Nú er revsivert at fremja kynsliga avnoyðslu ella at lokka børn og ung við ætlan um at fremja kynslig brotsverk.

Løgtingið samtykti einmælt at broyta revsilógina um kynsliga avnoyðslu og lokking. Hetta inniber, at lokking og kynslig avnoyðsla vera kynslig brotsverk í Føroyum, eins og tey eru í nógvum øðrum londum.

Áðrenn broytingina var mett at revsilógin ikki í nóg stóran mun hevði fylt við talgildu menningini og talgilda veruleikanum. Undanfarna lóggáva gjørdi tað torført hjá ákæruvaldinum at lyfta próvbyrðuna í sambandi við lokking og avnoyðslu, og tí er henda tíðarhóskandi broytingin nú framd.

”Hetta er eitt stórt fet ímóti at verja børn og ung, tá ið tey ferðast á netinum”, sigur Bjarni Kárason Petersen, landsstýrismaður, sum fegnast um, at løgtingið einmælt samtykti uppskotið.

Les meir um lokking og avnoyðslu her.

Løgmálaráðið

Fólkaflokkurin og Sambandsflokkurin taka ikki undir við uppskotinum hjá samgonguni at hækka prísin á heilivági, tí tað kemur bara at ganga útyvir tey, ið eru ringasta fyri.
 
Hetta er ikki einasta byrðan, samgongan leggur á okkara land. Í hesum føri á fólk, ið hava tørv á heilivági. 
 
Fólk, sum eisini fáa røð av øðrum rokningum frá landsstýrinum at rinda. 
 
Sitandi samgongan hevur eina rúgvu av avgjaldshækkingum og lítið skiljandi spariuppskotum. 
 
Bæði persónar og vinna standa fyri skotum.
 
Fyri persónar:
Hækka bensin-og dieselavgjald
Hækka brennioljugjald
Hækka el-prísin
Hækka kringvarpsgjaldið
Minka stuðulin til avlamisbil
Hækka egingjaldið á heilivág
Tey allar lægstløntu fáa hópin av avgjaldrokningum, men ongan skattalætta. Harafturat velur samgongan at lækka teirra orkustuðul úr 12.000 kr.í ár niður í 5.000 kr.næsta ár 
Sum einasti bólkur er samtykt, at lestrarstuðulin ikki skal prístalsjavnast í 2024
Útvald siglandi skulu,sum tey einastu,ið arbeiða heimanífrá, missa frádráttir.
Sjómannafrádrátturin skal skerjast
Og frádráttir hjá útisiglarum skulu takast burtur

Men:

Vælbjargaði skulu hava stóran skattalætta
Akademikarar hava í krónum fingið dupult so stóra lønarhækking sum sjúkrarøktarfrøðingar og Yngri læknar fáa tríggjar ferðirso stóra lønarhækking sum sjúkrarøktarfrøðingar 
Sendifólk skulu umframt serskipan av ovurstórari skattafríari viðbót fyri maka og børn, eisini hava barnafrádrátt

Fyri vinnuna eru rokningarnar stórar:
4-falding av toppskattinum á alivinnuna, sum longu hevur kostað 140 arbeiðspláss
Munandi hækking av tilfeingisgjaldi á fiskivinnuna og teirra manningar, upp í 36% av landingarvirðinum, t.v.s.áðrenn hýrur og útreiðslur 
Revsitiltøk móti Russlandi, sum bara raka føroyska veitaravinnu og tað meint 
Hækka bensin-og dieselavgjald
Hækka brennioljugjald á vinnuna úr 0 upp til 100 oyru/ltr. 
Hækka tungoljugjald
Hækka el-prísin munandi á vinnuna
Nýtt stórt avgjald á F-gass•Vinnan skal rinda fyri 7 teir fyrstu sjúkradagarnar í mun til 2 nú
Vinnan skal rinda størri part av løn til lærlingar, tá teir eru í skúla

Meirilutin heldur, at øll átøkini hjá landsstýrinum gera Føroyar til eitt verri og ójavnari samfelag.
 
Við hesum viðmerkingum tekur meirilutin ikki undir við málinum og mælir Løgtinginum frá at samtykkjauppskotið
 
Jørgen Niclasen, Fólkaflokkurin, Árni Skaale, Fólkaflokkurin, Johan Dahl, Sambandsflokkurin, og Kaj Leo Holm Johannesen, Sambandsflokkurin

Í dag hevur Fiskivinnu- og samferðslumálaráðið sent uppskot til broytingar í ferðslulógini í almenna hoyring.

Í 2006 samtykti Løgtingið, at Null-hugsjónin skuldi setast inn í ferðslulógina. Endamálið við Null-hugsjónini er, at eingin skal doyggja ella fáa álvarsligt mein av ferðsluvanlukku í vegaflutningsskipanini. Hetta krevur, at vit støðugt arbeiða við at betra um ferðslutrygdina í Føroyum.

Seinastu árini hevur gáloysni verið ein afturvendandi trupulleiki í ferðsluni. Í Ferðslutrygdarætlanini fyri 2019-2027, sum er gjørd av Ráðnum fyri Ferðslutrygd og øðrum samstarvsfeløgum, verður varpað ljós á vandan, tá førarar undir koyring ikki hugsavna seg um at koyra bil, men heldur eru upptiknir av øðrum, sum t.d. at tosa í fartelefon. Ferðslutrygdarætlanin mælir til, at førari av einum akfari, sum brúkar handhildna fartelefon ella annað handhildið samskiftistól, skal fáa klipp í koyrikortið og eina hægri bót.

Hesum tilmæli ynskir landsstýrismaðurin í samferðslumálum at fylgja, og tí er eitt av uppskotunum til broytingar í ferðslulógini, at bótin fyri nýtslu av handhildnari fartelefon, ímeðan koyrt verður, verður hækkað úr 1000 kr. til 1500 kr., umframt at tú fært klipp í koyrikortið.

Onnur uppskot til broytingar snúgva seg um, at verandi krav um skeið um rúsdrekka og ferðslu í sambandi við treytaleysa frádøming av koyrikortinum verður víðkað til eisini at fevna um rúsevni; forboð fyri nýtslu av lítlum motordrivnum akførum sum t.d. rennihjólum; tillagingar í tænastugjøldum, umframt at aðrar tekniskar broytingar eisini verða gjørdar.

Lógaruppskotið sæst undir "Uppskot til ummælis" her á síðuni.

Fiskivinnu- og samferðslumálaráðið

Løgtingið hevur í dag einmælt samtykt broytingaruppskotið um at leingja og hækka játtanina til at dagføra verandi vardar bústaðir. Lógin varð upprunaliga samtykt í 2020, og er endamálið, enn sum áður, at bøta um umstøðurnar á verandi bústovnum.

Síðani lógin varð samtykt er væl fingið burtur úr, serliga havandi í huga, at prísirnir eru munandi hækkaðir, eftir at lógin varð samtykt. Til samans eru 9 nýggj búpláss útvegað, samstundis sum fleiri av verandi bústovnum eru dagførdir í mun til brunakrøv, atkomu, ljóð, ljós, ventilatión o.a.

Tað er framhaldandi tørvur á at dagføra nakrar av verandi bústovnum. Tað snýr seg serliga um at betra um brunatrygdina, atkomuviðurskiftini, trygd, orku, inniklima o.a. Harumframt er ætlanin at brúka játtanina til aðrar fyriskipanir heimilaðar í lógini um almannatrygd og tænastur, eitt nú til hjálp í sambandi við harðskap.

Løgtingslógin er nú longd fram til 31. desember 2027 og fíggjarkarmurin hækkaður við 8,5 mió. kr. til tess at halda fram við at dagføra verandi bústovnar.

Almanna- og mentamálaráðið

Fólkaflokkuring og Sambandsflokkurin ávara móti broytingini í dagpeningalógini vegna sjúka.
 
Okkara uppfatan av einum vælferðarsamfelag er, at landið tekur sær av okkum, tá vit gerast sjúk.
 
Uppskotið um at broyta dagpening vegna sjúku rennur undan hesi meginreglu, tí nú vil landsstýrið senda rokningina til arbeiðsgevarar. Frá, at vinnan “bert” hevur rindað fyri 2 teir fyrstu sjúkradagarnar, vil landsstýrið við hesum uppskotinum áleggja vinnuni at rinda fyri 7 teir fyrstu sjúkradagarnar.
 
Landsstýrið sigur seg vilja spara 13 mió.kr. við uppskotinum. Hetta er ikki rætt, tí her verður einki spart, men henda stóra rokning verður send til arbeiðsgevarar.
 
Fyri arbeiðsgevarar kann uppskotið fáa álvarsamar avleiðingar, serliga fyri smáar fyritøkur.
 
Politikkur eigur at tryggja vinnuni góðar og støðugar karmar, men tað hevur sitandi samgonga ongan áhuga í.
 
Eisini er komið fram undir nevndarviðgerðini, at uppskotið kann fáa avleiðingar fyri fólk, sum av serligum orsøkum hava nógvar sjúkradagar. Sannlíkt er, at arbeiðsmarknaðurin fer at frávelja at seta hesi í starv. Hesar avleiðingar fara vit serliga at síggja, tá arbeiðsloysið aftur veksur.
 
Hetta er ikki einasta byrðan, samgongan leggur á okkara land og fólk.
 
Í hesumføri ein stór rokning til vinnufyritøkur, sum eisini fáa eina røð av øðrum byrðum frá landsstýrinum at rinda. Sitandi samgongan hevur eina rúgvu av avgjaldshækkingum og lítið skiljandi spariuppskotum. Bæði persónar og vinna standa fyri skotum.
 
Fyri persónar:
Hækka bensin-og dieselavgjald
Hækka brennioljugjald
Hækka el-prísin
Hækka kringvarpsgjaldið
Minka stuðulin til avlamisbil
Hækka egingjaldið á heilivág
Tey allar lægstløntu fáa hópin av avgjaldrokningum, men ongan skattalætta. Harafturat velur samgongan at lækka teirra orkustuðul úr 12.000 kr.í ár niður í 5.000 kr.næsta ár
Sum einasti bólkur er samtykt, at lestrarstuðulin ikki skal prístalsjavnast í 2024
Útvald siglandi skulu,sum tey einastu,ið arbeiða heimanífrá, missa frádráttir.
Sjómannafrádrátturin skal skerjast
Og frádráttir hjá útisiglarum skulu takast burtur

Men:

Vælbjargaði skulu hava stóran skattalætta
Akademikarar hava í krónum fingið dupult so stóra lønarhækking sum sjúkrarøktarfrøðingar og Yngri læknar fáa tríggjar ferðirso stóra lønarhækking sum sjúkrarøktarfrøðingar
Sendifólk skulu umframt serskipan av ovurstórari skattafríari viðbót fyri maka og børn, eisini hava barnafrádrátt

Fyri vinnuna eru rokningarnar stórar:
4-falding av toppskattinum á alivinnuna, sum longu hevur kostað 140 arbeiðspláss
Munandi hækking av tilfeingisgjaldi á fiskivinnuna og teirra manningar, upp í 36% av landingarvirðinum, t.v.s.áðrenn hýrur og útreiðslur
Revsitiltøk móti Russlandi, sum bara raka føroyska veitaravinnu og tað meint
Hækka bensin-og dieselavgjald
Hækka brennioljugjald á vinnuna úr 0 upp til 100 oyru/ltr.
Hækka tungoljugjald
Hækka el-prísin munandi á vinnuna
Nýtt stórt avgjald á F-gass•Vinnan skal rinda fyri 7 teir fyrstu sjúkradagarnar í mun til 2 nú
Vinnan skal rinda størri part av løn til lærlingar, tá teir eru í skúla

Meirilutin heldur í trivnaðarnevndini heldur, at øll átøkini hjá landsstýrinum gera Føroyar til eitt samfelag, har munandi verri verður at reka vinnuvirksemi.
 
Við hesum viðmerkingum tekur meirilutini kki undir við málinum og mælir Løgtinginum til ikki at samtykkja uppskotið.
 
Les uppskotið her.

Jørgen Niclasen, Fólkaflokkurin, Árni Skaale, Fólkaflokkurin, Johan Dahl, Sambandsflokkurin, og Kaj Leo Holm Johannesen, Sambandsflokkurin

Tað vóru ikki bara sjúkrarøktarfrøðingar,  sum stúrsaðu við,  tá tað frættist,  at hálønt fingu  ein lønarvøkstur uppá 12,70 % . Tað gjørdi eg og mong onnur við mær so sanniliga  eisini.

Sjúkrarøktarfrøðingar høvdu við tógvið  stríð  og strev og   7 vikurs streyku júst strítt seg til ein lønarvøkstur uppá 9,99 %.   Í krónum og oyrum fingu tey frammanundan háløntu     umleið  dupult so stóran lønarvøkstur sum sjúkrarøktarfrøðingar  uttan nakað hóvastak.

Langt ímillum orð og gerðir.
Áðrenn valið bleiv nógv tosað um tørvin á sjúkrarøktarfrøðingum av sitandi samgongu,  men hetta  bleiv so dyggiliga gloymt eftir valið. Her var langt ímillum orð og gerðir.  Tá samgongan útvaldi  nøkur starvsøkir til  lønarlyft blivu sjúkrarøktarfrøðingarnir frávaldir, so tað stóð eftir. Størsti bólkurin á økinum við longstu útbúgvingini og størstu ábyrgdini bleiv frávaldur.

Hóast sjúkrarøktarfrøðingarnir eru so týdningarmiklir, at løgmaður sjálvur fór í løgtingið at lóggeva teir aftur til arbeiðis, so blivu teir frávaldir til løntarlyft.  Sum um tað ikki var nóg mikið, so fingu hálønt  beint aftaná sáttmálasamráðingarnar  umleið dupult so stóran lønarvøkstur í krónum og oyrum.    Landstýrið hevur við hesum so dyggiliga traðkað á allar sjúkrarøktarfrøðingar, so tað stendur eftir.

Hvat bleiv av føgru orðum  løgmans áðrenn valið um bleytu virðini og heitu hendurnar. Eftirtíðin prógvaði, at hetta einans vóru  føgur orð uttan nakað   virði í veruleikanum. Hjarta meinti ikki tað, sum muður talaði.

Sjúkrarøktarfrøðingar størsta lønarlyftið í Danmark.
Í Dag og Viku mánakvøldið hoyrdu vit, at danska stjørnin júst hevur givið sjúkrarøktarfrøðingum størsta Lønarlyftið uppá kr. 3.000 um mánaðan.  Stjørnin legði dent á, at hon ynskti at  geva  eitt lønarlyft, sum kundi merkjast.   Soleiðis virðismetir danska stjørnin  og setir prís uppá   tey,  sum  arbeiða skeivu  tíðirnar í heilsuverkinum.   Í Føroyum verður hetta  ikki virðismett av sitandi  landstýri.  Tað er sjón fyri søgn.  Reyða samgongan yndar at samanlíkna okkum við grannalondini,  serliga Danmark -   hvussu tey gera har í øllum møguligum  málum. Tá tað kemur til hetta málið, ger reyða samgongan løgið  nokk júst tað øvugta.

Eg unni háløntum 12,75 % lønarvøkstur, men sjúkrarøktarfrøðingar skuldu sjálvandi fingið í minsta lagi tað sama. Samgongan má gevast við at gera mismun og velja fólk frá. Samgongan má gevast við at grava djúpari gjáir millum samfelagsbólkar. Sjúkrarøktarfrøðingar hava als ikki uppiborið hendan mismunin.

Elsebeth Mercedis Gunnleygsdóttur
Løgtingslimur

​Fólkapensjón hækkar næsta ár við 260 til 340 kr. um mánaðin. Saman við hækking í útgjaldi frá Samhaldsfasta, verður hækkingin til fólkapensjónistar 500 til 600 kr. um mánaðin. Sostatt fer ein stakur fólkapensjónistur uttan aðra inntøku at fáa 15.520 kr. um mánaðin. Fyritíðarpensjónin hækkar við 400 til 600 kr. um mánaðin, og hægsta endurgjald fyri mista arbeiðsinntøku hækkar við nærum 1.000 kr. upp í 26.814 kr. um mánaðin.

Kunngerðin um áseting og javning av almannaveitingum fyri 2024 er nú lýst, og á nýggjárinum hækka pensjónir og aðrar almannaveitingar við 3,8%.

Sirið Stenberg, landsstýriskvinna, sigur at javningin hevur stóran týdning fyri nógv fólk, soleiðis at almannaveitingarnar fylgja gongdini í samfelagnum annars.

Árini 2012 til 2021 var nærum ongin javning av almannaveitingum. Hetta er 3. árið á rað, at almannaveitingar verða javnaðar, og sostatt vísir tað seg, at javningin aftur er komin í eina fasta legu, sigur Sirið Stenberg.

Almanna- og mentamálaráðið