​Innkomna peningaupphæddin í ár er 1.407.000 kr.

Peningurin, sum Team Rynkeby Føroyar savnaði inn í sambandi við túrin til París í ár, varð handaður forkvinnuni í Krabbameinsfelagnum, Jansy Gaardlykke, á samkomu í Aulini í Finsen leygardagin 14. september.

Tá Team Rynkeby á sinni byrjaði varð stuðulin einans latin børnum við krabbameini og familjum teirra. Hetta er nú broytt soleiðis, at Team Rynkeby letur stuðul meira breitt, nevniliga til børn við hættisligum sjúkum og familjur teirra, og sostatt eisini til børn við til dømis lungna- og hjartasjúkum.

Team Rynkeby vil við hesum so miriliga takka fyri allan stuðul og styrk sum privatpersónar, feløg, fyritøkur og kommunur á ymsan hátt veita okkum í okkara stremban eftir at gera nakað gott fyri onnur, samstundis at vit gera nakað gott fyri okkum sjálvi.

Kelda: Team Rynkeby

SáH
​

Sum liður í arbeiðnum fyri at menna tænastuna og arbeiðsumstøðurnar á eldraøkinum, fingu starvsfólk hjá NBH í gjár undirvísing í, hvussu starvsfólk kunnu brúka flytilyftir, sum í næstum verða settar upp á Heiminum við Vágna, Sambýlinum á Heygnum og á Røktarheiminum.

Síðani eldraøkið varð lagt út til kommunurnar at umsita, hevur NBH raðfest tætt samstarv millum eitt nú leiðslu og starvsfólk. Ergoterapeutarnir hjá NBH hava í eina tíð víst á, at flytilyftir kunnu gera stóran mun, tá ið talan er um flytistøður, sum m.a. gerast smidligari fyri borgaran, umframt at starvsfólkini fáa nógv betri arbeiðsumstøður.

– Hetta er avgjørt eitt stig rætta vegin, tá hugsað verður um tænastuna til borgaran og arbeiðsumstøðurnar hjá okkara starvsfólkum. Í ár hevur stýrið raðfest pening soleiðis, at 16 kømur kunnu gerast klár til flytilyftir, og í komandi ári verður eisini peningur settur av til enn fleiri flytilyftir. Málið er, at vit framyvir fara at hava møguleika at knýta flytilyftir í allar búeindirnar hjá NBH, sigur Jógvan Skorheim, formaður í NBH.

Tað er danski veitarin Guldmann, ið hevur nógv ár á baki, sum er veitari av hesari tøkni. Til undirvísingina í gjár vístu teir m.a. á, at fyritøkan hevur gjørt eitt stórt kanningararbeiði, ið staðfestir høgt nøgdsemi millum bæði brúkarar og starvsfólk.

Malan Steinhólm og Olivia Mikkelsen, ergoterapeutar í NBH, sum saman við leiðsluni hava arbeitt við hesum átakinum siga, at nýggju flytilyftirnar hava nógvar møguleikar, sum gólvlyftin ikki hevur. Eitt nú kann nýggja flytilyftin eisini brúkast tá búfólk, sum eru songjarliggjandi, skulu hava venjing ella røkt. Malan Steinhólm og Olivia Mikkelsen fegnast alsamt um hesa menningina og eru stoltar av, at NBH raðfestir hetta høgt.

Tíðindaskriv á nbh.fo 11. september 2019

Her sæst fleiri myndir, klikk her: “Tænastur í støðugari menning”

SáH

Starvsfólkini í Barnatannrøktini høvdu í gjár skipað fyri hugnaligari hátíðarløtu fyri Lenu Gerðalíð, sum takkar fyri seg í starvinum sum klinikassistentur. Lena hevur starvast í barnatannrøktini í 44 ár.

Borgarstjórin, Jógvan Skorheim varð eisini boðin við, og nýtti hann høvið at takka Lenu fyri drúgva og trúfasta tænastu, sum er komið fleiri ættarliðum av klaksvíkingum til góðar. Eisini Unn Jacobsen, leiðari á Barnatannrøktini helt røðu fyri Lenu. Hon duldi ikki fyri, at saknurin verður stórur, tí Lena hevur verið bæði arbeiðsom og dugnalig, og so hevur hon ótrúlig evnir til at fjálga um sínar starvsfelagar.

Klaksvíkar kommuna takkar Lenu fyri drúgva og trúfasta tænastu í øll hesi ár.

​Blíðan byr framyvir.

Kelda: Klaksvík.fo

SáH