​187 føroyingar fingið staðfest smittuna

Tað eru nú í alt 187 føroyingar, ið hava fingið staðfest corona-smittuna. Hetta byggir á í alt 6375 kanningarúrslit.

Sostatt eru tveir tilburðir staðfestir seinasta samdøgrið.

Tað upplýsir Landslæknaembætið í morgun, nú seinastu kanningarúrslitini eru tøk.

Í løtuni eru 178 føroyingar staðfestir frískir, eftir at hava fingið staðfest coronasmittuna. Eingin persónur er í løtuni innlagdur á Sjúkrahúsverki Føroya í sambandi við coronasmittuna.

Heilsumálaráðið tann 23. apríl 2020 klokkan 07.10

Nógv virksemi er í gongd á Deildini fyri Arbeiðs- og Almannaheilsu. Í gjár fingu 1500 persónar bræv frá okkum í samband við kanning av myrkatalinum. Tað hevur verið ein sannur telefonstormur, og meira enn 200 fólk hava longu sagt, at tey vilja luttaka. Tað eru vit sera fegin um. 
 
Ein onnur verkætlan fer í gongd nú, har endamálið er at kanna sjúkutekin hjá fólki, sum hava havt koronasmittuna. Vit ætla at greina vanligu sjúkugongdina hjá teimum, men í serligan mun eisini at finna tey, sum hava óvæntaða sjúkugongd og eftirsjúkur. 
 
Luttøkan ber við sær, at vit ringja til hesi fólk eina ferð um vikuna í 6 vikur. Tað verður í høvuðsheitum læknin og PhD lesandi Marnar F. Kristiansen, sum fer at ringja. Frá summum fara vit eisini at biðja um eina blóðroynd at máta andevni í kroppinum, brunamarkørar, blóðtýpu og møguliga genetiskar broytingar, sum kunnu verða tengdar at sjúkueyðkennum. Hettar verður gjørt fyri at kunna samanbera tey, sum hava verið illa sjúk, við tey, sum hava haft milda sjúku. 
 
Verkætlanin er eitt samstarv millum Deildina fyri Arbeiðs- og Almannaheilsu, Landssjúkrahúsið, Heilsufrøðiligu Starvsstovuna, Fróðskaparsetur Føroya og Depilin fyri Heilsu- og Almannagransking. Pál Weihe er kliniskur ábyrgdarhavi og stendur saman við Mariu Skaalum Petersen, granskara fyri hesi kanning. Aðrir luttakarar eru Marin Strøm, lektari á Fróðskaparsetrinum, Bjarni á Steig og Shahin Gaini, yvirlæknar á Landssjúkrahúsinum, Lars Fodgaard Møller, landslækni, Debes H. Christiansen, deildarleiðari á Heilsufrøðiligu Starvsstovuni, og Marnar F. Kristiansen, lækni og PhD lesandi á Fróðskaparsetrinum. 
 
Verkætlanin er fíggjað við 445.000 frá partafeløgunum Krúnborg og Borgartún. 
 
 Vinarliga 
  
Pál Weihe, yvirlækni og Maria Skaalum Petersen, granskari 

Deildin fyri Arbeiðs- og Almannaheilsu 

“Við hesum vilja vit eisini hjálpa teimum, sum ikki vórðu umfatað av fyrra hjálparpakkanum,”
sigur Elsebeth Mercedis Gunnleygsdóttur, landsstýriskvinna í almannamálum.

Ein skipan verður nú gjørd til tess at hjálpa fólkapensjonistum, sum orsakað av covid-19 eru sendir heim, hava verið fyri inntøkumissi ella eru í sóttarhaldi.

Arbeiðandi fólkapensjonistar eru eisini raktir av covid-19.

Tí hevur landsstýrið gjørt av, at hesi – sum partur av hjálparpakka tvey – skulu hava sama rætt sum starvsfólk á privata arbeiðsmarknaðinum, tá tey eru fyri inntøkumissi orsakað av korona.

Arbeiðandi fólkapensjónistar fáa nú sjúkradagpening, um teir av heilsumyndugleikunum eru sendir í, ella eru mældir til at fara í, sóttarhald vegna covid-19. Talan verður um í mesta lagi 500 krónur um dagin, eftirsum hesi fólk frammanundan fáa fólkapensjón og samhaldsfasta.

Fólkapensjonistar, sum framvegis arbeiða, og sum eru fyri lønarmissi orsakað av covid-19, fáa eisini lønarískoyti. Hetta ískoytið verður í mesta lagi 58 krónur um tíman, eftirsum hesi fólk longu fáa fólkapensjón og samhaldsfasta.

“Tey eldru, sum ikki vóru við í fyrsta hjálparpakkanum, fáa nú ta somu hjálpina, sum onnur starvsfólk, tá tey missa inntøku orsakað av korona,”
sigur Elsebeth Mercedis Gunnleygsdóttur, landsstýriskvinna í almannamálum.

Afturat hesum báðum broytingum, verður skipanin, har privatir arbeiðsgevarar fáa afturrindað lønarútreiðslur til starvsfólk, víðkað til at fevna um ein størri starvsfólkahóp.

Nevndu broytingar fáa virknað frá 12. mars, og fara úr gildi aftur 30. juni í ár.

​Almannamálaráðið