Stórur dagur á Klaksvíkar Sjúkrahúsi í dag. Sáttmáli varð  undirskrivaður við Kanjon, ið skal høvuðsumvæla starvsfólkabygningin.

Hesin bygningur, ið er frá 1960-árunum, skal hýsa sjúklingum og starvsfólkum. Hetta hevur verið ein drúgv tilgongd, men nú fer arbeiðið í gongd og vit gleða okkum til at fylgja við umvælingini. 

Súsanna Bertholdsen, landsstýriskvinna í heilsumálum, segði, at "tað er gleðiligt, at vit nú kunnu tryggja bæði sjúklingum og starvsfólki góðar og nútímans karmar í bygninginum". 

Arbeiðið byrjar í august og tekur væntandi umleið tvey ár.

Klaksvíkar Sjúkrahús

Nógv fólk vóru samankomin at siga okkara Rynkur farvæl, nú tey skulu súkkla til París, her røðan hjá Karl Johansen borgmeistara

Góðan morgun, øll somul 
Í dag byrjar ferðin! 
Ikki bara ímóti París, men ímóti nøkrum nógv størri – nevnliga vónini um lív og kærleika. 

Tað eru støður í lívinum, har tíðin steðgar upp! 
Í øllum førum kennist tað soleiðis. Tað kann vera ein telefonsamrøða, eitt úttrykk frá einum lækna ella einum, sum stendur tær nær. 
Knappliga gerst verðin óhugnaliga kvirr, tí ein tú varðar av, er blivin sjúkur. 
Hetta hendi fyri okkum, og er hetta eisini hent fyri fleiri av tykkum. 
Tá ið man er komin upp í mín aldur, so hevur man uppliva eitt sindur av hvørjum. Bæði viðgongd og mótgongd.
Eg minnist enn sólarklárt, tá ið Annika, elsta dóttir okkara, ringdi við boðunum. 
Eg var til arbeiðis á politistøðini í Klaksvíkar, har eg arbeiddi sum sýðslumaður. 
Hon hevði fingið svar, og boðini vóru, at hon hevði fingið staðfest bróstkrabba! Alt bleiv kvirt!
Hetta var ein trupul tíð hjá dóttrini, men eisini hjá okkum, sum vóru rundan um hana, tí hóast hon var komin upp í árini, og var flutt heimanífrá, so fer hon í hjartanum altíð at vera mín lítla Annika. Og onki er meira tyngjandi enn at síggja síni børn hava pínu, og at uppliva, at tey kempa ímóti sjúku, sum tú sjálvur onga ávirkan hevur á. 
Vit kunnu í dag gleðast um, at ljósið aftur fór at lýsa. 
Smá fet, lítil smíl og til seinast, orðini: Tú ert frísk! 
Hetta er ongin sjálvfylgja, tí tíverri gerast øll ikki frísk. 
Tú ert frísk! 
Hetta er ein setningur, sum framvegis merkir meg, tí tað er ikki bara ein setningur, men eitt undur.   
Í dag súkkla tit – og tit súkkla nevnliga fyri júst hesum – undrinum. 
Tit súkkla fyri teimum, sum framvegis stríðast, og fyri familjunum, sum halda ondini. 
Saman við munagóðari gransking á krabbameinsøkinum, geva tit hesum familjum vón. Og við tí sjónliga arbeiðinum, sum tit gera, skapa tit ein felagsskap, sum ger, at ongin noyðist at kempa einsamallur. 
Eg veit hvussu týdningarmikið tað er fyri tey, sum verða rakt, at tey hava ein góðan felagsskap, har tey verða møtt av fólki, sum kenna teirra støðu. 
Hesum stuðlað tit undir, og eiga tit eina stóra tøkk fyri tað. Bæði tit sum súkkla, men ikki minst tykkum, sum gera tað møguligt fyri, at hesi kunnu súkkla. 
At vera ein evarska lítið partur av hesum felagsskapinum hjá tykkum er okkum í Klaksvíkar kommunu ein stór æra. 
Somuleiðis er tað ein heiður at fáa sagt farvæl við ynskjum um eina góða ferð.
Takk fyri tykkara ídni, dirvi og ikki minst hjartagóða hugburð. 
---
Til tykkum sjálvbodnu í Smæruni. 
Aftur í ár hava tit hjálpt við at fyrireika hetta tiltakið, og eiga tit eina hjartans tøkk fyri tað.
---
Eisini skal ljóða ein heilsan til fittu, røsku børnini í Blákolluni og Dr. Margrethu barnagarði, sum hava listprýtt og savnað pening inn til hetta góða endamál. Tit eru so ófør, øll somul. 

Við ynskjum um eina ógloymandi ferð og blíðan byr, nú toymið Team Rynkeby fer avstað.

​Takk fyri.

Karl Johansen, borgmeistari
Klaksvíkar Kommuna

Talvan gongur fyri Føroyska Bíbliufelagið Hvítusunnudag 8. juni 2025.

Bíbliufelagið vónar, at kirkjur, samkomur og onnur vilja stuðla Bíbliufelagnum at fáa Guds orð út til alt Føroya fólk.

Endamálið hjá Føroyska Bíbliufelagnum er:
1. at geva út Bíbliuna og partar av henni á føroyskum máli og at fáa Bíbliuna út,
2. at skipa fyri at týða Bíbliuna ella partar av henni, at endurskoða verandi bíbliuútgávur, at geva út bíbilsku skriftirnar í øðrum útgávum enn teimum løggildu og annað viðkomandi tilfar,
3. at fremja bíbliunýtslu, bíbliulesnað og bíbliukunnleika,
4. at hava innsavningar og forlagsvirksemi,
5. at umsita sambandið við útlendsk bíbliufeløg,
6. at stuðla altjóða bíbliuarbeiði.

Arbeiðið hjá Bíbliufelagnum er fíggjað við gávum og stuðli. Talvudagurin er tí ein góður fíggjarligur stuðul til virksemið hjá Bíbliufelagnum.

Endamálið hjá Bíbliufelagnum er at týða og útgeva Bíbliuna og bíbilskt tilfar til allar føroyingar, so vit øll hava møguleika at lesa Bíbliuna á móðurmálinum. Tí hevur nýggja bíbliuumsetingin hægstu raðfesting, men andaligur og fíggjarligur stuðul krevst, um tað skal eydnast at fáa útgávuna lidna.

Nýggj Bíbliutýðing á veg
Arbeiðið við nýggju týðingini hevur gingið longri enn ætlað, tí tað er nógv størri arbeiði enn væntað, men arbeiðið gongur væl og arbeitt verður miðvíst við verkætlanini. Í ár er ætlanin at geva út Nýggja Testamenti eftir týðing Hans Jacob Joensen. Hetta so at øll kunnu fáa høvi at lesa og gera viðmerkingar til nýggju bíbliutýðingina.

Endurskoðanin av Nýggja Sáttmálanum – Nýggja Testamenti á gerandisføroyskum – krevur sítt, og er komin væl ávegis. Harafturat hava vit ment nýggja Bíbliuapp - Bíbliuappin kallað – við enn fleiri hentleikum, fleiri bíbliuútgávum og til allar fartelefonir. Bíbliufelagið hevur eisini fingið nýggja heimasíðu.

Bíbliufelagið stuðlar eisini bíbliuarbeiði hjá øðrum tjóðum. Felagið stuðlar Altjóða Bíbliufelagnum, Ukrainska Bíbliufelagnum og sjónvarpsrásini Sat 7, ið m.a. ger undirvísingar- og kristiligt tilfar til Miðeystur og Norðurafrika.

Bíbliufelagið hevur konto í øllum peningastovnunum:
Føroya Banki: 6460-382.873.7
Eik Banki: 9181-380.777.2
Norðoya Sparikassi: 9865-992.646.6
Suðuroyar Sparikassi: 9870-992.061.8

Við tøkk og bøn um góðan stuðul.

Vinaliga,

Jógvan Fríðriksson
Forseti í Bíbliufelagnum

Bergur D. Joensen
Formaður í Bíbliufelagnum