Nú kunnu Doors-fjepparar og onnur, sum dáma góðan gamlan rock/blues tónleik, gleða seg!

18. desember 2015 kl. 20 fer Uni Debess á pall í Reinsarínum at spæla løg eftir kenda rockbólkinum The Doors.

Við sær á pallin hevur hann Finn Hansen á keyboard og Per Ingvald Højgaard á trummum.

Um tiltakið sigur Uni: “Tónleikurin hjá The Doors hevur fylgt mær gjøgnum allan mín uppvøkstur og hevur verið ein stórur íblástur til tónleikin, sum eg havi gjørt og hevur yvirhøvur eisini havt ávirkan á tann vegin, sum eg eri farin tónleikaliga. Eg spæli altíð løg hjá The Doors, tá eg framføri á teimum ymisku støðunum, og eg havi leingi hugsað um at gera eina konsert bert við løgunum hjá hesum framúr góða bólki, sum rockaði í 60’unum og fyrst í 70’unum.”

Løgini, sum verða at hoyra hetta kvøldið, eru mest tey blueskendu hjá The Doors, men nøkur av teimum stóru hittunum verða sjálvandi eisini spæld.

Keyp atgonguseðil HER

JáH (y) 28.11.2015
Kelda: Reinsaríið/Perlan

Ein hevur ikki hoyrt so nógv frá Jacob Haugaard og Simon Von Kunoy, men nú hevur hetta heldur løgna parið skapt henda heldur løgna (og góða) Frikadellu-sang, sum tú kanst hoyra niðanfyri ...

JáH (y) 18.11.2015

Í hesari vikuni doyði so tann fimti Beatle'in og varð hann ein persónur, sum spældi trummur í albuminum hjá The Beatles "Love Me Do".

Talan er um Andy White, og ikki Ringo Starr - og hevur Andy mangan tosað um sína tíð, tá ið spældi trummir fyri teir eitt stutt tíðarskeið. Men sjálvt um hann visti at The Beatles var nakað heilt serstakt, so bleiv tað also Ringo Starr, sum bleiv endiligi trummusláari hjá The Beatles. White sjálvur spældi víðari trummir fyri kend nøvn, sosum: Rod Stewart, Marlene Dietrich og Burt Bacarach.

Tann "fimti" Beatle'in Andy White doyði tann 9. november í ár av eini heilabløðing og bleiv 85 ára gamal.

​JáH (y) 13.11.2015

Tað er útselt til allar 5 komandi dramakonsertirnar hjá Rósa Mariu - og verður tað tískil ein eykasýning mánadagin 16. nov.

Sjá eitt brot úr konsertini HER

Hvussu leingi tey fara at spæla Dramakonsertina Rósa Maria eftir Jens Paula Heinesen er enn óvist - tí eftirspurningurin er eftir øll at døma stórur. 

Bergur Rasmussen hevur skrivað tekstirnar, og Jónleif Jensen hevur smíðað og lagt øll løgini til rættis í dramakonsertini - so roknast kann við einum ordiliga brakið av einari konsert, um tú ert so eydnusamur, at tú hevur skaffa tær eina billett.

​JáH (y) 11.11.2015