Føroyar og Russland hava gjørt avtalu um sínámillum fiskiveiðirættindi fyri 2025. Talan var um talgildan fund.

Munandi skerjingar eru í botnfiskakvotunum í Barentshavinum í 2025. Tí var eisini væntandi, at Føroyum fór at standa í boði lægri kvotur av toski og hýsu í russiskum sjógvi í 2025, samanborið við 2024. 

Føroyska lækkingin verður tó eitt vet minni enn lækkingin í heildarkvotuni. Toskakvotan lækkar við 23,8% og hýsukvotan við 4,5%. Føroyska kvotan av flatfiski og rækjukvotan verða óbroyttar í mun til 2024.

Føroysku kvoturnar í russiskum sjógvi í 2025 verða sostatt hesar: Toskur 7.445 tons, hýsa 1.000 tons, flatfiskur 900 tons og rækjur 4.000 tons. 

Seinastu árini hevur ein avmarking verið, at bert eitt føroyskt skip kann fara á norðaru leiðirnar í russiskum sjógvi at fiska rækjur. Í avtaluni hava Føroyar fingið betrað um hesar fortreytir, soleiðis at tvey skip nú kunnu vera til fiskiskap á norðaru leiðunum samstundis.

Í føroyskum sjógvi lækka russisku kvoturnar av makreli og norðhavssild. Russiska makrelkvotan lækkar við 34,3%, og kvotan av norðhavssild lækkar við 10,6%. Kvotan av svartkjafti verður óbroytt í mun til 2024.

Russisku kvoturnar í føroyskum sjógvi í 2025 verða hesar: Svartkjaftur 75.000 tons, makrelur 8.080 tons og sild 5.800 tons.

Russisk skip fáa í 2025 atgongd til føroyskan sjógv at fiska í mesta lagi 52.612 tons av svartkjaftakvotuni, sum russisk skip hava í altjóða sjógvi, hetta er ein lítil lækking í nøgd í mun til 2024.

Russisk skip hava í 2025 ikki atgongd at fiska í serøkinum hjá Føroyum og Bretlandi.

Fiskivinnu- og samferðslumálaráðið

Í farnu viku ráðførdi landsstýrismaðurin í fiskivinnu- og samferðslumálum seg við Løgtingsins uttanlandsnevnd viðvíkjandi samráðingum við Russland um fiskiveiðiavtalu fyri 2025.

Svarið er viðgjørt, og avgerð er tikin um at fara til samráðingar við Russland um eina fiskiveiðiavtalu fyri 2025.

Samráðingarnar verða hildnar á talgildum palli í hesi vikuni.

Fiskivinnu- og samferðslumálaráðið

Í farnu viku vóru umboð frá Suðurkoreansku fyritøkuni, LX International, í Føroyum og kunnaðu seg um Føroyar og føroyskt vinnulív. Serliga var áhugin stórur fyri føroyskum makreli og laksi.

Týsdagin Í farnu viku hevði Føroya Arbeiðsgevarafelag vitjan av tveimum umboðum frá stóru Suðurkoreansku fyritøkuni LX International. Fyritøkan virkar innan eitt nú handil, logistik og ymiskar aðrar vinnur. Umboðini vóru serliga áhugað í at hoyra um føroyskar fiskavørur, og serliga um føroyskan makrel og laks. Í hesum sambandi vóru útflytarar av makreli og laksi eisini við til fundin og greiddu frá.

Suðurkorea er, eins og fleiri onnur lond í Asia, áhugaverdur marknaður fyri føroyskar útflutningsfyritøkur og hevur Føroya Arbeiðsgevarafelag eisini víst á, at landsstýri eigur at raðfesta at fáa betri handilssambond við asiatisku marknaðirnir, og serliga Suðurkorea. Í dag er millum 10% og 20% tollur á bæði føroyskum makreli og laksi til Suðurkorea, meðan okkara kappingarneytar kunnu útflyta hesar vørur nærum tollfrítt.

Føroya Arbeiðsgevarafelag

Føroyar og Grønland hava gjørt avtalu um sínámillum fiskiveiðirættindi fyri 2025. Avtalan um fiskiveiðisamstarv hevur stóran týdning fyri bæði føroysk og grønlendsk fiskiskip, ið hava góða gagnnýtslu av fiskirættindum í sjóøkinum hjá hvørjum øðrum.

Føroysku kvoturnar í grønlendskum sjógvi vera óbroyttar í 2025 í mun til 2024.

Føroysk skip hava óbroytta kvotu í grønlendskum sjógvi í 2025

Vísindaliga ráðgevingin fyri svartkalva mælir til eina lækking í svartkalvakvotuni í grønlendskum sjógvi í 2025. Hóast hetta gekk Grønland á møti einum ynski frá Føroyum um at varðveita støðið í føroysku svartkalvakvotuni.

Smávegis tillagingar eru gjørdar í kvotunum hjá grønlendskum skipum í føroyskum sjógvi í 2025 í mun til 2024, sum taka atlit at, at føroyska sildakvotan er lækkað, umframt at broytingar hava verið í fiskaprísunum seinasta árið.

Grønlendska kvotan í føroyskum sjógvi av norðhavssild lækkar við 600 tonsum, ímeðan svartkjaftakvotan hækkar við 3.250 tonsum. Harumframt lækkar atgongdin hjá grønlendskum skipum at fiska svartkjaft í føroyskum sjógvi við 446 tonsum.

Úrslitið av samráðingunum er sostatt, at føroysk skip í 2025 framhaldandi kunnu fiska tilsamans 2.500 tons av toski í grønlendskum sjógvi við 50 tonsum av kalva sum hjáveiðu. Brosmukvotan verður samanlagt 375 tons. Føroysku kvoturnar av svartkalva í grønlendskum sjógvi eru 325 tons í Eysturgrønlandi og 100 tons í Vesturgrønlandi. Royndarkvotan eftir krabba við Eysturgrønland er 500 tons. Harumframt verður møguleiki framvegis hjá føroyskum skipum at luttaka í royndarfiskiskapi eftir toski og øðrum botnfiski og -djórum á teimum norðaru leiðunum í Eysturgrønlandi.

Grønlendsku kvoturnar í føroyskum sjógvi í 2025 eru 4.900 tons av norðhavssild og 23.750 tons av svartkjafti. Eisini fær Grønland atgongd til føroyskan sjógv at fiska í mesta lagi 7.814 tons av grønlendsku svartkjaftakvotuni í altjóða sjógvi í NEAFC-økinum.

Samráðingarnar millum Føroyar og Grønland, sum vanliga hava verið hildnar í Keypmannahavn, vóru hesaferð í Tórshavn. Í sambandi við, at nýggi altjóða flogvøllurin í Nuuk verður tikin í nýtslu í næstum, eru londini samd um, at árligu fiskiveiðisamráðingarnar frameftir skulu haldast heima í Tórshavn og Nuuk.

Fiskivinnu- og samferðslumálaráðið

Báðir partar vilja styrkja um tilbúgvingarsamstarvið. Hetta var millum niðurstøðurnar, tá ið landsstýrismaðurin í tilbúgvingarmálum, Bjarni K. Petersen, hitti danska starvsbróðurin, Torsten Schack Pedersen, í Keypmannahavn 15. novembur. Føroyar arbeiða við at betra um samstarvið við Danmark og hini Norðurlondini um tilbúgving, millum annað innan Haga-samstarvið.

Bjarni K. Petersen var sera fegin um samrøðuna við danska ráðharran og segði soleiðis eftir fundin: “Vit høvdu eina sera góða samrøðu um samstarv á tilbúgvingarøkinum, ið báðir partar vilja styrkja. Ítøkiliga havi eg góðar vónir um, at Føroyar kunnu luttaka meiri aktivt framyvir í Haga-samstarvinum og innan norðurlendska samstarvið um veitingartrygd”.

Løgmálaráðið