Krúndiamantbrúdleyp - Elsuba og Jógvan á Høvdanum

Mikudagin 23. apríl 2025 hátíðarhalda vit okkara 65-ára brúdleypsdag.
Vit halda dagin í Heiminum við Vágna í Klaksvík frá kl 17.00-21.00

Øll eru hjartaliga vælkomin.

Vit ynskja familju, vinum og kenningum eini gleðiligar páskir.

Elsuba og Jógvan á Høvdanum

Í dag varð almenn móttøka í MEGD, í sambandi við at Tóra við Keldu er farin frá sum forkvinna í MEGD, og Ruth Thomsen hevur tikið við sessinum. Eirikur í Jákupsstovu, landsstýrismaður, luttók og bar hann fram eina heilsan til tær báðar.

Heilsanin kann lesast her:
Eg fari vegna landsstýrið eisini nýta høvið til at takka Tóru við Keldu fyri tíðina, ið hon hevur verið forkvinna í MEGD. Tóra varð vald til forkvinnu fyri fyrstu ferð í 2014, og hevur tí verið við til at mynda felagið, og miðvísa arbeiðið á brekøkinum í eina rúma tíð.

Sigast kann um Tóru at hon hevur verið ein sera sjónlig og eldhugað forkvinna, sum ígjøgnum sítt arbeiði í MEGD hevur víst eina djúpa trúgv uppá rættindi og lívsgóðsku hjá fólki, ið bera brek.

Hennara virki hevur verið merkt av drúgvum arbeiði, góðum samstarvsevnum og eini greiðari visjón fyri inklusjón í samfelagnum. Hon hevur megnað at givið fólki við breki eina sterka rødd og hevur verið eitt týðandi talirør fyri at vit áheldandi skulu arbeiða fyri at í Føroyum skal vera gott hjá fólki, ið bera brek at búgva.

Og góða Ruth. Hjartaliga til lukku við starvinum sum forkvinna í MEGD!

Tú kemur inn í eina týðandi og virðismiklan sess, og tað verður spennandi at fylgja tínum arbeiði fyri at øll skulu hava javnrættindi í Føroyum.

Eg gleði meg til eitt gott og virkisfult samstarv.

MEGD hevur øll árini verið at arbeiða fyri at beina burtur allan mismun, tá ið ræður um fulla atkomu til eitt virkið lív í gerandisdegnum, á arbeiðsmarknaðinum og í politiska lívinum, og við tínum royndum sum forkvinna í Blindafelagnum eri eg sannførdur um, at tú fert at mynda MEGD við styrki og dirvi.

Vónandi fært tú eina góða byrjan og nógvan viðvind á leiðini.

Almanna- og mentamálaráðið

Í dag varð farið undir ein nýggjan hátt at kanna sjúklingar, har ein MR-skanning hevur víst illgruna um prostatakrabba. Sjúkrahúsverkið hevur fingið nýtt tól til vega, ið ger hetta møguligt.

Um 200 menn verða árliga ávístir til MR-skanning, við illgruna um prostatakrabba. Á leið 70 teirra verða sendir víðari til at taka vevnaðarroyndir. Umleið 50 av hesum fáa síðani staðfest krabbamein. 

Vevnaðarroyndir av prostata hava áður verið gjørdar á universitetssjúkrahúsinum í Aalborg.

Við hesum nýggja tólinum, og við upplæring av starvsfólkum, ber nú til at gera hesar kanningar herheima. Myndirnar frá MR-skanningini verða smeltaðar saman við ultraljóðmyndunum frá nýggja tólinum. So kann arbeiðast út frá myndunum, heilt nágreiniliga. Hetta ger at vevnaðarroyndirnar eru meira neyvar og tí eisini færri í tali. Á hendan hátt verða MR-skanningarnar av prostata eisini gagnnýttar til fulnar her í Føroyum. 

Hetta ger stóran mun fyri sjúklingin, ið oftast eru eldri menn. Fyri tað fyrsta tí at kanningin verður gjørd í Føroyum, heldur enn í Danmark. Tað er ikki neyðugt at ferðast eins langt, verða burtur í fleiri dagar og hava fylgjara við. Fyri tað næsta, tí at kanningin við hesum nýggja háttinum er minni pínufull, tað bløðir minni og tað er so gott sum ongin vandi fyri bruna. Hetta kemst av, at vevnaðarroyndirnar nú verða tiknar við at farið verður ígjøgnum millumkjøtið og ikki gjøgnum endatarmin.

Hendan kanningin tekur vanliga bara 20-30 minuttir. Sjúklingurin er væl fyri aftaná, tað eru færri hjáárin og ein nógv lagaligari sjúklingagongd. 

Mannagongdin eftir kanningirnar er tann sama sum frammanundan, royndirnar verða sendar til útgreinan á universitetssjúkrahúsinum í Aalborg og svarið verður sent til ávísandi lækna.

Í dag hava starvsfólk frá universitetssjúkrahúsinum í Aalborg verið við til kanningarnar, fyri at vegleiða okkara egnu starvsfólk. Eisini hava starvsfólk frá GE Healthcare verið við, fyri at tryggja at tólið er rætt stillað og sum heild koyrir sum tað skal. 

Sjey slíkar kanningar vórðu gjørdar í dag á Klaksvíkar Sjúkrahúsi, og framyvir verða tær gjørdar eftir tørvi. 

Tað er Jóhan Poulsen, ábyrgdarhavandi og visiterandi urologur í Sjúkrahúsverkinum, sum hevur fingið hetta týðandi arbeiði upp at standa. Framyvir verður tað urologur, saman við sjúkrarøktarfrøðingum, ið koma at gera hesar kanningar, á urologiska ambulatoriunum.

Klaksvíkar Sjúkrahús

Árligur ruddingardagur hevur í fleiri ár verið fyriskipaður av kommununi, sum hevur heitt á borgarar, fyritøkur og stovnar, um at rudda útvald øki. Seinastu tvey árini hevur eisini verið skipað fyri grannarudding, og hevur hetta verið sera væl eydnað.

Síðstu árini hevur árligi ruddingardagurin verið knýttur at skránni í Virkið vár, har eitt av endamálunum er at stuðla undir ABC átakinum hjá Fólkaheilsustýrinum um at vera virkin saman og hugbundin.

Lagt verður upp til, at fólk skipa seg í sínum grannalagi ella í smærri bólkum, soleiðis at fólk eru saman um at rudda eitt felags øki. Í hesum sambandi verður eisini ein grannapakki latin hvørjum grannalagi, sum meldar seg til. Pakkin inniheldur bæði okkurt praktiskt til ruddingina, søtt til góman og grønar spírar, sum grannalagið kann fáa gleði av.

Fyri at fáa lut í einum grannapakka er neyðugt at melda til. Ruddingarátakið í grannaløgum er í døgunum 28. apríl – 4. mai og eru tað grannaløgini sjálvi, sum heinta grannapakkan og avgera, hvønn dag tey rudda.

Í tilmeldingini er neyðugt at upplýsa, hvussu nógv taka lut, og hvussu nógv húsarhald talan er um. Neyðugt er eisini, at grannaløgini skipa seg sjálvi við einum samskipari, sum útfyllir tilmeldingarskjalið.

Boð um hvar grannapakkin kann heintast, verða send til tey, sum melda til.

Melda til umvegis leinkjuna her: Grannarudding 2025

Klaksvíkar Kommuna