​Jóhan Eli Poulsen hevur í dag tikið sætið fyri Anniku Olsen, ið er farin í farloyvið.

Hetta er fyrstu ferð, at ungi sandvíkingurin tekur sætið í løgtinginum.

Hjartaliga vælkomin, Jóhan Eli, og blíðan byr við løgtingsarbeiðinum🇫🇴🇫🇴

​Tá ið Løgtingið kom saman í dag vóru “nýggj” andlit at síggja í sessunum hjá Miðflokkinum.

Talan er um nývalda Steffan Klein Poulsen, sum er fyrsti varamaður hjá Miðflokkinum. Hann hevur tikið sætið fyri Bill Justinussen, sum er á ST aðalfundi í New York.

Tordur NIclasen, er garvaður politikari. Hann hevur áður bæði verið Landsstýris og tingmaður. Seinast Tordur sat á tingi, var í 2008. Tordur tók sæti fyri Jenis av Rana, sum kunnugt er blivin Mentanar og uttanríkis ráðharri.

Kelda: Miðflokkurin

SáH

Í dag tekur nýtt landsstýrið við, og vit fara úr starvi. Eg ynski nýggja landsstýrinum hepna hond í teirra tydningarmikla virki. Samuleiðis takki eg fyri 4 góð og gevandi ár. Eg havi gjørt alt tað eg eri ment fyri at umsita tey málsøki mær vóru tillutað so væl sum gjørligt. Og nú tíðin er farin haldi eg meg kunna siga at nógv gott er komið burturúr, sum gagnar borgarum og samfelagnum øllum.

Árini hava verið góð og hava kravt nógv. Ta ið økini hava verið so mong hava arbeiðsuppgávurnar bæði verið fjølbroyttar og mangar, eins og dagarnir langir. Men eg havi elskað mítt arbeiði. Eg fari sonuleiðis at takka øllum fyri gott samstarv.

Nú fari eg at gera mitt allarbesta í løgtinginum.

Sirið Stenberg

Samráðingarnar slitnaðu klokkan 11:00 í morgun, tað hevur formaðurin í Sambandsflokkinum Bárður á Steig Nielsen boða løgtingsfromanninum Páll á Reynatúgvu frá fyri løtu síðani.

Samráðingarnar slitnaðu, tí flokkarnir blivu ikki samdur um málsøkini. Sum skilst, so var samgonguskjalið komi uppá pláss, men Sambandsflokkurin forlangaði alt ov nógv, tá ið samráðst varð um málsøkini.

Bárðr á Steig Nielsen er nú farin oman í  Gamla Apotekið, har hann hevur boðað Tjóðveldi, Javnaðarflokkin og Framsókn til samráðingar.

Hann hevur fingið nýggja freist og hesaferð er freistin klokkan 13:00, um hann ikki megnar semju við teir flokkarnar, so verður ein nýggjur samráðingarleiðari útnevndur.

SáH

Tað verður nógv gitt um, hvørji krøv og ynskir, flokkarnir hava til hvønnannan, nú samgongusamráðingar eru. Eg fari at mæla fólki til at bíða við at gera sær eina meining um Miðflokkin og hinar flokkarnar, inntil eitt endaligt úrslit fyriliggur.

Tað eru bara formenninir í flokkunum, sum samráðast, og sum heild fæst lítið og onki at vita frá teimum, tí tað verður alla tíðina telvað, tøvt og tugt. Miðflokkurin hevur síni ynskir til samgongusamstarvið. Krøv verða ikki sett, tí í samráðingum eru krøv ósiviliserað.

Eg síggi, hvat fólk skriva og gita á Facebook. Og hvør fær skuldina fyri ávegis íkomnu støðuna. Tað eru bara teir tríggir formenninir, sum kenna orsøkina niður í smálutir. Tí fari eg at heita á miðfloksfólk og øll onnur um at geva tol og bíða, til nýggj samgonga er skipað. Tástaðni ber til at evaluera og analysera.

Bill Justinussen

Samráðingarnar komu ikki á mál í gjárskvøldið og sum skilst, so var tað býtið av Landsstýrisfólkum og málsøkjum sum flokkarnir vóru ósamdur um, men tað eru fleiri møguleikar at býta Landsstýrisfólkini upp uppá, men vanligt er, at tann sum fær løgmann, má siga tvey stór málsøkir frá sær og her havi eg samanlíkna býtið í 2011 og 2015.

Verður nýggja samgongan 8 Landsstýrisfólk, so kann býtið vera soleiðis, at tann sum fær Løgmann, fær tveir sessir afturat, nevnliga Mentamál og Vinnumál. Tann sum ikki fær Løgmann fær Fíggjarmál, Fiskimál, Almannamál og Løgtingsformannin. Triðju flokkurin fær Heilsumál og innlendismál.

Men verður samgongan 9 Landsstýrisfólk, so kann býtið vera 4-4-1 og tá fær tann sum hevur Løgmann, Vinnumál, Mentamál og Uttanríkismál. Tann sum ikki fær Løgmann fær Fíggjarmál, Fiskimál, Almannamál, Heilsumál og Løgtingsformannin. Tann triðju flokkurin fær Innlendismál.

Taka vit somu málsøkir, sum undanfarna Landsstýrið brúkti, so varð býtið hetta:
Aksel V. Johannesen løgmaður
Høgni Hoydal, varaløgmaður og landsstýrismaður í fiskivinnumálum
Kristina Háfoss, landstýriskvinna í fíggjarmálum
Poul Michelsen, landsstýrismaður í vinnu- og uttanríkismálum
Henrik Old, landsstýrismaður í innlendismálum
Eyðgunn Samuelsen, landsstýriskvinna í almannamálum
Sirið Stenberg, landsstýriskvinna í heilsumálum
Rigmor Dam, landsstýriskvinna í mentamálum

8 landsstýrisfólk. Tann sum fær løgmann, fær Innlendismál, Almannamál og Mentamál.
Tann sum ikki fær løgmann, fær Fiskivinnumál, Fíggjarmál, Heilsumál og Løgtingsformannin.
Triðju flokkur fær vinnu- og uttanríkismál.

Tað skuldi ikki verið so torført at skipa nýggja samgongu, um man gongur eftir hesum býtinum.

Sjálvandi skal tað kosta eitt sindur at fáa løgmann og tí fær tann stóru flokkurin, sum ikki fær løgmann tvey tung mál og Løgtingsformannin.

Samráðingarnar komu ikki á mál í gjárskvøldið, men tær vera tiknar uppaftur í dag.

SáH

Børnini og tey ungu eru framtíðin í Føroyum og tí eiga vit sum einstaklingar, familja og samfelag at gera alt til, at tey fáa góðar fortreytir fyri at vaksa upp í tryggum og mennandi umstøðum.

Ein stórur partur av børnum og ungum hava tað gott, men hóast hetta, so hava øll børn í Føroyum ikki líka góðar fyritreytir fyri trivnaði og menning.

Sambært tølunum, so hava umleið 20% av okkara børnum onkra avbjóðing, minni og størri, sum ger, at tey hava tað torførari í gerandisdegnum. Tað svarar til áleið 2.500 børn og ung undir 18 ár!

Nýggja barnaheimið má byggjast
Ein partur av hesum børnum eru tey, sum búgva á Barnaheiminum ella “stovnum undir landinum”, sum tað verður nevnt.

í mars í ár kunngjørdi umboðsmaðurin eina frágreiðing eftir at hann hevði verið eftirlitsvitjanir á Barnaheiminum.

Tað vísti seg, at umstøðurnar hjá hesum børnunum vóru alt annað enn góðar.

Serliga bústaðarumstøðurnar vóru vánaligar og gjørdu, at børnini fluttu í millum tær ymisku eindirnar. Hetta skapar ótryggleika og óstøðugleika hjá teimum børnunum í Føroyum, sum hava mest brúk fyri at kenna seg trygg og, sum hava mest brúk fyri at umstøðurnar eru støðugar rundan um tey.

Bústaðarumstøðurnar hava eisini við sær, at samansetingin av børnum ikki altíð er gagnlig fyri tað viðgerð sum einstaka barnið hevur brúk fyri. Harumframt ávirkar hetta arbeiðsumstøðurnar hjá starvsfólkinum, sum arbeiða á økinum.

Hetta er ikki gott nokk og tí má nýggja Barnaheimið byggjast sum skjótast eftir løgtingsvalið.

Uppskotið er klárt og var eisini borið í løgtingið, men sum við so nógvum øðrum, so bar hetta heldur ikki á mál hjá núverandi samgongu.

Fólkaflokkurin hevur víst í verki, at tá vit vilja nakað so gera vit tað.

Avbjóðingar í barnaárunum hava ofta stórar avleiðingar fyri menniskja alt lívið. Tí er alneyðugt, at hesi børnini ikki bíða meira.

Børn og ung eiga at verða loftaði og fáa málrættaða hjálp so skjótt sum møguligt

Bústaðarumstøðurnar er eitt, men børn við serligum tørvi og teirra familjur hava brúk fyri at føroyska samfelagið eisini rúmar tey og skapar umstøður og tilboð, sum hjálpa.

Neyðugt er við loysnum, sum fevna um øll økir, har børn og ung eru, eisini tvørtur um ráð og stovnar. Samstarv millum fakbólkar, stovnar og embætisráð er tí alneyðugt skula vit bøta um hetta.

Tann góða tilgongdin eigur at fevna um fleiri børn og familjur.

Børn við seinheilaskaða eiga at hava rætt til endurmenning og viðlíkahaldsmenning.

Familjan skal raðfestast.

Gott val!

Ingvør Justinussen – Valevnið fyri Fólkaflokkin

Tað gevur 2000,- kr meir um mánaðin til pensjónistin. Fólkaflokkurin vil burtur frá dupultskatting.

Samhaldsfastið verður skattaður við inngjald, tí skal hann ikki skattast við útgjald. Tað er ein feilur, sum Fólkaflokkurin vil rætta.

Tá vit spara upp til okkara egnu eftirløn, so verður tað skatta einafer, nevniliga við inngjald. Tá vit rinda eftirløn okkara pensjónistar ígjøgnum Samhaldsfasta, verður tað skattað við inngjald, tvs at tað verður tikið av skattaðum pengum. Okkara egna eftirløn verður frádrigin skattskyldugu inntøkuni, tað verður Samhaldsfasti ikki.

Og so skal pensjónisturin eisini gjalda skatt við útgjald. Tað er ikki rímuligt. Tá landið tekur skattaðar pengar frá mær til pensjónistin, so krevji eg, at pensjónisturin fær peningin.

Vit rætta feilin.

Jørgen Niclasen, Fólkaflokkurin

​Tað er ógvuliga umráðandi, at politikarar, sum fáa álit veljarans á løgtingsvalinum, lurta eftir og taka tað í álvara, sum felagsskapir boða frá og kunna um á teirra økjum. Eitt nú hava tey í MEGD gjørt sær ómak at boða frá teirra hjartamálum til hetta løgtingsvalið.

MEGD, sum er meginfelag við 24 limafeløgum á brekøkinum við fleiri enn 4000 limum, hevur hesa seinastu tíðina gjørt sær ómak at boða alment frá sínum hjartamálum til løgtingsvalið 2019.

Saman megna vit!
Soleiðis ljóðar eitt av slagorðunum í fráboðanini frá MEGD, nú tey hava boðað frá teirra 10 úrvaldu hjartamálum, sum eru eitt nú eru: *Bústaðir – til fólk, ið bera brek, *Lóggáva ímóti mismuni og kærumøguleikar - til fólk, ið bera brek, *Brekpolitisk virkisætlan, *Verja, tá ið verkfall er – verja fólk, ið bera brek, tá ið verkfall er, o.m.o.

Eftir at eg við áhuga havi lisið um hesi hjartamál hjá hesum stóra meginfelag, eri eg sannførdur um, at her er talan um viðurskifti, ið vit sum samfelag eiga og skulu taka okkum av og seta ferð á í komandi valskeiði.

Ferð aftur á bygging av bústøðum til fólk, ið bera brek
Nøkur av avrikunum hjá samgonguni undan hesari, har Fólkaflokkurin umsat Almannamál, var júst innan hjartamál hjá MEGD, eitt nú bygging av bústøðum til fólk í bera brek.

Nøkur av úrslitunum, sum vórðu framd tá av Fólkaflokkinum – í sera góðum samstarvi við kommunur – vóru eitt nú: *8 leigubústaðir í Klaksvík til fólk við serligum avbjóðingum, *12 vardar bústaðir í Klaksvík, *Depil bygdur til fjølbrekað børn og ung í Runavík, *16 íbúðir til fólk við sálarsjúku í Havn,  *16 leiguíbúðir í Runavík til fólk við serligum avbjóðingum, *12 nýggjar vardar bústaðir í Runavík, *Fountainhúsið stovnað í Havn, *Barnahúsið sett á stovn til børn og ung, ið eru útsett fyri kynsligan og annan harðskap, *Barnaumboðsmaður sett á stovn sambært ST sáttmálanum, *Barnaverndarlógin dagførd við m.a. herdari fráboðanarskyldu o.s.fr. o.s.fr.

Nú MEGD hevur sett bústaðaviðurskiftini á breddan sum eitt av sínum hjartamálum, kann eg avgjørt siga, at um vit fáa ávirkan eftir løgtingsvalið, so fer Fólkaflokkurin enn einaferð at leggja seg eftir at skapa fleiri ítøkilig úrslit á hesum øki.

“Vilja vit, so vinna vit”, var eitt slagorð, sum fyri nøkrum árum síðan sást við fótbóltsvøllin í Klaksvík, og sama vil eg siga um hesi týðandi viðurskifti, sum MEGD hevur boðað frá. Tað, sum fyrst og fremst krevst, er ein vilji og eitt miðvíst áhaldni frá politiskari síðu.

Ikki minst á brekøkinum havi eg eitt sterkt ynski um at hjálpa og gera mun, um eg fái møguleikan til tað á løgtingsvalinum, sum verður nú leygardagin 31. august.

Jákup Mikkelsen
Valevni fyri Fólkaflokkin

Eitt gamalt orð á enskum sigur: ”Music speaks what cannot be expressed, soothes the mind and gives it rest, heals the heart and makes it whole, flows from heaven to the soul”.

Og hetta er so satt, sum tað er sagt. Sangur og tónleikur raka nakað í okkum, sum einki annað kann.

Tvær ferðir í hesum valskeiðnum legði eg uppskot fyri tingið um at áseta í fólkaskúlalógini, at morgunsangur skal vera ein fastur táttur av skúladegnum.

Og í vár eydnaðist at finna semju um hetta í Løgtinginum, tá ið hetta varð sett inn í lógaruppskot frá Mentamálaráðnum saman við fleiri øðrum broytingum í fólkaskúlalógini, har m.a. eisini størri dentur verður lagdur á sang!

Hetta fegnist eg um. Tí við morgunsangi og í sangtímum koma børnini nær sálma- og sangskatti okkara og læra at kenna nakað av tí besta av føroyskum skaldskapi, sum mong annars sjáldan ella kanska ongantíð koma í samband við, og orðini og løgini verða ein barlast hjá teimum gjøgnum alt lívið.

Sangur og tónleikur stimbra eisini innlæringarevnini hjá børnum!

Og tí eiga vit eisini at styrkja sang- og tónleikaundirvísingina í musikkskúlaskipanini og seta okkum fyri, at øll børn í Føroyum, sum ynskja tað, fáa møguleika at spæla eitt ljóðføri.

Øll høvdu ikki tikið av møguleikanum, men øll áttu at havt sama møguleika. Eg veit, at musikkskúlarnir mangan uppliva, at ørkymlað foreldur ringja og eru kedd um, at júst teirra barn ikki sleppur framat, meðan onur sleppa. Vit vita, at bíðilistarnir til teir lokalu musikkskúlarnar eru langir, og í Havn, har nógv tann størsti musikkskúlin er, standa fleiri hundrað børn á bíðilista.

Sjálvandi fáa vit ikki bíðilistarnar burtur í einum, men eg haldi, at vit skulu seta okkum sum mál, at innan fyri nøkur ár skulu øll børn, sum ynskja tað, fáa møguleikan at spæla eitt ljóðføri í musikkskúlaskipanini. Eisini átti at verið kvalifiserað sangundirvísing í musikkskúlunum.

Haraftrat hevði verið gott, um lærararnir fingu møguleika at spælt meira og undirvíst eitt sindur minni enn í dag. Hetta hevði eftir mínum tykki givið so ómetaliga nógv aftur til okkara land. Akkurát hvussu tað skuldi verið skipað, dugi eg ikki at siga, men t.d. kundu lærararnir spælt so og so nógv við symfoniorkestrinum og so og so nógvar aðrar konsertir um árið.

Musikkskúlin í Føroyum er sera góður. Tað koma nógvir góðir tónleikarar út úr honum. Og teir allarflestu næmingarnir, sum av musikskúlamiðnámi søkja inn á konservatori’ini runt umkring, koma so loðandi inn.

Hetta ríkar okkara deiliga land og gevur ungdóminum nakað dýrabært og varandi at fáast við!

Jógvan á Lakjuni, løgtingsmaður og valevni Fólkafloksins.