Ægir ynskir at takka øllum, sum komu á 50 ára stovningarveitsluna í Varpinum 13. september.

Takk fyri at tit gjørdu kvøldið so hugnaligt. Takk til umboðini frá Klaksvíkar kommunu og Klaksvíkar svimjihøll.

Takk til okkara trúføstu stuðlar, og takk til øll tey, sum á einhvønn hátt hava hjálpt til við at fáa veitsluna í lag.

Takk til nevndina í Ægi og takk til Svimjisamband Føroya og svimjifeløgini úr øllum Føroyum. Takk til veitslustjóran, tónleikararnar og tekningararnar. Takk til kokkin og servitrisurnar. Takk fyri røður, heilsanir og sangframførslur.

Takk fyri at tit gjørdu kvøldið til eitt ógloymandi kvøld. Her filmsklipp og nakrar myndir frá veitsluni, sjá niðanfyri.

Veitslubólkurin, Ægir 50 ár.

Fótbóltssamband Føroya og MBM hava gjørt avtalu, ið inniber, at MBM verður høvuðsstuðul hjá øllum steypakappingunum hjá FSF frá í dag og næstu fýra árini

FSF og MBM hava gjørt stuðulsavtalu, ið inniber, at MBM verður stuðul hjá øllum steypakappingunum hjá FSF frá septembur 2025 og næstu fýra árini – til og við 2029.

Fótbóltssamband Føroya skipar á hvørjum ári fyri í alt nýggju steypakappingum. Talan er um U13 gentur og dreingir, U15 dreingir, U16 gentur, U17 dreingir, Minnu steypakappingini hjá kvinnum, steypakappingini hjá kvinnum og kappingini um Løgmanssteypið hjá monnum.

MBM verður við hesari avtalu ein týðandi partur av einum felagsskapi, ið savnar túsundtals spælarar og áskoðarar kring alt landið.

– Steypakappingarnar hava eina serliga støðu í føroyskum fótbólti – bæði hjá teimum yngru og hjá vaksnum. Tað gleðir okkum, at MBM nú gerst høvuðsstuðul hjá øllum kappingunum, og vit eru sannførd um, at hetta samstarvið fer at lyfta og styrkja føroyskan fótbólt í fleiri ár fram, sigur Christian Andreasen, forseti í Fótbóltssambandi Føroya.

Eisini í MBM fegnast tey um avtaluna, ið er fingin í lag.

– Fótbólturin savnar allar aldursbólkar og øll øki í Føroyum. At kunna stuðla steypakappingunum – frá teimum yngru til toppfótbóltin – hóskar sera væl til okkara virðir. Vit gleða okkum til hetta samstarv við FSF og at vera við til at skapa góðar løtur fyri bæði spælarar og áskoðarar, sigur sølu- og marknaðarleiðarin hjá MBM, Rúni Joensen.

Við hesi avtalu verður tryggjað, at allar steypakappingarnar hjá FSF fáa ein sterkan og virknan stuðul heilt fram til árslok 2029.

FSF og MBM

Sáttmálin hjá Gaston Nicolas Tellechea er í dag longdur, so hann ikki bert fevnir um 2026, men eisini 2027. Gaston kom úr Argentina við ársbyrjan, og hevur veruliga víst sítt virði á vøllinum.

- Eg eri ómetaliga glaður fyri at vera her. Tað hevur verið eitt stórt upplivilsi at spælt við KÍ, og ikki minst at fáa týdningarmiklu royndirnar úti í Evropa. Konan og eg eru ómetaliga glað fyri at vera her, og tað hevur alt verið eitt stórt upplivilsi fyri meg og okkum.

- Eg eri sera takksamur! Takksamur fyri at vera partur av hesum liðnum og takksamur fyri øll fólkini kring KÍ. Eg føli at eg vaksi sum leikari fyri hvønn dag, og eg ynski at halda fram við menningini. Bæði sum leikari og sum persónur. Eg ynski millum annað at læra meg betri enskt, so eg kann samskifta lættari við liðfelagar og áskoðarar, sigur argentinski verjuskansin hjá KÍ.

Spurdur hvørjar serligar løtur hava verið í ár, so er Gaston púra avgjørdur.

- Tá ið eg kom til Føroyar var eg bæði bilsin og bergtikin. Tá ið flúgvarin lendi var kavi og so at síggja øll fjøllini og havið. Tað var ótrúliga vakurt og gjørdi serstakt árin á meg.

- Persónliga var tað eisini sera stórt fyri meg, tá ið eg skoraði fyri KÍ á útivølli móti Sanajoki í Finnlandi. Tað var mítt fyrsta mál, og so var tað í einum evropeiskum dysti. Tað var stórt, tí tað eisini hevði so stóran týdning fyri dystin, og dreymin um at koma víðari í Evropa.

Til seinast spyrja vit sterka argentinan, hvat hesin sáttmálin kann geva honum.

- Eg ætli mær ikki at slappa av nú sáttmálin er longdur. Eg ætli mær at arbeiða hart og menna meg enn meiri, og geva enn meiri til KÍ. Vit skulu seta enn hægri mál, og tey ynski eg at náa saman við KÍ, sigur Gaston at enda.

Jógvan Skorheim
KÍ - Klaksvíkar Ítróttarfelag