Føroysku peningastovnarnir hava í fleiri ár samskift við MobilePay um at fáa tænastuna tøka í Føroyum. Síðstu tøkniligu forðingarnar verða nú loystar, og skjótt ber til at brúka væl umtóktu appina í Føroyum.

Við MobilePay kanst tú senda pengar við bara at skriva telefonnummarið hjá móttakaranum. Aðrir fyrimunir eru m.a.:
* Pengarnir koma á kontu alt fyri eitt
* Lætt at savna pengar saman til eina felags gávu, námsferð og tílíkt
* Lætt at býta útreiðslur millum fleiri fólk skjótt og lætt

Vinnurekandi og felagsskapir kunnu taka ímóti gjaldingum við MobilePay

Les meira
https://brnw.ch/21wQR19 

Føroya Banki
 

Týskvøldið 25. februar eru allir handilsleiðarar í kommununi bodnir til hugnaløtu og kunning í Varpinum.

Tiltakið verður skipað í sambandi við kommunuætlanararbeiðið hjá Klaksvíkar býráði, sum hevur til endamáls at menna visjónir og málsetningar fyri ymisku økini í kommununi.

Endamálið við tiltakinum fyri handilsleiðarar er at kunna um kommunuætlanararbeiðið, og at hoyra frá teimum, sum umboða handilslívið í Klaksvíkar kommunu.

Borgarakanningin frá 2023 vísti, at 69% av teimum 800 sum svaraðu halda, at handilslívið í Klaksvíkar kommunu er gott. Hetta er nøktandi, men eigur støðugt at verða ment, og hesum arbeiðinum eigur kommunan at stuðla undir. Fyri at hetta kann eydnast, er umráðandi, at tætt samband er millum kommununa og vinnuna, so partarnir vita hvør av øðrum.

Umframt kunning um kommunuætlanararbeiðið, sum seinastu tíðina er gjørt á handilsøkinum, verða eisini úrslit frá kanning, sum varð gjørd á handilsøkinum síðst í farna ári, løgd fram.

Bjóðað verður kaffi og lætt ábit. Eisini verður høvi at seta spurningar og at gera viðmerkingar.

Handilsleiðarar hava fingið innbjóðing til tiltakið, men er onkur, sum ikki hevur fingið innbjóðing, so verður heitt á viðkomandi handilsfyritøku, um at seta seg í samband við kommununa umvegis teldupost áðrenn mánadagin 24. februar.

Tiltakið er ókeypis, men neyðugt er við tilmelding umvegis [email protected].

Hvør umboðar handilslívið?
Vinnulívið í Klaksvíkar kommunu er ógvuliga samansett og fjølbroytt. Nógvar fyritøkur venda sær til bæði privat kundar og fyritøkur. Nakrar eru smáar, aðrar stórar, umframt at fleiri einstaklingavirki eisini eru í býnum.

Í sambandi við kommunuætlanararbeiðið er handilsvinnan raðfest í fyrstu atløgu. Handilsvinnan verður í hesum arbeiðinum nágreina sum smásøla millum fyritøkur og privatar kundar.

Klaksvíkar Kommuna

Nevndin á Posta hevur sett Edvard S. Remberg sum stjóra. Edvard hevur verið KT-leiðari í felagnum síðan 2014 og hevur verið ein týðandi partur av menningini í felagnum seinastu árini. Hann er 50 ár og búsitandi í Hoyvík.

“Eg fegnist um, at vit hava sett Edvard sum stjóra. Hann hevur sera góðan kunnleika um felagið, flutningsvinnuna eins og um møguleikar og avbjóðingar fyri framman. Eisini hevur hann sum fyribilsstjóri víst, at hann er rætta fólkið at mynda felagið og leggja framtíðarkósina til rættis saman við nevndini," sigur nevndarformaðurin á Posta, Árni Ellefsen.

Edvard Remberg sigur um nýggja starvið at: “Uppgávan fyri framman er spennandi. Posta hevur ein týðandi leiklut í samfelagnum og okkara flutningstænastur eru framkomnar og viðkomandi fyri bæði vinnuna og privatkundar. Saman við starvsfólkunum fari eg miðvíst til verka fyri at tryggja, at vit byggja víðari á góða grundarlagið. Í høvuðsheitum snýr tað seg um at styrkja raksturin, menna post-, flutnings- og filateliøkið og framvegis tryggja góðan starvsfólkatrivnað."  
 
Edvard tekur við starvinum í dag. Edvard hevur verið fyribilsstjóri síðan oktober í fjør, tá ið Hans Jákup Langgaard fór úr starvi. 

Posta