Fyrsta royndin at veita borgarum møguleika fyri Støkk inn til koppseting var leygardagin á Landssjúkrahúsinum. Í ein tíma bar til at leggja leiðina framvið koppsetingarstaðnum á Eirargarði og standa í kø til koppseting uttan at hava bílagt sær tíð frammanundan. Á Landssjúkrahúsinum vóru vit spent, um fólk fóru at taka ímóti tilboðnum, og tá avtornaði vísti tað seg, at áleið 85 fólk møttu tann tíman Støkk inn møguleikin vardi.

Í gjár 19. juli veittu øll trý sjúkrahúsini borgarum møguleika fyri Støkk inn í ein tíma.

Á Klaksvíkar Sjúkrahúsi møttu 136 borgarar, á Suðuroyrar Sjúkrahúsi vóru tey 33, og á Landssjúkrahúsinum vóru 140 fólk, sum brúktu møguleikan at koppseta seg uttan bílegging.  

Summi fingu fyrsta prikið, meðan onnur høvdu valt at fáa seinna prikið, heldur enn at bíða eftir innkalling. 

Tað skulu altíð ganga 21 dagar frá fyrra prikinum til seinna prikið. 

Sostatt vóru tað 394 fólk, sum nýttu Støkk inn í teir tilsamans 4 tímarnar, ið Sjúkrahúsverkið veitti hendan møguleikan. Tað eru knapt 100 fólk pr. tíma. 

Av tí at undirtøkan var so góð, verður væntandi lýst við Støkk inn møguleika aftur seinni. 

​Kunngerðin um ókeypis koppseting loyvir í løtuni borgarum í aldrinum 16 ár og eldri at vera koppsett.

Klaksvíkar Sjúkrahús

Landslæknin heitir nú á øll, sum sunnunáttina hava verið í Sirkus, Basecamp og Umami um at gáa eftir, um tey fáa sjúkueyðkenni.

​Eru fólk ikki koppsett ella í iva, eiga tey at lata seg kannast sum skjótast. Áheitanin hjá landslæknanum kemur í kjalarvørrinum á, at ein persónur, ið fekk staðfest smittuna í gjár, var í býnum sunnunáttina.

Heilsumálaráðið

Hevur tú ikki bílagt tær tíð til koppseting enn?

Sjúkrahúsverkið fer nú at bjóða støkk inn til koppseting, har tú ávís tíðarskeið kanst møta á nærmasta koppsetingarstaði og fáa prikið, uttan at hava bílagt tær tíð frammanundan.

Nýggjar kanningar vísa, at bert í fáum førum verða koppsett fólk smittað við koronu. Í Danmark eru einans 0,08% av teimum koppsettu eftirfylgjandi vorðin smittað við koronu.

Í Føroyum eru áleið 25.000 fólk koppsett higartil, og einans 0,04% eru eftirfylgjandi smittað. Tað er sostatt einans í fáum førum, at fólk eru vorðin smittað aftaná koppseting.

Lars Fodgaard Møller, landslækni, hevur úttalað, at tey, sum eru koppsett fáa eina nógv mildari sjúkugongd enn tey, sum ikki eru koppsett, umframt at tey koppsettu smitta minni.

Støkk inn til koppseting verður hesar tíðir:

Á Landssjúkrahúsinum
Leygardagin 17. juli kl. 16.30-17.30
Mánadagin 19. juli kl. 18.30-19.30

Á Klaksvíkar Sjúkrahúsi
Mánadagin 19. juli kl. 17.00-18.00

Á Suðuroyar Sjúkrahúsi
Mánadagin 19. juli kl. 15.30-16.30

Hevur tú fingið fyrra prikið, er tað ein treyt, at 21 dagar eru farnir, innan tú kanst fáa seinna prikið.

Nokk av koppsetingarevni er í landinum, so umframt støkk inn tíðirnar, verða næstu dagarnar eisini tey koppsett, sum hava tryggjað sær eina tíð frammanundan.

Heilsumálaráðið

Tá føroyska fólkið hevur fingið flokkimmunitet ímóti koronu, er ikki longur vandi fyri ógvusligum útbrotum, har sjúkan spreiðir seg uttan tamarhald. Men flokkimmunitetur merkir tó ikki, at ongin tá kann gerast sjúkur longur.

Vit laða okkum varðar á leiðini í verjuni ímóti koronu og niðurberjingini av farsóttini. Vit merkja okkum teir rundu dagarnar, fyrst tá tíggju prosent av okkum vórðu koppsett, síðani 20 prosent, triði hvør og so framvegis. Og nú hava 58 prosent av øllum føroyingum fingið fyrsta prikið, og sløk 40 prosent hava fingið seinna prikið, og eru liðugt koppsett.

Tað er at frøast um, at tað hevur gingið so væl at koppseta so nógvar føroyingar, uttan at sjúkan veruliga er sloppin at fáa fastatøkur í Føroyum. Og við fáum undantøkum eru tey, sum kortini eru blivin sjúk, sloppin væl – tey eru komin væl fyri seg aftur.

Málið er tó flokkimmunitetur, sum er tann stóri varðin á leiðini. Tí tá tað málið er rokkið, missir sjúkan takið og fer so líðandi at hvørva.

Tá tað snýr seg um koronu, COVID-19, hevur verið sagt, at flokkimmunitetur er rokkin, tá 70-75 prosent av fólkinum er koppsett. Nýggj meira smittandi frábrigdi av virusinum, til dømis tað sonevnda deltafrábrigdið, hava tó fingið donsku heilsumyndugleikarnar at ivast í, um 70-75 prosent er nóg mikið. Tí hevur Sundhedsstyrelsen mælt til, at ung í aldursbólkinum 12 til 15 ár eisini verða koppsett. Koppsetingarbólkurin hevur ikki tikið støðu til, um tey í aldursbólkinum 12-15 ár skulu fáa tilboð um koppseting. Arbeitt verður við málinum

Men hugtakið flokkimmunitetur verður ofta misskilt

Tað liggur í orðinum, at flokkimmunitetur verjir fjøldina. Prinsippið er einfalt at skilja: Tess fleiri fólk í einum landi ella avmarkaðum øki hava andevni ímóti eini smittandi sjúku, til dømis koronu, tí tey eru koppsett ella longu hava verið sjúk, tess minni eru sannlíkindini hjá ókoppsettum fólki at renna seg í fólk, sum eru sjúk og tískil kunnu smitta.

Tá flokkimuniteturin er rokkin, eru hesi sannlíkindini vorðin so smá, at tey flestu, sum kortini verða smittað, verða frísk aftur uttan at hava smittað nakran annan. Tá doyr smittan spakuliga út. Tað kann samanberast við ein vatnbrunn, tá turkur er – tað rennur meira úr brunninum enn í hann, og tí tømist hann.

Smittan doyr tó ikki út beinanvegin, tá flokkimmuniteturin er rokkin. Og sjúkan kann vitja aftur, til dømis í sambandi við ferðing. Tí er vert at geva gætur, at flokkimmunitetur als ikki merkir, at ongin longur kann gerast sjúk/-ur. Er eitt fólk ikki koppsett ella ikki longu hevur havt koronu, so hevur tað ikki andevni ímóti sjúkuni. Tí kann tað saktans verða smittað og gerast sjúkt, sjálvt um alt fólkið samlað sæð hevur rokkið markinum fyri flokkimmuniteti.

Tað er tí skeivt at halda, at einum ikki nýtist at koppsetast, men at tað er nóg mikið bara at ansa væl eftir ikki at gerast sjúk/-ur, áðrenn fjøldin hevur fingið flokkimmunitet, tí tá fer hann at syrgja fyri hundrað prosent verju.

Tað fer hann ikki. Flokkimmuniteturin ger sannlíkindini fyri smittu minni og forðar fyri ógvusligari smittuútbreiðslu, men ert tú ókoppsett/-ur og so óheppin at koma í samband við ein, ið ber koronusmittuna, so er stórur vandi fyri at fáa koronu, sama um fólkið annars hevur flokkimmunitet

COVID-19 koppsetingarbólkurin