27. januar 2022 fór Nordic Bridges av bakkastokki. Nordic Bridges er stórt altjóða mentanarátak í Kanada við høvuðsdenti á norðurlendskari list og mentan. Átakið fevnir um tiltøk um alt Kanada alt árið 2022.

Norðurlendska samstarvið við norðurlendsku mentamálaráðharrunum á odda hevur sett í verk Nordic Bridges undir leiðslu av Harbourfront Centre i Toronto, sum er ein av leiðandi mentanar- og listastovnunum í Kanada. Listafólk úr øllum Norðurlondunum fara at taka lut í átakinum.

Nordic Bridges byggir á tær fýra súlurnar: listarlig nýskapan, atkomuligheit og inklusjón, sjónarhorn hjá upprunafólki, umframt mótstøðuføru (resilience) og burðardygd.

Tað eru Harbourfront Centre og samstarvspartar, ið velja út og kuratera listafólk og verkætlanir at luttaka í einstøku tiltøkunum. Tiltøkini fevna um pallist, tónleik, myndlist, handverk og sniðgeving umframt bókmentir, film og talgilda list.

Úr Føroyum fara fleiri listafólk at luttaka. Longu nú er Randi Samsonsen við á framsýningini Shared Terrain, sum er ein bólkaframsýning, ið tekur støði í samstarvi millum fimm kanadisk og fimm norðurlendsk listafólk og sniðgevar. Framsýningin verður frá 1. februar til 20. mars. Tað er DesignTO, ið skipar fyri framsýningini. DesignTO er ein listarligur felagsskapur, ið fyriskipar ein árligan designfestival við meir enn 100 framsýningum og tiltøkum í sambandi við árligu designvikuna í Toronto.

Seinni verða fleiri onnur føroysk listafólk almannakunngjørd sum partur av átakinum. Harbourfront Centre arbeiðir javnt og savnt við at leggja skrá fyri tiltøkini í samstarvi við mongu samstarvspartarnar, eitt nú Toronto International Film Festival og Toronto International Festival of Authors.

Nordic Bridges letur upp við ljósinnstallasjónini Nordic Lights, sum er ein sameining millum kanadiska og norðurlendska ljóslist. Ætlanin var, at norðurlendsku mentamálaráðharrarnir skuldu vera hjástaddir í Toronto fyri at vera við til at seta tiltakið, men vegna koronaavmarkingar var luttøkan avlýst. Arbeitt verður við møguleikanum at savna ráðharrarnar í Kanada seinni í árinum.

Upprunaliga skuldi Nordic Bridges fremjast í 2021, men tær mongu avmarkingarnar vegna korona gjørdu, at átakið varð útsett til í ár, har vónin er, at átakið verður framt í so stóran mun, sum ætlað.

Norðurlendska ráðharraráðið hevur áður skipað líknandi átøk, fyrstu ferð í samstarvi við Kennedy Centre í Washington undir heitinum Nordic Cool og aðru ferð í samstarvi við Southbank Centre undir heitinum Nordic Matters. Nordic Bridges er higartil størsta norðurlendska mentanarátakið, tí tað fevnir um tíggjutals støð og meir enn 20 samstarvspartar í øllum Kanada gjøgnum alt árið.

Yvirskipaða endamálið við norðurlendsku altjóða mentanarátøkunum er at styrkja og gera vart við norðurlendska lista- og mentanarpallin úti í heimi og við hesum eisini at vísa á Norðurlond sum eitt virðismikið skapandi øki.

Umframt mentan og list fevnir Nordic Bridges um eitt nýtt átak um umhvørvisjournalistikk fyri ung. Úr Føroyum luttekur Silja av Reyni Wennerström. Eisini er ein røð av Nordic Talks sett á skrá, sum er ein pallur fyri dialogi millum norðurlendsk og kanadisk listafólk, hugsarar og nýhugsarar, leiðarar og politikkmennarar.

Meir kunning um Nordic Bridges fæst á www.nordicbridges.ca

Uttanríkis- og Mentamálaráðið

Sólvit E. Nolsø, landsstýrismaður í almannamálum, hevur valt nýtt umboð í Demokratia. Talan er um Róa B. Poulsen, ið avloysir Joan Samuelsen, sum umboð fyri Fólkaflokkin.

At valið fall á ein mann, fylgir ásetingunumr í javnstøðulógini um, allar almennar nevndir, ráð, umboð og líknandi skulu vera sett soleiðis saman, at umleið eins nógvir limir av báðum kynum hava umboðan.

Nevndin, sum nú situr, varð mannað 11. mars 2020, og hevur skipað seg við Kristinu Gry Berg. sum forkvinnu, og Ólavi í Geil, sum næstformanni. Hinir limirnir eru Maud Poulsen, Petur Matrin Hansen, Andrias Jacobsen, Dorit Hansen, Marna Jakobsen, Helena Fríðheim og  Anita Fuglø.

Mannagongdin er, at nevndin fyri Demokratia verður vald eftir tilmæli beint eftir løgtingsval fyri alt tað valskeiðið, sum Løgtingið situr. Umboð, ið hava sitið fyrr, kunnu veljast aftur.

Demokratia hevur til endamáls at virka fyri at fáa javnari og øktari kynsumboðan í politikki, bæði á Løgtingi og í kommunustýrum kring landið. Fyri at stuðla undir hesum, verður skipað fyri tvørpolitiskum tiltøkum. Eitt av málunum er at virka fyri, at umboðanin samsvarar á leið við umboðanina í hinum Norðurlondum.

Í nevndini fyri Demokratia sita umboð úr hvørjum flokki á Løgtingi, eitt umboð fyri Kommunufelagið, eitt umboð fyri Kvinnufelagssamskipan Føroya og eitt umboð fyri Javnstøðunevndina.

Almannamálaráðið

Latið Føroya Banka upp aftur fyri fiskiskapi við útróðrarbátunum.

Mín meining er tann, at Føroya Banki hevur verið alt ov leingi stongdir og um vit hava hann stongdan í 10 ár afturat, so kemur ikki meira fiskur á Føroya Banka.

Toskur er átufrekur og etur allan fisk sum er eitt sindur minni enn hann sjálvur og tí kann ein av høvuðsorsøkunum vera, at so lítil og ongin toskur hevur verið á Føroya Banka alla hesa tíðina bankin hevur verið stongdur og tí er tað av týdningi at bankin verður latin uppaftur skjótast gjørligt fyri fiskiskapi.

Tað kann ikki vera rætt, at nakrar matstovu í Tórshavn skulu hava rættindini til allan toskin á Føroyar Banka.

Tað er at byrjað spakuliga við at lata Føroya Banka uppaftur og geva útróðrarflotanum loyvið til at fiska eitt ávíst tíðarskeið á árinum og so við og við lata Føroya Bankan meira upp, so tað aftur verður lønandi at fiska á bankanum og á tann hátt at fáa toskin at koma fyri seg aftur, so at tann stóri toskurin ikki fær loyvið til at eta allan tann minna fiskin á bankanum.

Hetta stendur í samgonguskjalinum
Skipanin við stongdum leiðum á landgrunninum verður eftirmett. Royndarveiða á Føroya Banka heldur fram við tí endamálið at kanna, um veiða á bankanum kann takast upp aftur.

Í umsetiligheitini má tryggjast, at veiðiorka á djúpum vatni ikki ótarnað kann flytast inn á grunt vatn.

Um fiskirættindi verða endaliga avhendað, verður henda søla skattað.

Her heldur samgongan samgonguskjali og nú royndarveiðan er liðug, so eigur man at fara víðari og lata Føroya Banka upp fyri fiskiskapi hjá útróðrarflotanum.

SáH

Nú samgongan so smátt er farin ígongd aftur, so ætlar Norðoya Portalurin at hyggja í samgonguskjalið og taka nøkur mál upp, um tey eru framd ella ikki, lesarnir eru vælkomnir at hjálpa til við kunnandi innleggum.

Tað fyrsta málið verður skattamál, hetta stendur í samgonguskjalinum.

Skatta- og avgjaldspolitikkur
Skattaskipanin verður broytt, so hon verður meira arbeiðs- og búskaparliga vakstrarfremjandi. Gjørd verður ein ætlan, sum stigvíst lækkar skattin á arbeiði næstu árini. Málið er, at lønin ikki verður etin upp av harðari skatting, men at tað altíð skal loysa seg at arbeiða. Hetta er neyðugt fyri áhaldandi búskaparvøkstri og støðugum almennum tænastustøði.

Fann hesu tølini á heimasíðuni hjá Hagstovuni, sjá talvu herundir, men hon kann ikki brúkast til tað stóra, tí árini 2020 - 2021 eru ikki við í greiningini og tí kunnu vit ikki staðfesta at skattatrýsti er hækkandi ella lækkandi, nær nýggjastu tølini koma á heimasíðuna hjá teimum má Hagstovan svara fyri.

Havi vist tað leingi og nú tá ið nýggjur Landsstýrismaður bleiv settur í gjár, so visti man hvør rotna epli í Norðoya Fólkafloksfelag er.

Tað kann ikki rætt, at Norðoya Fólkafloksfelag innstillar 3 fólkavald umboð til Landsstýrisfólk, Beinir Johannesen, okkari toppskorðari, Jóhanna Christiansen, býráðslimur og Gunvá við Keldu býráðslimur, tær báðar høvdu gjørt tað, at man hevði kvinnu enn í Landsstýrinum, men ongin av teimum trimum vóru góð nokk, also hvar eru vit?

Eru vit so vánalig fólkafloksfólk í Norðoyggjum, at vit velja ein Landsstýrismann, sum als ikki var limur í Norðoya Fólkafloksfelag, men teknaði seg sum lim í gjár og FÓLKAFLOKKURIN vraðkaði øll uppskotini sum Norðoya Fólkafloksfelag innstillaði, har øll vóru limur í felagnum og hava gjørt eitt megnar arbeiðið fyri Fólkaflokkin.

Haldi ikki vit skulu góðtaka hetta spæli í Fólkaflokkinum, her má ruddast upp, sum okkara formaður segði so gott í Dag & Viku, men eg haldi eisini vit skulu ruddað upp í okkara lokala felag og lúka rotna epli út.

Viðkomandi stillar vónandi ikki upp aftur til komandi val, so verður trupuleikin loystir av sær sjálvum. 

Eri ikki nógv fyri at blakað fólk út og spæla skitið spæl aftanfyri gardinurnar, sum verður gjørt í Fólkaflokkinum nú og tað má fáa ein enda beinanvegin, bæði í Norðoya Fólkafloksfelag og Fólkaflokkinum, annars kann tað fáa óbøtaligan skaða fyri flokkin og tað er ongin av okkum áhugaði í.

SáH

Annika sigur sína hjartans meining á Facebook í kvøld, hetta skrivar hon á hennara Facebook vanga:

Nú hava formaðurin i Fólkaflokkinum, 2 fyrrverandi landsstýrisfólk og  løgtingsformaðurin ekskluderað meg úr tinginum.

Tey kunnu gott taka ein løgtingsstól frá mær og harvið mítt starv, men tey koma ongantið at taka mina rødd.

Tey kunnu gott seta meg i skammikrók og gera meg til syndabukk, men skommin er teirra fyri ikki at hava handlað, ti tey høvdu allar møguleikar, men ongan vilja at loysa málið um sammóðir.

Tey kunnu gott spilla meg út, karaktermyrða meg, persónsforfylgja mær og brenna meg á báli alment, men tey koma ongantið at taka fría tankan frá mær.

Tey kunnu stremba eftir at útihýsa fólkum úr okkara lóggávu, men eg komi so leingi eg livi at arbeiða fyri, at i lógini eru vit øll javnbjóðis sett. 

Tey kunnu gott brúka diktatur og valdsmisnýtslu, tað riggar kanska eina løtu, men fólkaræðið kemur at sigra, altið!

Annika Olsen (Facebook 05-01-2021)

Hetta skrivar Oddmar á Lakjuni fyri 3 tímum síðani á Facebook og avsannar alt tað Eirikur Lindenskov skrivar á in.fo, her viðmerkingin hjá Oddmar á Lakjuni:

Tað hevði verið spennandi at verið fiskimálaráðharri eina løtu…
Men áðrenn hendan søgan fær bein at ganga á, vil eg bara avsannað tað ið Eirikur skrivar í hesari greinini.

https://in.fo/…/oddmar-a-lakjuni-var-fiskimalaradharri…

Annika S. Biskopstø, forkvinna í heilsunevndini, hevur seinasta árið, vegna býráðið, verið forsprákari fyri betri trivnað, heilsufremjan og at skapa nøkur grøn og innihaldsrík býarrúm í kommununi.

Heilsunevndin hevur í farna ári sett nøkur nýggj tiltøk á breddan. Nevnast kann m.a. virkið vár og virkið heyst, har endamálið var at varpa ljós á kropsliga og sálarliga heilsu, samstundis sum lagt var upp til, at borgarar brúka náttúruna og harvið fáa upplivingar, sum kunnu eggja til góðar útivanar.   

Hetta arbeiðið heldur fram í komandi ári, har m.a. heilsa verður sett á breddan á ymiskan hátt.

Bókasavnið verður útbygt
Annika S. Biskopstø sigur, at nógv spennandi fer at mynda heilsuøkið í 2022. Eitt nú fær bókasavnið fleiri fermetrar at húsast í, og tað verður gjørt við at sambinda gamla Isenkram og Bókasavnið á ein vakran og skilagóðan hátt. Tekningar liggja í løtuni á borðinum. 

- Endamálið við hesum er, at vit skapa eitt nýtt spennandi innandura umhvørvi, sum serliga er ætlað okkara smæstu borgarum.

- Eg veit, at fleiri foreldur hava eftirspurt eitt stað, har møguleiki er at vera saman sum familja og hittast við øðrum. Hetta verður nú veruleiki.

- Semja er um at skipa nøkur innandura rúm, har møguleiki er fyri spæli, skapandi menning, djúphugsni og hugnaligum lesikrókum. Somuleiðis skulu karmar vera á staðnum, soleiðis at foreldur fáa møguleikan at hittast, hita eina fløsku upp, geva bróst og skifta barninum. 

- Barnagarðarnir vitja eisini javnan okkara bókasavn, og leingi hevur eitt ynski verið um, at børnini kunnu fáa meiri rásarúm, kunnu eta teirra matpakkar á staðnum og steðga í longri tíðarbili ella vera saman í størri bólkum.

 - Í okkara grannalondum eru fleiri bókasøvn, sum hava ótrúliga góðar karmar. Somuleiðis síggja vit eitt rák á hesum økinum í Føroyum. Klaksvíkar bókasavn er onki aftanfyri, hvat tænastu, úrvali og innihaldi viðvíkur. Men tað verður gott, serliga fyri smábarnaforeldur, at fáa meiri pláss og betri umstøður. Bókasøvn skulu vera tíðarhóskandi og innbjóðandi. Tað er umráðandi at leggja ein góðan mentanarligan botn, stimbra lesivanarnar hjá børnunum, skapa ró og innlivan og geva einstaklingum íblástur. Samfelagið er eisini okkara børn og dýrabæra tíðin vit fáa saman við teimum.

Sjósvimjarar fáa betri umstøður
Eitt annað átak, sum forkvinnan í heilsunevndini gleðist um, er undirtøkan fyri betri umstøðum til sjósvimjarum, sum er ein alsamt vaksandi áhugabólkur.

- Sjódipping sigst at vera heilsugott, tann rørsluligi parturin, løtan úti í fríu nattúruni og góða samanhaldið, sum útifelagsskapurin gevur. Allir aldursbólkar kunnu sjódippa, men tað eru serliga tilkomin og eldri, sum hava hava tikið hetta til sín. Og tað er eisini  gleðiligt. Hetta ítrivið skapar eitt virkið og sunt lív og fremur eisini sálarbót og trivnað. Somuleiðis eru vátdraktir, og tað at leypa á sjógv, vorðið eitt vaksandi rák í millum okkara størri børn og ungdómin. Hesum ynskja vit sum býráð at lofta.

- Í næstum verður eitt sjódippara felag sett á stovn. Í hesum sambandi fara vit at seta eitt neyst uppi í Borðoyavík við møguleikum fyri skiftirúmi, sauna og vesi. Tað skapar enn eina spennandi mentan ella býarrúm, og hetta staðið fer at leggja upp til eitt frískt og virkið felagslív tætt at nattúruni, sigur Annika S. Biskopstø at enda.

Klaksvíkar Kommuna