Bókingin av Roxette er tann størsta og mest krevjandi hjá Summar Festivalinum nakrantíð

Summar Festivalurin hevur síðani 2004 havt nógvar spennandi gestir á vitjan, og teirra millum hava eisini verið stór altjóða nøvn við krevjandi krøvum um ferðing, uppihald, tøkni og annað. Burtur úr rúgvuni kunnu nevnast Westlife, Scorpions, Ronan Keating og Twisted Sister.

Men bókingin av Roxette setur enn størri krøv til landsins størsta tónleikatiltak.

- Hetta er størsta og mest krevjandi bókingini av einum bólki, sum vit nakrantíð hava gjørt. Krøvini eru stór til tøkni og alt annað, men afturfyri kunnu vit eisini bjóða størstu poppkonsert í Føroyum nakrantíð. Hetta verður nakað, sum fólk ongantíð áður hava upplivað í okkara landi, og sum verður eitt minni fyri lívið, sigur Erik Biskopstø, sum er ein av fyrireikarunum av Summar Festivalinum.

Roxette eru farin undir heimsturné í ár, og næsta ár spæla tey serliga í Europa. Tey ætla ikki at slaka við sínari framførslu í Føroyum og ætla at geva føroyingum sama show, sum tey hava á pallum í Paris, London, Berlin, Prag, Madrid og øllum hinum stórbýunum, tey vitja næsta ár.

Lagt er tí upp til størstu poppkonsert í Føroyum nakrantíð, tá ið Roxette spælir á Summar Festivalinum, ið verður hildin í døgunum frá 6. til 8 august 2015.

Kelda: SF

Svenska heimsnavnið við stóru hittunum spælir á Vágsbøi næsta summar

It Must Have Been Love. The Look. Listen To Your Heart. Sleeping In My Car.Dangerous. Spending My Time. Joyride.

Listin við kendum sangum hjá svenska bólkinum Roxette er langur. 31 hitsinglur um allan heim, fleiri nummar 1 hitt í USA, og umleið 75 milliónir seld eintøk steðfesta bólkin sum eitt av størstu nøvnunum í altjóða popptónleiki í nýggjari tíð.

Næsta ár fer Roxette á heimsturné, og tá leggja tey eisini leiðina til Føroya, her tey spæla á Summar Festivalinum í Klaksvík.

- Vit hava havt samband við Roxette í nøkur ár, og vit eru ómetaliga glað og eyðmjúk um at kunna avdúka eitt so stórt navn til festivalin næsta summar, sigur Erik Biskopstø, sum er ein av fyrireikarunum av Summar Festivalinum.

- Roxette er ein bólkur, sum riggar ómetaliga væl til Summar Festivalin. Tey hava fleiri heimshitt og eina langa røð av kendum sangum. Hetta er melodiøsur popptónleikur á høgum altjóða stigi, sum fólk í øllum aldri kunnu njóta, sigur hann.

Roxette spælir fríggjakvøldið á Summar Festivalinum 2015.

Í dag byrjar forsølan til Summar Festivalin. Atgongumerki kunnu keypast áheimasíðuni sf.fo og í Telebúðum.

Kelda SF