Ein nýggj felags móttøka fyri ávísingar við illgruna um krabbamein, sett á stovn í Sjúkrahúsverkinum. Endamálið við móttøkuni er at tryggja, at allar krabbameinsávísingar skjótari og lættari koma á rætta stað, so útgreining og viðgerð kann fara í gongd uttan óneyðugt drál. Hetta er sambært tilmæli í Krabbameinsætlanini frá 2022.

Tað vil siga, at tá ið kommunulæknar framyvir skulu senda ávísingar har illgruni er um krabbamein, tá skulu ávísingarnar sendast til móttøkueindina – Krabbaútgreining.

Margit Stórá, landsstýriskvinna í almanna- og heilsumálum, fegnast um nýggju móttøkueindina:

Tað er sera jaligt, at eitt týðandi tilmæli í Krabbameinsætlanini nú verður sett í verk. Við einari felags móttøku fáa vit eina greiðari og tryggari skipan, sum kann stytta bíðitíðir og gera sjúklingagongdirnar betri, tá illgruni er um krabbamein.
Nýggja móttøkan verður staðsett og skipað á Medisinska deplinum á Landssjúkrahúsinum, har ávísingar verða mettar og neyðugar kanningar bílagdar skjótast gjørligt.

Sjúkrahúsverkið væntar, at nýggja skipanin fer at geva betri yvirlit og skrásetingar umframt  lættari arbeiðsgongdir hjá bæði kommunulæknum og sjúkrahúsverkinum – og fram um alt tryggja, at útgreining og viðgerð verður sett í verk skjótast gjørligt, tá illgruni er um krabbamein.

Kunning og leiðreglur fyri fakfólk eru tøkar á heimasíðuni hjá Sjúkrahúsverkinum - Krabbaútgreining - Sjúkrahúsverkið

Almanna- og heilsumálaráðið

Nú kann vera nóg mikið við miseydnaðum byggiverkætlanum

Ætlanir eru um nógvar almennar byggiverkætlanir komandi árini. Fleiri teirra kosta hundraðtals milliónir. 

❗Tó hevur samgongan enn ikki boð uppá, hvussu ábyrgd og útinnan skulu tryggjast, tá almennar verkætlanir verða framdar. Tað er ikki gott nokk. Vit kenna jú gongdina hjá H-bygninginum, sum absoulutt ikki kann góðtakast!

Tað sigur Beinir Johannesen, sum hevur sett Akseli V. Johannesen, løgmanni, fyrispurning um evnið.
➡️Les meira her: https://folkaflokkurin.fo/.../miseydnadar...

Beinir Johannesen
Fólkaflokkurin

Almannakunngerð av nevndaruppmøtingini hjá býráðspolitikarum.

Sambært býráðssamtykt skal uppmøtingin hjá býráðspolitikarum til nevndarfundir almannakunngerast á heimasíðuni hjá kommununi.

Uppmøtingin hjá býráðslimunum seinna hálvár kann síggjast umvegis leinkið her: Seinna hálvár 2025.pdf

Klaksvíkar Kommuna

Kelda: Skrivað av Rebekka

Hvussu nógv vita vit í veruleikanum um, hvør kemur til Føroya, og undir hvørjum treytum? Og hvørjar avleiðingar hevur hetta fyri okkara samfelag? Hesi ivamál er orsøkin til tveir fyrispurningar, sum Bárður á Lakjuni, tingmaður, hevur sett Sirið Stenberg, landsstýriskvinnu.

Í eitt longri tíðarskeið hevur arbeiði verið til meiri enn allar hendur á føroyska arbeiðsmarknaðinum, og tískil hevur tørvurin á arbeiðsmegi verið stórur – og hann sýnist framvegis at vera tað.

Fast Track-skipanin, sum varð sett í gildi í november 2021, hevði til endamáls at nøkta ein bráðfeingis tørv á arbeiðsmegi hjá føroyskum arbeiðsgevarum.

Hóast henda snarskipan hevur sum aðalmál at fáa útlendingar higar at arbeiða, so er nógv, sum týðir upp á, at tey ikki eru so fá, sum hava fingið samfylgjandi familju hendan vegin eisini.

Sammett við stóru verð eru Føroyar fámentar, lítlar og sárbærar. Undanfarin ættarlið hava bygt okkum eitt vælferðarsamfelag, sum er gott, frælst og trygt at liva í. Av tí at vit eru so fá og smá, skulu ikki serliga stórar broytingar henda í fólkasamansetingini, áðrenn vit byrja at merkja og síggja tær. Og tað bendir á, at vit síggja tær.


Avleiðingar av ov stórari tilflyting merkist
Fólkaskúlin er settur undir eyka trýst, tí næmingatalið av teimum, ið ikki hava føroyskt sum sítt fyrsta mál, er vaksið nógv. Hetta skapar avbjóðingar í vanliga samskiftinum í skúlanum – og ikki minst millum heim og skúla, bæði tá tað kemur til mál og mentan.

Sama ger seg galdandi á barnaansingarøkinum. Aðrastaðni í samfelagnum síggja vit, at vit javnan verða noydd at samskifta á enskum, tí tað eru ikki so fá, sum ikki duga føroyskt.

Eisini vísti Barnaverndarstovan í frágreiðing síni fyri 2023 á, at talið av barnaverndarmálum við útlendskum børnum (uttanfyri Norðurlond) er yvirumboðað samanborið við føroysk. Felags fyri hesi barnaverndarmál er, at tey „eru trupul at handfara vegna forðingar orsakaðar av málsligum og mentanarligum muni“, sum frágreiðingin sigur.

Mugu fáa greið svar og tøl á borðið
Vit kunnu og eiga av røttum at spyrja, hvussu nógv vælferðarsamfelag okkara megnar at bera av eyka byrðum, áðrenn skipanirnar byrja at ridla og kanska enntá hokna.

Spurningurin er, um vit eiga at umhugsa at broyta mannagongdir og seta størri krøv, harðari treytir og betra um eftirlitið, tá tað um útlendska arbeiðsmegi og tilflytarar ræður.

Tað tykist sum at vitanin um vavið og veruligu ávirkanina av tilflytingini til Føroya framvegis er ov lítil. Tí hevur Løgtingið hevur brúk fyri greiðum tølum og svarum um tilflytingina, soleiðis vit kunnu leggja ein ábyrgdarfullan útlendingapolitikk. Ein politikk, sum hevur til endamáls at tryggja komandi ættarliðum eitt gott, trygt og frælst vælferðarsamfelag – og sum samstundis tryggjar, at Føroyar megna at taka væl ímóti og lofta tilflytarum á skilabesta hátt.

Fyri at fáa greiði á nøkrum viðurskiftum viðvíkjandi treytum og eftirliti, tá um útlendska arbeiðsmegi og tilflytarar í Føroyum ræður, hevur Bárður á Lakjuni sett landsstýriskvinnuni í tveimum umførum hesar spurningar:

Hvussu nógvir útlendingar hava arbeiðs- og/ella uppihaldsloyvi í Føroyum í dag?
Júst hvørjum londum kemur útlendska arbeiðsmegin úr, hvussu nógv koma úr hvørjum landi sær, og hvussu langt áramál hava tey verið her?
Hvussu stórt er talið á samfylgjandi familju, og hvørjum londum koma hesi úr?
Hvørjar eru treytirnar fyri at fáa samfylgjandi familju til Føroya?
Hvussu nógvir útlendingar eru komnir á føroyska arbeiðsmarknaðin, síðani Fast Track-skipanin varð sett í gildi, og hvørjum vinnugreinum arbeiða hesi í?
Eru persónar skrásettir sum verandi í Føroyum uttan galdandi arbeiðs- ella uppihaldsgrundarlag, og hvat verður ítøkiliga gjørt fyri at tryggja, at slíkir persónar ikki ólógliga verða verandi í Føroyum?
Hvørjar eru treytirnar fyri varandi uppihaldsloyvi (undir hesum áramál og møgulig inntøkukrøv)? Eru almennar veitingar (ALS, fiskavirkisskipanin) íroknaðar, tá ið krøv um vikuliga arbeiðstíð og onnur krøv verða gjørd upp?
Hvussu nógvir útlendingar eru í fiskavirkisskipanini og í arbeiðsloysis-skipanini?
Hvørjar eru treytirnar viðvíkjandi revsiváttan, tá um útlendska arbeiðsmegi ræður?

Bárður á Lakjuni
Fólkaflokkurin

Á føðingardagsfundinum hjá Klaksvíkar Inner Wheel kundi Jastrid Gullaksen avdúka upphæddina, sum Klaksvíkar Inner Wheel hevur savnað saman við søluni av til- og frá seðlunum við heklaðu hjørtunum og søluni av lekru hondgjørdu Madagaskartaskunum í alskyns sniðum og litum á jólaluksusloppum.

Úrslitið gjørdist 35.290 krónur. Peningurin fer óskerdur til Hjartabarnið í Føroyum, sum er áhugabólkur fyri foreldur og avvarðandi hjá hjartabørnum. Bólkurin er ein partur av Hjartafelagnum í Føroyum og varð settur á stovn í november 2008.

Fríðhild Højgaard frá Hjartabarnið móttók kekkin og greiddi frá um arbeiðið, tey gera við eitt nú tiltøkum, har til ber at hitta onnur hjartabørn og avvarðandi at hjartabørnum sum foreldrakvøld við sálarfrøingi, rørsludegi o.a.m. og takkaði fyri kærkomna stuðulin.

Les meira um Hjartabarnið á Facebook-síðuni:
https://www.facebook.com/Hjartabarnid

Klaksvíkar Inner Wheel Klubbi hevur íalt 18 limir og er partur av einari heimsumfatandi kvinnurørslu í 104 londum við umleið 108.000 limum. Endamálið er at fremja vinarlag, hjálpsemi og altjóða fatan. Inner Wheel er ein ópolitiskur felagsskapur og ein av størstu heimsfelagsskapum, hvørs endamál er at hjálpa kvinnum og børnum. Klaksvíkar Inner Wheel klubbi bleiv stovnaður í 1975.

Vit í Klaksvíkar Inner Wheel Klubba ynskja at takka so hjartaliga øllum, sum hava stuðlað innsavningini.

#klaksvikarinnerwheel #hjartabarnið #tilogfráseðlar #luksusloppir #madagaskartaskur #peningagava 

Klaksvíkar Inner Wheel Klubbi

3,7 mió. kr. játtaðar í stuðli til granskingarverkætlan um immunverju 

Danska Umhvørvisstýrið, sum hevur pengar á fíggjarlógini til granskingarverkætlanir í Arktis, játtaði beint fyri jól Heilsugranskingareindini 3,7 mió. kr. í stuðli til at fremja eina granskingarverkætlan, sum skal lýsa, hvussu immunverjan hjá børnum í Føroyum starvar. Verkætlanin er mett at kosta fleiri mió. krónur og varðar í 2½ ár. National Institutes of Health (NIH) hevur játtað knappliga 2,7 mió. til somu verkætlan. 

Talan er um endurkanning av eini burðarkohortu við knapt 630 børnum, sum eru fødd í 2020-2022 og sum verða boðin til kanning við 5 ára aldur. Ulrike Steuerwald tekur sær av læknaligu kanningunum av børnunum. Verkætlanin er eitt samstarv millum Syddansk Universitet, University of Rhode Island og Sjúkrahúsverkið. 

Vit byrjaðu arbeiðið við burðarkohortum í 1985 og hava til henda dag stovnað og fylgt fimm ymiskum burðarkohortum. Umleið 3.000 børn og foreldur teirra hava luttikið í hesum verkætlanum. Áður hava vit serliga kannað, hvussu nervalagið starvar. Nú kanna vit í størri mun immunverjuna nágreiniliga, tí tað tykist sum at 
immunverjan er ávirkað av dálkandi evnum, serliga tí evnabólkinum, vit rópa fluorevnir. Hetta hava vit sæð í fleiri av okkara barnakohortum. 

Nú er so ætlanin at kanna hetta so væl sum gjørligt við at hygga at, hvussu 5 ára vaksinatiónin hjá børnum virkar, og um dálkandi evni hava tálmað virkingin, eins og vit áður hava ávíst. Í kohortu 6 hava vit fylgt kvinnum, sum eru við barn gjøgnum viðgongutíðina við blóðroyndum og spurnabløðum, tikið blóð frá nalvastreingi við føðing og síðani kannað børnini, tá tey vóru 2 vikur gomul, 3 mánaðir og 12 mánaðir gomul, og nú aftur, tá tey gerast 5 ár. 

Verkætlanin fer í gongd um miðjan januar, og vit vóna, at hon aftur hesaferð fær góða undirtøku, soleiðis sum hinar kanningarnar hava gjøgnum árini. 

Samband fæst við Pál Weihe, yvirlækna á tlf. 316696 ella á [email protected]. 

2025 er farin afturum bak og vit eru farin inn í 2026. 

Ì 2024 vóru vit heppin at fáa skótahjálpina. Tað hevur ligið mær á hjarta at hjálpa børnum úti á bygd, sum ongan skúla hava at ganga í. 

Vit fingu eina umbøn frá bygdafólkinum í Henry James Village. Har eru 70 børn, sum ikki ganga í skúla. Bygdin er so fjarlagin, at tey yngru børnini ikki sleppa í skúla fyrr enn tey eru 10/11 áragomul.

Vit fingu 80.000 kr  - ein ordans gáva frá skótahjálpini. 

Kvinnur og menn í bygdini fóru til verka at fáa tilfar til skúlan. Bygdin liggur í regnskóginum; so mennirnir høgga timbur og kvinnurnar bera tað heim.   

Vit skulu so keypa bøkur, skúla borð, stólar, talvur o.a. Vit takka tykkum fyri tykkara stuðul til børnini í Liberia, sum eru sloppin í skúla,  tí tit hava valgt at stuðla børnum og/ella skúlanum. Tit vita neyvan, hvussu stóran týdning hetta 
hevur fyri tað einstaka barnið. 

10. Nov. fóru Krista og eg til Liberia. Skúlin varð vígdur tann, 15. nov. 2025. Vit hava lagt myndir út á FB bólkin Mirjam. Har kunnu tit fylgja við. Vinarliga tak tær stundir at síggja filmin. sum var gjørdur um skúlan:  

https://www.youtube.com/watch?v=olDOPB9_B4w  

Tit kunnu stuðla skúlanum ella barnið við eini fastari ella eingangs flyting. Konta 9865-3346700 

Við bestu ynskjum 
Vegna Felagskapin Mirjam 

Hilda og Krista   
[email protected] Tel. 216785 

💚Vit fara nú inn í eitt spennandi ár, har vit bæði hava Fólkatingsval og Løgtingsval fyri framman. Seinastu veljarakanningarnar hava verið sera góðar fyri Fólkaflokkin, og gleðiligt er at síggja, at tær vísa eisini eina framgongd á 9-10% her í høvuðsstaðnum. 

✨Vit í Havnar Framburðsfelag eru longu byrjað at fyrireika okkum til val, hava longu fleiri góð valevni og arbeiða aktivt við einari valskrá. 

Hetta er ein valskrá, sum serliga er góð fyri familjuna og vinnuna her í høvuðsstaðnum og í øllum Føroyum. 

Tað er sera týdningarmikið,  at vit sláa manngarð um tey kristnu kjarnuvirðini og fara aftur til kjarnuvirðini hjá okkum føroyingum. Her skulu ongar Moskur byggjast í Føroyum!

💚Familjan er kjarnin í samfelagnum, og vit skulu hava borgaran í fokus. Skatturin skal niður og barnafrádrátturin upp, tí fólkið skal hava mest møguliga eftir av sínum egnu tjentu pengum. 

Vinnan skal fáa frið at arbeiða, og tað politiska skal blanda seg minst møguligt uppí.  

Vit eru spent at fara til verka í 2026 og ætlanin er at hava 1. uppstillingarfund tiðliga í 2026.

💚Hóast góðu veljarakanningarnar, so mugu vit halda áfram við at arbeiða hart og vísa á góða politikkin, sum er fólkaflokspolitikkur.

✨Soleiðis vinna vit valið og fáa ein sterkan Fólkaflokk inn í 2026.

Havnar Framburðsfelag
Fólkaflokkurin