Føroya Banka-samtakið er nú partur av Sólblómuskipanini. Hetta merkir, at samtakið ger tryggari og meira inkluderandi umstøður fyri kundar og starvsfólk við ósjónligum breki.

Summi fólk hava tørv á meira tíð, ró og tolsemi, uttan at tørvurin er sjónligur. Við Sólblómuskipanini ger samtakið tað møguligt hjá teimum kundunum, ið bera eitt ósjónligt brek ella hava eina ósjónliga sjúku, at fáa neyðugu hjálpina. Ósjónligu brekini kunnu vera sera ymisk - alt frá alzheimers, autismu, orðblindi, ADHD, angist og mangt annað, sum ger, at tú hevur serligan tørv.

”Tá ið kundar koma til okkara, skulu teir kenna seg tryggar, vælkomnar og virdar. Hetta er eisini galdandi fyri fólk, ið hava ein tørv, sum ikki sæst. Við Sólblómuskipanini styrkja vit tilvitið hjá okkara starvsfólkum og senda samstundis greið boð um, at tað er rúm fyri at hava tørv á eitt sindur meira tíð, ró ella tolsemi. Hetta er ein natúrligur partur av okkara ábyrgd sum ein stór fyritøka við nógvum ymiskum kundum og starvsfólkum,” sigur Turið F. Arge, forstjóri í Føroya Banka.


Ítøkilig átøk – Sólblómubandið, telefonlinja og teldupostadressa
At vera partur av Sólblomuskipanini merkir, at tú sum fyritøka skalt gera ymisk ítøkilig átøk. Vit hava gjørt hesi átøk, soleiðis at tað verður lættari hjá fólki við ósjónligum breki at seta seg í samband við okkum:

• Sólblómubandið er eitt diskret og altjóða viðurkent eyðkenni, sum fólk kunnu bera fyri at vísa, at tey hava eitt ósjónligt brek og møguliga tørva eyka atlit. Tann, ið ber bandið, nýtist hvørki at greiða frá sínum tørvi ella siga, hví viðkomandi ber sólblómubandið. Sólblómubandið fæst á øllum deildunum umframt hjá Trygd og Skyn.
• Vit hava eisini eina sólblómulinju -  telefonnummarið er 330 331 - og starvsfólkini, ið varða av sólblómulinjuni, eru klár at svara og hjálpa øllum teimum, ið ringja inn.
• Um tú heldur vilt skriva til okkara, so hava vit eina sólblómu-teldupostadressu: [email protected]
• Harafturat hevur tú eisini møguleika at bíleggja ein persónligan fund á heimasíðu okkara: www.bankin.fo/solbloma

”Atkomiligheit snýr seg ikki bara um fysiskar umstøður. Tað snýr seg eisini um, hvussu vit møta hvørjum øðrum. Smá atlit kunnu gera stóran mun, og við Sólblómuskipanini vilja vit vera við til at skapa meira rúm fyri ósjónligum brekum, bæði á arbeiðsplássinum og í samfelagnum sum heild,” sigur Turið F. Arge.


Starvsfólk fáa undirvísing í Sólblómuskipanini
Umframt tey ítøkiligu átøkini so hava starvsfólk í øllum samtakinum fingið undirvísing um Sólblómuskipanina, og hvussu starvsfólk kunnu møta fólki, ið bera sólblómubandið. Hetta kann til dømis merkja, at betur tíð verður sett av til eina samrøðu, at ein frágreiðing verður lagað til tørvin, at meiri friður er um fundin ella at spurt verður, hvussu best ber til at hjálpa.
Sólblóman verður sjónlig á teimum støðum, har kundar og samstarvsfelagar koma í samband við samtakið. Sólblómubandið kann heintast á øllum deildum kring landið.

Tú kanst lesa meira um Sólblómuskipanina á www.hdsunflower.com/dk

Føroya Banka

Uttanríkis- og fiskimálaráðið lýsir eftir umsóknum um loyvi at fremja royndarfiskiskap við tvítroli.

Royndirnar skulu gerast í fiskiskapi eftir svartkalva á djúpum vatni og í fiskiskapi eftir upsa hjá bólki 2. Endamálið við royndunum er at kanna veiðievni við tvítroli, sammett við veiðu við einkultum troli ella partroli. Royndirnar skulu serliga geva grundarlag fyri at rokna umrokningarfaktorar fyri fiskiskap við tvítroli mótvegis fiskiskapi við einkultum troli ella partroli. 

Karmar og treytir
Royndarfiskiskapurin verður skipaður sambært § 50 í løgtingslóg nr. 152 frá 2019 um sjófeingi við seinni broytingum (sjófeingislógin) og kunngerð nr. 8 frá 11. februar 2020 um loyvi til royndarfiskiskap við seinni broytingum.

Royndirnar skulu gerast við fiskiførum, sum lúka treytirnar í § 18, stk. 1, nr. 1 í sjófeingislógini. Hetta eru trolarar við 501 - 3000 HK.

Kanningarætlan er gjørd fyri royndarfiskiskapin. Royndirnar skulu fremjast sambært hesi ætlan og í neyvum samstarvi við Havstovuna.

Ætlanin er at geva tvey loyvi til royndarfiskiskap eftir upsa og eitt loyvi til royndarfiskiskap eftir svartkalva á umleið 500 metra dýpi. 

Krøv til skipini 

Fyri at luttaka í royndarfiskiskapinum skulu hesi krøv vera lokin:

Skipið skal hava veiðiloyvi og fiskiloyvi í bólki 2, trolarar.
Minst eitt av skipunum skal vera útgjørt til at royna við tvítroli.
Skipið skal hava trolsensorar, ið skulu brúkast til at máta ymsar parametrar á trolinum/lemmunum (t.d. Scanmar, Simrad ella Marport sensorar).
Skipið skal hava útgerð til neyva skráseting av oljunýtsluni fyri hvørt einstakt tóv.
Skipið skal hava koyggjupláss til tveir eygleiðarar.
Umborð skal vera gjørligt at standa innandura og taka sýni av veiðuni. Har skal vera borðpláss, minst 150x60 cm, til mátibretti og elektroniska vekt.

Umsókn og freist
Áðrenn umsókn verður send inn, skulu tey, sum ætla at søkja um loyvi til royndarfiskiskap, venda sær til Uttanríkis- og fiskimálaráðið fyri at fáa nærri kunning um kanningarleistin og treytir fyri royndarfiskiskapinum.

Leinki til umsóknarblað. 

Umsóknir um loyvi at fremja royndarfiskiskap við tvítroli skulu sendast til Uttanríkis- og fiskimálaráðið á teldupost [email protected]. 

Umsóknarfreistin er 2. oktober 2026 kl. 12.00. 

Nærri upplýsingar fáast við at venda sær til Símun Grønadal, fulltrúa ([email protected], telefon 22 22 58).

Uttanríkis- og fiskimálaráðið

Útróðrarbátar undir 15 tons í bólki 5, sum ætla sær á Føroyabanka í ár, kunnu nú søkja Vørn um fiskiloyvi.

Umsóknin skal vera Vørn í hendi í seinasta lagi 18. mai 2026 kl. 12.00.

Fyri at fáa fiskiloyvi á Bankanum, skal báturin hava avreitt fyri minst 500.000 krónur í eitt av teimum seinastu trimum árunum.

Sambært lógini um trygd á sjónum krevst, at bátar, sum fara á Føroyabanka, hava galdandi siglingarloyvi, sum eisini fevnir um Føroyabanka.

Uttanríkis- og fiskimálaráðið

Arbeiðarafeløgini hava í dag gjørt semju við arbeiðsgevararnar um nýggjan 2 ára sáttmála, sum eitt nú hækkar løn, eftirløn, starvsaldursviðbøtur, viðbót fyri upp og niðurvask umframt aðrar ábøtur í høvuðssáttmálanum, fastlønarsáttmálanum og sersáttmálum. 

“Vit eru nøgd við semjuna, tí vit serliga hava hækkað starvsaldursviðbøturnar umframt at tímalønin fer upp. Fyri okkara fólk, sum hava starvast nøkur ár, er hækkingin trivalig – góðar 18 kr um tíman fyri tey við hægsta starvsaldri yvir 2 ár. Vit løgdu okkum serliga eftir at fáa umskipa og hækka starvsaldurin, og tað eydnaðist, vísa forfólkini í arbeiðarafeløgunum á.”

Grundlønin hækkar í 2026 úr 161,79 kr til 165,96 kr og í 2027 til 171,94 kr. Starvsaldursviðbøturnar hækka somuleiðis í 2026 fyri viðbøturnar 6 ár, 8 ár, 10 ár og 11 ár til áviðkavist 6%, 8%, 10% og 12%.

Grundlønarhækkingin er knappar 1800 kr um mánaðin yvir tvey ár fyri tey sum arbeiða fulla tíð, og fyri tey við hægsta starvsaldri er mánaðarliga lønarhækkingin yvir 2 ár knappar 3.200 kr um mánaðin.

Prísirnir eru nógv hækkaðir seinastu árini, og tí hevur tað eisini ligið frammarlaga í okkara raðfestingum, at okkara verkafólk veruliga skulu merkja lønarhækkingina, tí gjørdu vit tað á henda hátt siga forfólkini í Føroya Arbeiðarafelag, Havnar Arbeiðarafelag, Havnar Arbeiðskvinnufelag, Klaksvíkar Arbeiðskvinnufelag og Klaksvíkar Arbeiðsmannafelag.

Fyri ein við 40 tíma viku verður mánaðarlønin komandi ár beint undir 30.000 kr og fyri ein við hægsta starvsaldri verður mánaðarlønin góðar 33.000 kr.

YMISKAR BETRINGAR
Umframt hækking í starvsaldri og tímaløn er eftirlønin í høvuðssáttmálanum hækkað 0,5% til 12,5%. 

Ymiskar ábøtur eru gjørdar í sersáttmálunum fyri aling og fyri Vága floghavn.

“Eg eri sera fegin um, at vit fingu broytt og betra alisáttmálan og fáa betraði og skipaði viðurskifti á flogvøllinum, sigur Elin Sørensen, forkvinna í Føroya Arbeiðarafelag.”

Teir fimm arbeiðarasáttmálarnir hava eisini fingið eyka frídagar í semjuna. Fyri feløgini í Havn er 1. Novembur vorðin hálvur frídagur og fyri feløgini uttanfyri Havnina er Ólavsøkuaftan vorðin frídagur. 

“Fyri okkum uttanfyri Havnina er gott at hava fingið ólavsøkuaftan við sum frídag, tí hetta er tjóðarhøgtíðin fyri okkum øll”, sigur Jastrid W. Niclasen, forkvinna í Klaksvíkar Arbeiðskvinnufelag.

Seinastu árini hava feløgini roynt at betra viðurskiftini hjá teimum, sum starvast í reingerð, og hesaferð var viðbótin fyri upp- og niðurvask hækkað.

“Eg eri ógvuliga fegin um, at vit hava hækkað viðbótina fyri høvuðsreingerð úr 9,15% upp í 15%, sigur Ruth Boetius, forkvinna í Havnar Arbeiðskvinnufelag, sum hevur sera nógvar limir, sum starvast innan reingerð.“

Fyri tey, sum starvast undir fastlønarsáttmálanum eru viðurskiftini viðvíkjandi løn undir sjúku betraði, soleiðis at arbeiðsgevarin nú rindar munin millum lønina og dagpeningin í ein mánað eyka t.v.s. í 3 mánaðir. 

“Eg haldi tað er gott at hava fingið betraði viðurskifti undir sjúku hjá teimum í fastlønarsáttmálanum, sigur Absalon Hansen, formaður í Klaksvíkar Arbeiðsmannafelag.”

Fyri fólk, sum eru komin til skaða undir arbeiðnum hevur arbeiðsgevarin skyldu at rinda munin millum lønina og sjúkradagpeningin í upp til 6 mánaðir, og tíðarskeiðið gjaldsskyldan stendur við er økt úr 12 til 18 mánaðir. 

“Tað er gott fyri okkara fólk, at vit hava fingið økt tíðarskeiðið til 18 mánaðir, tí avleiðingarnir av einum arbeiðsskaða vísa seg viðhvørt ikki beinanvegin, sigur Heri Reynheim, formaður í Havnar Arbeiðarafelag, og vísir á, at tey hava havt dømi um hetta. 

Sum heild fegnast forfólkini, og vísa á, at við hesum ábøtum í sáttmálum eru fleiri grundleggjandi viðurskifti betraði. Komandi dagarnir verður kunnað nærri um smálutirnar í sáttmálunum, og nýggju lønartalvurnar verða lagdar út.

Verkafólk

Norðurlendska ráðharraráðið innan fiskivinnusamstarv letur stuðul til verkætlanir

Nú ber til at søkja stuðul til verkætlanir innan fiskivinnu og alivinnu, sum eru stuðlaðar av norðurlendska ráðharraráðnum fyri fiskivinnusamstarv.

Føroyar hava saman við Danmark formansskapin í Norðurlendska ráðharraráðnum. Í Norðurlendska ráðharraráðnum eru fleiri ráð, og eitt av teimum er ráðið fyri matvørur, fiski- og alivinnu, landbúnaðarvinnu og skógarvinnu, á norðurlendskum er samstarvið stytt FJLS.

Í FJLS-samstarvinum hava Føroyar formansskapin fyri samstarvinum um fiski- og alivinnu og eisini samstarvinum fyri landbúnaðar- og skógarvinnu, meðan Danmark hevur formansskapin fyri samstarvinum um matvørur.

Við føroyska formansskapinum fer havið at fáa stórt fokus. Sum formansland hava Føroyar staðið á odda fyri at orða eina lýsing eftir umsóknum til verkætlanir innan fiskivinnu og alivinnu, sum eru stuðlaðar av Norðurlendska ráðharraráðnum fyri fiskivinnusamstarv.

Verkætlanirnar skulu vera innan raðfestu økini:
Samtilvera og havplanlegging
Vistfrøðiliggrundað havfyrisiting og at uppbyggja fiskastovnar
Endamálið við stuðlinum er, at vit í Føroyum og í Norðurlondum fáa eina grønari, sterkari og mótstøðuførari fiskivinnu og alivinnu. Stuðul verður latin til fyrisitingarliga- ella granskingarverkætlanir, sum byggja upp nýggja vitan, deila vitan ella styrkja netverk.

Freistin at søkja stuðul er 2. oktober í ár. Til ber at fáa umsóknarblað og meiri kunning á heimasíðuni hjá Norðurlendska fiskivinnusamstarvinum. Leinki Nordisk Fiskerisamarbejde

Uttanríkis- og fiskimálaráðið

Seinastu tíðina hava fleiri følsk SMS-boð verið í umferð, ið hava til endamáls at lumpa persónligar upplýsingar úr fólki. Millum annað hava nógv fingið boð, ið látast at vera frá Posta og Samleikanum. Tað er sera umráðandi ongantíð at trýsta á SMS-boð, ið innihalda leinki, ið biðja um persónupplýsingar.

Á heimasíðuni hjá Samleikanum kanst tú lesa meira og fáa góð ráð: https://www.samleikin.fo/fo/hjalp/foelsk-sms-bod-fra-samleikanum-i-umferd



Følsk sms-boð frá Samleikanum í umferð - trýst ikki á leinki

Ver ansin: Í løtuni herja følsk SMS-boð, ið royna at lokka persónligar upplýsingar úr tær. Tey síggja út at vera frá Samleikanum – tað eru tey ikki.

Í løtuni herja víðfevnandi svikálop í Føroyum, sonevnd smishing, har tú móttekur SMS-boð, ið síggja út til at koma frá veruligum avsendarum. Í nøkrum førum sær tað út sum at boðini eru frá Samleikanum. Boðini innihalda eitt leinki, og tú verður biðin um at trýsta á tað fyri at dagføra Samleikan.

Vit gera vart við, at hetta eru følsk boð, ið hava til endamáls at stjala títt loynital og tína atgongd. Tað er sera týðandi, at tú ikki trýstir á ókend leinki.

Talgildu Føroyar senda ongantíð leinki, har biðið verður um persónsupplýsingar.

Ein týðandi partur av trygdini hjá Samleikanum er, at Talgildu Føroyar ikki senda SMS-boð við leinkjum í, har tú skalt upplýsa persónsupplýsingar.

Hvat skalt tú gera, um tú ivast?

Hevur tú longu fingið boðini, skalt tú strika tey. Hevur tú trýst á leinkið ella skrivað loynitalið, mæla vit tær til at endurnýggja Samleikan eftir vegleiðingini omanfyri.

Hevur tú illgruna um, at tínar kontoupplýsingar eru misnýttar, skalt tú rita inn á netbankan og sperra kortini alt fyri eitt. Ring til bankan, um tú sært óregluligt virksemi í netbankanum.

Føroya Banki

Áðrenn ársskiftið bleiv svimjihøllin í Runavík avhandað, og hava fólk í Runavíkar kommunu eins og onnur kunnað notið gott av, at ein svimjihøll nú er í býnum.

Ein svimjihøll er ikki bert ein bygningur, men ein samansett og torgreidd verkætlan við mongum tekniskum instalatiónum eins og øðrum smálutum, sum skulu ganga upp í eina hægri eind.

Samstarvið við byggiharra, ráðgevarar og aðrar áhugabólkar gekk sera væl, sum er ein av grundarsúlunum undir einari væleydnaðari verkætlan.

Í samband við avhandingina skrivaði Torbjørn Jacobsen, borgarstjóri í Runavíkar kommunu soleiðis:

Vit báðir Kjartan skrivaðu undir í dag, og eg loyvi mær at siga, at Runavíkar kommuna er serstakliga væl nøgd við arbeiðið hjá Kanjon.

Vit hjá Kanjon eru errin av, at hava staðið fyri hesum megnar arbeiði, sum er snotiligt at síggja til, og kemur at hava stórt gagn fyri borgarar í Runavíkar kommunu og onnur í nógv ár framyvir.

At byggja framtíðar bygningar krevur dirvi og áræði fyri at tryggja, at hesir gerast ljós, lív og karmar um tann gerandisdagin, sum enn er óskrivaður.

​Fleiri myndir á heimasíðuni hjá Kanjon.

Kanjon

Vinnur skulu geva avkast og vera kappingarførar á altjóða marknaðinum.

Í 2006 gjørdi Landsstýrið ein vinnupolitikk. Vinnupolitikkurin eigur at verða endurskoðaður. Sjálvsagt skal so týðandi politikkur endurskoðast regluliga.

Vøkstur er vegurin til vælferð. Tað almenna skal tryggja karmarnar, og tað verður gjørt við framskygdum vinnupolitikki.

Ítøkiliga vil Fólkaflokkurin, at:

vit skulu reka burðardyggan landbúnaðarpolitikk, sum samstundis tryggjar vinnuligt gagn av tilfeinginum

vit skulu hava greiðari ferðavinnupolitikk, sum er fíggjarliga, umhvørvisliga og sosialt burðardyggur

broytingar skulu gerast í lóggávuni um burðardygga ferðavinnu, ið gera karmarnar greiðari

Føroyar skulu gerast maritimur depil í Norðuratlantshavinum.

X við Fíu Selmu Nielsen
Valdið til fólkið
– Vel Fólkaflokkin 26. mars

Vit mugu ikki gerast fremmand í egnum landi. Tí er neyðugt at vera varin, hvør fær loyvi at búseta seg her. Tað merkir at útlendingalógin eigur at verða dagførd, so hon betur svarar til tær avbjóðingar, vit síggja í Europa í dag.

Avbjóðingin er kriminalitetur og uppihaldsskyldan. Hartil er tað týdningarmikið, at tey, sum velja at búseta seg her, vilja verða ein partur av føroyska samfelagnum og ogna sær okkara mentan, mál og virðir. Fleiri lond í heiminum velja longu í dag, hvør sleppur at flyta til landið.

Niðurstøðan byggir á hagtøl frá Danmarks Statistik, sum í nógv ár hevur gjørt nágreiniligar greiningar av integratiónini hjá tilflytarum í Danmark. Serliga hava greiningarnar hugt eftir fólki úr sonevndu MENAPT-londum – tað vil siga londum í Miðeystri og Norðurafrika umframt Afganistan, Pakistan og Turkaland.

Tølini vísa eitt rættiliga greitt eitt mynstur. Tilflytarar úr hesum londum eru lutfalsliga minni á  arbeiðsmarknaðinum enn danir, og teir eru samstundis yvirumboðaðir, tá ið talan er um almennar veitingum. Serliga er tað kvinnurnar úr hesum londum, sum eru undirumboðarar á arbeiðsmarknaðinum. 

Hagtølini, tá ið talan verður brotsgerðir, vísa eisini ein greiðan mun. Sambært Danmarks Statistik er kriminaliteturin hægri hjá monnum úr hesum londum enn hjá donskum monnum, og í summum førum, er munurin enn størri hjá øðrum ættarliði. Hetta bendir á, at integratiónin er minni í øðrum og triðja ættarliði. Eisini tá hædd verður tikin fyri, at lutfalsliga nógvir ungir menn eru í hesum bólki.

Tá arbeiðsluttøkan er lægri, og fleiri verða forsyrgd av tí almenna, hevur tað eisini búskaparligar avleiðingar. Tað merkir minni skattainntøkur og størri almennar útreiðslur. Samstundis veksur  kriminaliteturin um útreiðslurnar til politi, rættarskipan og fongsul. Fyri ikki at tala um tær menniskjaligu avleiðingarnar av hesum kriminaliteti.

Í einum skattafíggjaðum vælferðarsamfelagi hevur hetta stóran týdning. Um ein stórur bólkur av borgarum hevur minni tilknýti til arbeiðsmarknaðin og samstundis er yvirumboðaður í kriminalitetsstatistikkinum, leggur tað eitt trýst á bæði búskap og samfelagssamanhang.

Samstundis er tað gagnligt fyri bæði samfelagið og tey, sum flyta higar, at fólk fáa møguleika at seta búgv í Føroyum. Føroyar hava eisini tørv á arbeiðsmegi og nýggjum borgarum. Men tað er týdningarmikið, at tey, sum velja at búseta seg her, vilja verða ein partur av føroyska samfelagnum og ogna sær okkara mentan, mál og virðir.

Tí er tað eisini rímiligt at spyrja, hvussu nógvum tilflytarum eitt lítið samfelag sum Føroyar kann taka ímóti, uttan at tað ávirkar samfelagsliga samanhangin.

Hetta merkir sjálvandi ikki, at øll fólk úr hesum londum eru eins. Men sum áður nevnt vísa hagtølini  eitt mynstur, sum politikarar eiga at taka í álvara, tá teir gera útlendingapolitikk.

Tí er neyðugt at hava ein ábyrgdarfullan og realistiskan tilflytingarpolitikk. Tað merkir at vera varin í, hvør fær loyvi at búseta seg her, og at dagføra útlendingalógina, so hon tekur hædd fyri hesum avbjóðingum. Í stuttum neyðugt er at velja, hvør sleppur at seta búgv her – og hvør ikki.

Fleiri lond í heiminum velja longu í dag, hvør sleppur at flyta til landið. Kanada, Avstralia og Ný Sæland hava stigaskipanir, har umsøkjarar verða mettir eftir útbúgving, arbeiðsroyndum og málførleikum. Í fleiri londum verða eisini tikin hædd fyri, hvørjum landi fólk koma úr, og í summum førum eru kvotur ella avmarkingar fyri ávís lond. Í Singapore eru til dømis kvotur fyri útlendska arbeiðsmegi, og í Sveis og USA eru eisini skipanir við avmarkingum.

Felags fyri nógv av hesum londum er, at tey stýra innflytingini aktivt og velja nýggjar borgarar eftir førleikum, arbeiðsroyndum, máli og í summum førum eisini eftir upprunalandi. Endamálið er at tryggja eina skipaða innflyting, har nýggir borgarar kunnu gerast ein virkin partur av samfelagnum.

X av A
X við FróðA Magnussen valevni hjá Fólkaflokkinum.

Eftirskriv: Eitt væl longri lesarabræv við nærri hagtalsgreining varð sent miðlunum 21. februar 2026. Tað kann millum annað lesast her: https://www.vp.fo/news/er-sjurdur-skaale-a-skeivari-kos