Til ber at søkja um upptøku á vallista fyri føroyingar, sum vegna útbúgving fyribils hava tilhald uttanfyri Føroyar

Avgerð um upptøku á vallistan skal vera tikin í seinasta lagi 3 vikur áðrenn valdagin. Umsóknir, sendar inn stutt áðrenn valdagin, kunnu tí ikki væntast at vera avgreiddar til valið.

Seinasta freist at søkja um upptøku er hósdagin 5. mars. 
Umsóknin, saman við lestrarprógvi, kann sendast til [email protected] 

Heinta skjalið her: Upptøka til val Kunna teg nærri her: Kunngerð um upptøku á vallista av persónum, sum vegna útbúgving fyribils hava tilhald uttanfyri Føroyar

Klaksvíkar Kommuna

Seinastu tvey árini hevur verið arbeitt við nýggjum reinsiverkið á Borðoyarvík. Nýggj rørleiðing á 150 m bleiv løgd út og knýtt í reinsiverkið. Harumframt eru stóru tanganir lagdir undir jørð, og økið asfalterað.

Seinastu dagarnar hevur verið arbeitt við at fáa reinsviverkið á Gili liðugt. Í hesum sambandi hevur verið neyðugt at leggja eina fyribils grótrúgvu í fjøruna, sum kann tryggja kranabilin, sum skal leggja betgong máttur, ið skulu trygga spillvatnsleiðinga ímóti brimi.

Tá arbeiðið er liðugt, verður grótið tikið burtur aftur.

Klaksvíkar Kommuna

Hósdagin tann 26. mars 2026 skulu føroyingar aftur á løgtingsval.

Løgmaður hevur í dag frá løgtingsins røðarapalli boðað frá, at hann, sambært grein 15, stk. 2 í løgtingsvallógini, hevur avgjørt at skriva út val at vera hósdagin 26. mars 2026.

Seinasta løgtingsval var tann 8. desember 2022.

Løgmansskrivstovan

Her filmsklipp av tá ið Aksel V. Johannesen boðar frá at tað verður nýval tann 26. mars, eg var staddur í Heiminum við Vágna og vitjaði pápa mín, tað gerið eg hvønn dag ímillum 15-16. Tey gomlu lurtaði eftir og øll tóktist sera glað, sjá filmsklipp herundir.

Í síðstu viku skrivaði Landsverk undir sáttmála við høvuðsarbeiðstakaran Articon, um at byggja nýggja sambýlið við Rygsá á Argjum.

"Stórur og átrokandi tørvur er á fleiri og betri búplássum til vaksin við autismu. Við hesum sambýlinum taka vit eitt týdningarmikið stig at tryggja teimum eitt virðiligt og tíðarhóskandi heim. Hetta er eitt mál, sum vit hava sett okkum fyri, tí vit vita, at karmarnir hava verið óhóskandi.”
Margit Stórá, landsstýriskvinna í almanna- og heilsumálum

Sambýlið við Rygsá verður bygt til vaksin við autismu. Í sambýlinum verða 24 búpláss, skipað í fýra eindum við seks íbúðum í hvørjari eind. Í hvørjari eind verða tvær íbúðir serliga lagaðar til fólk, sum hava stóran tørv á at vera vard fyri óljóði og órógvi.

Í øllum eindunum verða felagshøli og felagskøkar, og allar íbúðir kunnu hava egna inngongd uttanífrá.

Bygningurin verður 2.090 fermetrar til støddar og verður bygdur í forskotnum hæddum eftir lendinum. Eftir ætlan verður verkætlanin liðug við árslok í 2027.

Sambýlið við Rygsá er liður í ætlanini um at byggja nútíðar sambýli og loysa stóra bústaðartrupulleikan hjá fólki, sum hava tørv á vardum bústaði, og fer at geva hús- og starvsfólki góðar og hóskandi karmar, sum eru bygdir til teirra tørv.

Almanna- og heilsumálaráðið

- Fyrst vil eg vísa á, at øll, ið taka lut í fyrireikingunum, arbeiða fyri, at ein møguligur Suðuroyartunnil verður tryggur. Drúgvar mannagongdir og góðkenningartilgongdir mynda arbeiðið, sum er at koma fram til tryggastu loysnina, sigur Aksel V. Johannesen, løgmaður, í svari til fyrispurning frá Liljuni Weihe, løgtingskvinnu. 

- Løgtingið tekur ikki støðu til ein lidnan tunnil nú, men til eina tilgongd, har tunnilin bert kann gerast og latast upp, um fakligir myndugleikar staðfesta, at trygdin er nøktandi.

Løgmaður vísir á, at altjóða tunnilstrygdarreglur eru í høvuðsheitum bygdar á vanligar fortreytir sum ferðslumongd og tunnilslongd. Tá ein tunnil fellur uttan fyri hesar standardfortreytir, leggja reglurnar í staðin upp til, at trygdarstøðið verður staðfest við ítøkiligum váðametingum av samlaðu loysnini.

Tað er beinleiðis ásett í norsku Tunnelsikkerhetsforskriften, at myndugleikin kann góðkenna aðrar trygdarloysnir enn standardkrøvini.

- Tað er ikki rætt at lýsa støðuna soleiðis, at trygdarkrøv verða sett til viks. Heldur er talan um at gera sum reglurnar sjálvar leggja upp til – eina váðagrundaða meting í serligum førum, skrivar løgmaður í svarinum.

- Við øðrum orðum: Ikki minni trygd – men ein onnur trygdarlýsing, sum hóskar til lága ferðslu og umstøðurnar annars.

Les alt svarið her.

Løgmansskrivstovan

P-dagur í Maverick Barr klokkan 20-21

Aftur í ár er P-Dagur hjá Føroya Bjór og er hann í kvøld tann 20 Februar. Hetta merkir at teir fyrstu 30 gestirnir fáa eina øl fyri bert eina krónu, so er at møta tíðliga upp.

Hetta passar gott til vinardysti ímillum KÍ-B36, hann byrjar klokkan 18:30.

Vit síggjast í Maverick, koyr á KÍ.

Maverick Barr

Hetta er fyrsti ferð at skipa verður fyri Ferðavinnudegi í Klaksvík og nógv fólk vóru møtt upp í morgun.

Stevnan bleiv sett av Signhild V. Johannesen, forkvinnan í mentanarnevndini í Klaksvíkar Kommu og eftir røðuni hjá Signhild, bjóðaði Theres T. Kreutzmann stjóri í Visit North vælkomin.

Her nakrar myndir av Ferðavinnurástevnuni og filmsklipp, sjá herundir.

​SáH

Ingun Hansen sett sum fyribils landsapotekari

Almanna- og heilsumálaráðið kunnar um, at Hjalti Gunnarstein hevur sagt seg úr starvinum sum landsapotekari.

Uppsøgnin hevur virknað beinanvegin.

Ingun Hansen, apotekari á Eysturoyar apoteki, er sett sum fyribils landsapotekari og tekur við starvinum beinanvegin.

Almanna- og heilsumálaráðið

Í samband við at Landsstýrið hevur álagt øllum kommunum at gera ferðavinnuætlan, er Visit North farið undir at menna eina ferðavinnuætlan fyri flestu kommunurnar í Norðoyggjum. Endamálið við ferðavinnuætlanunum er at menna og fyriskipa ferðavinnuna í ymsu kommununum, so hon verður skipað á ein skilagóðan og burðardyggan hátt, við atliti til náttúru, lokal virði og trivnað í nærumhvørvinum. 

Heimafólk, festarar, hagastýri og onnur áhugað verða í hesum sambandi boðin til borgarafund. 

Á fundinum verður greitt nærri frá: 
· hvat ein ferðavinnuætlan er og hvat endamálið er
· hvussu arbeiðstilgongdin er skipað
· hvussu borgarar og lokalir áhugapartar kunnu geva íkast til arbeiðið

Størstur dentur verður lagdur á tykkara íkast. Tí verður stórur partur av fundinum settur av til prát, spurningar og viðmerkingar. Hetta er fyri at geva øllum møguleika at koma til orðanna og seta fram upplivingar, ynski og hugskot um, hvussu ferðavinnan eigur at mennast í Norðoyggjum. 

Yvirlit yvir fundirnir: 
Viðareiðis Kommuna:  23. februar kl. 19.00 í Viðareiðis skúla 
Hvannasunds Kommuna:  24. februar kl. 19.00 í skúlanum á Fossánesi
Kalsoy: Syðradalur, Húsar, Mikladalur og Trøllanes: 26. februar kl. 16.00 í Avhaldshúsinum í Mikladali 
Kunoyar Kommuna: 2. mars kl. 19.00 í Bygdarhúsinum í Haraldssundi 
Klaksvík, Árnafjørður, Ánirnar og Norðoyri: 3. mars kl. 19.00 í Varpinum í Klaksvík
Svínoy: Nærri kunning kemur seinni. 

Øll eru hjartaliga vælkomin at luttaka og leggja síni sjónarmið fram. 

Um tú ikki ynskir at taka orðið, verður eisini møguligt at lata skrivligt íkast á fundarstaðnum. 

Er ikki møguligt at møta á borgarafundi í tíni kommunu, ert tú vælkomin at møta á hinum fundunum.  

Klaksvíkar Kommuna

"Eitt av kendastu tónleikaverkunum í heiminum nakrantíð"

Tær fýra árstíðirnar eftir Antonio Vivaldi er eitt tað mest ikoniska verkið í tónleikasøguni – og av góðum orsøkum. Í fýra lívligum violinkonsertum endurgevur Vivaldi fuglasong, ódnarveður, summarhita og vetrarkulda so livandi, at tónleikurin framvegis kennist frískligur, fysiskur og nærverandi 300 ár seinni.

​Hetta kvøldið fært tú høvið at hoyra ein kamarbólk við føroyskum og útlendskum tónleikarum framføra alt verkið. Á odda stendur altjóða viðurkendi violinisturin Alissa Margulis, sum verður bæði solistur og fer at leiða ljómliðið.

Konsertin fer eisini at bjóða upp á Souvenir de Florence eftir Tjajkovski – eitt fjálgt, lagvakurt og ríkt kamarverk, sum tónaskaldið skrivaði eftir at hava vitjað Italia. Hetta eina kvøldið hittast Vivaldi og Tjajkovski, har norðurlendskir tónleikarar blása lív í tvær av størstu ferðafrásøgnunum í tónleikasøguni."

Christianskirkjan