Landsstýriskvinnan í heilsu- og orkumálum, Eyðdis Hartmann Niclasen, setti í morgun Fólkaheilsuráðstevnuna „Rørsla á arbeiðsplássinum“ í Kongshøll. Á ráðstevnuni kunngjørdi landsstýriskvinnan, at hon hevur valt at útnevna 2027 til Rørsluár.

Endamálið við Rørsluárinum er at skapa fleiri og betri møguleikar fyri rørslu í gerandisdegnum – á arbeiðsplássum, í skúlum, í frítíðini og í nærumhvørvinum.

Í røðu síni legði landsstýriskvinnan dent á, at arbeiðsplássini hava ein týðandi leiklut í fólkaheilsuni. Tørvurin er tó ymiskur. Fyri summi snýr tað seg um at koma meira upp úr stólinum, meðan onnur hava eitt kropsliga tungt ella einsíðugt arbeiði og hava tørv á at styrkja kroppin og fyribyrgja pínu, skaðum og sliti.

– Endamálið er ikki, at øll skulu gera tað sama ella líka nógv. Endamálið er, at øll kunnu vera við – á sínum egna støði, segði Eyðdis Hartmann Niclasen.

Fólkaheilsuráðstevnan var samstundis startskotið til Ítrótta- og rørsluvikuna. Á skránni vóru framløgur um heilsustøðuna í Føroyum, rørslu, arbeiðsumhvørvi og um, hvussu rørsla kann gerast ein natúrligur partur av arbeiðsdegnum.

Ráðstevnan varð skipað í samstarvi millum Heilsu- og orkumálaráðið, Heilsustýrið og Ítróttasamband Føroya.

Røðan hjá landsstýriskvinnuni kann lesast her.

Heilsu- og orkumálaráðið

Landsstýrismaðurin í uttanríkis- og fiskivinnumálum, Bárður á Steig Nielsen, er staddur í Nuuk, har hann luttekur á fundi í samstarvsráðnum millum Føroyar, Grønland og Danmark.

Í sambandi við ferðina hevur landsstýrismaðurin eisini havt fleiri aðrar fundir við politiskar samstarvsfelagar. Í gjár hitti hann danska uttanríkisráðharran, Lars Løkke Rasmussen, har teir umrøddu uttanríkispolitisk mál av felags áhuga og høvdu sínámillum kunning um aktuell mál.

Harumframt hevur landsstýrismaðurin havt fund við uttanlandsnevndirnar í Løgtinginum, Inatsisartut og Fólkatinginum, har hann kunnaði um føroysk uttanríkisviðurskifti og sjónarmið. Eisini hevur hann havt fund við verjunevndina í bretska tinginum, har serligur dentur varð lagdur á verju- og trygdarpolitisk viðurskifti, umframt samstarvið við Bretland.

Uttanríkis- og fiskimálaráðið

Maria Olsen er forkvinna í pensjónistafelagnum Hugna í Klaksvík

Umframt at Maria Olsen er næstforkvinna í Landsfelag Pensjónista, so er hon eisini  forkvinna í pensjónistafelagnum Hugna í Klaksvík, hetta hevur hon verið í nøkur ár.

-Aftan á at felagið hevur ligið stilt í nøkur ár, varð semja gjørd um, at pensjónistafelagið skuldi halda fram, og hetta vildi eg fegin hjálpa til við, sigur Maria Olsen

-Skjótt, so varð ein nevnd skipað, og í dag er pensjonistafelagið Hugni eitt vælvirkandi felag við umleið 190 limum.

Í nevndini eru umframt Mariu Olsen eisini Sjúrður Kjølbro, næstformaður, Kristina Lützen, skrivari, Jóan Karl Høgnessen, peningarøkil, Jetta Ellingsgaard, nevndarlimur, Sigga Arge, eykalimur og Jóna Skorheim, grannskoðari.

Leygardagin 5. septembur verður eldradagur í Varpinum

Leygardagin tann 5. septembur skipar pensjónistafelagið Hugni fyri einum eldradegi í Varpinum. Tað eru umleið 325 fólk úr øllum Føroyum, ið hava meldað seg til tiltakið.

Øll, sum eru 60+, kunnu tekna seg til eldradagin, tað er ikki neyðugt at vera limur.

Eldradagurin byrjar kl 12:00 um dagin og endar kl 20:00. Nógv ymiskt verður á skránni, eitt nú borðhald, fyrilestrar, granskingarætlan um diabetes, skemt, føroyskur dansur, hugni og prát.

– Tað eru 15 ár síðan, at eldradagur varð hildin í Klaksvík, so henda dagin gleði eg meg nógv til, sigur Maria Olsen, forkvinna í pensjónistafelagnum Hugna.

Hilda Sjúrðardóttir Kjølbro

Í morgun varð dekka borð og øll nevndin striddist at gera tað so hugnaligt sum gjørligt, borgmeistarin Karl Johansen kom og heilsaðu uppá, her nakrar myndir:​

Í dag luttók Bárður á Steig Nielsen, landsstýrismaður í uttanríkis- og fiskivinnumálum, á ráðstevnuni, EU Arctic Forum and Indigenous Peoples’ Dialogue, sum verður hildin í Brússel í døgunum 1.-3. september. 

Ráðstevnan, sum ES-nevndin skipar fyri, savnar stjórnarumboð, granskarar og umboð fyri upprunafólk at viðgera viðurskifti í Arktis. Á skránni eru evni sum altjóða samstarv, burðardygg og búskaparlig menning í Arktis, avbjóðingar í sambandi við veðurlagsbroytingar, samstarv millum arktisk lond og øki, umframt gransking, nýskapan og vitan um Arktis.

Landsstýrismaðurin tók lut í samrøðu á palli við aðalstjóran í DG Mare, Charlina Vitcheva, á tiltaki við heitinum “The Arctic today”. Í samrøðuni legði landsstýrismaðurin dent á týdningin av altjóða samstarvi, vísindagrundaðum avgerðum og einari skipan, sum byggir á altjóða lóg og reglur. Hann vísti eisini á føroyska íkastið til burðardygga umsiting av hav- og sjótilfeingi, umframt týdningin av øktum samstarvi um trygd og tilbúgving í Arktis.

Í sambandi við ráðstevnuna hevði landsstýrismaðurin eisini fund við ES-nevndarlimin í hav- og fiskivinnumálum, Costas Kadis. Á fundinum umrøddu teir samstarvið millum Føroyar og ES.

Meira kunning um ráðstevnuna fæst her. 

Uttanríkis- og fiskimálaráðið

Her nakrar myndir frá Sjómannadegnum 2026.

Veðrið var av tí besta og sera nógv fólk vóru og vitjaði á Sjómannadegnum.

Lagi var av tí besta og her nakrar myndir frá Sjómannadegnum 2026, sjá herundir:

SáH

Tá fiskidagaskipanin varð sett í verk fyri bólk 5, vóru 22.000 fiskidagar tøkir. Síðan tá er talið av fiskidøgum áhaldandi skorið niður. Í 2025 var dagatalið komið niður á 6.808 dagar. Hetta svarar til eina lækking upp á meira enn 15.000 dagar ella 70%.

Útróður hevur verið ein natúrligur partur av føroyska samfelagnum so langt aftur, sum vit kenna okkara søgu. Áðrenn stóra føroyska fiskivinnan varð ment, var tað útróðurin, sum helt lív í nógvum bygdum og gav familjum eitt íkast til lívsgrundarlagið.

Men útróður er meira enn bara vinnuligt virksemi. Hann er ein týðandi partur av føroyskari mentan og okkara samleika. Eins og seyðahald og aðrar gamlar føroyskar siðvenjur er útróður við til at knýta ættarlið saman. Kunnleiki, royndir og siðir verða latnir víðari frá eldir til yngri tvørtur um ættarliðini. Felags áhugi, sum bindur familjur og ættarlið saman.

Tá fiskidagatalið verður skert við 70%, er torført at síggja tað sum annað enn eina munandi niðurlaging av møguleikunum hjá hesi vinnu. Tað er tí viðkomandi at fáa upplýst, hvussu stórur partur av fiskidaganýtsluni stavar frá sera smáum avreiðingum, og um grundarlag er fyri at broyta skipanina, eitt nú við einum minstamarki, nær ein avreiðing skal telja við.

Spurningurin er, um politiski viljin framvegis er til staðar at varðveita og menna hesa rótføroysku vinnu- og mentanararv, ella um vit politiskt hava góðtikið, at ein av elstu og mest eyðkendu føroysku vinnum og siðvenjunum spakuliga hvørvur? 

Fróði Magnussen Løgtingsmaður, Fólkaflokkurin

Eitt pill býtt tíðspunkt at koma til Klaksvík á vitjan, tað er hvítusunnudagur og teir flestu av handlunum hava stongt ella rættari sagt alt er stongt.

Men eftir áheitan frá Visit North, so letur Maverick upp klokkan 12:00 og á skránni verður fótbóltur og tónleikur, Maverick stongir aftur klokkan 23:00.

Hetta skrivar internetið um ferðamannaskipi Renaissance: Renaissance (IMO 8919257) er eitt 55.575-tons, miðalstórt ferðamannaskip, ið verður rikið av Ambassador Cruise Line.

Skipið, sum upprunaliga varð bygt í 1992 av Holland America Line's MS Maasdam, varð nýliga umvælt og hýsir nú umleið 1.100 ferðafólkum býtt yvir níggju dekk. 

Skipi hevur fleiri hentleikar, ið eru lagaðir til klassiskar siglingar við denti á ferðamálini:

Matur: Grand Restaurant, ið fevnir um tvey dekk, Belle-Île Buffet, og serstøk matstovutilboð.Setursstovur (lounges): Ocean Bar, tann panorama-stødda Le Panoramique Lounge & Nightclub, og sundlaugarøki við taki, ið kann dragast aftur.

Hentleikar: Eitt endurnýggjandi heilsurúm (spa), sóldekk, undirhald (live) og tænasta frá einum fullkomiliga fleirmæltum manningatoymi.

Kannað núverandi ferðaætlanir, kømur møguleikar og frítíðarpakkar beinleiðis á Ambassador Cruise Line Renaissance síðuni.

SáH

Teir tríggir íbúðarblokkarnir Eirargarður 4, 6 og 8 eru í somikið ringum standi, at tað ikki loysir seg at høvuðsumvæla teir. Tí hevur Heilsu- og orkumálaráðið saman við Landsverki gjørt av, at teir ikki longur skulu vera bústaðir, og farast skal undir eina trý ára tilgongd, at endurhýsa teimum, ið búgva í íbúðarblokkunum.

Avgerðin er tikin eftir eina kanning av bygningunum, ið Landsbyggifelagið hevur gjørt fyri Landsverk, og eina triðjapartsmeting, ið ráðgevingarfyritøkan Spenn hevur gjørt.

Á kunningarfundi í kvøld fingu íbúgvarnir kunning um støðuna.

Farið er longu undir arbeiðið at finna aðrar bústaðir, m.a. við at fyrireika nýbygging ovast á matr. 1000a, við Heygsvegin.

Niðurstøðan í kanningi hjá Landsbyggifelagnum er, at orsaka av sliti og manglandi viðíkahaldi, umframt broyttum krøvum til íbúðarblokkar, lúka bygningarnir ikki longur nútíðar krøv.

Íbúðarblokkarnir húsa m.a. heilsustarvsfólki sum starvast í Sjúkrahúsverkinum, heilsustarvsfólki, ið koma til Føroya í styttri ella longri tíðarskeið, umframt fólki í heilsuørindum, ið búgva á øðrum oyggjum.

Hesir bústaðir eru tí alneyðugir fyri at tryggja okkum eitt vælvirkandi heilsuverk. Uppgávan við endurhýsing, verður tí tikin í størsta álvara.

Samstundis er arbeiði farið í gongd við at kanna allar hinar bygningarnar á økinum.

Arbeiðið við at tryggja brunaviðurskiftini fer í gongd beinanvegin.

Á Eirargarði 4,6 og 8 eru 115 búeindir, 42 kømur og 73 íbúðir. Tó eru vanliga einans millum 60 og 70 av teimum í brúki í senn.

Frágreiðing og tilmæli frá Landsverki viðv. bygningunum í Eirargarði 4, 6 og 8 hjá Landssjúkrahúsinum

Heilsu- og orkumálaráðið

Margit Stórá, landsstýriskvinna í almanna- og bústaðamálum, hevur tilnevnt tveir nýggir limir í stýrið fyri Húsalánsgrunnin, vanliga nevnt Bústaðir. 

Nýggju limirnir eru Bogi Jacobsen og Gestur Hovgaard, sum tóku við 1. mai 2026.

Umframt teir báðar sita Ingibjørg Berg, Rakul í Gerðinum og Maud Hilduberg í stýrinum.

Tilnevningin av stýrislimum fer fram annað hvørt ár, soleiðis at ávikavist tríggir og tveir stýrislimir verða tilnevndir aðru hvørja ferð.

Stýrið hevur skipað seg við Ingibjørg Berg sum forkvinnu.             

"Bústaðaravbjóðingin er stór, og hetta er eitt øki, sum samgongan fer at raðfesta høgt komandi árini. Ein liður í loysnini er leikluturin hjá Bústøðum, og eg síggi fram til eitt gott og virkið samstarv við nýggja stýrið komandi árini”, sigur Margit Stórá, landsstýriskvinna.

Landsstýriskvinnan ynskir nýggja stýrinum blíðan byr í arbeiðinum og takkar fráfarandi stýrislimunum, Teiti Samuelsen, sum hevur verið formaður, og Petur Even Djurhuus, fyri teirra íkast og arbeiðssemi seinastu árini.

Myndatekstur: Á myndini eru frá vinstru Gestur Hovgaard, Ingibjørg Berg, forkvinna, Margit Stórá, landsstýriskvinna, Rakul í Gerðinum, Maud Hilduberg og Bogi Jacobsen.

Almanna- og bústaðamálaráðið

SÁTTMÁLIN HJÁ ARBEIÐARAFELØGUNUM LONGDUR!

Arbeiðarafeløgini hava longt sáttmálan, sum fór úr gildi 1. mei, til og við á midnátt hósdagin 7. mei. 

Feløgini samráðast um nýggjan sáttmála, og hildið verður á við samráðingunum hósmorgunin.

Arbeiðarafeløgini, sum samráðast saman eru Føroya Arbeiðarafelag, Havnar Arbeiðarafelag, Havnar Arbeiðskvinnufelag, Klaksvíkar Arbeiðskvinnufelag og Klaksvíkar arbeiðsmannafelag

Verkafólk