Fugloy á heimsklassanetinum hjá Føroya Tele

Nøkur fólk frá Føroya Tele vóru í Fugloy og skiftið antennur út, her grein og myndir frá túrinum, starvsnæmingurin Kári Joensen hevur skrivað og tikið myndir:

Radiodeildini á Klubbanum í Fugloy.
15.-16. februar vóru Jóhan P. Poulsen, Kári Djurhuus og Óla Christian Vid Sandá frá Radiodeildini og Kári Joensen, starvsnæmingur á marknaðardeildini hjá Føroya Tele, á Klubbanum í Fugloy.
Antennur skuldu skiftast, eins og annað viðlíkahaldsarbeiði skuldi gerast. Tyrlan hjá Atlantic Airways fleyg okkum frá Klaksvík upp á Klubban á døgurða 15. februar, og tyrlan var nóg illa farin avstað, áðrenn fyrsti maðurin var á veg upp í mastrina. Arbeitt varð í mastrini líka til myrkurs, meðan restin av kvøldinum varð brúkt til at royndarkoyra ta nýggju útgerðina, áðrenn songin kallaði.

Næsti dagurin byrjaði gott við turrum og stillum veðri, men út á dagin gjørdist somikið grátt, at illa sást upp á toppin av mastrini. Tað eydnaðist okkum tó at skifta síðstu antennuna, áðrenn leiðin gekk oman í Kirkju, har Ritan bíðaði eftir at sigla okkum inn til Hvannasunds. Frá Hvannasundi tóku vit bussin aftur til Klaksvíkar, har ið bilarnir stóðu.
Klokkan var farin av 17.30, áðrenn vit komu til Klaksvíkar, og hetta vórðu tískil nakrir drúgvir arbeiðsdagar, áðrenn vit sluppu heim aftur at sova í egnari song og ikki á luftmadrassum í larmandi Tøknihúsinum uppi á Klubbanum í Fugloy.
At ganga tey 168 fetini upp í ta 50 metra høgu mastrina enntá í tjúkkum mjørka er nakað, vit vanlig fólk aldrin høvdu funnið uppá, men fyri menninar á Radiodeildini er tað “just another day at the office”, so at allir føroyingar kunnu fáa gleði av heimsklassanetinum hjá Føroya Tele.

Sjá myndir her: Klikk her:  "Radiodeildin á Klubbanum í Fugloy".

Orð og myndir: Kári Joensen, starvsnæmingur

Kelda: Føroya Tele

SáH

---