Starvsfólk, ið eru um persónar, sum hava víðfevnd likamlig ella sálarlig brek, skulu vita greitt, nær tvingsil og onnur inntriv í sjálvsavgerðarrættin kunnu fremjast.

Allir borgarar hava rætt til at taka avgerðir um egið lív og virki – eisini borgarar, sum hava tørv á umsorgan, røkt og stuðli. Stundum kunnu tó vera støður, har umsorgan, røkt og stuðul mugu veitast, tá vandi annars er fyri heilsu og lívi hjá viðkomandi borgara ella øðrum. Tá kann gerast neyðugt við serligum inntrivum, so sum tvingsli.

Tað er ongantíð loyvt starvsfólki at nýta tvingsil uttan greiða lógarheimild. Henda heimild verður nú veitt sambært nýggju Tvingsilslógini hjá Eyðgunn Samuelsen, landsstýriskvinnu, sum týsdagin verður viðgjørd í løgtinginum.

-Rættartrygdin hjá okkara veikastu borgarum skal altíð tryggjast, og bæði avvarðandi og myndugleikar hava leingi hava spurt eftir hesari heimildini, sigur landsstýriskvinnan.

Endamálið við Tvingsilslógini er at veita starvsfólki greiða heimild fyri, undir hvørjum umstøðum tvingsil og onnur inntriv í sjálvsavgerðarrættin kunnu fremjast. Slík inntriv skulu einans nýtast sum seinasti útvegur, tá aðrar loysnir roynast úrslitaleysar og meginreglan um minsta inntriv er ein grundleggjandi táttur í lógini.

Lógin er galdandi fyri starvsfólk og persónar, ið virka undir og fáa tænastur sambært komandi Vælferðarlógini, løgtingslóg um heimatænastu, eldrarøkt v.m. og Barnaverndarlógini.

Málbólkurin er persónar, ið m.a. hava seinheilaskaða, demenssjúku o.a., ið ikki geva samtykki ella ikki eru førir fyri at geva samtykki. Avgerandi er, at persónurin hevur fyri neyðini at fáa ávísa røkt og umsorgan, ið ikki kann veitast uttan at starvsfólk nýta tvingsil ella fremja onnur inntriv í sjálvsavgerðarrættin hjá honum.

Talan er m.a. um, at starvsfólk undir ávísum umstøðum hava heimild at nýta ávaringarskipanir og peilingarskipanir til persón við eitt nú demenssjúku, ið er í vanda fyri at villast av leið og koma sær sjálvum í ymsar vandastøður.

Kelda: amr.fo

Yvirlýsing

Um 300 sjúkrarøktarfrøðingar vóru samlaðir á Hotel Føroyum í dag til aðalfund hjá Felagnum Føroyskir Sjúkrarøktarfrøðingar.

Aðalfundurin er samdur um at átala hugburð og framferð hjá politiska myndugleikanum og fyrisitingini mótvegis fakligu leiðsluni, sum er neyðug fyri at leiða heilsuverkið og eldraøkið.

Nú álit um framtíðar heilsuverk er skrivað, og nýggj leiðsla sett, vóru starvsfólkini enn einaferð til reiðar at gera teirra besta, til tess at føroyingar skulu hava eitt vælvirkandi heilsuverk. Men soleiðis skuldi heldur ikki verða hesa ferð.

Starvsfólkini innan føroyska heilsuverkið eru til reiðar at gera sín part fyri at menna og stuðla undir framgongd. Vit bíða bert eftir, at politiska skipanin og heilsumálaráðið taka støðuna í álvara.

Sami hugburður til fakliga leiðslu sæst aftur í Almannamálaráðnum og lógini um eldraøkið. Føroyski borgarin er als ikki tryggjaður eina fakliga tænstu. Longu nú, fá ár eftir at kommunurnar yvirtóku eldraøkið, sæst ein ójavni ímillum økini, hvørjar tænastur verða veittar okkara eldru borgarum í Føroyum.

Givið er, at um avgerðir verða tiknar við støði í heilsufakligum kunnleika bæði í Almannamálaráðnum og Heilsumálaráðnum, verður arbeiðið á einum hægri støði og fakliga nógv betur tryggjað.

Ongin kennir tørvin innan heilsuverkið og eldraøkið betri enn fakfólk. Kortini verða tey hildin í armslongd, tá ið ætlanir verða lagdar av ráðunum ella lógarverk verður smíðað. Úrslitið verður sjálvsagt hareftir: eitt heilsuverk har fremsta uppgávan hjá forstjóranum sambært landsstýriskvinnuni er, at játtanin verður hildin, og ein eldralóg, sum ikki tryggjar føroyingum eina fakliga ella javnbjóðis tænastu.

Hetta vísir greitt manglandi vitan hjá teimum, sum taka avgerðirnar. Um fremsta uppgávan er, at játtanin skal haldast, verður tað ómøguligt at hava visjónir fyri at menna tænastuna til gagns fyri allar sjúklingar og borgarar. Men staðfestast má, at hetta er hugburðurin í politisku leiðsluni og ráðunum í dag.

Aðalfundurin hjá Felagnum Føroyskir Sjúkrarøktarfrøðingar rópar varskó. Heilsutænastur og veitingar innan eldraøkið eru grundarsteinar undir okkara vælferðarsamfelagi. Vit eiga sum samfelag at taka ábyrgd og seta skikkaði fakfólk til at leiða, fyri at tryggja fakliga støðið og eina javnbjóðis heilsutænastu til allar føroyingar.

Felagið Føroyskir Sjúkrarøktarfrøðingar