Á ársins síðsta degi kom Magni Husgaard út við síni fyrstu útgávu við navninum Husgaard. Útgávan, ið ber heiti Reflections, er ein samansavning av 5 instrumentalum løgum í sjangruni pop/jazz.

Stutt um útgávuna sigur Magni, at tónleikurin onkursvegna er ein hugleiðing um lívið, sambandið millum menniskju, tilveruna og tað andaliga.

Tónleikarar á útgávuni eru:
Guitar: Petur Hans Niclasen
Kontrabass: Eyðun Johannesen
Trummur: Høgni Klakkstein
Klaver: Magni Husgaard

Magni Husgaard hevur skrivað øll løgini - lagið Jane Doe hevur hann skrivað saman við Peturi Hans Niclasen.

Hans Poulsen hevur tikið upp í Bloch Studio og IntroVers Studio. Óli Poulsen hevur mixað, og myndirnar, sum eru tiknar í sambandi við útgávuna, hevur veingir tikið.

Øll løgini eru tøk á Youtube á slóðini:

​Helena Dam á Neystabø tekur við sum deildarstjóri á Útbúgvingardeildini í Uttanríkis- og mentamálaráðnum frá 1. januar 2021 at rokna.

Innanhýsis umleggingar eru gjørdar í Uttanríkis- og mentamálaráðnum, og ein Útbúgvingardeild er skipað, sum hevur ábyrgdina av tí fakliga og politikkfyrireikandi arbeiðinum í breiðum týdningi innan útbúgvingar- og granskingarøkið, frá dagstovnum til hægri útbúgvingar og gransking. Sjey fólk eru á Útbúgvingardeildini.

Helena Dam á Neystabø er útbúgvin cand.mag. og hevur masterútbúgving (MPM) í almennari fyrisiting. Hon hevur drúgvar royndir sum leiðari í útbúgvingarverkinum, bæði sum stjóri á Føroya Handilsskúla og stjóri á Skúlabókagrunninum í nógv ár,  eins og drúgvar politiskar royndir í Løgtinginum og  sum landsstýrisfólk í mentamálum. 

Helena Dam á Neystabø kemur framvegis at hava ábyrgdina av verkætlanini við føroyskum sum annaðmál fyri tilflytarar, sum hon hevur arbeitt við, síðani á heysti 2019.

“Tað eru nógvar týdningarmiklar uppgávur fyri framman, tá um útbúgvingarskipan okkara ræður. Eg vóni, at eg kann vera við til at flyta alla skipanina framá. Tí ein góð útbúgvingarskipan er avgerandi fyri alt samfelagið. Eg eri spent uppá uppgávuna”, sigur Helena, sum tekur við starvinum 1. januar 2021.

Uttanríkis- og mentamálaráðið