Súsanna Bertholdsen, landsstýriskvinna í heilsumálum, hevur sett Noomi Oddmarsdóttir Gregersen, sum stjóra í Heilsustýrinum.

Noomi Oddmarsdóttir Gregersen er 47 ára gomul, hon er útbúgvin MSc í lívfrøði frá Aarhus Universiteti í 2010, hevur eina PhD í medisini við sergrein innan arvafrøði frá Aarhus Universiteti í 2015. Noomi er júst farin undir eina master í leiðslu og skipan á Fróðskaparsetri Føroya.

Noomi hevur drúgvar starvsroyndir innan íleguøkið í Føroyum, har hon millum annað hevur starvast sum granskari, verkætlanarleiðari av FarGen og leiðari av heilsudátu- og fólkaheilsueindini í Heilsustýrinum.

Noomi tekur við starvinum tann 1. januar 2026.

Um Heilsustýrið
Heilsustýrið skipar heilsufakliga økið í Føroyum og veitir granskingargrundaða ráðgeving við støði í føroyskum heilsu- og samfelagsviðurskiftum. Málið er at fáa yvirlit, kunnleika og at byggja eitt grundarlag fyri heilsufremjandi átøkum.

Á heimasíðuni hjá Heilsustýrinum www.heilsustyrid.fo er nærri kunning um virkisøkið.

Heilsumálaráðið

Uppskot til ríkislógartilmæli um at seta í gildi fyri Føroyar broytingar í rættargangslógini eru í dag bornar Løgtinginum.  Endamálið við uppskotinum er at effektivisera og einfalda rættargangin, og stytta um viðgerðartíðina í rættinum.

Rættargangslógin er ein tann mest víðfevnda lógin, sum er galdandi í Føroyum, og ásetur hon reglur um, hvussu rættargangurin er skipaður. Rættargangslógin ásetur m.a. reglur um, hvussu dómstólarnir viðgera revsimál og borgarlig mál, nær leikdómarar skulu vera við at viðgera rættarmál, og nær og hvussu løgreglan kann kanna mál. Eisini ásetur rættargangslógin reglur um virksemi hjá advokatum og reglur um m.a. viðgerð av faðirskapsmálum, foreldramyndugleikamálum og verjumálum.

Landsstýrismaðurin í lógarmálum, Bjarni K. Petersen, fegnast um, at arbeiðið við at dagføra føroysku rættargangslógina er komið í ein fasta legu, soleiðis at tryggja verður, at rættargangurin í Føroyum ikki verður afturúrsilgdur.

Løgmálaráðið

Vísandi til grein 7 í Býarskipanarlógini*, sendi Klaksvíkar kommuna tann 14. feb. 2024 Umhvørvismálaráðnum uppskot til byggisamtykt fyri Svínoy  til góðkenningar.

Talan er um at fáa í vega byggisamtykt fyri Svínoyar bygd, tí eingin byggisamtykt er frammanundan í Svínoy.

Uppskotið hevur verið leingi ávegis, og hevur ligið frammi í trimum umførum, seinast frá 22. apríl til 13. mai 2024. Tá ið freistin at koma við møguligum mótmælum ella broytingaruppskotum var farin, 3. juni 2024, hevði kommunan fingið 12 mótmælir, ið eru viðgjørd av býráðnum.

Býarskipanarnevnd Landsins hevur havt málið til ummælis og mælir til at góðkenna byggisamtyktina fyri Svínoy. Umhvørvismálaráðið hevur við heimild í grein 4 í Býarskipanarlógini góðkent byggisamtyktina fyri Svínoy.  

Byggisamtyktin sæst her: Galdandi byggisamtykt

* Býarskipanarlógin: Løgtingslóg nr. 13 frá 21. mai 1954 um býarskipanir og byggisamtyktir, sum seinast broytt við løgtingslóg nr. 82 frá 2. mai 2025 
Kort Kort matr. Svínoy
Kort Svínoy

Klaksvíkar Kommuna

Í ár verður tað vakra tekningin hjá Sunnvá Rógvadóttir, sum kemur at prýða jólakortini hjá Klaksvíkar kommunu og Norðoya Bú- Heimatænastu.

Seinastu árini hava børnini í frítíðarskúlanum luttikið í eini jólateknikapping, har vinnandi tekningin myndprýðir jólakortini hjá Klaksvíkar kommunu og Norðoya Bú- og Heimatænastu.

80 tekningar komu inn, og tann heldigi vinnarin gjørdist Sunnvá Rógvadóttir, sum gongur í 2.b á Skúlatrøð. Tað vóru starvsfólkini í Estra, sum valdu bestu myndina. 

Karl Johansen, borgarstjóri og stýrisformaður í NBH, var og vitjaði Snjallubjallu og Garðalisu, har hann handaði Sunnvá eina gávu og fyrsta jólakortið. Eisini fingu børnini okkurt søtt frá borgarstjóranum.

Frá 1. desember kunnu allar myndirnar síggjast á hurðini í býráðshúsinum.

Fleiri myndir, klikk her "Sunnvá hevur teknað jólakortið"

Klaksvíkar Kommuna

Seinastu árini hevur verið siðvenja hjá Klaksvíkar Kommunu og Norðoya Búð- og heimatænastu at skipa fyri jólahaldi fyri øllum starvsfólkunum. Endamálið er at koma saman til hugnaliga samveru og at heiðra teimum starvsfólkum, sum hava havt starvsdag í árinum.

Ymiskt hevur verið, hvussu hendan hugnaløtan hevur verið skipað. Nøkur ár hava øll starvsfólkini í Klaksvíkar kommunu og Norðoya Bú- og Heimatænastu verið til felagshald í KÍ høllini, men í ár varð jólahugnin í tveimum. Týskvøldið fyri starvsfólkunum í NBH og mikukvøldið fyri starvsfólkunum hjá Klaksvíkar kommunu. 

Á skránni var tónleikur, lætt ábit, starvsheiðranir og røða frá Karl Johansen, borgarstjóri og stýrisformanni í NBH. Eisini Marna E. Jensen, stjóri í NBH, nýtti høvi at takka starvsfólkunum í NBH fyri góða tænastu. 

Hjá Norðoya Bú- og Heimatænastu vórðu hesi heiðraði: 

10 ára starvsdag
Elinor Nolsøe
Joan Højgaard
Rúna L. Josephsen

20 ára starvsdag
Einar Klakkstein
Ella Olsen

25 ára starvsdag
Tórgerð Jacobsen

35 ára starvsdag
Rósa Hammer

40 ára starvsdag
Birgit Klakk
Erna Johannesen
Petrina Mikkelsen

Hjá Klaksvíkar kommunu vórðu hesi heiðraði:

10 ára starvsdag
Osla Norðá
Morensa Bjartalíð 
Gerda Joensen
Dora Joensen
Mariann Poulsen
Khuldah Mikkelsen
Frida Klakkstein
Hervør Nolsøe

20 ára starvsdag
Carsten Andersen
Sigrun Eysturdal
Anja Eliasen
Hansy Sjúrðaberg
Elsebeth Mohr

25 ára starvsdag 
Dan Hjelm
Aksal Petersen
Hans Jacob Heinesen
Borghild Johannesen
Miriam Joensen
Klara Petersen

30 ára starvsdag 
Eli Hansen 

35 ára starvsdag 
Dánjal Poulsen
Esmar Klakkstein

45 ára starvsdag 
Jógvan Johannesen

Myndir frá hátíðarhaldinum, klikk her: "Felags starvsfólkahugni"

Klaksvíkar Kommuna

Við heimild í § 3, stk. 2, § 6, stk. 2 og § 25 í løgtingslóg nr. 44 frá 19. juni 1972 um val til allar føroyskar kommunur verður kunngjørt, at umval verður í Runavíkar kommunu.

týsdagin 13. januar 2026

Valevnislistarnir mugu vera valnevndarformanninum ella kommununi í hendi í seinasta lagi kl. 18.00 týsdagin 23. desember 2025.

Av tí at talan er um umval, fer atkvøðugreiðslan fram sambært teimum valevnislistum, ið vórðu nýttir til kommunuvalið í Runavíkar kommunu 12. november 2024.

Við umvalinum kunnu bert teir persónar velja, sum høvdu valrætt í Runavíkar kommunu 12. november 2024.

Fráboðanin er lýst á Kunngerðarportalinum, sí her.

Løgmálaráðið

Klaksvíkar kommuna hevur sett Sonna Óla Djurhuus í starv sum kommunustjóri í Klaksvíkar kommunu

Sonni er útbúgvin lærari í 2003. Hann hevur tikið eina BED í pedagogiskari leiðslu á Fróðskaparsetri Føroya í 2020. Harumframt hevur hann aðrar viðkomandi útbúgvingar.  

Sonni er 51 ár og hevur drúgvar leiðslu- og stjóraroyndir innan bæði privata og almenna geiran.

Hann hevur verið handils- og deildarleiðari í handilsvinnuni og hevur í fleiri umførum verið skúlastjóri. M.a. stóð hann fyri at leggja saman tríggjar skúlar, til tað vit í dag kenna sum Skúlan við Streymin í tíðarskeiðinum 2016 til 2023.

Síðani 1. apríl 2023 hevur Sonni verið stápsleiðari í sjúkrahúsverkinum.

Sonni sigur sjálvur: “Eg fari komandi tíðina at seta meg inn í viðurskiftini í kommununi og tosa við politikarar, leiðarar og starvsfólk bæði í fyrisitingini og á stovnum í kommununi, síðani fara vit saman at seta á skrá, hvat vit raðfesta at arbeiða við komandi fimm árini”.

Karl Johansen, borgarstjóri, sigur, at Sonni tekur við starvinum 1. februar 2026.

Vit ynskja Sonna hjartaliga til lukku við starvinum. 

Klaksvíkar Kommuna

Seinnapartin í dag hevur verið hildin stórur føðingardagur í Leguhúsinum í Nesvík, hetta í sambandi við, at Sámal Jákup Petersen, ættaður úr Kvívík, fyllir 100 ár. Millum gestirnar var eisini Eirikur í Jákupsstovu, landsstýrismaður í almanna- og mentamálum, sum bar fram heilsan og røðu fyri Sámal Jákup og niðanfyri ber til at lesa røðuna:

Góði Sámal Jákup, kæra familja, góðu gestir.
Í dag hava vit æru av at savnast her fyri at heiðra einum serligum manni – einum sum hevur sett síni spor, bæði í familjulívi, í bygdini, í arbeiðslívi og sum borgari í Føroyum.

Tað er ikki hvønn dag, vit fáa høvi at hátíðarhalda ein hundrað ára føðingardag. Ella rættari, so siga tey mær, at kanska ongantíð áður er tað hent, at ein kvívíkingur fyllir 100 ár. Tí má sigast, at dagurin í dag ikki bara er stórur fyri tykkum familjuna, men eisini fyri bygdina og fyri alt landið.

Tygum Sámal Jákup, hava alt lívið verið ein raskur og virkisfúsur maður. Tað sæst aftur í øllum tí, sum tygum eru farið undir – og tað er ikki lítið. Sigast má, at tygum hava tænt bæði bygd og landi.

Í 1970-inum vóru tygum borgarstjóri í Kvívík, og ein av tínar størstu avrikum var at lata byggja nýggja skúlabyggingina, sum lat upp í 1976.

Hetta var stórt fyri bygdina og ein íløga, sum framvegis gevur bøtur.

Eitt annað gott dømið um trúgvu tænastu má sigast at vera uppgávan, sum tygum í nógv ár røktu: at hava  koyrikall til og úr Mjørkadali. Hetta fingu tygum eisini heiðursmerki fyri frá Færøernes Kommando.

Bæði hesi dømini siga nógvum, at tygum hava verið vælgerðin álitismaður, at tygum hava røkt arbeiðsuppgávurnar til lítar og altíð hava hildið lyfti. 

Longu sum 14-ára gamal gjørdist tygum hugtikin av øllum tí tekniska. Hetta vísti seg í 1939, har tygum, saman við øðrum ungum, luttóku á skúlaferð í Danmark. Tað tekniska gjørdi so stórt inntrykk, at tygum alt lívið hava hildið fast í hesum áhuga. Sigast má, at tað er næstan poetiskt at hugsa sær, at ein túrur við flogfari – eitt túrur, sum bara fýra børn fingu loyvi at verða partur av – skuldi seta kósina fyri hesum lívsvarandi  áhuga.

Seinni í 1970-unum keyptu tygum ein mikroovn í Onglandi – nógv undan øllum øðrum. Hetta sigur ikki so lítið um framskygni. Og somuleiðis tá fartelefonin kom til Føroyar, tá vóru tygum ein av teimum fyrstu, sum átti eina slíka. Longu tá visti tygum at siga familjuni, at ein dag fór at verða møguligt at kunna síggja tann, ein tosaði við. Ikki øll tóku hetta fyri fult tá – men Sámal Jákup fekst rætt. Jú sigast má, at tygum sóu longur fram enn nógv okkara.

Tygum, saman við konuni Elsa, sum doyði í 2022, bygdu saman eitt langt og ríkt lív. Heili 70 ár untust tykkum at verða gift og upplivdu tit at halda jarnbrúdleyp.

Saman fingu tit seks døtur, og ættarliðurin hava vaksið seg stór og eru ein vakur vitnisburður um eitt langt og ríkt lív: 17 eru abbabørn, og ikki minni enn 40 langabbabørn og  6 oldurabbabørn. Hetta má sigast at vera ein skattur, sum fáur fær.

Tygum byrjaði sum skipari, rættu inniløgumaður, sum fekst mangan døgurðan til húsa – og hetta líka til tygum vóru 93 ár.

Seinni vart tú lastbilførari fyri SEV, tú koyrdi rutubil, buss, skúlabørn og arbeiðsfólk til Mjørkadal. Altíð arbeiðssamur. Altíð til reiðar við eini hjálpandi hond.

Tó at aldurin nú kennist eitt sindur, eru tygum framvegis upp hvønn dag og luttekur í gerandisdegnum. Tygum hoyra ikki sum fyrr – men tygum eru her, og Sámal Jákup, tygum eru væl við.

Tygum hava verið ein undangongumaður, ein arbeiðsmaður, ein familjumaður, ein bygdarmaður og ja ein maður við framtíðarsjón. Jú sanniliga hevur Sámal Jákup livað eitt langt og ríkt lív  – og tygum hevur livað tað.

Eg má siga, at eg havi ómetaliga stóra virðing fyri tí stóra arbeiði, sum tygum, saman við tygara samtíðarfólki, hava útint. Í øllum hesum arbeiði, er stórur arvur lagdur eftir tygum, sum nútíðarsamfelagið kann heysta.

Tínum nærmastu hava tygum givið kærleika, tryggleika og fyrimyndir.

Og bygd tíni hava tygum givið menning, eins og Føroya land við tygum eru ríkaði við einum manni, sum hevur virkað við arbeiði, heilsu og hegni.

Vegna landsstýrið og vegna alt fólkið í Føroyum fari eg at siga tær hjartaliga til lukku við 100 ára degnum.

Eg fari at enda við seinasta ørindi úr vakrari sálminum eftir Mikkjal á Ryggi:

 “Tey, sum Guðs vilja gera,
og elska fólk og land,
tey signing við sær bera,
sum sløkkir hatskan brand.
Tey lýsa gjøgnum strevið,
tey bjarga lond úr neyð,
tey sigra víst. Guð gevi,
vit teljast millum tey”.

Somuleiðis fari eg at ynskja tygum eitt blítt lívskvøld. Og enn einaferð hjartaliga til lukku við degnum, verður ynskt tygum og tygara avvarðandi og eg takki fyri meg.

Eirikur í Jákupsstovu, landsstýrismaður í almanna- og mentamálum

Almanna- og mentamálaráðið

Vegna eftirlit verða Tunlarnir norður um fjall stongdir soleiðis frá mánakvøldinum 24. november til fríggjamorgunin 28. november:

Árnafjarðartunnulin verður stongdur fyri allari ferðslu mánakvøldið   og týskvøldið frá kl. 22 til 06. 

Hvannasundstunnulin verður stongdur fyri allari ferðslu mikukvøldið og hóskvøldið frá kl. 22 til 06.

Ferðslan verður leidd ígjøgnum á midnátt, kl. 02 og kl. 04.

Landsverk

Í dag vitjar Troels Lund Poulsen, verjumálaráðharri, í Føroyum, har hann hittir landsstýriskvinnuna í Uttanríkis- og vinnumálum, Sirið Stenberg, fyri at umrøða verjupolitiska samstarvið millum Føroyar og Danmark og í breiðari høpi á norðurleiðunum.

Orsakað av trygdarpolitisku støðuni í heiminum hava Arktis og Norðuratlantshavið størri alsamt strategiskan týdning. Tískil er neyðugt við einum haldgóðum samstarvi um trygdar- og verjupolitikk í millum londini í hesum øki. Tað er avgerandi, at Føroyar er við í tilgongdini fyri at fáa eina felags fatan av raðfestingum og møguleikum í økinum, og at Føroyar hava ein virknan leiklut.

Umframt fundin í Tinganesi vitjar danski verjumálaráðharrin MEST og Atlantic Airways Aviation Academy saman við landsstýriskvinnuni. 

Uttanríkis- og vinnumálaráðið