“Úrmælingurin og originali trubadururin Hanus G. Johansen hevur gjøgnum eina hálva øld spælt seg inn í hjørtuni á flestu føroyingum. Hanus G. er framúr vísutulkari, viðurkendur og høgt í metum langt út um landoddarnar. Hann er partur av teirri ríku norðurlendsku og føroysku fólkatónleikasiðvenjuni og er ein vísutulkari á hægsta stigi.

Hanus G. skapar við sínum tulkingum eitt serligt huglag, og hann rakar heilt inn í fólkasálina við sínum hjartanemandi og hugtakandi framførslum, sum tíðum eru yndisligar, tíðum daprar og dramatiskar.

Tónleikurin og tulkingarnar hjá Hanusi G. hava ríkað føroyskt mentanarlív í ríkiligt mát. Tónleikastarv hansara hevur verið við til at bera skaldskapin hjá mongum av okkara mætastu yrkjarum víðari til komandi ættarlið, t.d. yrkingar hjá Tummasi N. Djurhuus, Bernhardi Brim og Hans Jacobi Glerfoss og eisini hjá norska skaldinum Jakob Sande. Eina heilt serliga støðu hevur skaldskapurin hjá Poul F. fingið gjøgnum tulkingar Hanusar.

Hanus G. hevur við sínum vísutulkingum havt alstóran týdning fyri mentanararvin og fyri at flyta hann víðari til ungu ættarliðini.

Fyri meistarligu tulkingarnar, vísurnar og tónasmíðið verður Mentanarvirðisløn landsins 2019 latin Hanusi G. Johansen.”

Uttanríkis- og Mentamálaráðið

Heiðursgáva landsins 2019 verður latin Simma Arge Jacobsen við hesi grundgeving:

“Simme Arge Jacobsen slóðaði fyri innan føroyskan popptónleik og var millum tey fremstu í strembanini eftir at seta orð og ljóð á føroyskan popptónleik – á føroyskum. Við løgunum hjá Simma og teimum fekk okkara samtíðar populertónleikur eitt hevdbundið orða- og tónalag, ið ikki var til frammanundan. Hesin tónleikur var við til at mynda tónleikaúrvalið í Útvarpi Føroya frá byrjan, og við eitt hevði ungdómurin fingið eina rødd, ið eisini hevur víst seg at hava staðið ímóti tíðarinnar tonn. Løgini hjá Simma og teimum eru partur av grundarlagnum í modernaðum føroyskum populertónleiki í tíðarskeiðinum eftir Seinna Veraldarbardaga. Vit kenna tey øll, og tey verða sungin í felagsskapi og veitslulagi.

Simme hevur verið ein drívmegi í føroyska tónleikalívinum líka síðani fimmtiárini. Hann hevur verið tónlistamaður og sangskrivari, hevur sett á stovn tónleikaklubba og tónleikafelag, og eisini læt hann í 1959 upp tónleikahandil, sum enn í dag er til undir sama navni, “Simme Musikkhús.” Við handilsvirkseminum vísti Simme á, at tað ber til at gera tónleik og geva út á føroyskum, og við Simma gjørdist tónleikur eisini ein møguligur vinnuvegur. Simme hevur av sonnum gingið undan og hevur verið ein fyrimyndarligur stuðul og kveikjari í føroyska tónleikaumhvørvinum.

Fyri slóðbrótandi tónleikastarvið verður Heiðursgáva landsins 2019 latin Simma Arge Jacobsen.”

Uttanríkis- og Mentamálaráðið

Í ár hevur Jenis av Rana, landsstýrismaður í uttanríkis- og mentamálum, valt at lata eina serstaka virðisløn. Forlagið Leirkerið í Gøtu fær serstøku virðisløn landsins 2019 við hesi grundgeving:

“Síðani 1982 hevur Leirkerið staðið fyri týdningarmiklum og mennandi starvi innan útgávu av andaligum tilfari: bókum, sálmum og bløðum.

Brøðurnir Zacharias Zachariassen og Flóvin Tyril eru persónarnir aftan fyri Leirkerið. Bókaútgávurnar eru nógvar í tali, og dentur hevur alla tíðina verið lagdur á góðan og vakran málsligan búna.

Í áratíggju hevur Leirkerið staðið fyri einum vælumtóktum bókaringi, og skipað hevur verið fyri einum stórum savni av talgildum sangum, sálmum og tónum. Menninir aftan fyri Leirkerið hava yrkt, týtt og skrivað sálmar, sangir og bøkur, bæði fyri børn og vaksin. Leirkerið hevur eisini skipað fyri einum vælvirkandi nethandli og hevur í mong ár staðið fyri blaðútgávu.

Miðvísa og stillføra virksemið brøðranna handan Leirkerið hevur birt uppundir, lívgað og ríkað stóra og týðandi partin av føroysku mentanini, ið trívist í kirkjum og samkomum runt landið. Tað hevur verið ein týdningarmikil íblástur og eggjan hjá mongum, og innihaldið í rúgvismikla tilfarinum, íroknað granskingar, ið lagt er úr hondum teirra, stendur og verður standandi sum ein týðandi varði í føroyska bókmentaheiminum.

Uttanríkis- og Mentamálaráðið

​So eru Torradagarnir aftur á skrá 17. – 23. februar 2020, og eru tey, ið ynskja okkurt sett á skránna vælkomin at gera vart við seg á dw@klaksvik.fo ella ringja til Klaksvíkar kommunu.

Skráin er ikki liðug enn, men m.a. Fiskivinnutingið tekur samanum fiskivinnulóggávuna og verður ein partur av leikpallinum á Torradøgunum í miðhøllini á Skúlatrøð hesaferð.

Eisini verða ymsar hugnaløtur í Smæruni við m.a. Jógvan Arge, rithøvundi sum greiðir frá um tíðina í Føroyingahavnini í Grønlandi, tá ið menn vóru til lands við opnum bátum. Kári P. Højgaard, sum hevur roynt hetta í verki, fer at greiða frá sínum royndum í við opnum báti har og um sambandi millum manningarnar, ið har vóru.

Torradagar í Klaksvík 17. – 23. februar

”Søgur av Flemish Kap” verður aftur á skrá, við framløgum og práti við sjómenn, sum hava verið á Flemish Kap. Eisini verður víst brot úr filminum Trolmenn, sum sjónvarpssnillingurin, Zacharis Hammer er í ferð við at gera.

Njál Djurhuus kemur at greiða frá serstaka lívi sínum við nógvum hendingaríkum á leiðini. Bókin, sum kom út um hann fyri stuttum, er útseld, tó at hon er komin í tveimum uppløgum.

Ein serstøk framløga verður um Arktis og tær broytingar, har henda vegna broytta veðurlagið. Tikið verður upp hvørjar fylgjur hetta kann hava fyri fskiskap á okkara leiðum.

Ein myndamaður úr Eysturríki, Christoph Ruhsam, sum hevur verið í Arktis, greiðir frá í myndum um broytingar í ”landslagnum” har. Vinmaður hansara, Wolfgang Schöner, professari, greiðir eisini frá um hesi somu viðurskifti við eini meira gjøllari sjóneyku.

Heilsurenning, Heilsukáfé og Matiné er eisini á skrá. Matstovurnar plaga at spíla seg út við nógvum áhugaverdum á matarseðlinum. Spennandi fiska-bufféin hjá Umsorganarheiminum, Gloria verður aftur á skrá og so mangt annað.

Torradagarnir verða 17. – 23. februar og sum sagt er skráin ikki liðug enn, men verður meir at frætta seinni.

Tey, ið ynskja okkurt sett á skrá kunnu gera vart við seg á dw@klaksvik.fo ella ringja til Klaksvíkar kommunu á tel. 410000.

Gott um hetta tilfarið – Heiti, staðseting og tíð var okkum í hendi í seinasta lagi 10. februar 2020.

Uttanríkis- og mentamálaráðið lýsir við hesum møguleikan at søkja um stuðul til film í 2020.

Stuðulin kann veitast til ymsar tættir innan filmsgerð, harundir hugskots- og handritsmenning, undanframleiðslu, framleiðslu, eftirframleiðslu og útbreiðslu.

Stuðulin kann verða játtaður einstaklingum, bólkum ella feløgum.

Freistin at søkja um filmsstuðul fyrra umfar er 1. februar 2020. Seinna umfar verður lýst í summar við freist 1. september 2020.

Gevið gætur, at stuðul verður latin treytað av, at játtan verður tøk til endamálið á løgtingsfíggjarlógini fyri 2020. Játtanin fyri 2019 var 2,7 mió. kr.

Mentamálaráðið

​ALLARBESTU TIT, sum hava lisið, lurtað ella á annan hátt fylgt teimum vónríku og forpíndu persónunum í krimirøð míni. Og øll tit, sum hava kent tykkum sum part av umhvørvinum og skakandi hendingunum í tí rættuliga meinlíka føroyska samfelagnum.

Takk fyri góðar og svárar løtur. Alt fær ein enda. Eisini tann ringasta plágan. Tað verða ikki fleiri svik ella brotsverk. Heldur ikki fleiri freistingar og ódámligar ætlanir.

Við sorgblídni sigi eg bindiklubbanum farvæl. Hann hevur verið í mínum huga í skjótt fýra ár. Ein er tíðin til hevnd og hatur. Onnur til kærleika og fyrigeving. Nú er stundin at binda frið.

Seinasta bókin í krimirøðini er avdúkað. Eg má bíða tolin og í spenningi. Vitandi at tíðin er rættvísasti dómari.

Takk øll somul fyri miklan íblástur. Fyri vøkur orð og áhugaverdar afturmeldingar. Alt sum gav skerdum skaldaveingjum hugflog og dirvi at skriva.

Takk til Mentanargrunn Landsins og takk til bókasøvn, skúlar, fyritøkur og stovnar kring landið, sum hava stuðlað, keypt og víst bókarøðini ans.

Takk Sprotin og Edition krimi. Og takk góði Martin Schürholz fyri týsku umsetingina. Og takk Jan Nystrøm fyri tínar frálíku kápumyndir.

Takk til tykkum, sum hava lisið, rættað og viðmerkt í handritunum, áðrenn bøkurnar fóru til prent og vórðu lagdar fram fyri almenningin.

Til seinast takk, góða Jóngerð. Fyri títt tolsemi og áhuga, hóast mína fráveru í gerandisdegnum og mítt forelskilsi í nøkrum fremmandum kvinnum og einum forførandi skaldaheimi, sum hevur bundið niður mínar hendur og føtur hesi seinastu árini.

Ein er tíðin at skriva. Ein er tíðin at liva.

​Steintór Rasmussen

Rani Nolsøe hevur lagt eitt nýtt tónleikalag út á YouTube. Lagið eitur Eina løtu afturat, sera vakurt lag.

Orð og lag Rani Nolsøe, hoyr sangin herundir.

SáH

Tað er ikki á hvørjum degi at KÍ gerst føroyameistarar og sjálvandi skuldi tað feirast, Maverick Barr er høvuðsstuðul hjá Bláu Bylgju, men í morgin tann 14. november  letur Maverick Barr uppaftur.

Maverick Barr letur upp klokkan 17:00, har vit fara at hyggja eftir landsdystinum Tyrkiet – Ísland og aftaná vísa við dystin Ongland – Montenegro.

Í vetur vera upplatingartíðinar hesar: hóskvøld kl. 17.00 – 24.00, fríggjakvøld/nátt kl. 17.00 – 04.00, leygarkvøld/nátt kl. 17.00 – 04.00 og sunnukvøld kl. 17.00 – 24.00.

Er fótbóltur um vikuskiftinum lata vit upp fyrr um dagin og leygarkvøld klokkan 22:00 er Pub Quiz.

Stuðulin hesaferð er á 833.600 kr. tilsamans og verður latin ymiskum verkætlanum, sum fevna víða – talan er um alt frá hugskotsmenning til framleiðslu og um bæði spælifilmar, stuttfilmar og heimildarfilmar.

Søkt var um tilsamans 1.514.468 kr.

Hesi standa fyri verkætlanunum, sum fingu stuðul í seinna umfari í 2019:

Umsøkjari:

Játtað:
Trygvi Danielsen  132.000 kr.
Julia í Kálvalíð   103.600 kr.
Johan Rimestad   103.000 kr.
Rói Davidsen   100.000 kr.
Torfinnur Jákupsson   88.000 kr.
Heri í Ravnagjógv   60.000 kr.
Búi Egason Dam   42.000 kr.
Katrin Joensen-Næs   33.000 kr.
Theresa Jákupsdóttir   32.000 kr.
Sakaris Stórá   32.000 kr.
Franklin Henriksen   31.000 kr.
Franklin Henriksen   26.000 kr.
Jóhan Martin Christiansen   26.000 kr.
Zacharis Hammer   25.000 kr.

Verkætlanin “111 góðir dagar” við Trygva Danielsen fekk størstu stuðulsupphæddina á 132.000 kr. í hesum umfari. Talan er um ein spælifilm í fýra pørtum. Í stuttum viðger verkætlanin tað sosiala og eksistensiella einsemið í modernaðu tilveruni. Og stigtakarin sjálvur sigur, at “111 góðir dagar” sameinir svartan humor og menniskjasligt innlit til eina kensluliga dygdaruppliving, ið føroyskir filmsáskoðarar tráa eftir at fáa.

Mikudagin 30 okt. kemur út nýggj fløga við Kristinu Nónklett Hansen.

Fløgan sum ber heiti Við Takksemi, er upptikin í Crossroads Studios, Arden NC í USA.

Nakrar av røddunum eru tó upptiknar í upptøkuhølunum hjá Erik Biskupstø í Klaksvík.

Fløgan inniheldur 13 sangir, har teir flestur eru skrivaðir av Kristinu sjálvari. Terje Vestergaard hevur gjørt lag til, tveir av sangunum, Eyðun Jacobsen hevur gjørt orð og lag til ein sang og Hervør á Torkilsheyggi orð og lag til ein. Eisini er ein sálmur við á fløguni.

Tað eru Jeff Collins og Lauren Talley sum hava skipa og lagt sang og tónleik til rættis.

Kristina Nónklett Hansen hevur verið aktiv í sangi í nógv ár. Hon hevur sungið síðani hon var ein smágenta. Seinastu árini hevur hon verið aktiv sum lovsongsleiðari í Kelduni, har eisini fleiri av hennara sangum vera sungnir.

Fløgan ber brá av tí, sum Kristina brennur fyri, og tað er lovsongurin og tilbiðjanin av Honum, sum gav henni nýtt lív, Jesus Kristus.

Í samband við fløgu útgávuna, verður útgávuløta í Kelduni, Skálafirði, mikukvøldið 30 okt. kl 19. Øll eru hjartaliga vælkomin.