Løgreglan fortaldi at eitt marijuana vakstrarhús hevði ólógliga brúkt streym, sum fekk allan býin í Deltona, Florida - at missa streymin sunnudagin.

Teknikkara frá streymveitingini blivu kallaðir til Deltona fyri at hyggja eftir einum brostnum transformara og tá funnu teir so útav, at okkurt varð rav-ruskandi galið.

Teir funnu útav, at fleiri leidningar vóru ólógliga settir saman til streymveitingina í Deltona. Ólógligu leidningarnir blivu brúktir til Marijuana vakstrarhúsið hjá 43 ára gamla Ramon Munoz-Rodriguez sum hevði 51 marijuana plantur í vakstrarhúsinum, sum bleiv handtikin á staðnum.

 

Tilgongdin at skipa og byggja nýggja Vesturskúlan, ið er samanrenning av Venjingarskúlanum og Kommunuskúlanum, er nú byrjað. 

Herfyri samtykti býráðið at seta arbeiðsbólk at gera uppskot til bygnaðarliga samskipan og/ella samanlegging av Venjingarskúlanum og Kommunuskúlanum, og at gera uppskot til samskipan av undirvísingarvirkseminum hjá báðum skúlum, herundir tíðarætlan fyri tilgongdina. 

Samstundis samtykti býráðið, at nú fer bygginevndin fyri Vesturskúlan til verka.

Á fyrsta fundi í arbeiðsbólkinum tóku Heðin Mortensen, borgarstjóri, og Helena Dam á Neystabø, forkvinna í mentamálanevndini, eisini lut. 

Bæði borgarstjórin og forkvinnan í mentamálanevndini vístu á, at høliskarmarnir hjá Venjingarskúlanum og Kommunuskúlanum eru ótíðarhóskandi og hava verið tað ov leingi. Tey ásannaðu, at hølisloysnirnar til hesar báðar skúlar og framtíðar skúlaskipanin í Havn sum heild hevur verið eitt stórmál bæði í býráðnum og millum borgarar. 

Nú er so politisk avgerð um nýggja Vesturskúlan tikin, og tey fegnaðust um, at nú er leiðin fram fyri Venjingarskúlan og Kommunuskúlan greið. Ásannast má samstundis, at tað er stór avbjóðing at leggja tveir so stórar skúlar saman – skúlar, sum hava ymsa mentan og hvør sín útbúgvingarliga profil. Tað er eisini umráðandi, at báðir skúlar kenna seg aftur í nýggja skúlanum, og at rúm verður fyri dygdunum úr báðum skúlum.

Borgarstjórin og forkvinnan løgdu tí stóran dent á, at tilgongdin fram til samanlegging og nýggjan skúla verður væl fyriskipað, har bæði foreldur, næmingar og lærarar skulu kenna seg trygg. Partur av hesum er eitt nú, at verandi flokkar undir øllum umstøðum kunnu halda fram. 

Størsti útbúgvingardepil

Vesturskúlin verður staðsettur úti á Fløtum við Landavegin og verður næsti granni hjá stóra miðnámsskúlanum í Marknagili. Hetta økið í Vesturbýnum verður størsti útbúgvingarligi orkudepil í Føroyum.

Umboðini fyri skúlarnar vístu á hetta sum ein søguligan møguleika fyri skúlaskapin í Havn. Tey mettu eisini sera týdningarmikið, at samanleggingin av Venjingarskúlanum og Kommunuskúlanum byggir á og styrkir tær dygdir, sum skúlarnir hvør sær hava, so at nýggi Vesturskúlin verður ein útbúgvingarlig gáva til næmingarnar, lærararnar og býin.

Í býráðssamtyktini er ásett, at nýggi Vesturskúlin hevur tvey spor, tvs. tveir flokkar á hvørjum floksstigi, men at skúlin skal kunna byggjast út til trý spor seinni. Í dag hava Venjingarskúlin og Kommunuskúlin tilsamans millum trý og fýra spor. 

Umboðini fyri skúlarnar vístu í hesum sambandi á, at umráðandi er ikki at byggja skúlan ov lítlan, nú fólkatalið í Havn aftur veksur. Hesum vóru borgarstjórin og forkvinnan samd um og vístu á, at býráðið í sambandi við byggiverkætlanina fer at viðgera tann spurningin nærri. 

Arbeiðsbólkurin skal lata síni uppskot til býráðið tann 15. mai 2014.

Í arbeiðsbólkinum eru: Jógvan Dahl, skúlastjóri í Venjingarskúlanum, Hanus Joensen, skúlastjóri í Kommunuskúlanum, Katrin Gullbein, starvsfólkaumboð í Venjingarskúlanum, Martin Karl Olsen, starvsfólkaumboð í Kommunuskúlanum, Magnus Tausen, foreldraumboð í skúlastýrinum fyri Venjingarskúlan, Hansina Iversen, foreldraumboð í skúlastýrinum fyri Kommunuskúlan, Katrin Ellingsgaard, málsviðgeri á mentamáladeildini hjá Tórshavnar kommunu, og Jóan Petur Hentze, trivnaðarstjóri, sum eisini er formaður í arbeiðsbólkinum.


Kelda: Tórshavnar Kommuna

Lisitatión varð hildin í býráðshøllini hósdagin 13. mars 2014, har fylgjandi tilboð komu inn frá teimun bjóðandi:

• Sp/f Grevstur v/Allan Jacobsen kr. 832.150,00 uttan mvg
• Sp/f á Brekku v/Gunleif Joensen kr. 1.062.150,00 uttan mvg
• NH Grevstur Sp/f kr. 1.276.000,00 uttan mvg
• Kanjon kr. 1.307.200,00 uttan mvg
• Kosnaðarmeting kr. 1.281.400,00 uttan mvg


Fyrst verða tilboðini kannað og gjøgnumgongd. Síðani verður sáttmáli undirskrivaður við arbeiðstakara um gerð av arbeiðnum.


Tekniska Umsiting, tann 18. mars 2014. 


Kristoffur Olsen
Spillivatnssamskipari

PM-pluss er ein fyritøka, sum selir vitan, ser- og heildarloysnir innan reingerð og kantinurakstur. Fyritøkan er partur av stóra virkseminum hjá Pf. Poul Michelsen. Her starvast 60 starvsfólk úr 18 londum, fyritøkan heldur til á Mannaskarði 2.

Í morgun vitjaðu 12 starvsfólk á Ráðhúsinum saman við leiðaranum Sveini Thomassyni, og føroysktlæraranum hjá starvsfólkunum, Jørleivi Kúrberg. Fyritøkan sjálv bjóðar starvsfólkunum hesa ókeypis undirvísing, og Jørleif Kúrberg undirvísir í máli, mentan og almennari vitan.

Sveinur Thomassen, leiðari á PM-pluss, sigur, at størri parturin av starvsfólkunum hava góðar útbúgvingar við sær úr útlondum, men fáa ikki brúkt tær, orsakað av málsligum trupulleikum. Tí er PM-pluss ein vælkomin møguleiki at sleppa inn á arbeiðsmarknaðin, samstundis sum starvsfólkini læra føroyskt.

Tær 12 kvinnurnar, sum hittu borgar- og kommunustjóran í morgun, vóru samdar í hesum. Fleiri teirra høvdu rættiliga góðar útbúgvingar og sóu PM-pluss sum eitt einstandandi arbeiðspláss, tær kundu halda fram at starvast í, ella kundu brúka sum lopfjøl til okkurt annað seinni, sum hóskaði til teirra útbúgving, um høvið beyðst.

Tær fingu samstundis høvið at tosa við borgarstjóran um praktisk mál, sum eitt nú bussskipanina og undirvísingina á Tórshavnar Kvøldskúla. Bæði borgarstjórin og kommunustjórin nýttu høvið at bjóða kvinnunum vælkomnum í kommununa. 

JáH 18/03-14 (Kelda: Tórshavnar Kommuna)

31. desember 2013 var fólkatalið 48.308. Í 2013 var burðaravlopið 265 og nettoflytingin -117. Fólkatalið vaks sostatt við 148 fólkum.
Størsti fólkavøksturin var í Tórshavnar økinum við 233 fólkum. Í Norðoyggjum vaks fólkatalið við 15 fólkum, í Vágum við 8 fólkum og í Suðuroy við 7 fólkum. Í hinum trimum økjunum minkaði fólkatalið við samanlagt við 115 fólkum.
Orsøkin til fólkavøksturin er, at flytingin av landinum er minkað so mikið, at burðaravlopið í 2013 var meira enn tvær ferðir so stórt sum nettoflytingin av landinum. Sí talvurnar niðanfyri og omanfyri.

Fólkavøkstur var bert í fimm av oyggjunum: Fugloy, Borðoy, Streymoy, Vágum og Suðuroy. Størsta minkingin var í Eysturoy, Sandoy og Viðoy.

Verður hugt at kommunum, sæst, at fólkatalið minkaði í fimtan og vaks í tólv. Størsta minkingin, 83 fólk samanlagt, var í teimum trimum kommununum kring Skálafjørðin, Nes, Runavíkar og Sjóar kommunum. 
Kommunurnar, ið hava størstan fólkavøkstur í tali, eru Tórshavnar, Vestmanna, Klaksvíkar og Tvøroyrar kommunur.

Kelda: Hagstova Føroyar

Sjálvt um tað bleiv lovað tá av sinni av Landsverki at Kunoyartunnil skuldi vera liðugur innan nakrar vikur, so er arbeiðið ikki liðugt enn - nú vit tosað um nakrar mánaðir eftir byrjan av arbeiði.

Umvælt hevur verið uppá tunnilin og eisini er uppá tal, at kunoyarfólk skula betri alnót - men hvussu leingi arbeiðið fer at vara - er ilt at spáa um.

Kanska nakrar "vikur" afturat ..?

Annars skrivar Landsverk soleiðis á heimasiðuni hjá sær um Kunoyar projekti:

Í sambandi við trygdar- og eftirlitsarbeiði í Kunoyartunnulin verður tunnilin stongdur mánadag til fríggjadag frá klokkan 22.00-06.00. Bilar sleppa ígjøgnum klokkan 24 og 03.00. Tó kunnu akfør í neyðsynjarørindum altíð sleppa ígjøgnum tunnilin. 

JáH (y) 16/03-14

Eftir at Peter Chodqiuk hevði greitt okkum frá um lívið hjá sær - varð tað tíð til Pallborðsfundin, har ”Skaðaárin av misbrúki av rúsdrekka og rúsevnum” varð viðgjørt.

Ingolf S. Olsen stýrdi fundinum, og alt í alt so gekk fundurin væl fyri seg. Tann Fyrsti at tosað um "skaðaárin av misbrúki av rúsdrekka og rúsevnum" varð Pál Weihe og greiddi hann frá, at føroyingar drekka umleið 6,7 litrar av reinum alkoholið um ár, men at hetta talið tó skuldi takast í fyrivarni. M.a. hava 25% av øllum føroyingum svara, at tey eru totalt avhaldandi.
  Pál Weihe legði dent á, at tey frá Fólkaheilsuráðnum ikki bert fóru at hjálpa alkoholikaranum, men í ár eisini hava sett sum mál, at røkka tí meira ósjónliga stór forbrúkaranum av rúsdrekka.

  Annika Olsen tosaði eftir Pál og hon legði dent á, at brúka tíð & orku til tey yngru, so at tey ikki endaðu í einari misnýtslu av alkoholi. Hon brúkti sjálv eitt dømið um, at tá hon svam í meistaradeildini, so slapp hon ikki at smakka sær á, og hettar viðførdi, at hon var yvir 20 ára gomul, áðrenn hon fyrstu ferð smakkaði alkohol.  Tískil so kravdist ein hugburðsbroyting innan rúsdrekka av teim yngru. Hon metti, at ítróttur kundi verða ein umráðandi faktorur, til at halda børn burtur frá alkoholi.

So varð tað túrurin hjá Annbjørg á Høvdanum, sum fortaldi okkum at drekkur tú ov ofta rúsdrekka og í ov stórum nøgdum, so viðførir rúsdrekka nógvar neiligar fylgjur fyri sálarligu heilsuna hjá fólki, m.a. økti tað munandi um lýkindini fyri tunglyndi, ymiskar formar av ótta, og aðrar meira ógvusligar sálarligar líðingar so sum psykosur og skizofreni. Hon fortaldi okkum eisini, at hagtalssliga, so eru lýkindini fyri at ein misbrúkari ger sjálvmorð millum 5 til 20 ferðir stórri, enn hjá ikki misbrúkarum. Eisini vísti hon á at misnýstla yvir longri tíð, skaðar heilan, og viðførir m.a. verri minni.  Eisini greiddi hon frá eini nýggjari kanning úr DK. ið vísti, at umleið 50 % av teimum sum fáa eina "hash-psykosur" hava eina diagnosu við skizofreni eitt ár seinni, og at man tí er við at flyta seg frá, at hash bara útloysir skizofreni hjá fólki sum frammanundan eru disponeraði fyri sálarsjúkuni, og til, at hash førir til skizofren, í hesum sambandi vísti hon eisini vísti á, at kanningar úr Englandi vátta hettar, við at vísa, at í økjum har nógv hash verður brúkt, eru eisini fleiri tilfeldi við skizofreni, enn aðrastaðnis. 

Birni Hansen (læknin hjá Bláakrossi) fortaldi ymisk fakta um rúsdrekka, og tey yngru (ímillum 18 - 20 ár) vóru tey sum oftast endaði á skaðastovuni, eftir eitt vilt leygarkvøld. Eisini fortaldi Birni um vandin við at spýggja blóð, orsaka av rúsdrekka, og at tann vandin kundi vera, at ein doyði av tí. Hann segði eisini, at hann visti ikki um nakað tilfeldi við vold sakum leygarkvøld, har rúsdrekka ella evnir ikki vóru íblandaði. 

  Stórur áhugi var, og nógvir spurningar komu úr  salinum til paneli. Limirnir í paneli kláraðu sera væl at svara spurningunum, bæði fyri sítt serøkið, og eisini kláraðu tey sera væl at supplera hjá hvørjum øðrum. Og fjøldin av teimum, sum møtti upp til tað stóra tiltakið hjá Bláakrossi vóru sera væl nøgd við tiltakið.

Sí myndarøð niðanfyri: 

JáH (y) 16/03-14

Pallborðsfundur hjá Bláakrossi:

Peter Chodqiuk úr Klaksvík, greiddi frá, hvussu hann var bundin at stoffum og rúsdrekka, og at hann vegna smugling endaði handan rimarnar. 

Mong fólk vóru komin at lurtað eftir Peter Chodqiuk, sum fortaldi um lívið hjá sær nú - og hvussu lívið varð, tá hann varð bundin hash'ari. Hann fortaldi eisini, at hann endaði við at sita eitt ár í fongsul fyri smugling og um ta mundi, tá ringast stóð til - tá roykti Peter og tók stoffir næstan hvønn dag.

Peter fortaldi okkum, at hann einaferð smuglaði 100 gram av reinum kokain til Føroyar og tað gjørdi hann við at svølgja 10 innpakkaðar klumpar - til støddar við ein tummil per klump, og innførdi hann tað soleiðis, innvortis, til Føroyar. Men so byrjaði hann at plágast av  ringari samvitigheit yvir hesa ger, og fór tískil at sniffa fyri 5 - 6.000,00 kr um dagin av kokain'inum.

Tá hann so bleiv hóttir við lívinum, tí hann skyldaði pengar - valdi hann at fara á Bláakross, har hann varð til eina 4 vikurs viðgerð.

Men tað endaði so við, at Peter Chodqiuk endaði í isolering fyri nakað, sum hann ikki hevði gjørt, og tá innrømmaði hann fyri løgregluni um hansara fyrrverandi smugling. Hettar fekk hann 1 ár handan rimarnir fyri. Ímeðan Peter sat inni fekk hann ein ryggskaða, ið tók dygt uppá hann. Eftir at Peter kom útaftur, byrjaði hann aftur at drekka ...

Og í tí tokutta rúsinum av rúsdrekka og tí meiningsloysinum sum við fylgdi - vildi Peter ikki liva longur, og legði seg á songina fyri at doyggja. Hann rópti til Harranum, at um tú vilt, so vakni eg ikki aftur. Men sum Peter sjálvur fortaldi, so kom ein vinur til hansara bjarging og hann vaknaði aftur úr svøvninum - tá kom Jesus aftur í lívið hjá honum.

Áhugaverda søgan endar ikki har. Peter greiddi eisini frá, at Jesus grøddi hansara alkoholismu, ryggskaða og hansara roykjing. Og ígjøgnum samkonuni Getsemane fann Peter eisini sín lívskærleika. Í dag ferðast hann, konan og mamman kring føroya land, og halda ymiskar kunnandi og  fyribyrgjandi fyrilestrar. 

JáH (y) 16/03-14

 

Norðoya Portalurin var forbí nýggja Betesda ímorgun og har stríddist øll av øllum alvi, við at gera nýggja Betesda klárt til almennu móttøkuna seinni ídag.

Fyrverandi borgmeistarin Steinbjørn Jacobsen støvsúgvaði. Primus motor Kristian Martin Rasmussen lossaði teir seinastu stólarnir inn. John Heinesen stríddist við ledningar. Pauli Heinesen bar vørur inn, Páll Klein Rasmussen stríddist uttanfyri, gamli grannin hjá mær Miriam Vitalis støvsúgvaði á loftinum og ein kundi við at nevnt nøvn, men eitt høvdu tey øll til felags og tað var at fáa alt so reint og ruddiligt, til allar teir mongu gestirnar ídag.

Norðoya Portalurin og undirriaði ynskir Betesda góðan byr og lat Harran signa nýggja Betesda.

SáH

Ídag bjóðar samkoman í Betesda øllum at vitja nýggja samkomuhúsið. Tvey ár eru nú liðin síðani samkoman flutti út á Klaksvíksvegin, ímeðan gamla Betesda varð tikið niður, og byrjað varð at byggja nýtt.

Fyrsta Betesda varð bygt í 1917, á økið har Klaksvíkar Bókasavn stendur í dag. 11 ár seinni varð nýggjur bygningur bygdur á økið, har Betesda síðani hevur staðið, til tað í mars 2012 varð tikið niður. Í 1951 varð salurin longdur og í 1961/62 breiðkaður og kjallarin hækkaður. Nýggj krøv, víðkað virksemi, tað, at bygningurin var nógv brúktur og slitin, og at mong eru løgst afturat, hevur havt við sær, at tíðin nú var komin at byggja nýggjan og tíðarhóskandi bygning - til nútíðina og komandi ættarliðini.

Tíðin er nú komin at lata dyrnar upp og bjóða tykkum øllum inn at síggja og uppliva nýggju umstøðurnar. Skráin fyri dagin er hendan:

15:00 Vertir vísa gestum samkomuhúsið


18:00 Nýggja Betesda verður alment tikið í nýtslu


19:00 Felagssangur


Barnakórið


Kvartettin í Betesda


17 Sangarar
Betesdakórið


Betesdakórið

21.00 Ung í Betesda

Vit gleða okkum til dagin og verið øll hjartaliga vælkomin!


 Samkoman í Betesda