Jørgen Niclasen leggur upp til at broyta dupultskattaavtaluna millum Norðurlond soleiðis, at tað ikki verður máað burtur av fíggingini til vælferð føroyinga

Á fundi í Reykjavík fríggjadagin 6. juni umrøddu fíggjarmálaráðharrarnir úr Føroyum og Íslandi, Jørgen Niclasen og Bjarni Benediktsson, norðurlendsku dupultskattaavtaluna og broytingarnar, ið Føroyar ynskja verða gjørdar í henni. 
Ísland hevur formansskapin í norðurlendsku nevndini fyri fíggjarmálaráðharrar, sum eisini viðgerð norðurlendsku dupultskattaavtaluna. 

Jørgen Niclasen setti síðsta heyst í Norðurlandaráðnum fram ynski um, at avtalan verður eftirkannað, og á fundinum í Reykjavík samdust Jørgen Niclasen og Bjarni Benadiktsson um arbeiðsetningin fyri hesa eftirkannan.

Arbeiðssetningurin verður nú sendur embætisbólkinum undir norðurlendska ráðharraráðnum fyri fíggjarmálaráðharrar.

Lagt verður upp til, at embætisfólkini t.d. skulu koma fram til hvørji lond, ið skulu kannast, og hvørjar upplýsingar skulu fáast til vega.

Eitt nú er hugsandi, at kannast skal, hvussu nógvir borgarar í ymsu londunum hava arbeiði í einum øðrum norðurlandi, og hvussu stór útlendska inntøkan er. Harumframt hvussu nógvan skatt hesir borgarar gjalda úti og heima.

Eisini er hóskandi at vita, hvussu nógvir persónar arbeiða í einstaka landinum men búgva í einum øðrum norðurlandi, og hvussu nógvan skatt persónarnir gjalda í arbeiðslandinum.

Orsøkin til, at Føroyar vilja hava hetta kanningararbeiði sett í verk, er, at landsstýrið arbeiðir við at fáa broytt dupultskattaavtalurnar millum Føroyar og onnur norðurlond, tí tær stríða ímóti grundtankanum um, hvussu vælferðartænastur verða fíggjaðar í okkara parti av heiminum.

- Vælferðartænastur eru skattafíggjaðar, og tað eru brúkararnir á staðnum, sum gjalda fyri tænasturnar. Norðurlendska dupultskattaavtalan brýtur við henda grundtanka. Hon ásetur, at skattur skal rindast har, sum han verður forvunnin, og ikki har, ið skattgjaldarin býr. Á henda hátt verður máað burtur av fíggjarliga grundarlagnum undir vælferðini, eisini her í Føroyum. Tað má broytast, sigur Jørgen Niclasen, fíggjarmálaráðharri.

Hann leggur afturat:

- Um tað vísir seg at vera útbreitt, og at norðurlendskir borgarar í stóran mun arbeiða og njóta gott av vælferðartænastum í einum landi men gjalda sín skatt í einum øðrum, so eiga embætisfólkini at koma við einum uppskoti um, hvat ið gerast kann við hesa avbjóðing, sigur fíggjarmálaráðharrin.

Eftir ráðførslu við Løgtingsins uttanlandsnevnd í gjár hevur landsstýrið í dag tikið undir við, at semja verður gjørd við ES um at seta handilstiltøkini mótvegis Føroyum úr gildi, og at steðga báðum gerðarrættarmálunum, ið Føroyar hava lagt ímóti ES.

Løgmaður sigur í hesum sambandi: “Handilstiltøkini hjá ES eru í stríð við altjóða lóg. Av hesi orsøk hava Føroyar lagt tvey gerðarrættarmál móti ES. Tað er eingin ivi um, at hesi rættarmál hava viðvirkað til, at ein semja nú er gjørd millum partarnar um at fáa tiltøkini sett úr gildi, men gleðist eg um, at Føroyar og ES eru tilreiðar at leggja hetta stríðið aftur um seg. Føroyar og ES eru felags samstarvspartar á nógvum týdningarmiklum økjum, og vóni eg, at partarnir báðir framyvir fara at nýta høvi til at styrkja um samstarvið á mongum økjum, ikki minst á handilsøkinum.”

Føroyar hava í dag fráboðað øllum strandarlondunum í samráðingunum um norðhavssildina, at føroyska veiðiloftið í 2014 verður 40.000 tons.

Talan er í hesum føri um eitt veiðiloft, ið er munandi minni enn í 2014, men framvegis góð 85 prosent hægri enn býtisluturin hjá Føroyum í seinastu strandarlanda semju. Jacob Vestergaard, landsstýrismaður í fiskivinnumálum, sigur í hesum sambandi: “Føroyar hava í ár formansskapin í strandarlanda samráðingunum um felags umsiting av norðhavssild, og fara Føroyar at gera sítt ítasta til, at semja verður gjørd um eina felags umsitingarætlan um henda fiskastovnin, ið er sera virðismikil fyri Føroyar.”

Seinni í summar verður frágreiðing liðug hjá vísindabólkinum, ið kannar útbreiðsluna av norðhavssild. Jacob Vestergaard sigur víðari: “Frágreiðingin verður uttan iva eitt gott útgangsstøði í samráðingunum um at finna semju um eina umsitingarætlan, ið tryggjar øllum londum ein rættvísan part av norðhavssildini, og á tann hátt tryggja eina burðardygga umsiting av hesum týdningarmikla stovni.”