Stýrið fyri Norðoya Bú- og Heimatænastu hevur gjørt av, at tænastudepilin skal fevna um hølir til venjingar, heimatænastu og dagtilhald.

Í hesum sambandi verður skipað fyri kunningarátaki í Auluni í skúlanum á Viðareiði hóskvøldið 3. februar kl. 19.00.

Eisini fer tað í næstum at bera til hjá fólkapensjónistum at venja í skúlanum á Viðareiði. Kunnað verður somuleiðis um hendan venjingarmøguleika og høvi verður at síggja venjingarumstøðurnar.

Skráin:
·       Marita Sumberg, borgarstjóri á Viðareiði, bjóðar vælkomin
·       Marna E. Jensen, stjóri fyri NBH, og Svend Sivertsen, arkitektur frá FuglArk, kunna um tænastudepilin
·       Hedevig Matras, deildarleiðari fyri fysio- og ergoterapieindina hjá NBH, kunnar um venjingartilboðið
·       Margetha í Buð, limur í Eldraráðnum, hugleiðir
·       Olvheðin Jacobsen syngur
·       Katrin Næs, borgarstjóri i Hvannasundi, leiðir átakið

Allir fólkapensjónistar norðanfyri fjall eru vælkomnir.

Norðoya Bú- og Heimatænastan

Í gjár vóru 518 nýggir tilburðir staðfestir, vísa nýggjastu tølini hjá landslæknanum.

Øll tey smittaðu hava fingið boð.

2619 kanningar vóru gjørdar seinasta døgnið. Í løtuni eru 4171 smittað, eingin er innlagdur vegna, tvey eru innløgd við korona, og 17 eru deyð við korona í Føroyum.

Heilsumálaráðið og Føroya Landsstýri

Í gjár vóru 616 nýggir tilburðir staðfestir, vísa nýggjastu tølini hjá landslæknanum.

Øll tey smittaðu hava fingið boð.

3888 kanningar vóru gjørdar seinasta døgnið. Í løtuni eru 4061 smittað, eingin er innlagdur vegna, tvey eru innløgd við korona, og 17 eru deyð við korona í Føroyum.

Heilsumálaráðið og Føroya Landsstrýri

Í gjár vóru 533 nýggir tilburðir staðfestir, vísa nýggjastu tølini hjá landslæknanum.

Øll tey smittaðu hava fingið boð.

3606 kanningar vóru gjørdar seinasta døgnið. Í løtuni eru 3859 smittað, eingin er innlagdur vegna ella við korona í Føroyum.

Heilsumálaráðið og Føroya Landsstýri

Fleiri tíðir eru lagdar út til koppseting av børnum í aldrinum 5-11 ár. Koppsett verður bæði mikudagin og leygardagin hesa vikuna.

Til ber at bíleggja tíð á korona.fo. Minst til at velja Tjaldurs Apotek sum koppsetingarstað. Børnini í hesum aldurbólki verða ikki koppsett á hinum koppsetingarstøðunum.

Tað er Sjúkrahúsverkið, sum hevur ábyrgdina av koppsetingini av teimum 5-11 ára gomlu børnunum. Koppsetingin fer fram í samstarvi við Apoteksverkið og tað eru heilsufrøðingar, ið taka sær av sjálvari koppsetingini.

Lækni frá Sjúkrahúsverkinum verður eisini knýttur at koppsetingarstaðnum.

Sjúkrahúsverki

Seinnapartin í dag varð skipað fyri almennari framløgu í Smæruni, har Felagið Føroyskir Sjúkrarøktarfrøðingar (FFSF) handaði Almannamálaráðnum nýtt tilmæli. Talan er um eitt arbeiði um skipan av dygdargóðum heilsutænastum í primera geiranum við høvuðsdenti á eldraøkið og sjúkrarøktarfakligar førleikar.
Tað eru tær báðar Sunnuva á Lakjuni, sjúkrarøktarfrøðingur og master í fólkaheilsuvísindi, og Jónvør Christiansen, sjúkrarøktarfrøðingur og master í avanseraðari, kliniskari, geriatriskari sjúkrarøkt, sum hava fyristaðið vísindaligu kanningina og skrivað tilmælið vegna FFSF.

Ætlanin var, at Óluva í Gong, forkvinna skuldi handa Sólviti Nolsøe, landsstýrismanni í Almannamálum tilmælið, men honum barst undan og í hansara stað var Eyðun Mohr Hansen, aðalstjóri í Almannamálaráðum.

Framløgan varð stroymað og sæst HER

Niðanfyri er røðan hjá Sólvit E. Nolsø, landsstýrismanni, sum Eyðun Mohr Hansen bar fram á tiltakinum í Smæruni. 

Góðan dag, øll somul!

Í dag er ein stórur dagur, nú tilmælið hjá Felagnum Føroyskir Sjúkrarøktarfrøðingar verður handað. Spennandi var at fylgja framløguni við tilmælum hjá tykkum báðum Sunnuva á Lakjuni og Jónvør Christiansen. Tit hava báðar drúgvar leiðsluroyndir í eldrarøktini, og hava arbeitt vísindaliga við økinum, so tað er sjálvsagt at lata tykkum standa á odda fyri slíkum arbeiði.

Avbjóðingarnar á eldraøkinum eru stórar, og er tað væl kent. Tað er tí átrokandi, at vit sum samfelag endurskoða og um neyðugt nýhugsa bæði røkt og viðgerð av okkara eldri borgarum.

Tað hevur verið frammi, at hesar avbjóðingar vísa seg á fleiri mótum:

Bæði demografiskt, við trygd fyri dygd av tænastuni kring alt landið við tvørrandi starvsfólkaorku, yrkisførleika og fakligari menning í tí samansetta tørvinum hjá okkara eldru og í sjálvum hugburðinum til tey eldri Alt hetta má takast í álvara.

Tað var á nýggjárinum í 2015, at ábyrgdin av eldrarøktini og heimatænastuni varð løgd út til kommunurnar at umsita, og hesi árini hava givið okkum nýggjar royndir. Tað er tí  bæði gott og neyðugt, at ein slík eftirmeting sum hendan verður gjørd.

Beint fyri jól varð annað tilmæli latið um sama økið. Talan var um lógarásett arbeiði, har eftirmeting skuldi gerast av útleggingini av eldrarøktini. Bólkurin varð mannaður við fólki úr Almannamálaráðnum, Fíggjarmálararáðnum, Umhvørvis- og vinnumámaráðnum og Kommunufelagnum.

Her hevur  verið hugt eftir, um lógin og fíggjarsleisturin virkar eftir ætlan, og hvussu skipanin við samstarvsøkjum virkar. Mælt verður m.a. til at gera broytingar í lógini um heimatænastu, eldrarøkt v.m., og tað er nakað, sum landsstýrismaðurin ætlar at fara undir sum skjótast.

Starvsfólkatørvurin innan bæði røkt og námsfrøði er eyðsýndur, og tí er tað nú frá politiskari síðu sett fokus á hetta økið. Kannað verður í løtuni, hvussu vit tey komandi 10 árini fáa tryggjað starvsfólk til eldra-, heilsu-, almanna- og dagstovnaøkið.

Hetta tilmælið, sum í dag verður handað, setir serligt sjóneykuna á leiklutin hjá sjúkrarøktarfrøðinginum, og er hetta ein vinkul, sum er bæði spennandi og avgjørt týdningarmikil. Tykkara fakligheit er, og fer altíð at vera, berandi innan eldrarøktina. Uttan hendan partin, vísa tilmælini ikki alla myndina av eini betraðari tilgongd til røkt og viðgerð av eldri fólki her á landi.
Eg gleði meg at sleppa at lesa tilfarið, og eri sannførdur um, at við hesum tilmæli, er enn eitt týðandi klípi lagt afturat, fyri at flyta eldraøkið fram á leið.

Takk fyri at eg varð boðin við til tiltakið og til at fáa handað tilmælið.

Eg fari at enda at ynskja tykkum øllum, saman við øllum góðum samstarvspørtum, allarbestu eydnu í tí víðari arbeiðinum og blíðan byr.

Takk fyri!

Almannamálaráðið

Ein kanning frá Harvard T.H. Chan skúlanum vísir, at brúkar man bara eitt sindur av oliven olju hvønn dag, umleið eina hálva spísiskeið, so livur enn nógv longri, tí tað fyribyrgir hjartasjúkum, krabbamein og alzheimers.

Eisini løgdu granskarnir til merkist at tey sum fingu sær oliven olju hvønn dag vóru meira aktiv, roykti minni og ótu meira frukt og grønsagir.

Ein týdningarmikil faktorur var eisini, at brúkti man oliven olju ístaðinfyri vanligt feitt, eitt nú margarine og vanligt smør, sum ikki er flótandi, so minkaði tað um deyliguheitina munandi.

Í kanningini luttóku 90.000 fólk og er kanningin gjørd frá 1990 og staðfest er, at fólkini í suðureuropa vóru tey sum brúkti mest av oliven olju í allari verðini.

SáH

Fólkaheilsuráðið hevur nú fyri triðju ferð gjørt nakrar álmanakkar til børn, ung og vaksin, sum hava nøkur uppskot til, hvussu tú frá 1.-31. januar 2022 kanst vera virkin og gera okkurt gott fyri kropsligu og sálarligu heilsuna.

Álmanakkarnir eru fyri øll, og kunnu heintast umvegis leinkjuna her: Virkin januar 2022.  Uttan mun, um tú hevur kropsligar ella sálarligar avbjóðingar ella ert í sóttarhaldi, kanst tú luttaka í tann mun, tú megnar. Alskyns møguleikar eru fyri, hvussu álmanakkarnir kunnu brúkast, tí bæði privatpersónar, arbeiðspláss, skúlar og ymiskir stovnar hava brúkt álmanakkarnar í 2021 uppá ymsar mátar.

Boðskapurin í ABC fyri sálarliga heilsu, “ver virkin, ver saman, ver hugbundin” er inngrógvin í átakinum, og tískil eggja vit til, at tú fylgir uppskotunum ella tillagar virksemið, so tað samsvarar við tíni áhugamál og til tað, sum er við til at geva tær eina kenslu av meining.

Gev øðrum íblástur til at vera virkin
Fyri triðju ferð skipar Fólkaheilsuráðið fyri eini kapping í sambandi við Virkin januar og eins og áður, er vinningurin ein uppliving, har tú kanst vera virkin, saman og hugbundin. Endamálið við kappingini er, at tú kanst vera við til at geva øðrum íblástur til at vera virkin í januar og skapa tilvit um, hvussu einfalt tað kann vera at gera okkurt gott fyri sálarligu heilsuna, og hvussu ofta tú longu gert okkurt gott.

Um tú hevur Instagram, kanst tú luttaka í kappingini við at fylgja Instagramsíðuni “Folkaheilsuradid” og hyggja eftir okkara uppslagi við eini vegleiðing um luttøku í kappingini.

Í stuttum snýr tað seg um, at tú við nøkrum ávísum hashtags leggur myndir út á Instagram, sum vísa, hvussu tú ert virkin í januar.

Vinningurin er tvær nætur fyri fýra persónar í einum av frítíðarhúsunum hjá “Útsýnið” í Bø – virði 3.000-4.000 kr.  

Klaksvíkar Kommuna

Í gjár vórðu 324 fólk koppsett fyri koronu. 5 fólk fingu fyrra prikið og 13 fingu tað seinna. 306 fólk fingu triðja prikið.

Nú hava 41.450 fólk fingið fyrru koppsetingina. 40.550 fólk hava fingið seinnu koppsetingina. 14.959 fólk hava fingið trý prik.

Tilsamans 96.960 koronukoppsetingar eru gjørdar í Føroyum.

Koppsetingarbólkurin

Leiðreglurnar fyri tey, sum skulu í sóttarhald eru broyttar. Tað vil siga tey, sum hava havt beinleiðis samband við persón, ið hevur korona.

Skilt verður millum “tættar kontaktir” og “aðrar kontaktir”.

Tættar kontaktir

Tú ert ein ”tøtt kontakt”, um tú hevur verið saman við einum smittaðum persóni seinastu 48 tímarnar, áðrenn hesin fekk sjúkueyðkenni ella varð staðfest smittaður, og um tú samstundis lýkur eina av fylgjandi treytum:

Tú býr saman við smittaða persóninum
Tú gongur saman við smittaða persóninum, men tit búgva ikki saman
Tú býr á kamari saman við smittaða persóninum á t.d. eftirskúla, háskúla, seturskúla ella líknandi
Smittaði persónurin hevur gist hjá tær, ella tú hevur gist hjá viðkomandi

Tilmæli til "tættar kontaktir"

Mælt verður til, at tú letur teg kanna skjótast gjørligt, umframt 4 og 6 dagar eftir at tú hevur verið saman við smittaða persóninum.

Mælt verður til, at tú ert í sóttarhaldi í 7 dagar frá tí degi, tú seinast var saman við tí smittaða.

Fáa tit ikki býtt tykkum upp í sóttarhaldstíðini, til dømis tá talan er um eitt barn, sum er smittað, verður mælt til, at tú ert varin, gevur tær far um møgulig sjúkueyðkenni, og letur teg kanna, um sjúkueyðkenni vísa seg dagarnir eftir, at smittaði persónurin er sloppin úr sóttarhaldinum.

Aðrar kontaktir

Tú hoyrir til bólkin ”aðrar kontaktir”, um tú hevur verið saman einum smittaðum persóni seinastu 48 tímarnar, áðrenn hesin fekk sjúkueyðkenni ella varð staðfest smittaður, og sum ikki lúka treytirnar fyri at vera ein “tøtt kontakt”. Aðrar kontaktir eru til dømis:

Arbeiðsfelagar
Floks-/stovnsfelagar
Vinfólk
Fólk, sum tú hevur verið saman við til frítíðarvirksemi og sosial tiltøk
Fólk, sum tú hevur tosað við í almenna rúminum

Tilmæli til "aðrar kontaktir"

Mælt verður til, at tú letur teg kanna skjótast gjørligt, umframt 4 og 6 dagar eftir, at tú hevur verið saman við smittaða persóninum.

Tú skalt ikki í sóttarhald og kann fara til arbeiðis, í skúla og/ella á stovn, um tú eingi sjúkueyðkenni hevur.

Mælt verður tó til, at tú heldur teg frá øðrum tiltøkum í 7 dagar, eftir at tú hevur verið saman við tí smittaða fyri at steðga møguligari smittuspjaðing.

Tú eigur at vera varin, geva tær far um møgulig sjúkueyðkenni og lata teg kanna, um sjúkueyðkenni vísa seg.

Landslæknin hevur í løtuni nógv at gera, tí smittutrýstið er stórt. Tískil verður ikki ringt til tey smittaðu ella til tey, sum skulu í sóttarhald. Ístaðin fáa tey, sum eru staðfest smittaði við korona, eitt kunningarskriv, sum greiðir frá, hvussu tey skulu bera seg at, hvørjar teirra “tøttu kontaktir” og “aðrar kontaktir” eru, og hvussu hesar skulu bera seg at.

Nýggju leiðreglurnar eru settar í verk.

Tú kanst kunna teg nærri um leiðreglurnar fyri avbyrging, sóttarhald og heimauppihald her.

Heitt verður á øll um at minnast til almennu ráðini um gott reinføri og at halda frástøðu.

Heilsumálaráðið