurin, sum er okkara, noktar reyða Danmark okkum eisini at yvirtaka. 

Limaskap í WTO, heimshandilsfelagskapinum, nokta tey okkum eisini. Felagsskapurin, sum m.a. kann forða handilsstongsli móti Føroyum, sum t.d. Danmark sjálvt gjørdi í 2013 í makrelstríðnum. 

Donsk Javnaðarstjórn noktaði eisini Føroyum at yvirtaka undirgrundina. Tá mátti ein blá donsk stjórn til fyri, at vit fingu yvirtikið. 

Nú er tíðin aftur til litskiftið. 

Tað vil Fólkaflokkurin. Vit vilja kempa fyri, at vit fáa tað, sum er okkara. 

Jørgen Niclasen, valevni Fólkafloksins til fólkatingsvalið.
​
​FÓLKAFLOKKURIN

Dysturin um fólkatingssessirnar  er í hæddini   og sambært síðstu veljarakanning   eru fleiri, sum ikki hava tikið støðu til,  hvønn tey fara  velja.  Eisini eru  nógv, sum ikki ætla sær á val.  

Síðsta veljarakanningin hjá Spyr.fo er ikki góður lesnaður  fyri fólkaflokkin, men vit missa   ikki mótið av eini veljarakanning. 

Hetta  setir  okkum  enn  meir upp til dystin.  Vit hava  sæð fyrr, at veljarakanningar ikki geva rætta mynd.   Tær eru bert ein løtumynd.

Allar súðir eru langtfrá  syftar enn. Dysturin  er  ikki lokin,   fyrrenn valhølini lata aftur.  

Mangur kappróður er ikki avgjørdur fyrrenn í síðstu tøkunum í  endaspurtinum og mangur fótbóltsdystur er ikki avgjørdur fyrrenn í  tíðini,  sum dómarin hevur lagt aftrat.

Eg eri  sannførd um, at  enn sum  áður hevur fólkaflokkurin  besta politikkin  fyri allar føroyingar – eisini til hetta  fólkatingsvalið.   Tí er altavgerandi,  at allir fólkafloksveljarar kring alt landið  fara mannsterkir á val og velja fólkaflokkin, ella eitt av valevnum hansara.

Latum  okkum sláa  ring um flokkin og koma aftur til røturnar og verja grundsjónarmið  floksins – eisini  til hetta fólkatingsvalið. 

Fólkaflokkurin verjir frælsið hins einstaka  –  herundir  eisini frælsið til  sjálvur at hava ræðið yvir størsta partinum  av  sínum ofta súrt  tjentu pengum  - og ikki umvent.  Tað skal løna seg at arbeiða eyka,  og tað skal løna seg at gera íløgur,  skapa virksemi og arbeiðspláss og framburð.   Tað skal løna seg at ganga undan og vera íverkseti.  Soleiðis skapa vit eitt burðardygt vælferðarsamfelag.  Hetta er góður fólkaflokspolitikkur og hvør einasta atkvøða fyri honum ger mun – eisini til eitt fólkatingsval. 

Tað er sjón fyri søgn, at okkara politikkur byggir land.  Latum okkum seta prís uppá hetta.

Ein serlig áheitan  á tykkum ungu, sum skulu velja fyri fyrstu ferð. Farið á val og veljið fólkaflokkin.   Og til tykkum, sum ikki ætla sær á val. Vælsignaði sitið ikki heima, men  farið á val og veljið fólkaflokkin.

Sjálv hevði eg sett stóran  prís uppá  hvørja einastu atkvøðu fyri mær persónliga.  

X  við Elsebeth Mercedis Gunnleygsdóttur.

​Nú, ið frí fosturtøka aftur er á skránni, og áganguri bæði innan- og uttanlendis frá er øgiligur, kundi verið áhugavert at víst á, hvussu álvarsliga Jóhan Nielsen, prestur og fólkatingsmaður fyri Javnaðarflokkin í mong ár, bardist ímóti fríari fosturtøku ella "fosterdrab", sum hann nevndi tað, og hvussu harðliga hann tók til orðanna ímóti hesum.

Sanniliga munur á javnaðarmonnum tá, og hvat javnaðarmenn í dag siga, nú bæði Aksel Johannesen og Sjúrður Skaale saman við meginpartinum av flokkinum siga seg taka undir við fríari fosturtøku.

Her er endin á røðu, Johan Nielsen helt undir 2. viðgerð av málinum 11. mars 1973:

".... her må det ufødte barn regnes for det svageste menneskelige væsen. Man frygter, og ikke med urette, at fosterdrab kun er en begyndelse. Man er bange for, at medlidenhedsdrab vil blive det næste, og har man først gjort sig til herre over livet, hvor ender man så? Højtærede justitsminister, høje ting, jeg håber, man er enig med mig i, at der ikke er noget argument tilbage for abortus provocatus andet end, hvad der eventuelt ligger i et hedensk menneskesyn, at mennesket er et dyr i lighed med andre, og derfor bør lovgivningsmagten gøre sig til herre over livet, så man skal kunne bestemme, hvem der skal have lov til at leve, og hvem der skal have lov til at dø. Vi har for ikke så mange år siden oplevet noget lignende i et naboland, og de spor skræmmer mig i allerhøjeste grad. Derfor: lad os adlyde Gud mere end mennesker. Stands dette lovforslag ...."
21 kommentarer

Jógvan á Lakjuni

Fólkaflokkurin

​Umboð fyri Amnesty vóru í KvF 3. okt., har tey bóru fram, at vit í Føroyum hava eina fosturtøkulóggávu, sum er í stríð við altjóða mannarættindi.

Simone Nørholm Jacobsen frá Amnesty DK segði, at tey, júst sum tey gera ímóti Iran og Afghanistan, savna undirskriftir fyri at leggja trýst á Føroyar, tí vit hava eina fosturtøkulóggávu, sum gongur ímóti altjóða mannarættindum!

Turið Maria Jóhansdóttir frá Amnesty Føroyum tók undir við hesum og segði, at hetta er eitt altjóða mannarættindamál, sum er staðfest í altjóða mannarættindalóg!

Men hetta passar ikki! Okkara lóg er ikki í stríð við altjóða mannarættindi.

Veruleikin er, at rætturin til fosturtøku er ikki staðfestur í nøkrum sáttmála um mannarættindi. Og tað er einki grundarlag fyri at siga, at altjóða mannarættindi stuðla fríari fosturtøku.

Eingin tekstur í nøkrum mannarættindaskjølum og eingi rættarpraksis siga hetta.

Harafturímóti er rætturin til lívið vardur í mongum mannarættindasáttmálum, t.d. europeiska mannarættindasáttmálanum og altjóða mannarættindasáttmálanum frá 1966.

Eg veit væl, at aktivistar í nevndum í ST royna at tulka mannarættindasáttmálan av nýggjum fyri at leggja trýst á og av øllum alvi royna at gera fosturtøku til eini mannarættindi í ST.

Men tað er bara ST-aðalfundurin, sum kann broyta sáttmálan, og tað er ein veruleiki, at umleið 75% av øllum heimsins londum viðurkenna ikki fría fosturtøku.

Og barnakonventiónin hevur ein tekst í formælinum, sum als ikki stuðlar fosturtøku, tvørturímóti. Har verður sagt (í danskari útgávu): …”barnet har som følge af sin fysiske og psykiske umodenhed behov for særlig beskyttelse og omsorg, herunder passende juridisk beskyttelse, både før og efter fødslen”.
Barnið hevur rætt til verju, eisini áðrenn tað kemur í verðina!

Eg vil bara siga, at tað er óhugnaligt, at Amnesty Føroyar skal biðja útlendingar leggja trýst á Føroyar, sítt egna heimland – og at tey enntá brúka mannarættindi sum argument!

Heldur áttu tey at gleðst um støðuna í Føroyum, her fosturtøkutalið er nógv lægri enn í hinum norðurlondunum, og her kvinnurnar framvegis eru nógv raskastar at fáa børn!

Jógvan á Lakjuni

​Eitt av málunum, sum eg vil arbeiða við, eru lestraríbúðir til tey, sum fara til  Danmarkar í lestrarørindum. Øll sum fara  niður  í lestrarørindum vita,  hvussu trupult tað ofta  kann vera at  fáa bústað í lestrartíðini.    

Tað er møguliga  avmarkað, hvussu nógv eitt fólkatingsumboð kann gera við hendan bústaðartrupulleikan.  Eg vil so íhvussu er gera alt  tað sum stendur í míni makt at ávirka teir røttu myndugleikarnar fyri at betra um atgongdina til lestraríbúðir.  Eg vil arbeiða fyri at føroysk lesandi blíva raðfest í tillutanini av lestraríbúðum.

Bústaður er ein grundleggjandi tørvur hjá okkum øllum og serliga hjá teim  ungu, sum fara heimanífrá í lestrarørindum.   Eg vil tí raðfesta hetta økið  høgt. 

X við Elsebeth Mercedis Gunnleygsdóttur​

Tjóðveldisdrongurin, sum gjørdist danskur sosialdemokratur.

Sjúrður og Javnaðarfl. vilja í einum og øllum fylgja Mette og dønum.
Sjúrður var við til at samtykkja “kapasitetspakkan”, sum m.a. innihelt ein radara, sum skuldi setast upp í Føroyum.
Føroyingar høvdu ikki biðið um nakran radara, og føroyskir mynduleikar vóru ikki tiknir við í viðgerðina, hóast radarin skuldi setast upp á føroyskari jørð.
So byrjaði dupultspælið frá dønum, Sjúrði og Javnaðarfl.
Tey høvdu ivaleyst roknað við, at føroyingar tóku undir við ætlanini uttan at seta treytir.
Tá eg so dittaði mær at nýta høvið til at seta treytir, (ikki noktaði fyri at seta radaran upp), so vit kundu fáa nøkur viðurskifti uppá pláss ímillum Føroyar og Danmark, umframt at kasta ljós á okkara handilsviðurskifti við Danmark/ES, gav Sjúrður ilt av sær.
Sjúrður hevur fingið nøkur oyrur frá Mette til mentanartiltøk í Føroyum. Afturfyri hevur hann verið handgingin maður hjá Mette í Føroyum.
Sjúrður, Mette og onnur komu fram á torg, speiraktu undirritaða, og hildu uppá, at ein blandaði ikki handilspolitikk o.a. uppí verju- og trygdarpolitikk.
Javnaðarfl. vildi hava Løgtingið til at taka støðu til radaran, men legði onki uppskot fyri Tingið tí viðvíkjandi. Saman við Tjóðveldi og Framsókn vildu tey hava Tingið til at heita á løgmann um at leggja radaramálið fyri Tingið. Dupultspæl.
Við hjálp frá Javnaðarfl., (tað var jú avtalað ímillum Sjúrð og Mette), løgdu føroyskir myndugleikar seg flatar og settu ongar treytir.
Radarin hevur ongantíð verið settur í samband við kríggið í Ukraina. Hóttanarstøðan um okkara leiðir er ikki broytt.
Nú skal Sjúrður í kríggj saman við Mette. Handilskríggj. Nú ber væl til at blanda handilspolitikk og trygdar- og verjupolitikk saman. Dupultspæl.
Tað hevur verið áhugavert at fylgja Sjúrði, tí politikkurin er sum vindurin blæsur. Í 2014, tá Russland tók Krim, skuldi handilspolitikkur og verju- og trygdarpolitikkur ikki blandast saman. Nú sigur Sjúrður tað sama sum Mette.
Tað er væl kent, at samskifti ímillum lond, serliga handilsviðurskifti, eru við til at skapa støðufesti í heiminum.
Eg kenni ongi dømir um, at handilstiltøk hava steðga nøkrum kríggi.
Tí undrar tað meg, at ongin tosar um at fara undir eina friðartilgongd fyri at fáa partarnar at gevast við krígnum í Ukraina.
Tað hevði sømt seg betur, um Sjúrður, Mette og øll onnur løgdu seg í selarnar fyri at fáa steðga ræðuleikunum í Ukraina í staðin fyri at bera brenni á bálið
Eingin umboðar betri Mette Fredriksen á Fólkatingi enn Sjúrður Skaale, velja tit hann fáa tit fýra ár afturat við tjóðveldisdronginum, sum gjørdist danskur sosialdemokratur.

Føroyar hava uppiborið betri.

Jacob Vestergaard

Fólkaflokkurin

Nú er bara ein vika eftir til stóra brakið tann 31.  Okt., tá vit í Føroyum skulu  velja tvey  umboð   at tala okkara  áhugamál  á Fólkatingi. Hetta er ein pallur  uttanfyri landoddarnar, sum vit heilt avgjørt skulu gera nýtslu av, so leingi vit eru í ríkisfelagsskapi við Danmark.   Vit skulu ongantíð  frásiga okkum møguleikar, sum vit hava.

 Verið eg vald, so vil eg troyta  allar   møguleikar  - eisini á Fólkatingi 100 % til frama fyri Føroyar.  Er tað nakað, sum eg sum politikari  altíð  eri farin eftir og nakað  sum hevur týdning  fyri meg,  so er tað fyrst og fremst  úrslit.  Tað er júst tað, sum eg framhaldandi fari eftir -  eisini  á Fólkatingi.      Kann nevna  lestraríbúðir til lesandi í Danmark, sjúkratrygd og yvirtøka av íleggingargrunninum. 

Eg fari at kempa  víðari hesar síðstu dagarnar   inntil valhølini lata aftur  fyri  at fáa flest møgulig  at velja fólkaflokkin.     Tað er umráðandi , at so nógvir  føroyingar sum gjørligt  brúka  møguleikan at velja eitt gott umboð  á fólkating.  Besta boðið  er ein fólkslig  rødd í fólkaflokkinum.

Til tey ungu sum velja fyrstu ferð og til tey sum enn ikki hava tikið støðu til, hvønn tey fara at velja til Fólkatingið vil eg koma við eini serligari og    inniligari áheitan.  Farið á val og veljið fólkaflokkin.  Tað er umráðandi við góðari  umboðan  og hon fæst best í fólkaflokkinum.  Hvør einasta atkvøða fyri mær persónliga hevði fløvað og  glett meg almikið. Møguleikin er nú. 

X við Elsebeth Mercedis Gunnleygsdóttur.   

​Nú eg stilli upp til fólkatingsvalið er tað eitt av mínum hjartamálum at bøta um umstøðurnar hjá sjúklingum, sum verða sendir til Danmarkar til sjúkraviðgerð. Eg vil arbeiða fyri at stytta og bøta um viðgerðina og økja um sjúklingatrygdina.

Tíðin hjá sjúklinginum í Danmark skal verða so stutt og effektiv sum møguligt og so lítið tyngjandi fyri sjúklingin sum til ber. Fyri at náa hesum er avgerandi neyðugt, at samstarvið millum føroyska og danska sjúkrahúsverkið er í topp. Allir relevantir upplýsingar um sjúklingin skulu verða tøkir, tá hann kemur til Danmarkar.

Somu kanningar, sum sjúklingurin er farin ígjøgnum í Føroyum, skulu ikki gerast umaftur í Danmark, tí skipanirnar í Føroyum og í Danmark ikki tosa saman. Úrslitið av hesum verður , at viðkomandi upplýsingar um sjúklingin ikki eru tøkir í Danmark, og tað má byrjast av nýggjum við kanningum.

Hetta krevur nógva tíð og orku. Ikki bara hjá heilsuverkinum, men sanniliga eisini hja sjúklinginum. Arbeiðið, sum er gjørt í Føroyum skal ikki gerast umaftur í Danmark. Tryggjast skal, at sjúklingurin fær røttu viðgerðina skjótast møguligt. Tíðin er í nógvum førum ein avgerandi faktor fyri útlitunum hjá sjúklinginum.

Eitt av amboðunum til at náa hesum er at fáa nýggju føroyska talgildu heilsuskipanina at samvirka við tí donsku, soleiðis at journalupplýsingar eru tøkar í bæði føroyska og danska heilsuverkinum.

Við vón um eitt gott fólkafloksvæl

Farið á val og veljið fólkaflokkin
Til teir veljarar, sum ikki ætla sær á fólkatingsval, vil eg siga, at tað er ein veruleiki, at vit eru framvegis í ríkisfelagsskapi við Danmark. Tað ræður tí um at brúka henda møguleikan til at ávirka og tala okkara søk. Fólkatingssessurin hjá okkum er ein pallur uttanfyri landoddarnar, har vit kunnu gera vart við okkara støðu og føra okkara sjónarmið fram. Fólkaflokkurin hevur áður víst, at tað kann geva úrslit. Tað ræður um at brúka allar teir møguleikar, sum vit hava at føra okkara áhugamál fram, bæði her heima og aðrastaðni. Tað er umráðandi, at vit hesuferð fáa eitt borgarligt umboð. Besta borgarliga umboðið fæst við at velja fólkaflokkin á fólkatingsvalinum tann 31. okt. Farið á val og brúkið hendan møguleikan. Tað hevði glett meg persónliga at fingið eina álitisváttan frá veljarunum á fólkatingsvalinum.

Við vón um eitt gott fólkafloksvæl.

Elsebeth Mercedis Gunnleygsdóttir