BYGGING: Kringvarpið setti í einum tíðindainnslagi týsdagin ljós á nakrar almennar byggiverkætlanir, har niðurstøðan var, at nógvar verkætlanir líða undir prosjektfeilum og manglum. Landsverk er byggiharri á hesum verkætlanum og hevur sum fremstu uppgávu at stýra tíðarætlan, pengum og góðsku.  Stovnurin vil í hesum sambandi lýsa hesi viðurskiftir nærri og greiða frá, hvussu ein byggiverkætlan verður samanskrúvað og samskipað.

Tað hevur seinnu árini verið eitt politiskt ynski, at so at siga allar uppgávur í sambandi við almennar byggiverkætlanir skulu bjóðast út. Hesum ynski hevur Landsverk sum almennur byggiharri fylgt. Sostatt verða bæði ráðgeving, bygging og at kalla allar aðrar veitingar veittar út til privatar fyritøkur í vinnuni at taka sær av. Eftir hjá Landsverki er sjálvur byggiharraleikluturin, sum fevnir um høvuðsábyrgdina av verkætlanini.

Ein av mongum uppgávum hjá byggiharranum er at halda vakið eyga við og staðfesta møguligar manglar og feilir, ið júst kunnu hava ávirkan á bæði tíð og kostnað og í síðsta enda á góðskuna. Ein onnur skylda er at halda ánaran kunnugan um gongdina í eini verkætlan. Tí verða støðulýsingar við jøvnum millumbilum sendar ánara.

Flestu byggiverkætlanir hava størri ella smærri avbjóðingar, sum við jøvnum millumbilum stinga seg upp undir byggitilgongdini. Hetta er púra vanligt í byggivinnuni. Eingin verkætlan er eins, og tískil hevur hvør einasta byggiverkætlan sínar heilt serstøku avbjóðingar.

Sum byggiharri mugu vit tíverri staðfesta, at tað oftani eru alt ov nógvir feilir og manglar í prosjekteringstilfarinum, sum verður latið okkum. At hesir verða funnir og rættaðir so hvørt, prógvar, at eftirlitið hjá Landsverki sum byggiharri virkar, men tað ávirkar sjálvandi gongdina. 

Kynstrið er at hava eitt gott eftirlit við, at møguligir feilir verða uppdagaðir skjótast gjørligt, so teir kunnu rættast. Hetta er júst tað, sum er høvuðsuppgávan hjá einum byggiharra, og hendan leiklutin tekur Landsverk í størsta álvara og brúkar nógva orku upp á at tryggja rættar loysnir á. Hetta er høvuðsorsøkin til, at tað hevur eydnast væl hjá stovninum at staðfesta møguligar trupulleikar við eini verkætlan.

Feilir og manglar skapa ikki bert trupulleikar fyri byggiánaran og byggiharran, men so sannliga eisini fyri privatu byggivinnuna, sum loysir tær ymsu uppgávurnar, og kanska skulu nýta óneyðuga nógva orku upp á at byggja eftir mangulfullum ella lutvíst skeivum tekningum.

Ein byggitilgongd er samansett av nógvum pørtum, og tí er sera týdningarmikið, at bæði byggiharri og teir mongu partarnir í eini verkætlan hava eitt gott og álitisfult samstarv um at loysa tær ymsu uppgávurnar á best møguligan hátt. Hetta er nakað, sum Landsverk framhaldandi fer at gera sítt ítarsta til at hepnast við. Fyritreytin er, at allir partar hava sama ynski um at fáa samstarvið at virka, til gleði fyri allar partar.

Landsverk 02.12.2015

Jógvan Skorheim, borgarstjóri í Klaksvíkar kommunu var í dag vertur fyri fundi við Stephen Wheeler, umboð fyri amerikonsku sendistovuna í Keypmannahavn.

Amerikanska sendistovan í Keypmannahavn hevur víst áhuga fyri Klaksvík, bæði í mun til vinnulívið og virksemið í býnum annars, og á fundinum greiddi borgarstjórin frá stóru menningini, sum hevur verið í Klaksvíkar kommunu seinastu árini, eitt nú fíggjarliga, men eisini í mun til fólkatal og vinnuvirksemi.

Stephen Wheeler frá amerikonsku sendistovuni vísti kommununi stóran áhuga, og eftir vitjanina í Býráðshúsinum vitjaði hann eisini fleiri onnur støð í Klaksvík.

Kelda: Klaksvíkar Kommuna 02.12.2015

Skunda tær um tú vilt gera kvetti. Vit hava opið ímorgin frá kl. 15.00 til kl. 17.00 ... og eru at hitta á Stangavegi 4.

Klaksvíkar Timburhandil hevur fingið hópin av Jólavørum, sum bert skula seljast út og eitt nú so hava vit eina rúgvu av Jólaperum (og annað Jólapynt) á lagri. 

Vit hava eisini Karmar (farva: granit & mormor), sum fyrr kostaðu 198 kr pr. stk og sum vit nú selja fyri einans:
69 kr stk. Hartil so hava vit massar av máttum, sum vit eisini vilja sleppa av og sum tú kanst fáa fyri ein bíligan pening.

Og ynskir tú gávuna til hana ella hansara, so hava vit ovmikið av búnýtis gávum til hennara og amboðs gávum til hansara. 

Gólv & loft er ikki so nógv av eftir - so her mást tú skunda tær, um tú vilt gera kvetti. 

Símun og Jógvan á Høvdanum vera at hitta ímorgin frá kl. 15.00 til kl. 17.00 og tá kanst tú veruliga gera kvetti. Vit gleða okkum at síggja teg ímorgin - støkk inn á gólvi ímorgin og fá tær eitt gott kaffiprát, saman við Símun og Jógvan. Kanska vit hava júst tað gávuna, tú leitar eftir ..?

HAVIÐ, heimsins sterkasta akvavitt, ið Dism hevur framleitt síðan 2010, kemur nú í einari serligari útgávu. Hendan útgávan er eld fimm mánaðir í sponskum sjerritunnum. Úrslitið av eldingini er eitt gylt akvavitt við rundum og søtligum sjerrismakki, ið er væl hóskandi sum snapsur ella at njóta omaná eina góða máltíð.

​Tunnurnar, ið eru úr amerikanskari eik, hava frammanundan verið brúktar til Oloroso sjerri í Andalusia í Spania. Tær eru fingnar til vega frá einari bodega við Jerez, har tær hava verið brúktar til sjerri í níggju ár. Tunnur av hesum slagnum eru forkunnugar, tí sjerrisølan er fallandi, samstundis sum eftirspurningurin eftir brúktum sjerritunnum er vaksandi.

Talan er um avmarkaða framleiðslu, eina sokallaða batch framleiðslu. “Einans 2136 fløskur eru framleiddar, so tú kanst kalla hetta eina roynd. Verður vøran væl móttikin, so royna vit kanska aftur; og tá møguliga við onkrum øðrum tunnuslagi”, sigur Erling Eidesgaard, stjóri í Dism.

Elda HAVIÐ, ið eins og upprunin er 50%, er latið á snøggar hálvliturs fløskur, ið eru proppaðar við korkproppi við trætoppi.

Hendan serliga útgávan av HAVINUM fæst í Rúsunum kring landið, í tollfríu handlunum umborð á Norrönu og í Vága floghavn.

Dism framleiðir frammanundan eisini Eldvatn, Lívsins Vatn, Havið og Barald.