Býráðsfundurin byrjar kl. 17:30. Til ber at stroyma almenna býráðsfundin umvegis leinkið á forsíðuni.

Býráðsfundurin verður hildin í býarsalinum í Varpinum, har regluligu fundirnir hjá býráðnum nú verða hildnir. Til ber eisini at lurta eftir býráðsfundinum á stream(.)fo og á FM 98,7.

Býráðsskráin sæst her: Býráðsfundur 31. oktober 2024

Klaksvíkar Kommuna

Minningarhald verða hildin 1. nov í Klaksvík kl. 15.00, á Syðradali kl. 13.00 og í Svínoy kl. 11.00.

Til minningarhaldið í Klaksvík verður tað Øssur Kjølbro, sóknarprestur, sum flytir fram røðu. Allahalgannahaldið verður sum vant í gamla kirkjugarði í Vágstúni 1. nov. kl. 15.00. Eisini luttekur Betesdakórið við sanginum 'Ver tú hjá mær'.
Eftir haldið verður boðið til drekkamunn í Betesda

-----------------------------

Á Syðradali flytir Sverri Steinhólm, prestur fram røðu við minnisvarðan fríggjadagin 01. november kl. 13.30. Kransar verða lagdir. SAM fer av Klaksvík kl. 13.00 og av Syðradali kl. 15.50!
Bussur koyrir niðan til Syðradals kl. 13.20

-----------------------------

Í Svínoy verður tað Frímund Hansen, sum flytir fram røðu. Minnishaldið verður við minnisvarðan, ”Dropi í lívsins havi”  allahalgannadag kl. 11.00 – og kransar verða lagdir. Jósup siglir av Hvannasundi kl. 08.45.

Klaksvíkar Kommuna

Í morgin verður møguligt at keypa feskan útróðrarfisk við Neystið.

Útróðrabáturin Stakkavík hevur valt at selja ein part av veiðuni til borgaran eftir nógvar fyrispurningar.

Møguligt er eisini at bíleggja sær fisk áðrenn.

Toskurin kostar 40kr/kg og hýsan 35kr/kg.

Tey ið bíleggja 10 kg ella meir fáa 5 kr av bæði tosk og hýsuni.

Tilber at bíleggja við at skriva til 258077 ella 265415.

Landsstýriskvinnan í umhvørvismálum, Ingilín D. Strøm, hevur boðað løgmanni frá, at hon ynskir at verða loyst úr starvi, sbr. stýrisskipanarlógini § 29 stk. 1.

Løgmaður hevur eftirlíkað hennara umbøn.

Sambært fráboðan nr. 164 frá 22. desember 2022 um býti av málsøkjum landsstýrisins millum landsstýriskvinnurnar og landsstýrismenninar, sum seinast broytt við fráboðan nr. 73 frá 18. juni 2024, § 55 stk. 3, røkir løgmaður fyribils umhvørvismál. 

Løgmansskrivstovan

Samsvarandi lýstu kunngerð frá Løgmálaráðnum er kommunuval týsdagin 12. november 2024. Samstundis er val til staðbundnar nevndir.

Valið fer fram á hesum støðum
KÍ – høllin í Klaksvík (Klaksvík, Ánirnar og Norðoyri)
Valstýrari: Eydna Klakkstein Thomsen, formaður

Róðrarneystið í Árnafirði (bygdin Árnafjørður)
Valstýrari: Guttorm F. Pálsson, formaður

Skúlin í Mikladali (bygdirnar: Mikladalur og Trøllanes)
Valstýrari: Herfrí Sørensen, formaður

Skúlin á Húsum (bygdirnar Húsar og Syðradalur)
Valstýrari: Fríða Isaksen, formaður

Gamligarður (bygdin Svínoy)
Valstýrari: Hanna Jacobsen, formaður

Atkvøðutíðin verður frá kl. 10:00 til 20:00, og so leingi veljarar koma til valborðið uttan steðg.

Brævatkvøður
Veljarar, ið vænta at verða burturstaddir valdagin ella á annan hátt lúka treytirnar fyri at greiða brævatkvøðu, kunnu í seinasta lagi dagin fyri valið greiða brævatkvøðu við at venda sær til Miðlan/kommunuskrivstovuna.
Brævatkvøður skulu verða valnevndini í hendi innan valið byrjar kl. 10:00 valdagin.

Heimaval
Veljarar, ið vegna sjúku ella vantandi førleika, ikki kunnu møta við valborðið, kunnu velja heima í seinasta lagi dagin fyri valið við at boða frá á Miðlan telefon 41 00 00 innan kl. 12 mánadagin tann 11. november 2024.

Valkort
Valkort verða send út við postinum. Um onkur, ið heldur seg hava valrætt í kommununi, ikki fær valkort sendandi, verður viðkomandi vinaligast biðin um at venda sær til Miðlan / kommunu-skrivstovuna skjótast gjørligt.

Klaksvíkar Kommuna

Tað ganga leysasøgur í Klaksvík um at eg havi skrivað hatta brævið um Jógvan Skorheim, men tað kann eg upplýsa tykkum at so er ikki.

Eg fekk hatta brævið fyri einari viku síðani og vísti blaðstjóranum á Norðlýsinum Jóhan Lutzen tað og spurdi hann um Norðlýsið hevði fingið hatta brævið, men tað høvdu teir ikki.

Bað hann lesa brævið og har vóru tveir aðrir í bilinum sum eisini sóu brævið. 

Eg upplýstið Jóhan Lutzen, at eg fór ikki at koyra hatta brævið í Norðoya Portalin, tí eg helt tað vera dekan ov grovt.

Kenni heldur onki til privatu viðurskiftini hjá Jógvan Skorheim og slett ikki um konuna hjá honum og hansara vinum, so har et tað heilt sikkur onkur sum vil hava at eg komi í ringt orð til Býráðsvalið tann 12. november, men tað eydnaðist honum/henni ikki.

Eg koyrdi ikki brævið í Norðoya Portalin og tað ætli eg mær heldur ikki at gera tað, men nú er tað komu út á sosialu miðlunum og tað haldi eg vera langt úti. Haldi slett ikki tað er í ordan, at vit blanda privat viðurskiftir og politikk saman og tað kunnu øll sum kenna meg játtað, at soleiðis eri eg ikki.

Eg blandi ikki privat og politikk saman og ein av mínum besti vinum er Javnaðarmaður og tá ið vit eru saman, so leggja vit politikkin á hyllina.

Til tykkum sum senda mær hatta brævið, so kann eg upplýsa tykkum, at tað kemur ikki í Norðoyar Portalin og heldur ikki inn á mínar sosialu síður á Facebook og Instagram.

Vit í Fólkaflokkinum eru sum ein flokkur og vit fara øll at reka saman til frama fyri Klaksvíkar Kommunu og Fólkaflokkin.

Gott Fólkafloksval

Símun á Høvdanum

Ikki vóru nógvir áskoðarnar til fundin í gjárskvøldið, leiðslan á Føroya Bjór og so trý fólk afturat, annars fylgdu nógv við á stroymingini.

Heita epli á Býráðsfundinum í gjárskvøldið skuldi vera Føroyar Bjór, men áðrenn fundurin byrjaði, so boðaði borgmeisarin Karl Johansen at mál 24/00328-21 Skipan av øki 14 í miðbýnum varð tikið av skrá.

Samskifti hevur verið millum kommununa og Føroya Bjór um leiguøki til Føroya Bjór í miðbýnum. Avrátt varð, at umsitingin arbeiðir víðari við skitstu og fer at skipa økið í mun til fermetrabýti, veg, parkering o.a. Tí kann ein væntað at hetta málið ikki verður loyst í hesari setuni.
Norðoya Portalurin skrivaði um málið, les her: "Føroya Bjór skal viðgerast ordiligt, Føroya Bjór er okkara stoltleiki"

Símun á Høvdanum

Mánakvøldið 21. oktober kl. 19.30 verður boðið til almennan kunningarfund í Varpinum, har greitt verður nærri frá um, hvussu Klaksvíkar kommuna fer at skipa arbeiðið við kommunuætlanini, sum í høvuðsheitinum skal mynda stóru linjurnar fram til 2040.

Í vár samtykti Klaksvíkar býráð, at farast skal undir eina kommunuætlan, sum m.a. skal tryggja, at skiftandi býráð skipa og leiða kommununa inn í eina framtíð, sum byggir á haldgóðar og burðardyggar loysnir.

Arbeiðstilgongd
Tað eru nógvir ymiskir hættir at loysa eina slíka uppgávu, men støða er tikin til, at høvuðsorðið í hesi verkætlanini er samskapan. Tað merkir, at arbeiðið skal vera væl kjølfest í býráðnum, samstundis sum allir viðkomandi partar skulu kunnast, hoyrast og takast við í arbeiðið.

Skipað verður tí fyri almennum kunningarfundum, samrøðum í smærri bólkum, umframt at møguleiki skal vera at geva sítt íkast til verkætlanina umvegis teldupostin [email protected] 

Endamálið við fundinum mánakvøldið er at greiða almenninginum frá arbeiðinum við hesari heildarætlan, sum uttan iva verður eitt gott úrslit, um samstarvið millum kommununa og borgarin eydnast væl. 

Klaksvíkar Kommuna

Eyka býráðsfundurin, sum bleiv lýstur at verða hósdagin 10. oktober, er útsettur til mánadagin 14. oktober kl. 16.30. Býráðsfundurin verður hildin í býarsalinum í Varpinum.

Til ber at stroyma almenna býráðsfundin umvegis leinkið á forsíðuni. Til ber eisini at lurta eftir býráðsfundinum á stream(.)fo og á FM 98,7

Býráðsskráin kann takast niður her: Býráðsskráin 14. otober 2024.

Klaksvíkar Kommuna

​Henda kunning er til øll, sum hava havt samskifti við Klaksvíkar kommunu, Norðoya Bú- og Heimatænastu (NBH) og Barnaverndartænastuna í Norðoyggjum.

Sum tey flestu helst vita, so hevur Klaksvíkar kommuna verið úti fyri einum álvarsomum telduálopi, har óviðkomandi eru komin fram at skipanunum hjá kommununi og harvið eisini hjá NBH og Barnaverndartænastuni. Sostatt hava bæði vanligar og viðkvæmar persóns-upplýsingar verið á skeivum hondum. Vit hava nú ræði á øllum upplýsingunum aftur, men kunnu ikki við vissu siga, at teldsníkarnir ikki hava tikið avrit av upplýsingunum.

Hetta trygdarbrotið fevnir millum annað um upplýsingar, sum eru skrásettar hjá Klaksvíkar kommunu, NBH og Barnaverndartænastuni, so sum navn, bústaður, p-tal, kontunummur, yrkisfelagsligt tilknýti og aðrar viðkvæmar persónupplýsingar í sambandi við málsviðgerðir.
Talan kann eisini vera um skrásetingar hjá barnatannlækna í Klaksvíkar -, Fugloyar -, Hvannasunds -, Kunoyar - og Viðareiðis kommunum.

Henda kunning er fyri at geva øllum møguleika at taka neyðug stig og fyrivarni fyri at tryggja seg, nú persónupplýsingar hava verið á skeivum hondum.

Trygdarbrotið kann viðføra m.a. hesar vandar: 

Persónar kunnu royna at nýta p-tal ella aðrar upplýsingar til m.a. samleikastuldur ella svik
Við atgongd til persónsupplýsingar kunnu óviðkomandi royna at lumpa fólk at veita fleiri upplýsingar ella pengar
Her eru nøkur stig, ið kunnu takast fyri at forða fyri misnýtslu av persónupplýsingum: 

Verið varin, um tit fáa óvæntaðar teldupostar, SMS-boð ella telefonuppringingar, har biðið verður um persónligar upplýsingar, innritanarupplýsingar ella pengar
Trýstið ikki á ivasamar leinkjur og latið ikki persónupplýsingar til óviðkomandi
Broytið veik loyniorð til sterk loyniorð - sí t.d. kunning frá Gjaldstovuni her: https://gjaldstovan.fo/Gjaldstovan/kunning/tidindi/kt-tilbugvingin-a-gjaldstovuni-haekkar-nu-netalop-er-innan-landoddarnar/
Um tit hava spurningar, ella tykkum tørvar fleiri upplýsingar, eru tit vælkomin at seta tykkum í samband við okkara dátuverndarfólk, Jens Chr. Olsen, telefon 784070, teldupostur: [email protected].

Arbeitt verður av øllum alvi við at framtíðartryggja allar dátur.

Vinaliga

Klaksvíkar kommuna, Norðoya Bú- og Heimatænasta (NBH) og Barnaverndartænastan í Norðoyggjum

Klaksvíkar Kommuna