Team Rynkeby hevur avgjørt at avlýsa tann árliga súkklutúrin til París, orsakað av koronasmittuni í Evropa.

Ætlandi skuldu 2.150 súkklarar og 550 hjálparfólk úr 12 londum súkkla til París í døgunum 2.-11. juli 2020, sum partur av vælgerandi tiltakinum hjá Team Rynkeby.

Ársins túrur til fyrimunar fyri børn við álvarsligum sjúkum verður tó av ongum.

Tað hevur eitt samt stýri í Team Rynkeby Fonden avgjørt seinnapartin fríggjadagin. Avgerðin er grundað á ta áhaldandi ótryggu forsøgnina um koronasmittuna í Evropa, sigur nevndarformaðurin í Team Rynkeby Fonden, Peter Frank Andersen.

– Okkara høvuðsdentur hevur alla tíðina verið á at gjøgnumføra ferðina, um tað heilsuliga var ráðiligt.
Tann áhaldandi ótryggleikin um smittuspjaðing í Evropa ger, at vit ikki longur halda at tað er ráðiligt at fara til París í summar, sigur hann og heldur fram:
– Tað snýr seg fyrst og fremst um at fyribyrgja smittuspjaðingini. Men tað snýr seg eisini um trygdina hjá súkklarunum á vegunum. Orsakað av rætningslinjunum frá myndugleikunum, um ikki at savnast, hava súkklararnir ikki havt møguleika at vant saman í tann mun, tað er neyðugt fyri at læra seg at súkkla saman í bólkum. Afturat tí ber ikki til at fáa góðkenningar, at ferðast um landamørk í Evropa, og í heila tikið at ferðast á vegunum til París, sigur Peter Frank Andersen.

Sær fram til 2021
Fyrireikingarnar hjá Team Rynkeby luttakarunum eru hóast alt ikki heilt til fánýtis. Allir luttakararnir í ár fáa í boði at luttaka á túrinum í 2021 til París.

– Vit vita at fleiri at luttakarunum náttúrliga verða vónbrotnir av hesi avgerðini, og vit vilja royna at gera onkur tiltøk her heima, so luttakararnir sleppa at vísa klæðini fram og hátíðarhalda tað stóra arbeiðið við at savna pening inn til álvarsliga sjúk børn. Vit vóna sjálvandi eisini at flestu luttakararnir vilja halda fram við arbeiðnum, og gleða seg til túrin komandi ár, sigur Carl Erik Dalbøge, stjóri í Team Rynkeby.

Hóast stóra arbeiðið hjá luttakarunum at savna pening inn, kemur korona farsóttin ivaleyst eisini at merkjast í úrslitinum av innsavninini.

– tað ringasta við hesi støðuni er, at vit ikki fáa savnað so nógvan pening sum vit høvdu vónað, sigur hann og leggur afturat:

– tað fer hóast alt verða talan um eina stóra tvísifraða milliónaupphædd, sum allir luttakarar og stuðlar eiga at verða sera stoltir av í hesum truplu tíðum, sigur Carl Erik Dalbøge.

Team Rynkeby hevur súkklað til París á hvørjum ári síðani 2002 fyri at savna pening inn til børn við álvarsligum sjúkum og avlýsingin er tann fyri av síðum slag í søguni hjá Team Rynkeby.

Síðani byrjan hevur Team Rynkeby savnað inn góðar 425 milliónir krónur inn til børn við álvarsligum sjúkum – bara í seinasta ár eru savnaðar umleið 80 milliónir krónur.

Team Rynkeby

Myndir Rynkeby í Klaksvík 2019

Hetta gjørdist ein søguligur dagur í Badmintonhøllini í dag, tá ið bæði kvinnurnar og mennirnir hjá Mjølnir fingu gull heiðursmerkini og steyp frá formanninum í Flogbóltssambandinum, nú tað er greitt at bæði liðini eru útnevnd til Føroyameistarar 2019/2020. Sjá filmsklipp herundir og hetta bleiv sjálvandi gjørt í fjarstøðu.

Aftaná handaðina fór Mjølnir runt býin við steypinum og News.fo og Norðoya Portalurin møtti teimum á Fípuni Føgru og fingu vit eina liðmynd at okkara hetjum.

Hjartaliga tillukku Mjølnir.

SáH

​Flogbóltsárið endað – Heilsustøðan avgerandi

Nevndin í Flogbóltssambandi Føroya hevur tikið avgerð um, at landskappingin hjá øllum liðum endar nú. Henda avgerð er grundað á hoyringar frá feløgunum og tilmæli frá myndugleikunum viðv. Korona.

Tað er niðurstøðan hjá nevndini, at tað ber ikki til at hava dystir og kappingar og samstundis halda viðmæltar ásetingar.

Avgerðin hevur við sær, at eingir dystir verða leiktir afturat hetta kappingarárið og ongar FM-finalur verða leiktar. Støðan í ymisku deildunum nú avgerð FM hetta kappingarárið. Hetta merkir m.a., at Mjølnir er føroyameistari hjá bæði kvinnum og monnum í Meistaradeildini.

Øll uppliva næsta kappingarár
Vit eru øll somul ógvuliga hørm um støðuna, og at FM ikki kann verða avgjørt, so sum vit øll høvdu ynskt tað. Men samstundis vóna vit, at hetta stigið vit nú taka, fer at gera næsta kappingarár møguligt hjá okkum øllum at uppliva og gleðast enn meiri um.

Hetta skrivari venjarin hjá Mjølnir ígjár.
We are the Champions! 🏆🥇
The Faroese Volleyball Federation announced this morning that the league will not continue and each team will be awarded with the position they are currently sitting. We would like to thank all of our supporters for being with us this season and we look forward to seeing you for the next one!

Hjartaliga tillukku Mjølnir, fantastiska flott klára, bæði liðini Føroyarmeistar og mennirnir eisini steypavinnarar.

SáH

Nú venjingarnar í ítróttafeløgunum kring landið eru steðgaðar, orsakað av koronatiltøkunum, er avgjørt at víðka felags vanlukkutryggingina til eisini at umfata heimavenjingar. Tað merkir, at fyribils er tað ikki ein treyt, at ein skaði er hendir undir ítróttakapping ella venjing fyri at fáa tryggingardekning.

Betri Trygging boðar frá, at “við støði í, at øll felagsvenjing er steðgað eftir tilmæli frá almennu myndugleikunum, eru treytirnar fyri felags vanlukkutryggingina broyttar. Tað er tí – í hesi serstøðu – ikki eitt krav, at venjingin skal vera fyriskipað av einum sersambandi/felagi. So leingi tilmælið frá almennu myndugleikunum um ikki at hava felagsvenjing stendur við, verður felags vanlukkutryggingin víðkað til at fevna um heimavenjingar.”

Sambært vanligu tryggingartreytunum, tekur tryggingin við undir ítróttakapping ella venjing, í Føroyum, sum er fyriskipað av tryggingartakaranum, t.e. ÍSF ella tess sersambondum. Somuleiðis tekur tryggingin við undir vanligari ferðing ella flutningi beinleiðis til og frá heimstaðnum hjá ítróttafelagnum í sambandi við kapping ella venjing, sum fer fram uttan fyri kommunumark. Tryggingin tekur bert við í Føroyum.

Tryggingartreytirnar kunnu lesast á heimasíðuni hjá ÍSF: https://isf.fo/tilfar/felags-vanlukkutryggingin/

Um spurningar eru til felags vanlukkutryggingina, ber til at seta seg í samband við skrivstovuna hjá ÍSF umvegis teldupost (isf@isf.fo) ella telefon (312606).

ÍSF

​Ítróttafeløgini missa milliónir

Føroysku ítróttafeløgini missa 8-10 milliónir krónur í inntøkum næstu fýra mánaðirnar orsakað av korona-kreppuni. Henda veruleika eiga politikarar at viðurkenna og bøta um beinanvegin við serstakari stuðulsskipan

– Í roynd og veru snýr tað seg um at bjarga ítróttinum undan einum hóttafalli, sum tekur langa tíð at byggja uppaftur. Føroyskur ítróttur er í løtuni í vanda fyri at verða sligin eini 30-40 ár aftur í tíðina, um politikarar ikki taka støðuna í álvara, sigur Elin Heðinsdóttir Joensen, forseti í ÍSF.

Bara næstu fýra mánaðirnar missa føroysku ítróttafeløgini minst 8-10 milliónir krónur í inntøkum. Tað vísa tøl, ið ÍSF seinastu tíðina hevur savnað inn frá føroyskum ítróttafeløgum. Politiski myndugleikin eigur beinanvegin at virðismeta føroyskan ítrótt við einari serstakari stuðulsskipan undir korona-kreppuni, er niðurstøðan hjá starvsnevndini í ÍSF.

– Tað er ein stór hjálp, at løntir leikarar og venjarar hava rætt til pengar úr serligu covid19-skipanini hjá ALS, men tað munar alt ov lítið. Um politiski myndugleikin vil ítróttinum væl, so verður ein stuðulskipan sett í verk, sum endurrindar mistar inntøkur og fastar útreiðslur hjá føroyskum ítróttafeløgum, sigur Elin Heðinsdóttir Joensen.

ÍSF-forsetin vísir á, at fleiri lond hava gjørt serstakar hjálparpakkar til ítróttin. Eitt nú hava bæði Svøríki og Noreg veitt ítróttinum og frítíðarvirkseminum 100-tals milliónir krónur í stuðli.

– Eg rokni við, at øll á ein ella annan hátt sakna ítróttin. Tað er nú, hann er lagdur lamin, at vit síggja veruliga virðið, ítrótturin hevur fyri føroyska samfelagið, ikki minst fyri trivnaðin og fólkaheilsuna – serstakliga hjá børnum og ungum, sigur ÍSF-forsetin.

Elin Heðinsdóttir Joensen minnir á, at ítróttafeløgini longu dúva ein stóran part av sínum virksemi upp á sjálvbodna arbeiðsmegi, og tað verður sera óhugaligt hjá hesum góðu kreftum at brúka komandi árini at savna pengar til at rinda skuld, sum tekur seg upp undir korona-kreppuni. Tað verður tyngri at fáa fólk í nevndir og til onnur sjálvboðin størv.

ÍSF